ଲୁକ 7
7
ସେଙ୍ଗୁଡ଼ି ସିପେଙ୍ଗ୍ତି ଗାମିନାଞ୍ଜିତି କାମ୍ୱାରେଏଞ୍ଜି ନେହି ଆଅନ୍
(ମାତିଉ ୮:୫–୧୩)
1ଜିସୁ ଦାଲ୍ଲାନିକି ଇ ହାବେତ୍ କାତା ୱେସ୍ପନ୍ ୱିହି କିଆନ୍ କପର୍ନାହୁମ ଗାଡ଼ାନାଜୁତାୱା ହଟେଞ୍ଜି । 2ଏଚିତୁକାତାୱା ରଃଅଞ୍ଜି ସେଙ୍ଗୁଡ଼ି ସିପେଙ୍ଗ୍ତି ଗାମିନାଞ୍ଜିତି କାମ୍ବାରେଏଞ୍ଜି ରେଡ଼ମ୍ ଆନାହି ହାନି ଲାକ୍କା ଆଚ୍ଚେଞ୍ଜି, ଏୱାଞ୍ଜି ତା ଜେଡାଗାଟାଞ୍ଜି ମାଚ୍ଚେଞ୍ଜି । 3ଏୱାଞ୍ଜି ଜିସୁ କୁଲାଟି ୱେଞ୍ଜାନାହି, ଏୱାଞ୍ଜି ଇନିସ୍ ୱାନାହି ତା କାମ୍ବାରେଏଞ୍ଜିକି ନେହି କିଅନ୍ ବାଗା ତା ରେଃଏସ୍ ଜିହୁଦିତି ଏଚ୍ଚେ ଗାମିନାରିନିକି ପାଣ୍ଡାନାହି ତାଙ୍ଗେ ଆର୍ପି କିତେଞ୍ଜି । 4ଏୱାରି ଜିସୁ ରେଃଏସ୍ ୱାନ୍ ଜିଗାନ୍ ୱେସ୍ତେରି, “ଇ କୁଏଞ୍ଜି ନିଜ୍ଜାନେଃଏ ନି ସାହାଜ୍ୟ ପାଁନ୍ବନ୍ ମାନ୍ନେ । 5ଇନାକି ଏୱାଞ୍ଜି ମା ଜିହୁଦି ଜାତିତିଦି ଜେଡା କିନ୍ନେଞ୍ଜି ଅଟେ ମା ବାଗାଟି ହାଜା ଇଡ୍ଡୁ କ୍ଲେହାନ୍ନେଞ୍ଜି ।”
6ଏମ୍ବାଟି ଜିସୁ ଏୱାର୍ ଡ଼ାହି ହାଚ୍ଚେଞ୍ଜି । ଏୱାଞ୍ଜି ତା ଇଡ୍ଡୁ ଏପନ୍ତିକି ତାୱାଟି ହିତେ ଦେହା ମାଚ୍ଚି ତୁକାତାୱା ସେଙ୍ଗୁଡ଼ି ସିପେଙ୍ଗ୍ତି ଗାମିନାଞ୍ଜି ତା ତଡ଼ୁଗାଟାରିକି ପାଣ୍ଡାନାହି ଏୱାଞ୍ଜିକି ୱେସ୍ତେଞ୍ଜି, “ଦାର୍ମୁ, କସ୍ଟ କିଃଆ; ଇନାକି ନିନୁ ଜେ ନା ଇଡ୍ଡୁ ଦଲାନ୍ ଲାଃଇ କାଡୁ ଇଟ୍ଟିଦି, ଏଦାବାଗା ନାନୁ ଜଗ୍ୟ ଆଃଏ; 7ଏଦାକି ନାନୁ ନି ରେଃଏସ୍ ହାଲ୍ବନ୍ ବାଗା ମନ କିଃଆତେନୁ; ମତ୍ର ହିତେ ଆଦେସ୍ କିମୁ, ନା କାମ୍ୱାରେଏଞ୍ଜି ନେହି ଆନେଞ୍ଜି । 