ଲୁକ 8
8
ଜିସୁ ଡ଼ାହି ତାକେନ୍ନି ଆଚାସ୍କା
1ଏମ୍ବାଟି ହିତେ ତୁକାଟି ଜିସୁ ଗାଡ଼ାନାଜୁ ଅଟେ ନାସ୍କା ଏସେନ୍ ମୁଲାପେନୁତି ରାଜି କୁଲାଟି ସୁସମାଚାର ପ୍ରଚାର କିଆନ୍ ତ୍ରେବନ୍ ମ୍ରାସ୍ତେଞ୍ଜି, ଆଟେ ତା ଡ଼ାହି ବାରାଗାଣ୍ଡି ଗ୍ରାମ୍ବାଗାଟାରି ମାଚ୍ଚେରି । 2#ମାତି ୨୭:୫୫,୫୬; ମାର୍କ ୧୫:୪୦,୪୧; ଲୁକ ୨୩:୪୯ଆଟେ ଏଚ୍ଚଡ଼୍ ଆଚାସ୍କା ୱାଡ଼େ ତା ଡ଼ାହି ମାଚ୍ଚୁ, ଇମ୍ୱିନ୍ ଆଚାସ୍କା ଡ଼ଃଆନ୍ ଡିଙ୍ଗା ଅଟେ ରଗୁତାୱାଟି ନେହିଆଚ୍ଚୁ, ଇହିଙ୍ଗିସି ଏଚ୍ଚେ ଆଚାସ୍କା ଇଚ୍ଚେସ୍, ମଗ୍ଦଲିନି ପାରୁତି ମରିୟମ, ଇନ୍ଦାର୍ତାୱାଟି ଅଡ଼ି ଗଟ୍ଟା ବୁତଙ୍ଗ୍ ହଚାନ୍ ହାଜ୍ଜାଚ୍ଚୁ, 3ହେରଦତି ଗୁମୁସ୍ତା କୁଜା ଅଟେ ତା କୁଆଲୁ ଜହାନା, ସୁସାନ୍ନା, ଆଟେ ଏଚ୍ଚଡ଼୍ ଆଚାସ୍କା ଜିସୁ ଅଟେ ତା ଗ୍ରାମ୍ୱାଗାଟାରିକି ସାହାଜ୍ୟ କିଅନ୍ ବାଗା ତା ଟାକ୍କାଙ୍ଗ୍ କର୍ଚ କିଚ୍ଚୁ ।
ବିଚ୍ଚା ମାଟ୍ଟନ୍ତାଞ୍ଜିତି ତୁକାଙ୍ଗାତା
(ମାତିଉ ୧୩:୧–୯; ମାର୍କ ୪:୧–୯)
4ଗାପ୍ଚି ଦାଲ୍ଲା ଗାଡ଼ାନାସ୍କାଟିଆଟି ଏୱାଞ୍ଜ୍ ରେଃଏସ୍ ୱାନ୍ ରପାଟ୍ଟେ ଆଅନେଃଏ, ଜିସୁ ଇ ତୁକାଙ୍ଗାତାଟି ୱେସ୍ତେଞ୍ଜି,
5“ରଃଅଞ୍ଜି ମାଟ୍ଟନ୍ତାଞ୍ଜି ତା ବିଚ୍ଚା ମାଟ୍ଟନ୍ତିକି ହତେଞ୍ଜି । ଏୱାଞ୍ଜି ମାଟ୍ଟି ମାଟ୍ଟି ଏଚ୍ଚଡ଼୍ ବିଚ୍ଚା ଗିଜ୍ଜୁ ରେଃଏସ୍ ଦିତୁ ଅଟେ ଏୱା କାଟ୍କାଟି ସ୍ଡିତେରି, ଆଟେ ଜାଗ୍ଗୁତି ପଟ୍ଟାଙ୍ଗ୍ ୱାନ୍ ଏ ବିଚ୍ଚାତିଦି ତିଚ୍ଚୁ । 6ଆଟେ ଏଚ୍ଚଡ଼୍ ୱାଲ୍ଲିଙ୍ଗ୍ ମାଚ୍ଚି ୱିର୍ରାତାୱା ଦିତୁ, ଆଟେ କଡ଼ ଆନାହି ଏଜୁ ପାଃନାତାୱାଟି ୱାଚ୍ଚାୱିତୁ । 7ଆଟେ ଏଚ୍ଚଡ଼୍ ହାପ୍କା ମ୍ରାକା ମାଦ୍ଦି ଦିତୁ, ଆଟେ ହାପ୍କା ମ୍ରାକା ବାଡ୍ଡି ଆନ୍ ଏୱାତିଦି ନାଚ୍ଚିତୁ । 8ଆଟେ ଏଚ୍ଚଡ଼୍ ନେହି ୱିର୍ରାତାୱା ଦିତୁ, ଆଟେ ବାଡ୍ଡି ଆନ୍ ସେଙ୍ଗୁଡ଼ି ଦୁଗୁଡ଼୍ କାଉ ଆଗିତୁ ।” ଏୱାଞ୍ଜି ଇଦା ୱେସି ୱେସି ଗଜେଲ୍ ଆନାହି ୱେସ୍ତେଞ୍ଜି, “ଇନ୍ଦାରିକି ୱେନ୍ବନ୍ ବାଗା କ୍ରିକା ମାନ୍ନୁ, ଏୱାଞ୍ଜି ୱେନ୍ନାକାଞ୍ଜି ।”
