ଲୁକ 9
9
ଜିସୁ ବାରାଗାଣ୍ଡି ଗ୍ରାମ୍ୱାଗାଟାରିକି ପାଣ୍ଡନ୍
(ମାତିଉ ୧୦:୫–୧୫; ମାର୍କ ୬:୭–୧୩)
1ଏମ୍ବାଟି ଜିସୁ ତା ବାରାଗାଣ୍ଡି ଗ୍ରାମ୍ବାଗାଟାରିକି ଆର୍ଚାନ୍ ରପାଟ୍ଟେ କିଆନ୍ ଏୱାରିକି ବୁତଙ୍ଗ୍ ପିହ୍ପି କିଅନ୍, ଆଟେ ହାବେତ୍ ରଗୁତିଦି ନେହି କିଅନ୍ ବାଗା ହକତ୍ ହିତେଞ୍ଜି । 2ଏମ୍ବାଟି ଏୱାଞ୍ଜି ଏୱାରିକି ମୁଲାପେନୁତି ରାଜି କୁଲାଟି ପପ୍କନ୍ ଅଟେ ରଗୁଗାଟାରିକି ନେହି କିଅନ୍ ବାଗା ପାଣ୍ଡିତେଞ୍ଜି 3ଅଟେ ଏୱାରିକି ୱେସ୍ତେଞ୍ଜି, ମିରୁ ହାନ୍ନି ତୁକାତାୱା ଡେଙ୍ଗ କି ବେଗୁ କି ରୁଟିଙ୍ଗ୍ କି ଲେବୁଙ୍ଗ୍ ଇନାୱାଡ଼େ ଅଃଆଟୁ, କି ରି ଜଡ଼ା ଅଙ୍ଗିଙ୍ଗ୍ ଅଃଆଟୁ । 4ଆଟେ ମିଙ୍ଗେ ଇମ୍ୱିନ୍ ଇଡ୍ଡୁତାୱା ଆର୍ଚାନ୍ ଅଦାନେରି, ଏ ଗର୍ରି ପିଃହାନ୍ ଟିକ୍ନା ଏମ୍ୱା ମାଞ୍ଜୁ । 5#ପେରି ୧୩:୫୧#ଲୁକ ୧୦:୪–୧୧ଆଟେ ଏଚ୍ଚେ ଦାଲ୍ଲା ମିଙ୍ଗେ ଗ୍ରହନ କିଆଦାଃଏରି, ଏ ନାଜୁତାୱାଟି ୱାନି ତୁକାତାୱା ଏୱାର୍ତି ବିରୁଦିଆଟି ସାକି ୱେସ୍ପନ୍ ବାଗା ମି କାଟ୍କାତି ଦୁଲି ହାଡ଼୍ଦୁ ।
6ଏମ୍ବାଟି ଏୱାରି ହାଜ୍ଜାନାହି ହାବେଇନ୍ଦା ସୁସମାଚାର ୱେସ୍ତେରି ଅଟେ ନେହି କି କି ନାସ୍କା ତ୍ରେବନ୍ ମ୍ରାସ୍ତେରି ।
ଜିସୁ କୁଲାଟି ୱେଞ୍ଜାନ୍ ହେରଦ ସନ୍ଦେହ କିଅନ୍
(ମାତିଉ ୧୪:୧–୧୨; ମାର୍କ ୬:୧୪–୧୯)
7 #
ମାତି ୧୬:୧୪; ମାର୍କ ୮:୨୮; ଲୁକ ୯:୧୯ ଏମ୍ବାଟି ଗାଲିଲି ରାଜିତି ଆକୁଡ଼୍ କିଅନ୍ତି ହେରଦ ରାଜେଞ୍ଜି ଇ ହାବେତ୍ ଡୁଣ୍ତେଲ୍ ୱେଞ୍ଜାନ୍ ବୁଦ୍ଦି ଏଲୁ ମ୍ରାକ୍ତେଞ୍ଜି, ଇନାକି ଜହନ ହାନ୍ନାର୍ଟିଆଟି ନିଙ୍ଗାନ୍ନେଞ୍ଜି ଇଞ୍ଜାନ୍ ତୁଲ୍ଲେତାରି ୱେସ୍ପିଚ୍ଚେରି; 8ଆଟେ ତୁଲ୍ଲେତାରି ଏଲିୟ ତଞ୍ଜୁ ଆନ୍ନେଞ୍ଜି ଅଟେ ତୁଲ୍ଲେତାରି ନକିତି ବାବବାଦିଙ୍ଗ୍ତାୱାଟି ରଃଅଞ୍ଜି ନିମ୍ୱାନ୍ନିଙ୍ଗାନ୍ନେଞ୍ଜି ଇଞ୍ଜାନ୍ ୱେସ୍ପିଚ୍ଚେରି । 9ମତ୍ର ହେରଦ ୱେସ୍ତେଞ୍ଜି, “ଜହନତି ତ୍ଲାଉ ନାନୁ ତ ରାସ୍ପି କିଆମାଃଇ, ମତ୍ର ଇନ୍ଦାର୍ କୁଲାଟି ମାମୁ ଇହିଙ୍ଗ୍ତି କାତା ୱେଞ୍ଜିନ୍ନାମୁ, ଇୱାଞ୍ଜି ଏମ୍ୱେନାଞ୍ଜି ?” ଆଟେ ତାନୁ ଏୱାଞ୍ଜିକି ହୁଡ଼ନ୍ ବାଗା ସେସ୍ଟା କିଚ୍ଚେଞ୍ଜି ।