8ଇନାକି ନାନୁ ୱାଡ଼େ ରଃଅଞ୍ଜ୍ତି ହକତ୍ତାୱା ମାଃଇ ଅଟେ ନା ହକତ୍ତାୱା ସିପେଙ୍ଗ୍ ମାନ୍ନେରି, ନାନୁ ରଃଅଞ୍ଜିକି ହାଲ୍ମୁ ଇଚ୍ଚେସି ଏୱାଞ୍ଜି ହାଜ୍ଜିନ୍ନେଞ୍ଜି; ଆଟେ ରଃଅଞ୍ଜିକି ୱାମୁ ଇଚ୍ଚେସି ଏୱାଞ୍ଜି ୱାଇନ୍ନେଞ୍ଜି; ଆଟେ ନା କାମ୍ବାରେଏଞ୍ଜିକି ଇଦା କିମୁ ଇଚ୍ଚେସି ଏୱାଞ୍ଜି ଏଦା କିନ୍ନେଞ୍ଜି ।”
9ଜିସୁ ଇ ହାବେତ୍ କାତା ୱେଞ୍ଜାନ୍ ଏୱାଞ୍ଜ୍ତି କୁଲାଟି ଆକ୍କାବାଡ଼ାଙ୍ଗ୍ ଆତେଞ୍ଜି, ଆଟେ ମ୍ଲିଆନାହି ତା ବେତଟ୍ ୱାଇଚ୍ଚି ଦାଲ୍ଲାନିକି ୱେସ୍ତେଞ୍ଜି, ନାନୁ ମିଙ୍ଗେ ୱେସ୍ପିଞ୍ଜା, “ଇସ୍ରାଏଲ ତାୱା ୱାଡ଼େ ଇନ୍ଦାର୍ ପାଟ୍ଟି ଇହିଙ୍ଗିସି ବେର୍ ମାଞ୍ଜାଡ଼ି ହୁଡ଼ାହେଃଲ୍ଲାନୁ ।”
10ଆଟେ ପାଣ୍ଡାଚ୍ଚି ଦାଲ୍ଲା ଇଡ୍ଡୁଇନ୍ଦା ୱ୍ଡେଚାନ୍ ୱାନ୍ କାମ୍ବାରେଏଞ୍ଜିକି ନେହିଆଅନ୍ତାଦା ହୁଡ଼ିତେରି ।
ଜିସୁ ୱାଟ୍ଟାଗାଟି ଇୟାତି ମ୍ରିଃଏଞ୍ଜିକି ନିପନ୍
11ଏମ୍ୱାଟି ଜିସୁ ତା ଗ୍ରାମ୍ୱାଗାଟାର୍ ଡ଼ାହି ନାଇନ ପାରୁତି ଗାଡ଼ାନାଜୁଇନ୍ଦା ହାଚ୍ଚେଞ୍ଜି, ଏମ୍ବା ଗାପ୍ଚି ଦାଲ୍ଲା ତା ବେତଟ୍ ହାଜ୍ଜିଚ୍ଚେରି । 12ଏୱାଞ୍ଜି ନାଜୁ ରେଃଏସ୍ ଏପନେଃଏ, ହୁଡ଼ାଟୁ ଦାଲ୍ଲା ରଃଅଞ୍ଜି ହାଚି କୁଏଞ୍ଜିକି ଡେକାନ୍ ତାପିଚ୍ଚେରି, ଏୱାଞ୍ଜି ଏ ୱାଟ୍ଟାଗାଟି ଇୟାତି ରଃଅଞ୍ଜେଃଏ ମ୍ରିଃଏଞ୍ଜି ମାଚ୍ଚେଞ୍ଜି; ଆଟେ ଗାଡ଼ାନାଜୁତି ଗାପ୍ଚି ଦାଲ୍ଲା ଏଦାଡ଼୍ ଡ଼ାହି ମାଚ୍ଚେରି । 