ତୁକାଙ୍ଗାତାତି ଉଦେସ
(ମାତିଉ ୧୩:୧୦–୧୭; ମାର୍କ ୪:୧୦–୧୨)
9ଜିସୁତି ଗ୍ରାମ୍ୱାଗାଟାରି ଇ ତୁକାଙ୍ଗାତାତି ଅର୍ତ ଇନ୍ନାଦି ଇଞ୍ଜାନ୍ ୱେନ୍ବନ୍ ମ୍ରାସ୍ତେରି । 10ଏମ୍ବାଟି ଜିସୁ ୱେସ୍ତେଞ୍ଜି, ମୁଲାପେନୁ ରାଜିତି ଲାଃଇତ୍ କାତା ହାବେ ପୁନ୍ବନ୍ ବାଗାଟି ମିଙ୍ଗେ ବଲ ହିୱା ଆନ୍ନେ, ମତ୍ର ବିହିତାରିନିକି ତୁକାଙ୍ଗାତା ଡ଼ାହି ୱେସ୍ପନ୍ ଆଇନେ, ଇନିସ୍ ଏୱାରି ହୁଡ଼ି ହୁଡ଼ି ହୁଃଡ଼େରି ଅଟେ ୱେଞ୍ଜି ୱେଞ୍ଜି ବୁଜ୍ଜି ଆଃଏରି ।
ଜିସୁ ବିଚ୍ଚା ମାଟ୍ଟନ୍ତାଞ୍ଜିତି ଅର୍ତ ବୁଜ୍ଜେ କିଅନି
11“ତୁକାଙ୍ଗାତାତି ଅର୍ତ ଇଦି । ଆଟେ ବିଚ୍ଚା ଆଇନେ ମୁଲାପେନୁତି ବାକ୍ୟ, 12ଆଟେ ଏମ୍ବେନାରି ୱାର୍ରି ବାକ୍ୟ ୱେଞ୍ଜିନ୍ନେରି, ଏୱାରି ଗିଜ୍ଜୁ ରେଃଏସ୍ ଦିଆନ୍ନି ବିଚ୍ଚା ଡେହେଙ୍ଗ୍, ମତ୍ର ସଇତାନ ୱାନାହି, ଇନିସ୍କି ଏୱାରି ମାଞ୍ଜାଡ଼ି କିଆନାହି ଜ୍ଡିପା ପାଁନ୍ବନ୍ ମୁଃଏରି, ଏଦାବାଗା ଏୱାର୍ତି ହଡାଙ୍ଗ୍ତାୱାଟି ବାକ୍ୟ ମିଞ୍ଜାନ୍ ଅଇନେ । 13ଆଟେ ୱାଲ୍ଲିଙ୍ଗ୍ ମାଚ୍ଚି ୱିର୍ରାତାୱା ଦିଆଚ୍ଚି ବିଚ୍ଚା ଇହିଙ୍ଗ୍ତି ଦାଲ୍ଲାନିକି ବୁଜ୍ଜେ କିନ୍ନେ, ଏମ୍ବେନାରି ବାକ୍ୟ ୱେଞ୍ଜାନ୍ ରାହାଙ୍ଗ୍ ଆନାହି ଆହ୍ପିନ୍ନେରି; ମତ୍ର ଏୱାର୍ତି ହିର୍କା ହେଃଲ୍ଲାନ୍ ବାଗା ଏ ବାକ୍ୟତିଦି ନେହେନ୍ ଆହ୍ପେହେଃଲ୍ଲେରି, ଆଟେ ଏୱାରି ହିତେ ମାଞ୍ଜାଡ଼ି କିନ୍ନେରି ଅଟେ ପରିକ୍ୟା ୱାତେସି ଦାର୍ମୁନିକି ପିହ୍ପିନ୍ନେରି । 