ଜିସୁ ସେ ହଜାର୍ ଦାଲ୍ଲାନିକି ତିସ୍ପନ୍
(ମାତିଉ ୧୪:୧୩–୨୧; ମାର୍କ ୬:୩୦–୪୪; ଜହନ ୬:୧–୧୪)
10ଡେଗ୍ଗା ପେରିତଙ୍ଗ୍ ୱ୍ଡେଚାନ୍ ୱାନାହି, ଇନ୍ନା ଇନ୍ନା କିଆଚ୍ଚେରି, ଏୱା ହାବେ ଜିସୁନିକି ୱେସ୍ତେରି । ଆଟେ ତାନୁ ଏୱାରିକି ତା ଡ଼ାହି ଅଚ୍ଚାନ୍ ଆଙ୍ଗେ ଅଆନ୍ ବେତ୍ସାଇଦା ପାରୁତି ଗାଡ଼ାନାଜୁଇନ୍ଦା ହାଚ୍ଚେରି । 11ମତ୍ର ଦାଲ୍ଲା ହାବେ ଏଦା ପୁଞ୍ଜାନ୍ ତା ବେତଟ୍ ହାଚ୍ଚେରି; ଆଟେ ଜିସୁ ଏୱାରିକି ରାହାଙ୍ଗ୍ ଆନ୍ ଗ୍ରହନ କିଆନ୍ ମୁଲାପେନୁତି ରାଜି କୁଲା ଏୱାରିକି ୱେସ୍ତେଞ୍ଜି, ଆଟେ ଇନ୍ଦାରିକି ନେହି ଆଅନ୍ ମାଚ୍ଚେ, ଏୱାରିକି ନେହି କିତେଞ୍ଜି ।
12ଏଚିତୁକାତାୱା ମିଡ୍ଡଡ଼୍ ଆଚ୍ଚେ; ଏମ୍ବାଟି ବାରାଗାଣ୍ଡି ଗ୍ରାମ୍ବାଗାଟାରି ତା ରେଃଏସ୍ ୱାନାହି ୱେସ୍ତେରି, “ଇଦି ଆଇନେ ରଣ୍ଡି ପାଡ଼ୁ ଗର୍ରି, ଏଦାବାଗା ଦାଲ୍ଲା ହାବେ ଇନିମିଡିକି ଗୁଞ୍ଜେର୍ ମାନ୍ନି ନାସ୍କାଇନ୍ଦା ହାଜ୍ଜାନାହି ତିନ୍ବା ଉନ୍ବା କିଆନାହି ବାସାଗର୍ରି ପାଁନେରି, ଏଦାବାଗା ଏୱାରିକି ପାଣ୍ଡାମୁ ।”
13ମତ୍ର ଜିସୁ ଏୱାରିକି ୱେସ୍ତେଞ୍ଜି, “ମିରୁ ଏୱାରିକି ତିନ୍ବନ୍ ହିଦୁ ।” ଏୱାରି ୱେସ୍ତେରି, “ମା ପାଟ୍ଟି ସେଙ୍ଗି ରୁଟିଙ୍ଗ୍ ଅଟେ ରିଣ୍ଡି ମିନ୍ଙ୍ଗା ଟିଆଟି ଏଗେଲ୍ ହେଃଲ୍ଲ; ଏହେଙ୍ଗ୍ ଆତେସି ମାରୁ ହାଜ୍ଜାନାହି ଇନ୍ନା ଇ ହାବେତ୍ ଦାଲ୍ଲା ବାଗା ତିନ୍ବା ପଡ଼ି କଡ୍ଡିନା ?” 14ଇନାକି ଏଦିମ୍ୱା ୱାର୍ରି ମ୍ଡେହେଙ୍ଗ୍ ବାଇକ୍ ସେ ହଜାର୍ ମାଚ୍ଚେରି । ଆଟେ ତାନୁ ତା ଗ୍ରାମ୍ୱାଗାଟାରିକି ୱେସ୍ତେଞ୍ଜି, “ଏୱାରିକି ରି କୁଡ଼ି ଦାସାଗାଣ୍ଡି ଲାକ୍କା ଗୁଟ୍ଟୁ ଗୁଟ୍ଟୁ କିଆନ୍ କକ୍କି କିଦୁ ।”