13ଏଦାଡ଼ିକି ହୁଡ଼ାନ୍ ଦାର୍ମୁ ପାପୁଅଲ୍ଚାନ୍ କଲବଲ ଆନ୍ ଏଦାଡ଼ିକି ୱେସ୍ତେଞ୍ଜି, “ଡ଼ିଃଆ ।” 14ଏମ୍ବାଟି ଏୱାଞ୍ଜି ରେଃଏସ୍ ହାଜ୍ଜାନ୍ ହତା ଗାଡ୍ଡେଲ୍ ଡିଗିତେଞ୍ଜି, ଏମ୍ବାଟି ଡେକନ୍ତାରି ଡିଡ୍ଡନେଃଏ, ଏୱାଞ୍ଜି ୱେସ୍ତେଞ୍ଜି, “ଲାୱେଞ୍ଜ୍ତି, ନାନୁ ନିଙ୍ଗେ ୱେସ୍ପିଞ୍ଜା, ନିଙ୍ଗାମୁ ।” 15ଏଦିମ୍ୱା ହାଚି କୁଏଞ୍ଜି ନିଙ୍ଗାନ୍ କକ୍ତେଞ୍ଜି, ଏମ୍ବାଟି କାତା ୱେସ୍ପନ୍ ମ୍ରାସ୍ତେଞ୍ଜି, ଆଟେ ଏୱାଞ୍ଜି ଏୱାଞ୍ଜିକି ତା ଇୟା କାଜ୍ଜୁତାୱା ସର୍ପି କିତେଞ୍ଜି ।
16ଏମ୍ବାଟି ହାବେତାରି ଆଜ୍ଜିତେରି, ଆଟେ ମୁଲାପେନୁତି ଗାଡ଼ିହେରୁ କି କି ୱେସ୍ପନ୍ ମ୍ରାସ୍ତେରି, “ମା ତାୱା ରଃଅଞ୍ଜି ଗାମିନ୍ ବାବବାଦି ହଚାନ୍ନେଞ୍ଜି ଅଟେ ମୁଲାପେନୁ ତା ଦାଲ୍ଲାନିକି ନିପନ୍ ବାଗା ୱାନ୍ନେଞ୍ଜି ।”
17ଏମ୍ବାଟି ଜିସୁତି କୁଲାଟି ଇ କାତା ହାବେ ଜିହୁଦା ଦେସା ଅଟେ ଗୁଞ୍ଜେର୍ ହାବେତ୍ ନାସ୍କାତାୱା ପ୍ରେଜିତେ ।
ଡୁବନ୍ ହିନ୍ନି ଜହନତି ରିଃଆର୍ ଗ୍ରାମ୍ୱାଗାଟାରି
(ମାତିଉ ୧୧:୨–୧୯)
18ଡେଗ୍ଗା ଜହନତି ଗ୍ରାମ୍ୱାଗାଟାରି ଇ ହାବେ କାତା ତାଙ୍ଗେ ୱେସ୍ତେରି । 19ଏମ୍ବାଟି ଜହନ ତା ଗ୍ରାମ୍ୱାଗାଟାରି ତାୱାଟି ରିଃଆରିକି ଟାକ୍କେ ଆର୍ଚାନ୍ ଦାର୍ମୁ ରେଃଏସ୍ ଇଦା ୱେସାନ୍ ପାଣ୍ଡିତେଞ୍ଜି, ଏମ୍ବେନାଞ୍ଜିକି ୱାଅନ୍ ମାଚ୍ଚେ, “ଏ କୁଏଞ୍ଜି ଇନ୍ନା ନିନୁ, କି ମାମୁ ବିହିତାଞ୍ଜିନିକି କାଚାନ୍ ବାସାଆନାମୁ ?”