14ଆଟେ ଏମ୍ବେନାରି ବାକ୍ୟ ୱେଞ୍ଜିନ୍ନେରି ମତ୍ର ପୁର୍ତିତି ଏଲୁ, ଦନ ଅଟେ ବୁଗ ବିଲାସତାୱା ମାଞ୍ଜାନ୍ ପରନ୍ଟିଆଟି ତାକାନ୍ ମାଞ୍ଜିନ୍ନେରି, ଏୱାରି ହାପ୍କା ମ୍ରାକାତାୱା ଦିଆନ୍ନି ବିଚ୍ଚା ଡେହେଙ୍ଗ୍, ଆଟେ ଏୱାରି ମୁଲାପେନୁତି ଗ୍ରାପା ଡେହେଙ୍ଗ୍ ମାଞ୍ଜାଡ଼ିତାୱା ନେଞ୍ଜାନ୍ ଗାମେହେଃଲ୍ଲେରି । 15ଆଟେ ଏମ୍ବେନାରି ନେହି ଆଟେ ଲୁଙ୍ଗୁର୍ ହଡାଙ୍ଗ୍ତାୱା ବାକ୍ୟ ୱେଞ୍ଜାନ୍ ଏଦା ଆହାନାହି ବାସାଆଇନେରି, ଏୱାରି ନେହି ୱିର୍ରାତାୱା ଦିଆନ୍ନି ବିଚ୍ଚା ଡେହେଙ୍ଗ୍, ଆଟେ ଏୱାରି ଦର୍ଜ୍ୟଟି ଗାପ୍ଚି କାଉ ଆଗେନ୍ନେରି ।”
ମାଡ଼ା ନେତେ ଡୁବ୍ବି
16 #
ମାତି ୫:୧୫; ଲୁକ ୧୧:୩୩ “ଏମ୍ବେନାରି ୱାଡ଼େ ଡୁବ୍ବି ପ୍ରୁସାନାହି ଏଦା ମୁଚ୍ଚି କିଆନ୍ ଇଟ୍ଟେରି, କି ଗାଡ୍ଡେଲ୍ ନେତେ ଇଟ୍ଟେରି, ମତ୍ର ଡୁବ୍ବି ଇଟ୍ଟନ୍ତି ଗର୍ରିତାୱା ଇଟ୍ଟିନେରି, ଇନିସ୍କି ଲାଃଇ ହଲ୍ବିନ୍ନି ଦାଲ୍ଲା ଅଲା ହୁଡ଼ନ୍ ମୁନେରି ।
17 #
ମାତି ୧୦:୨୬; ଲୁକ ୧୨:୨ ଇନାକି ଇନ୍ନିକୁଲା ହାବେ ହୁଟ୍ଟାନାହି ମାନ୍ନୁ, ଏୱା ହାବେ ଦାଲ୍ଲା ନକେସ୍ ପଙ୍ଗିନ୍ନୁ, ଅଟେ ହୁଟ୍ଟାନ୍ ମାନ୍ନି ହାବେ କୁଲା ଦାଲ୍ଲା ନକେସ୍ ପୁନ୍ବି କିୱା ଆନେ ।
18 #
ମାତି ୨୫:୨୯; ଲୁକ ୧୯:୨୬ ଏଦାକି ଇନିସ୍ ୱେଞ୍ଜିଞ୍ଜେରି, ଏ କୁଲାଟି ନେହେନ୍ ବାସାଆଦୁ; ଇନାକି ଇନ୍ଦାରିକି ମାନ୍ନୁ, ଏୱାଞ୍ଜିକି ହିଅନ୍ ଆନେ, ଆଟେ ଇନ୍ଦାରିକି ହେଃଲ୍ଲ, ଏୱାଞ୍ଜି ଇନ୍ନା ନାଃଆ ଇଞ୍ଜାନ୍ ଏଲୁ କିନ୍ନେଞ୍ଜି, ଏଦା ୱାଡ଼େ ଏୱାଞ୍ଜ୍ତାୱାଟି ଅୱାଆନେ ।”
ଜିସୁତି ଇୟା ଅଟେ ଆମ୍ବେସାଙ୍ଗା
(ମାତିଉ ୧୨:୪୬–୫୦; ମାର୍କ ୩:୩୧–୩୫)
19ଜିସୁତି ଇୟା ଅଟେ ତା ଆମ୍ୱେସାଙ୍ଗା ଏୱାଞ୍ଜ୍ ରେଃଏସ୍ ୱାତେରି, ମତ୍ର ଗାପ୍ଚି ଦାଲ୍ଲା ମାଚ୍ଚି ବାଗାଟି ତା ଡ଼ାହି ତଞ୍ଜୁ ଆଅନ୍ ମୁଃଆତେରି । 20ଏମ୍ବାଟି ରଃଅଞ୍ଜି ଜିସୁନିକି ଇ କାତା ୱେସ୍ତେଞ୍ଜି, “ନି ଇୟା ଅଟେ ଆମ୍ୱେସାଙ୍ଗା ନିଙ୍ଗେ ହୁଡ଼ନ୍ ବାଗା ଇଚ୍ଚା କିଆନ୍ କାଟ ଡିଡ୍ଡାନ୍ନେରି ।”