15ଏମ୍ୱାଟି ଏୱାରି ଏଚିଡେହେଙ୍ଗ୍ ହାବେତାରିନିକି କକ୍କି କିତେରି । 16ଆଟେ ତାନୁ ଏ ସେଙ୍ଗା ରୁଟିଙ୍ଗ୍ ଅଟେ ରିଣ୍ଡା ମିନ୍ଙ୍ଗା ଅଆନ୍ ସର୍ଗଇନ୍ଦା ମେହାନ୍ ଏୱା ହାବେ ମେଲା କିତେଞ୍ଜି, ଆଟେ କାଣ୍ଡାଙ୍ଗ୍ କିଆନ୍ ଦାଲ୍ଲାନିକି ହାବେ ପାହ୍ପନ୍ ବାଗା ଗ୍ରାମ୍ୱାଗାଟାରିକି ହିତେଞ୍ଜି । 17ଏମ୍ୱାଟି ହାବେତାରି ତିଞ୍ଜାନାହି କ୍ଡିତେରି, ଆଟେ ଏୱାରି ହାରାଚ୍ଚି ରୁଟି କାଣ୍ଡାଙ୍ଗ୍ ବାରା ହୁନ୍ଦା ରପାଟ୍ଟେ ଉହି କିତେରି ।
ଜିସୁନିକି ପିତର କ୍ରିସ୍ଟ ଇଞ୍ଜାନ୍ ୱେସ୍ପନ୍
(ମାତିଉ ୧୬:୧୩–୧୯; ମାର୍କ ୮:୨୭–୨୯)
18ରଲି ଜିସୁ ରଃଅଞ୍ଜେଃଏ ପ୍ରାତ୍ନା କିଚ୍ଚି ତୁକାତାୱା ଗ୍ରାମ୍ୱାଗାଟାରି ତା ଡ଼ାହି ମାଚ୍ଚେରି, ଆଟେ ତାନୁ ଏୱାରିକି ୱେଚ୍ଚେଞ୍ଜି, “ନାନୁ ଏମ୍ବେନାନୁ ଇଞ୍ଜାନ୍ ଦାଲ୍ଲା ଇନ୍ନା ଇଞ୍ଜିନ୍ନେରି ?”
19 #
ମାତି ୧୪:୧,୨; ମାର୍କ ୬:୧୪,୧୫; ଲୁକ ୯:୭,୮ ଏମ୍ବାଟି ଏୱାରି ୱେସ୍ତେରି, “ଡୁବନ୍ ହିନ୍ନି ଜହନ, ଆଟେ ଏମ୍ୱେ ଏମ୍ୱେନାରି ଇଞ୍ଜିନ୍ନେରି, ଏଲିୟ, ଆଟେ ଏମ୍ୱେ ଏମ୍ୱେନାରି ଇଞ୍ଜିନ୍ନେରି, ନକିତି ବାବବାଦିଙ୍ଗ୍ତାୱାଟି ରଃଅଞ୍ଜି ନିଙ୍ଗାନ୍ନେଞ୍ଜି ।”
20 #
ଜହ ୬:୬୮,୬୯ ଏୱାଞ୍ଜି ଏୱାରିକି ୱେଚ୍ଚେଞ୍ଜି, “ନାନୁ ଏମ୍ୱେନାନୁ ଇଞ୍ଜାନ୍ ମିରୁ ଇନ୍ନା ଇଞ୍ଜିଞ୍ଜେରି ?” ପିତର ୱେସ୍ତେଞ୍ଜି, “ନିନୁ ମୁଲାପେନୁତାୱାଟି ୱାନ୍ନି କ୍ରିସ୍ଟ ।”
ଜିସୁ ତା ଦୁଃକ ଅଟେ ହାଅନ୍ତି କୁଲାଟି ୱେସ୍ତେଞ୍ଜି
(ମାତିଉ ୧୬:୨୦–୨୮; ମାର୍କ ୮:୩୦; ୯:୧)
21ଏମ୍ବାଟି ଏୱାଞ୍ଜି ଇଦା ଇନ୍ଦାରିକି ୱେଃସାନ୍ ବାଗା ଏୱାରିକି ମାଞ୍ଜାଟି ଆଦେସ୍ ହିଆନ୍ ୱେସ୍ତେଞ୍ଜି, 22ଆଟେ ଏୱାଞ୍ଜି ଏୱାରକି ୱେସ୍ତେଞ୍ଜି, “କୁଏଞ୍ଜ୍ ମ୍ରିଃଏଞ୍ଜିକି ଏଗେଲ୍ ଦୁଃକ ପାଁନ୍ବନ୍ତିକି ଆନେ ଆଟେ ଜିହୁଦିଙ୍ଗ୍ତି ଗାମିନାରି, ଗାମିନ୍ ଜାଜକଙ୍ଗ୍ ଅଟେ ସାସ୍ତ୍ରିଙ୍ଗ୍ତାୱାଟି ଅଗ୍ରାହ୍ୟ ଆନେଞ୍ଜି ଆଟେ ତାନୁ ହାନେଞ୍ଜି, ଆଟେ ମୁ ଦିନାଟି ରିହିକ୍ ନିଙ୍ଗିନେଞ୍ଜି ।”
23 #