20ଏ କୁଇଙ୍ଗ୍ ତା ରେଃଏସ୍ ଏଚ୍ଚାନ୍ ୱେସ୍ତେରି, ଡୁବନ୍ ହିନ୍ନି ଜହନ ମାଙ୍ଗେ ନି ରେଃଏସ୍ ଇଦା ୱେସାନ୍ ପାଣ୍ଡାଞ୍ଜାନେଞ୍ଜି, “ଏମ୍ବେନାଞ୍ଜିକି ୱାଅନ୍ ମାନ୍ନେ, ଏ କୁଏଞ୍ଜି ଇନ୍ନା ନିନୁ, କି ମାମୁ ବିହିତାଞ୍ଜିନିକି କାଚାନ୍ ବାସାଆନାମୁ ?”
21ଏଚିତୁକାତାୱା ଏୱାଞ୍ଜି ଏଚ୍ଚେ ଦାଲ୍ଲାନିକି ରଗୁ, ରେଡ଼ମ୍ ଅଟେ ଡ଼ଃଆନ୍ ଡିଙ୍ଗାଙ୍ଗ୍ ତାୱାଟି ନେହି କିତେଞ୍ଜି, ଆଟେ ଏଚ୍ଚେ କାଡ଼ାଙ୍ଗ୍ଗାଟାରିକି କାଡ଼୍କା ହୁଡ଼ିକିତେଞ୍ଜି । 22ଏୱାଞ୍ଜି ଏୱାରିକି ୱେସ୍ତେଞ୍ଜି, “ମିରୁ ହାଜ୍ଜାନାହି ଇନ୍ନା ଇନ୍ନା ହୁଡ଼ିତେରି ଅଟେ ୱେଚ୍ଚେରି, ଏଦା ହାବେ ଜହନନିକି ୱେସ୍ଦୁ; କାଡ଼ାଙ୍ଗ୍ଗାଟାରି ହୁଡ଼େନ୍ନେରି, ମେଟ୍ଲାଙ୍ଗ୍ଗାଟାରି ତାକେନ୍ନେରି, ମୁଟ୍ଡାଙ୍ଗ୍ ରଗୁଗାଟାରି ନେହିଆଇନେରି, କାଲ୍ଲାଗାଟାରି ୱେଞ୍ଜିନ୍ନେରି, ହାନ୍ନାରି ନିଙ୍ଗେନ୍ନେରି, ପାଃନାନ୍ଗାଟାରି ରେଃଏସ୍ ସୁସମାଚାର ୱେସ୍ପା ଆଇନେ; 23ଆଟେ ଏମ୍ୱେନାଞ୍ଜି ନାଙ୍ଗେ ସନ୍ଦେହ କିଃଏଟେଃଏ ଗ୍ରହନ କିଆନେଞ୍ଜି, ଏୱାଞ୍ଜି ଦନ୍ୟ ।”
24ଜହନତି ଦୁତଙ୍ଗ୍ ହାଚ୍ଚି ଡେଗ୍ଗା ଏୱାଞ୍ଜି ଜହନ କୁଲାଟି ଦାଲ୍ଲାନିକି ୱେସ୍ପନ୍ ମ୍ରାସ୍ତେଞ୍ଜି, “ମିରୁ ଇନ୍ନା ହୁଡ଼ନ୍ ବାଗା ଚିହ୍ପି ଗର୍ରିଇନ୍ଦା ହଚାନ୍ ହାଜ୍ଜାଚ୍ଚେରି ? ଇନ୍ନା ୱ୍ଲିଉଟି ଦୁଙ୍ଗେନ୍ନି ଡୁଙ୍ଗା ? 