21ମତ୍ର ଜିସୁ ୱେସ୍ତେଞ୍ଜି, “ଏମ୍ବେନାରି ମୁଲାପେନୁତି ବାକ୍ୟ ୱେଞ୍ଜିନ୍ନେରି ଅଟେ ପାଲ୍ନି ଆଇନ୍ନେରି, ଏୱାରି ନା ଇୟା ଅଟେ ଆମ୍ୱେସାଙ୍ଗା ।”
ଜିସୁ ୱ୍ଲିକାପିସ୍କାତିଦି ଲତୁ କିଅନ୍
(ମାତିଉ ୮:୨୩–୨୭; ମାର୍କ ୪:୩୫–୪୧)
22ରନେସି ଜିସୁ ଅଟେ ତା ଗ୍ରାମ୍ୱାଗାଟାରି ରଣ୍ଡା ଡଙ୍ଗାତାୱା ଏଙ୍ଗିତେରି, ଆଟେ ଏୱାଞ୍ଜି ଏୱାରିକି ୱେସ୍ତେଞ୍ଜି, “ୱାଦୁ, ସାମ୍ନ୍ଦେର୍ତି ଆନେଟ୍ ୱାଡୁ ହାନ୍ନା ।” ଏମ୍ବାଟି ଏୱାରି ଡଙ୍ଗାତାୱା ହାଚ୍ଚେରି । 23ମତ୍ର ଏୱାରି ଡଙ୍ଗାତାୱା ହାଜ୍ଜିଚ୍ଚି ତୁକାତାୱା ଜିସୁ ହୁଞ୍ଜିତେଞ୍ଜି । ଏଚିତୁକାତାୱା ସାମ୍ନ୍ଦେର୍ତାୱା ୱ୍ଲିକା ପିସ୍କା ଆତୁ, ଆଟେ ଏୱାର୍ତି ଡଙ୍ଗା ଏଜୁଟି ନେଞ୍ଜନ୍ ମ୍ରାସ୍ତେ ଅଟେ ଏୱାରି ବିପଦତାୱା ଦିତେରି । 24ଏମ୍ବାଟି ଗ୍ରାମ୍ୱାଗାଟାରି ଜିସୁ ରେଃଏସ୍ ହାଜ୍ଜାନ୍ ନିକ୍ଚାନ୍ ୱେସ୍ତେରି, “ଏ ଗ୍ରାପାଗାଟାତି, ଏ ଗ୍ରାପାଗାଟାତି ମାମୁ ହାତାମୁ ।” ଏମ୍ବାଟି ଜିସୁ ନିଙ୍ଗାନାହି ୱ୍ଲିକା ଅଟେ ଲହଡ଼ା ଏଜୁତିଦି ଡାମ୍ନା ମାନ୍ବନ୍ ବାଗା ଆଦେସ୍ ହିତେଞ୍ଜି, ଏମ୍ବାଟି ଏଦି ହାବେ ଲତୁନା ବାସାଆତେ । 25ଆଟେ ଏୱାଞ୍ଜି ଏୱାରିକି ୱେସ୍ତେଞ୍ଜି, “ମି ମାଞ୍ଜାଡ଼ି ଇମ୍ୱିନାଦି ?” ମତ୍ର ଏୱାରି ଆଜ୍ଜାନାହି ଅଟେ ଆକ୍କାବାଡ଼ାଙ୍ଗ୍ ଆନାହି ତାରୁ ତାରୁ ୱେସ୍ପିଆତେରି, “ଏହେଙ୍ଗ୍ ଆତେସି ଇୱାଞ୍ଜି ଏମ୍ୱେନାଞ୍ଜି ଜେ, ଏୱାଞ୍ଜି ୱ୍ଲିକା ଅଟେ ଏଜୁତିଦି ୱାଡ଼େ ଆଦେସ୍ ହିନ୍ନେଞ୍ଜି, ଏୱା ତା ଆଗ୍ୟାଁ ମାନି ଆଇନୁ ।”
ଜିସୁ ବୁତ ଆହାଚ୍ଚି କୁଏଞ୍ଜିକି ନେହି କିଅନ୍
(ମାତିଉ ୮:୨୮–୩୪; ମାର୍କ ୫:୧–୨୦)