ମାତି ୧୦:୩୮; ଲୁକ ୧୪:୨୭ ଏଚିତୁକାତାୱା ଜିସୁ ହାବେତାରିନିକି ୱେସ୍ତେଞ୍ଜି, “ଏମ୍ୱେ ଜଦି ନା ବେତଟ୍ ୱାଅନ୍ ବାଗା ଇଚ୍ଚା କିନ୍ନେଞ୍ଜି, ଏହେଙ୍ଗ୍ ଆତେସି ତା ଗାଣ୍ଡି ବ୍ଡୁଜ୍ଜାକାଞ୍ଜି, ଆଟେ ହାବେ ୱେଲା କ୍ରୁସ ଡେକାନ୍ ନା ବେତଟ୍ ୱାପାକାଞ୍ଜି । 24#ମାତି ୧୦:୩୯; ଲୁକ ୧୭:୩୩; ଜହ ୧୨:୨୫ଇନାକି ଏମ୍ୱେନାଞ୍ଜି ତା ପରନ୍ ନିପ୍ଚ୍ଚାନ୍ ଇଟ୍ଟନ୍ ବାଗା ଇଚ୍ଚା କିନ୍ନେଞ୍ଜି, ଏୱାଞ୍ଜି ଏଦା ମ୍ରାକ୍ନେଞ୍ଜି; ଏମ୍ବେନାଞ୍ଜିକି ନା ବାଗା ତା ପରନ୍ ହିନେଞ୍ଜି, ଏୱାଞ୍ଜି ଏଦା ନିପ୍ନେଞ୍ଜି । 25ଆଟେ କୁଏଞ୍ଜି ଜଦି ପୁର୍ତି ହାବେ ଜିତି ଆନାହି ତା ଗାଣ୍ଡି ନାହେଡ୍ କିନେଞ୍ଜି କି ମ୍ରାକ୍ନେଞ୍ଜି, ଏହେଙ୍ଗ୍ ଆତେସି ତାଙ୍ଗେ ଇନ୍ନି ଲାବା ? 26ଏଦାକି ଏମ୍ୱେନାଞ୍ଜି ନାଙ୍ଗେ ଆଟେ ନା ବାକ୍ୟ କୁଲାଟି ଲେଜ୍ଜା ଆଇନ୍ନେଞ୍ଜି, କୁଏଞ୍ଜ୍ ମ୍ରିଃଏଞ୍ଜି ଆବା ଅଟେ ପିର୍ନି ଦୁତଙ୍ଗ୍ତି ମହିମାଟି ୱାନେଞ୍ଜି, ଏଚିତୁକାତାୱା ଜିସୁ ଏୱାଞ୍ଜିକି ତା କୁଲାଟି ଲେଜ୍ଜା ଆନେଞ୍ଜି । 27ମତ୍ର ନାନୁ ମିଙ୍ଗେ ନିଜ୍ଜା ୱେସ୍ପିଞ୍ଜା, ମୁଲାପେନୁତି ରାଜି ହୁଃଡ଼ାନ୍ ଟିକ୍ନା ଇମ୍ୱା ମାନ୍ନି ଦାଲ୍ଲା ତାୱାଟି ଏଚ୍ଚେ ଦାଲ୍ଲା ଇନିମିଡି ୱାଡ଼େ ହାଃଏରି ।”
ଜିସୁତି ୱାନ୍ନା ମ୍ଲିଅନ୍
(ମାତିଉ ୧୭:୧–୮; ମାର୍କ ୯:୨–୮)
28ଇ ହାବେତ୍ ଡୁଣ୍ତେଲ୍ଆନ୍ ବାଇକ୍ ଆଟ୍ଟା ଦିନାଟି ଏୱାଞ୍ଜି ପିତର, ଜହନ ଅଟେ ଜାକୁବନିକି ଅଆନ୍ ପ୍ରାତ୍ନା କିଅନ୍ ବାଗା ହରୁଇନ୍ଦା ହାଚ୍ଚେଞ୍ଜି । 29ଆଟେ ଜିସୁ ପ୍ରାତ୍ନା କିଚ୍ଚି ତୁକାତାୱା ତା ୱାନ୍ନା ମ୍ଲିତେ ଅଟେ ତା ଜିରାଙ୍ଗ୍ ହୁକୁଲ୍ ଅଟେ ଏଗେଲ୍ ଅଲା ଆତୁ । 30ଆଟେ ହୁଡ଼ାଟୁ, ଏଚିୱାଡ଼େ ମସା ଅଟେ ଏଲିୟ, ତା ଡ଼ାହି କାତାବାର୍ତା ଆଇଚ୍ଚାଦାଃଆ ହୁଡ଼ିତେରି । 31ଏୱାରି ଗଉରବଟି ତଞ୍ଜୁଆନାହି, ଜିସୁ ଜିରୁସାଲମତାୱା ଇନିସ୍ କାର୍ବେକ୍ ହାନାହି ଆବାତି ଇଚ୍ଚା ସପଲ କିନେଞ୍ଜି । ଇ କୁଲାଟି କାତାବାର୍ତା ଆଇଚ୍ଚେରି । 32ଏଚିତୁକାତାୱା ପିତର ଅଟେ ତା ଡ଼ାହି ମାଚ୍ଚି ଦାଲ୍ଲା ହୁଞ୍ଜାୱିଆଚ୍ଚେରି; ଏୱାରି ନିଙ୍ଗାନାହି ଜିସୁତି ଗଉରବ ହୁଡ଼ିତେରି ଅଟେ ତା ଡ଼ାହି ଡିଡ୍ଡାଚି ରିଃଆର୍ କୁଇଙ୍ଗ୍ନିକି ହୁଡ଼ିତେରି । 