25ଏହେଙ୍ଗ୍ ଆଃଆତେସି ମିରୁ ଇନ୍ନା ହୁଡ଼ନ୍ ବାଗା ହଚାନ୍ ହାଜ୍ଜାଚ୍ଚେରି ? ଇନ୍ନା ଏଗେଲ୍ ମର୍ଗତି ଜିରାଙ୍ଗ୍ ମେଦ୍ଦନ୍ତି ରଃଅଞ୍ଜି କୁଏଞ୍ଜିକି ? ହୁଡ଼ାଟୁ, ଏମ୍ବେନାରି ଏଗେଲ୍ ମର୍ଗତି ନେହି ଜିରାଙ୍ଗ୍ ମେଦ୍ଦେନ୍ନେରି ଅଟେ ଏୱାରି ରାହାଙ୍ଗ୍ ଆନ୍ ମାଞ୍ଜିନ୍ନେରି, ଏୱାରି ରାଜେଞ୍ଜ୍ତି ଇଡ୍ଡୁତାୱା ମାଞ୍ଜିନ୍ନେରି । 26ନାଙ୍ଗେ ୱେସ୍ତାଟୁ, ଏହେଙ୍ଗ୍ ଆତେସି ଇନ୍ନା ହୁଡ଼ନ୍ ବାଗା ହାଜ୍ଜାଚ୍ଚେରି ? ଇନ୍ନା ରଃଅଞ୍ଜି ବାବବାଦିନିକି ? ନାନୁ ମିଙ୍ଗେ ନିଜ୍ଜା ୱେସ୍ପିଞ୍ଜା, ବାବବାଦି ତାୱାଟି ଏଗେଲ୍ ନେହି କୁଏଞ୍ଜିକି । 27ଇନ୍ଦାର୍ତି କୁଲାଟି ଇଦି ଦର୍ମପୁତିତାୱା ୱ୍ରିଗାଆନ୍ନେ, ହୁଡ଼ାମୁ, ନାନୁ ନା ଦୁତନିକି ନି ନକେସ୍ ପାଣ୍ଡେଞ୍ଜା, ଏୱାଞ୍ଜି ନି ନକେସ୍ ନି ପାହେର୍ ହାମ୍ୱେର୍ କିନେଞ୍ଜି, ଇୱାଞ୍ଜି ଏ କୁଏଞ୍ଜି । 28ନାନୁ ମିଙ୍ଗେ ୱେସ୍ପିଞ୍ଜା, ଆଚାଲୁ ଟୁଟୁତାୱାଟି ପ୍ଲିଆନ୍ନି ହାବେ ଦାଲ୍ଲାତାୱାଟି ଜହନ ବେର୍ରାନାଞ୍ଜି; ଆତେସ୍ୱାଡ଼େ ମୁଲାପେନୁତି ରାଜିତାୱା ଏମ୍ବେନାଞ୍ଜି ହିତାନାଞ୍ଜି, ଏୱାଞ୍ଜି ତା ତାୱାଟି ବେର୍ରାନାଞ୍ଜି ।”
29 #
ମାତି ୨୧:୩୨; ଲୁକ ୩:୧୨ ଏମ୍ୱେନାରି ଇ ହାବେତ୍ କାତା ୱେଞ୍ଜାଚ୍ଚେରି, ଏୱାରି ଗାପ୍ଚି କିଆନ୍ ସିସ୍ଟୁଅନ୍ତି ଦାଲ୍ଲା ୱାଡ଼େ ଜହନତାୱାଟି ଡୁବନ୍ ଆନ୍ ମୁଲାପେନୁନିକି ନିଜ୍ଜା ଇଞ୍ଜାନ୍ ମାନି ଆତେରି; 30ମତ୍ର ପାରୁସି ଦାଲ୍ଲା ଅଟେ ହାଜୁ ପୁତିତି କାତା ପୁନ୍ବନ୍ତାରି ଏୱାର୍ତି ପରନ୍ ବାଗା ମୁଲାପେନୁତି ଉଦେସ ଆହେଟେଃଏ ଜହନତାୱାଟି ଡୁବନ୍ ଆହେଃଲ୍ଲାତେରି ।