26ଡେଗ୍ଗା ଜିସୁ ଅଟେ ତା ଗ୍ରାମ୍ୱାଗାଟାରି ଗାଲିଲି ଆନେଟ୍ ୱାଡୁ ମାଚ୍ଚି ଗରାସିୟ ରାଜିଇନ୍ଦା ଏତେରି । 27ଜିସୁ ଡଙ୍ଗାତାୱାଟି ଜାପିଚ୍ଚି ତୁକାତାୱା ଏ ଗାଡ଼ାନାଜୁତି ରଃଅଞ୍ଜି ବୁତ ହଲ୍ଜାଚ୍ଚି କୁଏଞ୍ଜି ଜିସୁନିକି ପୁଁଣ୍ତିତେଞ୍ଜି; ଏୱାଞ୍ଜି ଏଗେଲ୍ ଅଁଣ୍ଡୁ ଆଇଚ୍ଚେ ଗତାଙ୍ଗ୍ ମେଦ୍ଦେଟେଃଏ ଆଟେ ଇଡ୍ଡୁତାୱା ବାସାଆଃଏଟେଃଏ ୱିଚାଙ୍ଗାଜୁତାୱା ମାଞ୍ଜିଚ୍ଚେଞ୍ଜି । 28ଏୱାଞ୍ଜି ଜିସୁନିକି ହୁଡ଼ାନ୍ ଗଜେଲ୍ ଆନାହି ଜିସୁତି କାଟ୍କା ନେତେ ବ୍ଡିଆନ୍ ଏଗେଲ୍ ଗଜେଲ୍ ଆନାହି ୱେସ୍ତେଞ୍ଜି, “ଏ ହାବେତାୱାଟି ଗାମିନ୍ ମୁଲାପେନୁତି ମ୍ରିଃଏଞ୍ଜି ଜିସୁ, ନାଙ୍ଗେ ନି ଡ଼ାହି ଇନ୍ନି ବିଡ଼ା ମାନ୍ନେ ? ନାନୁ ନିଙ୍ଗେ ଜିଗେଞ୍ଜା, ନାଙ୍ଗେ କସ୍ଟ ହିଆଦାଃଆ ।” 29ଇନାକି ଡ଼ଃଆନ୍ ଡିଙ୍ଗାତିଦି ଏ କୁଏଞ୍ଜ୍ତାୱାଟି ହଚାନ୍ ହାଲ୍ମୁ ଇଞ୍ଜାନ୍ ୱେସାଚ୍ଚି ବାଗା ଏୱାଞ୍ଜି ଏହେଙ୍ଗିସି ୱେସ୍ତେଞ୍ଜି । ଏ ଡ଼ଃଆନ୍ ଡିଙ୍ଗା ଏଚ୍ଚେ ଅଲି ତାଙ୍ଗେ ଆହାଚ୍ଚେ, ଆଟେ ଦାଲ୍ଲା ଏୱାଞ୍ଜିକି ହିକଲ୍କା ଡ଼ାହି ଗାସ୍ପାୱିଆନା ଇଟ୍ଟେଚ୍ଚେରି, ମତ୍ର ଏୱାଞ୍ଜି ଗାସ୍ପାୱିଆଚି ହିକଲ୍କା ପ୍ଡୁପ୍କାୱିଚ୍ଚେଞ୍ଜି, ଆଟେ ଏୱାଞ୍ଜିକି ଚିହ୍ପି ଗର୍ରିଇନ୍ଦା ଅପିଚ୍ଚେ ।
30ଜିସୁ ଏୱାଞ୍ଜିକି ୱେଚ୍ଚେଞ୍ଜି, “ନି ପାରୁ ଇନ୍ନି ପାରୁ ?” ଏୱାଞ୍ଜି ୱେସ୍ତେଞ୍ଜି, “ବାହିନି” ଇନାକି ଏଗେଲ୍ ବୁତଙ୍ଗ୍ ଏୱାଞ୍ଜ୍ ଲାଃଇ ହଲ୍ଜାଚ୍ଚୁ । 31ଆଟେ ଏୱାଞ୍ଜି ଇନିସ୍କି ଏୱାଡ଼ିକି ନିୱେଡ଼୍କୁଟ୍ଟି ଲାଃଇ ହାଲ୍ବନ୍ ବାଗା ଆଦେସ୍ ହିଃଏଞ୍ଜି, ଏଦାବାଗା ଏୱା ଏୱାଞ୍ଜିକି ଜିଗାନାହି ୱେସ୍ପନ୍ ମ୍ରାସ୍ତୁ ।
32ଏମ୍ବାଟି ଟାକ୍କେ ମାଚ୍ଚି ହରୁ ରେଃଏସ୍ ଗାପ୍ଚି ପାଜ୍ଜିଙ୍ଗ୍ ଗୁଟ୍ଟୁ ଆନ୍ ତିଞ୍ଜିଚ୍ଚୁ, ଆଟେ ଜିସୁ ଇନିସ୍କି ବୁତଙ୍ଗ୍ତିଦି ଏ ପାଜ୍ଜିଙ୍ଗ୍ ଲାଃଇ ହଲ୍ବନ୍ ବାଗା ୱେସ୍ନେଞ୍ଜି, ଏଦାବାଗା ଏୱା ତାଙ୍ଗେ ଜିଗିତୁ । 33ଏୱାଞ୍ଜି ବୁତଙ୍ଗ୍ନିକି ୱେସ୍ପନେଃଏ, ବୁତଙ୍ଗ୍ ଏ କୁଏଞ୍ଜ୍ତାୱାଟି ହଚାନାହି ପାଜ୍ଜିଙ୍ଗ୍ ଲାଃଇ ହଟୁ, ଏମ୍ବାଟି ଏ ପାଜ୍ଜିଙ୍ଗ୍ ଗୁଟ୍ଟୁ କାର୍ବେକ୍ ଡେହାନାହି ହରୁତି ପ୍ଡିତି ଗର୍ରିଟି ସାମ୍ନ୍ଦେର୍ତାୱା ଦିଆନ୍ ମୁଞ୍ଜାନ୍ ହାତୁ ।