33ଆଟେ ଏ ରିଃଆରି କୁଇଙ୍ଗ୍ ଏୱାଞ୍ଜ୍ତାୱାଟି ହାଜ୍ଜିଚ୍ଚି ତୁକାତାୱା ପିତର ଜିସୁନିକି ୱେସ୍ତେଞ୍ଜି, “ଏ ଗ୍ରାପାଗାଟାତି ମାରୁ ଜେ ଇ ଗର୍ରିତାୱା ମାନ୍ନା, ଇଦି ନିଗ୍ଗାଗାଟାଦି; ଏଦାକି ମାରୁ ମୁଞ୍ଜା କୁପ୍କା କ୍ଲେହିନା, ନି ବାଗା ରଣ୍ଡା, ମସା ବାଗା ରଣ୍ଡା ଅଟେ ଏଲିୟ ବାଗା ରଣ୍ଡା । ମତ୍ର ପିତର ଇନ୍ନା ୱେସ୍ପିନ୍ନେଞ୍ଜି, ଏଦା ତାନୁ ପୁଞ୍ଜାହେଃଲ୍ଲାତେଞ୍ଜି ।”
34ଏୱାଞ୍ଜି ଏ କାତା ୱେସ୍ପିଚ୍ଚି ତୁକାତାୱା ଜାଗ୍ଗୁ ମୁଲ୍ଡେଞ୍ଜ୍ ୱାନାହି ଏୱାରିକି ମୁଚ୍ଚି କିତେ, ଏମ୍ବାଟି ଗ୍ରାମ୍ବାଗାଟାରି ଆଜ୍ଜିତେରି । 35#ମାତି ୩:୧୭; ୧୨:୧୮; ମାର୍କ ୧:୧୧; ଲୁକ ୩:୨୨#୨ପି ୧:୧୭,୧୮ଆଟେ ଜାଗ୍ଗୁଟି ଇ ଉକୁଡ଼୍ ଆତେ, ଇୱାଞ୍ଜି ନା ମ୍ରିଃଏଞ୍ଜି, ନାନୁ ଇୱାଞ୍ଜିକି ଆଚି କିଆମାଃଇ, ଇୱାଞ୍ଜ୍ତି କାତା ୱେଞ୍ଜୁ ।
36ଆଟେ ଏ ହାଦ୍ଦା ଆତାୱିଃଆଟି ଜିସୁ ରଃଅଞ୍ଜେଃଏ ତଞ୍ଜିତେଞ୍ଜି । ଆଟେ ଗ୍ରାମ୍ବାଗାଟାରି ଡାମ୍ନା ବାସାଆତେରି, ଆଟେ ଇନ୍ନା ଇନ୍ନା ହୁଡ଼ାଚ୍ଚେରି, ଏୱାରି ଏ କାତା ଇନ୍ଦାରିକି ୱେଃସାତେରି ।
ଜିସୁ ବୁତ ଆହାଚ୍ଚି ବଦାସିକି ନେହି କିଅନ୍
(ମାତିଉ ୧୭:୧୪–୧୮; ମାର୍କ ୯:୧୪–୨୭)
37ଏ ୱେଃଇତାୱା ଜିସୁ ଅଟେ ତା ଗ୍ରାମ୍ୱାଗାଟାରି ହରୁତାୱାଟି ଜାଚାନ୍ ୱାଅନେଃଏ, ଗାପ୍ଚି ଦାଲ୍ଲା ୱାନାହି ଜିସୁନିକି ବେଟ୍ଟା ଆତେରି । 38ଆଟେ ହୁଡ଼ାଟୁ, ହାବେ ଦାଲ୍ଲା ତାୱାଟି ରଃଅଞ୍ଜି ଗଜେଲ୍ ଆନ୍ ୱେସ୍ତେଞ୍ଜି, “ଏ ଗ୍ରାପାଗାଟାତି” ନାନୁ ନିଙ୍ଗେ ଜିଗେଞ୍ଜା, ନା ମ୍ରିଃଏଞ୍ଜିକି ପାପୁଅଲମୁ, ଇନାକି ଏୱାଞ୍ଜି ନା ରଃଅଞ୍ଜେଃଏ ମ୍ରିଃଏଞ୍ଜି; 39ହୁଡ଼ାମୁ, ଏୱାଞ୍ଜିକି ରଣ୍ଡି ବୁତ ଆହ୍ପିନ୍ନେ, ଆଟେ ଏୱାଞ୍ଜି ଏଚିୱାଡ଼େ ଗଜେଲ୍ ଆନ୍ ନିଙ୍ଗେନ୍ନେଞ୍ଜି, ଆଟେ ଏ ବୁତ ତାଙ୍ଗେ ଇହିଙ୍ଗିସି ତ୍ଲିପ୍କା ୱିନ୍ନେ ଜେ, ତା ଗୁତିତାୱାଟି ପମ୍ୱେଲ୍ ହପିନ୍ନେ, ଆଟେ ବୁତ ଏୱାଞ୍ଜିକି ଗାଜାଙ୍ଗ୍ କିଆନାହି ଏୱାଞ୍ଜ୍ଟିଆଟି କସ୍ଟଟି ହଚାନ୍ ହାଜ୍ଜିନ୍ନେ । 40ନାନୁ ନି ଗ୍ରାମ୍ୱାଗାଟାରିକି ବୁତ ପିହ୍ପି କିଅନ୍ ବାଗା ଜିଗିତେଃଏ, “ମତ୍ର ଏୱାରି ଏୱାଞ୍ଜିକି ନେହି କିଅନି ମୁଃଆତେରି।”