31ଜିସୁ ରିହିକ୍ ୱେସ୍ତେଞ୍ଜି, “ଇ ତୁକାତି ଦାଲ୍ଲାନିକି ନାନୁ ଇନ୍ଦାର୍ ଡ଼ାହି ତୁକା କିଃଇ, ଆଟେ ଏୱାର୍ ଇନ୍ଦାର୍ ଲାକ୍କାଟି ? 32ଇମ୍ୱିନ୍ ବଦାଙ୍ଗ୍ ହାଟ୍ଟୁ ବଜାରତାୱା କକ୍ଚ୍ଚାନ୍ ତାରୁ ତାରୁ ଆର୍ଚାନ୍ ୱେସ୍ପିନ୍ନେରି, ମାମୁ ମି ରେଃଏସ୍ ହେଲୁକ୍ ଉକିତାମୁ, ମିରୁ କ୍ରାଃହାତେରି; ମାମୁ ହାଅନ୍ତି ଗାଡ଼ି କିତାମୁ, ମିରୁ ଡ଼ିଃଆତେରି, ଏୱାରି ଏୱାର୍ତି ବଦାଙ୍ଗ୍ ଲାକ୍କାଟି । 33ଇନାକି ଡୁବନ୍ ହିନ୍ନି ଜହନ ୱାନାହି ରୁଟି ତିଃନ୍ନାତେଞ୍ଜି ଅଟେ ଅଙ୍ଗୁରନିରୁ ଉଃନ୍ନାତେଞ୍ଜି, ଆଟେ ମିରୁ ୱେସ୍ପିଞ୍ଜେରି, ଏୱାଞ୍ଜିକି ବୁତ ଆହାନ୍ନେ । 34କୁଏଞ୍ଜ୍ ମ୍ରିଃଏଞ୍ଜି ୱାନ୍ ତିନ୍ବା ଉନ୍ବା କିନ୍ନେଞ୍ଜି, ଆଟେ ମିରୁ ୱେସ୍ପିଞ୍ଜେରି, ହୁଡ଼ାଟୁ, ଇୱାଞ୍ଜି ରଃଅଞ୍ଜି ରାକାଗାଟାଞ୍ଜି ଅଟେ କାଲୁଗାଟାଞ୍ଜି, ସିସ୍ଟୁଅନ୍ତାଞ୍ଜି ଅଟେ ପାପିଗାଟାର୍ତି ତଡ଼େଞ୍ଜି । 35ମତ୍ର ଏମ୍ୱେନାରି ମୁଲାପେନୁତି ଗ୍ୟାଁନ ଗ୍ରହନ କିଆନ୍ନେରି, ଏୱାର୍ତି ପରନ୍ତାୱା ତା ନିଜ୍ଜା କୁଲା ତଞ୍ଜେନ୍ନେ ।”
ପାରୁସି ସିମନ ଇଡ୍ଡୁତାୱା ଜିସୁ
36ଆଟେ ପାରୁସିଙ୍ଗ୍ତାୱାଟି ରଃଅଞ୍ଜି ଜିସୁନିକି ତା ଡ଼ାହି ତିନ୍ବା ଉନ୍ବା କିଅନ୍ ବାଗା ଆର୍ତେଞ୍ଜି । ଏଦିମ୍ୱା ଏୱାଞ୍ଜି ପାରୁସି ଇଡ୍ଡୁତାୱା ହାଜ୍ଜାନାହି ଉନ୍ବନ୍ ବାଗା କକ୍ତେଞ୍ଜି । 