34ଏମ୍ବାଟି କପେଚ୍ଚି ଦାଲ୍ଲା ଏ ଡୁଣ୍ଡେଲ୍ ହୁଡ଼ାନ୍ ଡେହାନ୍ ଗାଡ଼ାନାସ୍କା ଅଟେ ଡଟି ନାସ୍କା ଏସେନ୍ ଏ ଡୁଣ୍ଡେଲ୍ କୁଲାଟି ୱେସ୍ତେରି । 35ଏମ୍ବାଟି ଦାଲ୍ଲା ଏ ଡୁଣ୍ଡେଲ୍ ହୁଡ଼ନ୍ ବାଗା ୱାତେରି; ଆଟେ ଏୱାରି ଜିସୁ ରେଃଏସ୍ ୱାନାହି, ଇମ୍ୱିନ୍ କୁଏଞ୍ଜ୍ତାୱାଟି ବୁତଙ୍ଗ୍ ହଚାନାହି ହାଚ୍ଚୁ, ଏୱାଞ୍ଜିକି ଗତାଙ୍ଗ୍ ମେଦ୍ଦାନାହି ନେହି ଏଲୁଟି ଜିସୁତି କାଟ୍କା ନେତେ କକ୍ଚ୍ଚାନାଦା ହୁଡ଼ାନାହି ଆଜ୍ଜିତେରି । 36ଆଟେ ଏମ୍ବେନାରି ଇ ଡୁଣ୍ଡେଲ୍ ହୁଡ଼ାଚ୍ଚେରି, ଏୱାରି ଏ ବୁତଙ୍ଗ୍ ହଲ୍ଜାଚ୍ଚି କୁଏଞ୍ଜି ଇନିସ୍ ନେହିଆତେଞ୍ଜି, ଏଦା ଏୱାରିକି ୱେସ୍ତେରି । 37ଏମ୍ବାଟି ଗରାସିୟ ରାଜି ଗୁଞ୍ଜେର୍ ମାଚ୍ଚି ଦାଲ୍ଲା ହାବେ ଜିସୁନିକି ଏ ଗର୍ରିଟି ହାଲ୍ବନ୍ ବାଗା ଜିଗିତେରି, ଇନାକି ଏୱାରି ଏଗେଲ୍ ଆଜ୍ଜାଚ୍ଚେରି; ଏଦାକି ଏୱାଞ୍ଜି ରଣ୍ଡା ଡଙ୍ଗାତାୱା ଏଙ୍ଗାନାହି ୱ୍ଡେଚାନ୍ ୱାତେଞ୍ଜି । 38ମତ୍ର ଇମ୍ୱିନ୍ କୁଏଞ୍ଜ୍ଟିଆଟି ବୁତଙ୍ଗ୍ ହଚାନ୍ ହାଜ୍ଜାଚ୍ଚୁ, “ଏୱାଞ୍ଜି ଜିସୁ ଡ଼ାହି ହାଲ୍ବନ୍ ବାଗାଟି ଜିଗିତେଞ୍ଜି ।” ମତ୍ର ଜିସୁ ତାଙ୍ଗେ ବଲା କିଆନ୍ ୱେସ୍ତେଞ୍ଜି, 39“ନି ଇଡ୍ଡୁଇନ୍ଦା ନିନୁ ୱ୍ଡେଚାନ୍ ହାଲ୍ମୁ, ଆଟେ ମୁଲାପେନୁ ନି ବାଗାଟି ଇନ୍ନି ଇନ୍ନି କାମା କିଆନ୍ନେଞ୍ଜି, ଏଦା ହାବେ ଏଲୁ କିଆନ୍ ୱେସ୍ମୁ ।” ଏମ୍ବାଟି ଏୱାଞ୍ଜି ହାଜ୍ଜାନାହି, ଜିସୁ ଏୱାଞ୍ଜ୍ ବାଗାଟି ଇନ୍ନି ଇନ୍ନି କାମା କିଆଚ୍ଚେଞ୍ଜି, ଏଦା ହାବେ ଗାଡ଼ାନାଜୁତାୱା ୱେସ୍ପନ୍ ମ୍ରାସ୍ତେଞ୍ଜି ।
ଜାଇରସତି ମ୍ରାଗା ଅଟେ ରଗୁଗାଟି ଆଚାଲୁ