41ଜିସୁ ୱେସ୍ତେଞ୍ଜି, “ଏ ହିତେ ମାଞ୍ଜାଡ଼ି କିଅନ୍ତାତେରି ଅଟେ ଡ଼ଃଆନ୍ ପାହେରିଃଆ ହାଲ୍ବନ୍ତି ପୁଣ୍ଡି, ଏଚ୍ଚି ଅଁଣ୍ଡୁ ନାନୁ ମି ଡ଼ାହି ବାସାଆନାହି ମି ବେବାର୍ ସହି ଆଃଇ ? ଏ ମ୍ରିଃଏଞ୍ଜିକି ନା ଟାକ୍କେ ତାଚ୍ଚିୱାଦୁ ।”
42ଆଟେ ବଦାସିକି ଆହାନ୍ ତାପିଚ୍ଚି ତୁକାତାୱା ବୁତ ତାଙ୍ଗେ ନେତେ ବ୍ଡିପ୍ଚ୍ଚାନାହି ତ୍ଲିପ୍କା ୱିତେ, ମତ୍ର ଜିସୁ ଡ଼ଃଆନ୍ ଡିଙ୍ଗାତିଦି ୱ୍ଲିଚାନାହି ପେରିତେଞ୍ଜି ଅଟେ ବଦାସ୍ନିକି ନେହି କିଆନ୍ ତାଙ୍ଗେ ତା ଆବା କାଜ୍ଜୁତାୱା ସର୍ପି କିତେଞ୍ଜି ।
43ଏମ୍ୱାଟି ହାବେତାରି ମୁଲାପେନୁତି ବେର୍ ବଲ ବାଗାଟି ଆକ୍କାବାଡ଼ାଙ୍ଗ୍ ଆତେରି । ମତ୍ର ତା କିନ୍ନି ହାବେତ୍ କାମା ବାଗାଟି ହାବେତାରି ଆକ୍କାବାଡ଼ାଙ୍ଗ୍ ଆଇଚ୍ଚି ତୁକାତାୱା ତାନୁ ତା ଗ୍ରାମ୍ୱାଗାଟାରିକି ୱେସ୍ତେଞ୍ଜି,
ଜିସୁ ତା ହାଅନ୍ତି କୁଲାଟି ରିହିକ୍ ୱେସ୍ତେଞ୍ଜି
(ମାତିଉ ୧୭:୨୨–୨୩; ମାର୍କ ୯:୩୦–୩୨)
44“ଇ ହାବେ କାତା କୁଲାଟି ମିରୁ ମନ ହିଆନ୍ ୱେଞ୍ଜୁ; ଇନାକି କୁଏଞ୍ଜ୍ ମ୍ରିଃଏଞ୍ଜି କୁଇଙ୍ଗ୍ତି କାଜ୍ଜୁତାୱା ସର୍ପି ଆଅନ୍ ବାଗା ହାଜ୍ଜିନ୍ନେଞ୍ଜି ।” 45ମତ୍ର ଗ୍ରାମ୍ୱାଗାଟାରି ଏ କାତା ପୁଃନ୍ନାତେରି, ଆଟେ ଏଦି ଏୱାରି ତାୱାଟି ମ୍ରାଗାନ୍ ମାଚ୍ଚେ, ଏୱାରି ଏଦା ପୁଃନ୍ନାତେସି ୱାଡ଼େ ଜିସୁନିକି ଏୱାରି ଏ କାତା କୁଲାଟି ୱେନ୍ବନ୍ ବାଗା ଆଜ୍ଜିତେରି ।
ଏମ୍ୱେନାଞ୍ଜି ଗାମିନାଞ୍ଜି
(ମାତିଉ ୧୮:୧–୫; ମାର୍କ ୯:୩୩–୩୭)
46 #
ଲୁକ ୨୨:୨୪