37#ମାତି ୨୬:୭; ମାର୍କ ୧୪:୩; ଜହ ୧୨:୩ଆଟେ ହୁଡ଼ାଟୁ, ଏ ନାଜୁତାୱା ରଣ୍ଡି ପାପିଗାଟି ଆଚାଲୁ ମାଚ୍ଚେ; ଜିସୁ ଏ ପାରୁସିତି ଇଡ୍ଡୁତାୱା ଉନ୍ବନ୍ ବାଗା କକ୍ଚ୍ଚାନ୍ନେଞ୍ଜି, ଏଦା ପୁଞ୍ଜାନାହି ଏଦି ରଣ୍ଡା କାଞ୍ଚତାୱା ନେହିଗାନ୍ଦା ନିଜ୍ଜୁ ତାଚ୍ଚାନ୍, 38ବେତଟ୍ ୱାନ୍ ଏୱାଞ୍ଜ୍ତି କାଟ୍କା ରେଃଏସ୍ ଡିଡ୍ଡାନ୍ ଡ଼ିଆନ୍ କାଣ୍ଡ୍ରୁକ୍ ଡ଼ାହି ଏୱାଞ୍ଜ୍ତି କାଟ୍କା ଉସାନ୍ ତା ତ୍ଲାଉତି ତ୍ଲାଏର୍କା ଡ଼ାହି ଏୱା ତାସ୍କନ୍ ମ୍ରାସ୍ତେ, ଆଟେ ଜିସୁତି କାଟ୍କାତିଦି ଜୁମ୍ୱି ଜୁମ୍ୱି ଏ ନେହିଗାନ୍ଦା ନିଜ୍ଜୁ ମିସ୍ତେ । 39ଏଦା ହୁଡ଼ାନ୍, ଇମ୍ୱିନ୍ ପାରୁସି ଏୱାଞ୍ଜିକି ଆର୍ଚାଚ୍ଚେଞ୍ଜି, ଏୱାଞ୍ଜି ଏଲୁ ଏଲୁଟି ୱେସ୍ତେଞ୍ଜି, “ଇୱାଞ୍ଜି ଜଦି ବାବବାଦି ଆନ୍ନେଞ୍ଜିମା, ଏହେଙ୍ଗ୍ ଆତେସି ତାଙ୍ଗେ ଏମ୍ୱେ ଡିଗେନ୍ନେ, ଏଦି ଏମ୍ୱେ ଅଟେ ଇନିମିଡିତି ଆଚାଲୁ, ଇଚ୍ଚେସି ଏଦି ତ ପାପିଗାଟାଦି, ଏଦା ପୁନ୍ନେଞ୍ଜିମା !”
40ଜିସୁ ତାଙ୍ଗେ ୱ୍ଡେପ୍ଚ୍ଚି ୱେସ୍ତେଞ୍ଜି, “ସିମନ, ନିଙ୍ଗେ ନାନୁ ହିତେ ୱେସ୍ପନ୍ ମାନ୍ନେ ।” ସିମନ ୱେସ୍ତେଞ୍ଜି, “ଗ୍ରାପାଗାଟାତି ୱେସ୍ତାମୁ ।”
41ରଃଅଞ୍ଜି ସକାରତାୱାଟି ରିଃଆର୍ ରିଡ଼ା ଅଆଚ୍ଚେରି, “ରଃଅଞ୍ଜି ସେ ସଇ ଦିନାତି ଟାକ୍କାଙ୍ଗ୍ ଆଟେ ରଃଅଞ୍ଜି ରିକୁଡ଼ି ଦାସା ଦିନାତି ଟାକ୍କାଙ୍ଗ୍ ରିଡ଼ା ଅଆଚ୍ଚେଞ୍ଜି । 42ୱ୍ଡେପନ୍ ବାଗା ଏୱାର୍ ରେଃଏସ୍ ଇନ୍ନା ହେଃଲ୍ଲାତାୱାଟି ସକାର ଏ ରିଃଆର୍ତି ଉଦେର୍ ପିହାହିତେଞ୍ଜି । ଏଦାକି ଏୱାରି ତାୱାଟି ଏମ୍ୱେ ତାଙ୍ଗେ ଏଗେଲ୍ ଜେଡା କିନେ ?”