(ମାତିଉ ୯:୧୮–୨୬; ମାର୍କ ୫:୨୧–୪୩)
40ଏଚ୍ଚିକିଃଆ ଜିସୁ ୱ୍ଡେଚାନ୍ ୱାତେଞ୍ଜି, ଏମ୍ବା ଦାଲ୍ଲା ହାବେ ରାହାଙ୍ଗିଃଆଟି ତାଙ୍ଗେ ଗ୍ରହନ କିତେରି, ଇନାକି ହାବେତାରି ତାଙ୍ଗେ କାଚାନ୍ ମାଚ୍ଚେରି ।
41ଆଟେ ହୁଡ଼ାଟୁ, ଜାଇରସ ପାରୁଟି ରଃଅଞ୍ଜି କୁଏଞ୍ଜି ୱାତେଞ୍ଜି, ଏୱାଞ୍ଜି ହାଜା ଇଡ୍ଡୁତି ଗାମିନାଞ୍ଜି ମାଚ୍ଚେଞ୍ଜି । ଏୱାଞ୍ଜି ଜିସୁତି କାଟ୍କାନାୱା ବ୍ଡିଆନାହି ତା ଇଡ୍ଡୁଇନ୍ଦା ହାଲ୍ବନ୍ ବାଗା ଜିଗିତେଞ୍ଜି । 42ଇନାକି ଏୱାଞ୍ଜିକି ବାଇକ୍ ବାରା ଅଁଣ୍ଡୁ ଆଇଚ୍ଚି ରଣ୍ଡି ମ୍ରାଗା ମାଚ୍ଚେ, ଏଦି ଗାପ୍ଚି ରେଡ଼ମ୍ ଆଚ୍ଚେ । ମତ୍ର ଜିସୁ ହାଜ୍ଜିଚ୍ଚି ତୁକାତାୱା ଦାଲ୍ଲା ହାବେ ତା କୁଃଏଟି ନାଚ୍ଚିତ୍ରଚି ଆଇଚ୍ଚେରି । 43ଏଚିତୁକାତାୱା ବାରା ଅଁଣ୍ଡୁ ଟିକ୍ନା ରଣ୍ଡି ଆଚାଲୁ କାଟକ୍ ଆନ୍ ରାକ୍କା ହାଜ୍ଜାନ୍ ରେଡ଼ମ୍ ଆନ୍ ମାଚ୍ଚେ, ଏମ୍ବେନାଦିକି ତା ଟାକ୍କାଙ୍ଗ୍ ୱିହି କିଆନ୍ ଇନ୍ଦାର୍ତାୱାଟି ୱାଡ଼େ ତାନୁ ନେହି ଆଅନ୍ ମୁପେହେଃଲ୍ଲାତେ, 44ଏଦି ବେତଟ୍ ୱାନାହି ଜିସୁତି ଜିରା ଲିଙ୍ଗୁସ୍ ଡିଗନେଃଏ, ଏଚିୱାଡ଼େ କାଟକ୍ ଆନ୍ ରାକ୍କା ହାଜ୍ଜିଚ୍ଚି ରଗୁତାୱାଟି ନେହି ଆତେ । 45ଏମ୍ବାଟି ଜିସୁ ୱେଚ୍ଚେଞ୍ଜି, “ଏମ୍ୱେ ନାଙ୍ଗେ ଡିଗିଦାତେ ?” ମତ୍ର ହାବେତାରି ୱେସ୍ତେରି, ମାମୁ ଡିଗା ହେଲ୍ଲାଦାଃଆମୁ, ଏମ୍ବାଟି ପିତର ୱେସ୍ତେଞ୍ଜି, “ଏ ଗ୍ରାପାଗାଟାତି, ଦାଲ୍ଲା ହାବେ ନି ଗୁଞ୍ଜେର୍ ନାଚ୍ଚିତ୍ରଚି ଆନ୍ ସ୍ଡିପିଆଇନ୍ନେରି ।”
46ମତ୍ର ଜିସୁ ୱେସ୍ତେଞ୍ଜି, “ଏମ୍ୱେନାଞ୍ଜି ରଃଅଞ୍ଜି ନାଙ୍ଗେ ଡିଗିଦାତେଞ୍ଜି, ଇନାକି ନା ତାୱାଟି ବଲ ହାଚ୍ଚେ ଇଞ୍ଜାନ୍ ନାନୁ ପୁଚ୍ଚେଏ ।” 47ଏଚ୍ଚିକିଃଆ ଆଚାଲୁ ପୁଚ୍ଚେ, ଏ କାତା ୱେସେଟେଃଏ ବାସା ଆଅନ୍ ମୁଃଆତେ, ଏମ୍ବାଟି ଏଦି ତ୍ରେଗିତ୍ରେଗି ୱାନାହି ଜିସୁତି କାଟ୍କା ନେତେ ବ୍ଡିଆନ୍, ଇନାବାଗା ଜିସୁନିକି ଡିଗିତେ, ଆଟେ ଇନିମିଡି ଏଚିୱାଡ଼େ ନେହି ଆତେ, ଏଦା ଦାଲ୍ଲା ନକେସି ପକ୍ତେ । 