ଏୱାରି ତାୱାଟି ଏମ୍ୱେନାଞ୍ଜି ଗାମିନାଞ୍ଜି, ଏ କୁଲାଟି ଏୱାରି ତାରୁ ତାରୁ କାତାବାର୍ତା ଆଇଚ୍ଚେରି । 47ଜିସୁ ଏୱାର୍ତି ମନତି କାତା ପୁଞ୍ଜାନାହି ରଃଅଞ୍ଜି ଡଟି ବଦାସିକି ଆହାନ୍ ତା ରେଃଏସ୍ ଡିଡ୍ଡି କିଆନ୍ ଏୱାରିକି ୱେସ୍ତେଞ୍ଜି, 48#ମାତି ୧୦:୪୦; ଲୁକ ୧୦:୧୬; ଜହ ୧୩:୨୦ଏମ୍ୱେନାଞ୍ଜି ନା ପାରୁଟି ଇ ଡଟି ବଦାନିକି ଗ୍ରହନ କିନେଞ୍ଜି, ଏୱାଞ୍ଜି ନାଙ୍ଗେ ଗ୍ରହନ କିଞ୍ଜାନେଞ୍ଜି, ଆଟେ ଏମ୍ୱେନାଞ୍ଜି ନାଙ୍ଗେ ଗ୍ରହନ କିଞ୍ଜାନେଞ୍ଜି, ଏୱାଞ୍ଜି ନାଙ୍ଗେ ପାଣ୍ଡାଞ୍ଜାନି ଆବାନିକି ଗ୍ରହନ କିନ୍ନେଞ୍ଜି, ଇନାକି ମି ହାବେତାରିତାୱା ଏମ୍ୱେ ଡଟିଗାଟାଞ୍ଜି ଏୱାଞ୍ଜି ଗାମିନାଞ୍ଜି ।
ଏମ୍ୱେନାଞ୍ଜି ମି ସତ୍ରୁ ଆଃଏ ଏୱାଞ୍ଜି ମିଆଃଞ୍ଜି
(ମାର୍କ ୯:୩୮–୪୦)
49ଏମ୍ୱାଟି ଜହନ ୱେସ୍ତେଞ୍ଜି, “ଏ ଗ୍ରାପାଗାଟାତି, ମାମୁ ରଃଅଞ୍ଜିକି ନି ପାରୁଟି ବୁତଙ୍ଗ୍ ପିହ୍ପି କିଚ୍ଚାଦାଃଆ ହୁଡ଼ିତାମୁ, ଆଟେ ଏୱାଞ୍ଜି ମା ଦାଲ୍ଲାତାଞ୍ଜି ଆଃଆନ୍ ବାଗାଟି ତାଙ୍ଗେ ଆଃଏ କିତାମୁ ।”
50ମତ୍ର ଜିସୁ ଏୱାଞ୍ଜିକି ୱେସ୍ତେଞ୍ଜି, “ତାଙ୍ଗେ ଆଃଏ କିଃଆଟୁ, ଇନାକି ଏମ୍ୱେନାଞ୍ଜି ମି ସତ୍ରୁ ଆଃଏ, ଏୱାଞ୍ଜି ମିଆଃଞ୍ଜି ।”
ସମିରନତାୱା ଜିସୁନିକି ଗ୍ରହନ କିଃଆତେରି
51ଡେଗ୍ଗା ଏଚ୍ଚିକିଃଆ ଜିସୁ ସର୍ଗଇନ୍ଦା ହାଲବନ୍ତି ତୁକା ଟାକ୍କେ ୱାତେ, ଏଚିତୁକାତାୱା ତାନୁ ଜିରୁସାଲମଇନ୍ଦା ହାଲ୍ବନ୍ ବାଗା ଏଲୁ କିତେଞ୍ଜି, 52ଏୱାଞ୍ଜି ତା ନକେସି ଏଚ୍ଚେ ଦାଲ୍ଲା ଦୁତଙ୍ଗ୍ନିକି ପାଣ୍ଡିତେଞ୍ଜି । ଏୱାରି ହାଜ୍ଜାନାହି ତା ବାଗା ହାମ୍ୱେର୍ କିଅନ୍ ବାଗାଟି ସମିରନତି ରଣ୍ଡା ନାଜୁତାୱା ହଟେରି; 53ମତ୍ର ଜିସୁ ଜିରୁସାଲମଇନ୍ଦା ହାଲ୍ବନ୍ ବାଗା ମନ କିଆନ୍ନେଞ୍ଜି ଇଞ୍ଜାନ୍ ପୁଞ୍ଜାନ୍ ଏୱାରି ତାଙ୍ଗେ ଗ୍ରହନ କିଃଆତେରି । 54ଇଦା ହୁଡ଼ାନ୍ ଜାକୁବ ଅଟେ ଜହନ, ଇ ରିଃଆରି ଗ୍ରାମ୍ୱାଗାଟାରି ଜିସୁନିକି ୱେସ୍ତେରି, “ଦାର୍ମୁ, ଏଲିୟ ଇନିମିଡି କିଆଚ୍ଚେଞ୍ଜି, ଏଚିଲାକ୍କା ଏୱାରିକି ନାହେଡ୍ କିଅନ୍ ବାଗା ଜାଗ୍ଗୁତାୱାଟି ନାଡ଼ି ରିୱି କିୱିକିନା ଇଞ୍ଜାନ୍ ମାମୁ ୱେସ୍ନାମୁ, ନିନୁ ଇନ୍ନା ଇଞ୍ଜିଞ୍ଜି ?”