43ସିମନ ୱେସ୍ତେଞ୍ଜି, “ନାନୁ ଏଲୁ କିମାଃଇ, ଏୱାଞ୍ଜି ଇନ୍ଦାର୍ତି ଉଦେର୍ ଏଗେଲ୍ ପିହ୍ତେଞ୍ଜି, ଏୱାଞ୍ଜି ।” ଜିସୁ ତାଙ୍ଗେ ୱେସ୍ତେଞ୍ଜି, “ନିନୁ ନିଜ୍ଜାନେଃଏ ଟିକ୍ ବିଚାର କିଆଞ୍ଜି ।” 44ଆଟେ ଜିସୁ ଏ କୁଆଲୁନିକି ହୁଡ଼ାନ୍ ସିମନନିକି ୱେସ୍ତେଞ୍ଜି, “ଇ କୁଆଲୁନିକି ହୁଡ଼େଞ୍ଜି ?” ନାନୁ ନି ଇଡ୍ଡୁଇନ୍ଦା ୱାତେ, ନିନୁ ନା କାଟ୍କା ବାଗା ଏଜୁ ହିଆଦାଃଆତି, ମତ୍ର ଇଦି ନାଙ୍ଗେ କାଣ୍ଡ୍ରୁକ୍ ଡ଼ାହି ନା କାଟ୍କା ଉସାନ୍ ତା ତ୍ଲାଉ ଡ଼ାହି କାଟ୍କା ହମ୍ବାଦାତେ । 45ନିନୁ ନାଙ୍ଗେ ଜୁମ୍ୱିଦାଃଆତି, ମତ୍ର ନାନୁ ଇଡ୍ଡୁ ଲାଃଇ ୱାତି ତାୱାଟି ଇଦି ନା କାଟ୍କା ଜୁମ୍ବନ୍ତିକି ୱାହା ହେଃଲ୍ଲେ । 46ନିନୁ ନା ତ୍ଲାଉତାୱା ନିଜ୍ଜୁ ମିସ୍ପନ୍ ହିଆଦାଃଆତି, ମତ୍ର ଇଦି ନା କାଟ୍କାତାୱା ନେହିଗାନ୍ଦା ଆଅନ୍ତି ନିଜ୍ଜୁ ମିସ୍ତାତେ । 47ଏଦାବାଗା ନାନୁ ନିଙ୍ଗେ ୱେସ୍ପିଞ୍ଜା, ଇଦାଡ଼୍ତି ଗାପ୍ଚି ପାପ ମାକ୍ସାଡ଼ି ଆନ୍ନେ, ଇନାକି ଏଦି ଏଗେଲ୍ ଜେଡା କିଆତେ; ଇନ୍ଦାରିକି ହିତେ ମାକ୍ସାଡ଼ି ହିଅନ୍ ଆଇନେ, ଏୱାଞ୍ଜି ହିତେ ଜେଡା କିଆନେଞ୍ଜି ।
48ଆଟେ ଜିସୁ ଏ ଆଚାଲୁନିକି ୱେସ୍ତେଞ୍ଜି, “ନି ପାପ ହାବେ ମାକ୍ସାଡ଼ି ଆନ୍ନେ ।”
49ଏଦିମ୍ୱା ଜିସୁ ଡ଼ାହି ତିନ୍ବନ୍ତିକି କକ୍ଚାଚ୍ଚି ଦାଲ୍ଲା ତା ତା ଲାଃଇ ଏଲୁ କିଆନ୍ ୱେସ୍ପନ୍ ମ୍ରାସ୍ତେରି, “ପାପ ୱାଡ଼େ ମାକ୍ସାଡ଼ି କିନ୍ନେଞ୍ଜି ଜେ, ଇୱାଞ୍ଜି ଏମ୍ୱେନାଞ୍ଜି ?”
50ମତ୍ର ଜିସୁ ଏ ଆଚାଲୁନିକି ୱେସ୍ତେଞ୍ଜି, “ନି ମାଞ୍ଜାଡ଼ି ନିଙ୍ଗେ ନେହି କିଆଞ୍ଜାନେ ଲତୁଟି ହାଲ୍ମୁ ।”
Currently Selected:
ଲୁକ 7: DWK
Highlight
Share
Compare
Copy
Want to have your highlights saved across all your devices? Sign up or sign in
© 2023 NLCI CC BY-NC-ND 4.0