48ଏମ୍ବାଟି ଜିସୁ ତାଙ୍ଗେ ୱେସ୍ତେଞ୍ଜି, “ମ୍ରାଗାନାତି ନି ମାଞ୍ଜାଡ଼ି ନିଙ୍ଗେ ନେହି କିଆଞ୍ଜାନେ, ଲତୁଟି ହାଲ୍ମୁ ।”
49ଜିସୁ ଇ କାତା ୱେସ୍ପିଚ୍ଚି ତୁକାତାୱା ହାଜା ଇଡ୍ଡୁତି ଗାମିନାଞ୍ଜି ଇଡ୍ଡୁତାୱାଟି ରଃଅଞ୍ଜି ୱାନାହି ୱେସ୍ତେଞ୍ଜି, “ନି ମ୍ରାଗା ହାତେଦେ, ଜିସୁନିକି ଆଟେ କସ୍ଟ ହିଃଆ ।”
50ମତ୍ର ଜିସୁ ଇଦା ୱେଞ୍ଜାନ୍ ଜାଇରସନିକି ୱେସ୍ତେଞ୍ଜି, “ଆଃଜ୍ଜାଆ, ୱାର୍ରି ମାଞ୍ଜାଡ଼ି କିମୁ, ଆଟେ ଏଦି ନିମ୍ୱିନେ ।”
51ଆଟେ ଜିସୁ ଜାଇରସତି ଇଡ୍ଡୁତାୱା ଏଚ୍ଚାନାହି ୱେସ୍ତେଞ୍ଜି, “ପିତର, ଜହନ ଅଟେ ଜାକୁବ, ଆଟେ ମ୍ରାଗାତି ଇୟାଆବାନିକି ପିହାନ୍ ଆଟେ ଇନ୍ଦାରିକି ତା ଡ଼ାହି ଇଡ୍ଡୁ ଲାଃଇ ହଲ୍ବନ୍ ଆଃଏ କିତେଞ୍ଜି ।” 52ମତ୍ର ହାବେ ଏଦାଡ଼୍ ବାଗାଟି ଦୁଃକ କିଆନ୍ ହଡାଙ୍ଗ୍ ୱେଚି ୱେଚି ଡ଼ିଆୱିଚ୍ଚେରି । ଏମ୍ବାଟି ଜିସୁ ୱେସ୍ତେଞ୍ଜି, “ଡ଼ିଃଆଟୁ; ଏଦି ହାହେଃଲ୍ଲେଏ, ମତ୍ର ହୁଞ୍ଜାନ୍ନେ ।”
53ମତ୍ର ଏଦି ହାନ୍ନେ ଇଞ୍ଜାନ୍ ପୁଞ୍ଜାଚ୍ଚାୱିଃଆଟି ଏୱାରି ଜିସୁନିକି ଗେରୁ କିତେରି । 54ମତ୍ର ଜିସୁ ତା କାଜ୍ଜୁ ଆହାନ୍ ୱେସ୍ତେଞ୍ଜି, “ମ୍ରାଗାନାତି ନିଙ୍ଗାମୁ ।” 55ଏମ୍ବାଟି ଏଦାଡ଼୍ତି ପରନ୍ ୱ୍ଡେଚାନ୍ ୱାତେ, ଆଟେ ଏଦି ଏଚିୱାଡ଼େ ନିଙ୍ଗିତେ, ଏମ୍ବାଟି ଜିସୁ ତାଙ୍ଗେ ଇନ୍ନା ହିତେ ତିନ୍ବନ୍ ବାଗା ହିଦୁ ଇଞ୍ଜାନ୍ ୱେସ୍ତେଞ୍ଜି । 56ଏମ୍ବାଟି ଏଦାଡ଼୍ତି ଇୟାଆବା ଆକ୍କାବାଡ଼ାଙ୍ଗ୍ ଆତେରି; ମତ୍ର ଜିସୁ ଇ ଡୁଣ୍ତେଲ୍ ଇନ୍ଦାରିକି ୱେଃସାଟୁ ଇଞ୍ଜାନ୍ ଆଦେସ୍ ହିତେଞ୍ଜି ।
Currently Selected:
ଲୁକ 8: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