55ମତ୍ର ଜିସୁ ମ୍ଲିଆନାହି ତାଙ୍ଗେ ୱ୍ଲିଚାନ୍ ୱେସ୍ତେଞ୍ଜି, “ମିରୁ ଇନିମିଡି ଡିଙ୍ଗାତି ଦାଲ୍ଲା, ଏଦା ମିରୁ ପୁଞ୍ଜେହେଃଲ୍ଲେରି । କୁଏଞ୍ଜ୍ ମ୍ରିଃଏଞ୍ଜି କୁଇଙ୍ଗ୍ତି ପରନ୍ ନାହେଡ୍ କିଅନ୍ ବାଗା ୱାଃଏଟେଃଏ ନିପନ୍ ବାଗାଟି ୱାନ୍ନେଞ୍ଜି ।” 56ଏମ୍ୱାଟି ଏୱାରି ଆଟେ ରଣ୍ଡା ନାଜୁଇନ୍ଦା ହାଚ୍ଚେରି ।
ଜିସୁତି ଗ୍ରାମ୍ବାଗାଟାର୍ ଆଅନ୍ ବାଗା ଇଚ୍ଚା କିନ୍ନି ଦାଲ୍ଲା
(ମାତିଉ ୮:୧୯–୨୨)
57ଏୱାରି ଗିଜ୍ଜୁତାୱା ହାଜ୍ଜିଚ୍ଚି ତୁକାତାୱା ରଃଅଞ୍ଜି କୁଏଞ୍ଜି ଜିସୁନିକି ୱେସ୍ତେଞ୍ଜି, “ନିନୁ ଇମ୍ୱିନ୍ ଗର୍ରିଇନ୍ଦା ହାଜ୍ଜି, ନାନୁ ନି ବେତଟ୍ ୱାଃଇ ।”
58ଜିସୁ ତାଙ୍ଗେ ୱେସ୍ତେଞ୍ଜି, “କଲେର୍କାତି ଗର୍ରି ମାନ୍ନେ, ଜାଗ୍ଗୁତି ପଟ୍ଟାଙ୍ଗ୍ ବାଗା ମାନ୍ବା ବଡ଼ା ମାନ୍ନେ, ମତ୍ର କୁଏଞ୍ଜ୍ ମ୍ରିଃଏଞ୍ଜିକି ତ୍ଲାଉ ଇଟ୍ଟନ୍ତି ଗର୍ରି ହେଃଲ୍ଲେ ।”
59ଏମ୍ୱାଟି ଜିସୁ ଆଟେ ରଃଅଞ୍ଜିକି ୱେସ୍ତେଞ୍ଜି, “ନା ବେତଟ୍ ୱାମୁ ।” ମତ୍ର ଏୱାଞ୍ଜି ୱେସ୍ତେଞ୍ଜି, “ଏ ଦାର୍ମୁ, ନାଙ୍ଗେ କାହେ ନା ଆବାନିକି ଗ୍ରିପନ୍ ବାଗା ଅନୁମତି ହିଆମୁ ।”
60ଜିସୁ ଏୱାଞ୍ଜିକି ୱେସ୍ତେଞ୍ଜି, “ହାନ୍ନି ଗାଣ୍ଡିତିଦି ହାନ୍ନି ଦାଲ୍ଲା ଗ୍ରିପାକାରି, ମତ୍ର ନିନୁ ହାଜ୍ଜାନାହି ମୁଲାପେନୁତି ରାଜି କୁଲାଟି ୱେସ୍ମୁ ।”
61ଆଟେ ରଃଅଞ୍ଜି ୱାଡ଼େ ୱେସ୍ତେଞ୍ଜି, “ଦାର୍ମୁ, ନାନୁ ନି ବେତଟ୍ ୱାଃଇ, ମତ୍ର କାହେ ନା ଇଡ୍ଡୁତି ଦାଲ୍ଲାନିକି ୱେସାନ୍ ୱାଅନ୍ ବାଗା ନାଙ୍ଗେ ଅନୁମତି ହିଆମୁ ।”
62ଜିସୁ ଏୱାଞ୍ଜିକି ୱେସ୍ତେଞ୍ଜି, “ଏମ୍ୱେନାଞ୍ଜି ନାଙ୍ଗେଲ୍ତାୱା କାଜ୍ଜୁ ହିଆନ୍ ବେତକ୍ ମେହ୍ନେଞ୍ଜି, ଏୱାଞ୍ଜି ମୁଲାପେନୁତି ରାଜି ବାଗା ଜୁଗ୍ୟ ଆଃଏଞ୍ଜି ।”
Currently Selected:
ଲୁକ 9: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
