Yâng 1

Panôic ba

(1:1-18)

Panôic gilaic jiơng anưk mưnuix

1Phunti hu Panôic,#1:1 Panôic: Dalam xap Hi-lap nạn Logos, ar nạn panôic đôm. Dalam ilimô Hi-lap, akhar ni đôm ka panôic đôm gam thangka dalam mat ar, thong đôm ka camrek tatheh abih gruk thong thit tamư dalam alam. Dalam agal rwah Yo Thaic, Panôic nan rapanưh anưd bruk padak padang. Panôic mưdok thong Pô Lingik, thong Panôic nạn Pô Lingik. 2Mưng phunti, Bhô dok thong Pô Lingik. 3Rim pakar jang kaywa Bhô padak padang, ôh tha pukar halei bihu padak padang bloh ôh kaywa di Bhô. 4Dalam Bhô hu gruk diup, gruk diup nạn tanrak hadah ka mưrôxak. 5Tanrak hadah pachang dalam bhôlir, min bhôlir ôh takabal#1:5 ôh takabal: Ngan nạn ôh cruh padam bihu. tanrak hadah.

6 # Mat 3:1; Mag 1:4; Lu 3:1,2. Hu tha urang bihu Pô Lingik pađar mưrai angan nạn Yâng. 7Ong mưrai thong athal mưnuh tha rakaxan piêh ngak kaxan ka tanrak hadah piêh nhơ di ong abih drei jang dial. 8Êng ong ôh njaup nạn tanrak hadah, min ong mưrai piêh ngak kaxan ka tanrak hadah. 9Sani nạn tanrak hadah biak krung hu mưrai dunya piêh pachang hadah abih drei. 10Panôic mưdok dalam dunya thong dunya krung bihu padak padang kaywa Bhô, min dunya ôh krưn thau Bhô. 11Bhô mưrai dalam diya Bhô, min bôl Bhô ôh takabal Bhô. 12Min pathar pathar urang halei takabal Bhô, ar nạn dial angan Bhô, yơ Bhô ƀai brei ka khol nhu gon gilaic hajiơng anưk bik Pô Lingik, 13nạn dôm urang bihu mưnưk tabiak ôh njaup kaywa rilo darah, ngan kaywa ragơh tathrưg mưyut mưyau, ngan kaywa jamal mưnuix, min kaywa Pô Lingik.

14Panôic krung hu gilaic jiơng mưnuix, diup krưh khol drei, bak karun hanim thong tantu. Khol drei krung hu mong puja xêh mưlang Bhô, biak nạn xêh mưlang Anưk Ralai mưrai mưng Amư. 15Yâng ngak kaxan ka Bhô thong pablo laic: “Sani nạn Dê dahlak krung hu đôm: ‘Dê mưrai hadei di dahlak ƀlwak hơl dahlak, kaywa Bhô takrung hu dahlau dahlak.’” 16Thong mưng halau mưhê xarai anưd Bhô, abih khol drei jang tôk bihu karun hanim bik paƀlwak karun hanim. 17Kaywa hakum jakar krung bihu ƀai brei kaywa Mô-se, dok karun hanim thong tantu mưrai mưng Pô Yê-su Krist. 18Ô ka hu thei ƀôh Pô Lingik, ciêt Anưk Ralai dok dalam Amư nạn Dê krung hu sahadah Amư ka khol drei thau.

Pô Yê-su thrap gap rapajan

(1:19-51)

Rapajan Yâng Bap-tit

(Ma-thi-ơ 3:1-12; Mag 1:1-12; Lu-ka 3:1-18)

19Sani nạn panôic kaxan Yâng: Tuk dôm urang Yo Thaic pachai dôm gru mưliêng thong mưnuix Lê-vi mưng dhan Yê-ru-sa-lem mưrai tanhi ong laic: “Ong nạn thei?” 20yơ ong tapi tapak pađang akhan, ôh dađaup bađang haget trah. Ong đôm: “Dahlak ôh njaup nạn Dê Krist.” 21Khol nhu gilaic tanhi: “Nan yơ ong nạn thei? Hu njaup nạn Ê-li lei?” Ong thuuk: “Ôh njaup.” “Yau nan ong hu njaup nạn pakat hôr lei?” Ong thuuk: “Ôh njaup.” 22Khol nhu đôm: “Nan yơ ong nạn thei piêh khol dahlak pathau vơk ka dôm urang krung hu pachai khol dahlak? Ong tao êng drei nạn thei?” 23Ong thuuk:

“Dahlak nạn xap mưnuix prêu tagôk dalam bhum kamrang:

‘Xang ngak ka tapak jalan Pô’,

yau panôic hôr Ê-sai krung hu đôm.” 24Dôm urang bihu pachai mưrai bha di kavôm Pha-ri-si, 25khol nhu tanhi ong laic: “Mưyah ong ôh njaup nạn Dê Krist, ôh njaup nạn Ê-li, lijang ôh njaup nạn pakat hôr, nan ka habar ong gilaic ngak ƀap-tem?” 26Yâng thuuk: “Dahlak ngak ƀap-tem mưng ia, min hu tha Dê krưh dok di krưh khol hư min khol hư ôh krưn thau; 27Dê nan mưrai hadei di dahlak, dahlak ôh lek thamgôn taleh kwai kalik jwak ka Bhô.” 28Dôm bruk ni mưjiơng tabiak tak Ƀêt-tha-ni, gah dêh krong Yô-đar, libik Yâng ngak ƀap-tem.

Pabo Anưk anưd Pô Lingik

29Harei hadei, Yâng ƀôh Pô Yê-su mưrai tom drei, yơ đôm laic: “Dêh Pabo Anưk anưd Pô Lingik, nạn Dê ramik danuh glaic dunya nao! 30Sani nạn Dê dahlak krung hu đôm: ‘Dê mưrai hadei di dahlak, kaywa Bhô takrung ƀlwak hơl dahlak, kaywa Bhô takrung dahlau dahlak.’ 31Êng dahlak takrung ôh thau Bhô, min dahlak mưrai ngak ƀap-tem mưng ia piêh Bhô bihu sahadah ka bôl I-sra-ên.” 32Yâng lijang ngak kaxan laic: “Dahlak krung hu ƀôh Pô Nưbi Ginrơh mưng thôr riga jrang trun yau ganap katrau đam ngok Bhô. 33Êng dahlak takrung ôh thau Bhô, min Dê krung hu pachai dahlak ngak ƀap-tem mưng ia hu bican thong dahlak: ‘Dê mưca hư ƀôh Pô Nưbi Ginrơh jrang trun, biđang tagôk di ngok, êng nạn Dê ngak ƀap-tem mưng Pô Nưbi Ginrơh.’ 34Dahlak krung hu ƀôh thong ngak kaxan laic, sani nạn êng Anưk Pô Lingik.”

Dôm anưk xêh Pô Yê-su mưng tamưrơp

35Harei hadei, Yâng gilaic dang tak nan thong dwa dalam dôm anưk xêh drei. 36Tuk ƀôh Pô Yê-su nao thrang tapa, ong đôm: “Dêh, Pabo Anưk anưd Pô Lingik!” 37Dwa anưk xêh pang ong đôm, binhêt nao tui Pô Yê-su. 38Pô Yê-su gaic vơk, ƀôh khol nhu tui yơ tanhi: “Khol hư dwah thei?” Khol nhu thuuk: “Raƀi (ar nạn gru), Gru krưh mưdok pak halei?” 39Bhô bican: “Xang mưrai iơk.” Khol nhu mưrai iơk libik Bhô mưdok, thong mưdok vơk thong Bhô dalam harei nan. Tuk nan nôic tuk pāk biêr harei. 40Tha dalam dwa urang krung hu hamit Yâng đôm thong nao tui Pô Yê-su, nan nạn Ar-rê, adei Si-môn Phi-e-rơ. 41Dahlau yatha, ong dwah xaai drei nạn Si-môn Phi-e-rơ thong đôm: “Khol dahlak krung hu gōk Dê Mê-si-a” (ar nạn Dê Krist). 42Ong ba xaai drei mưrai tom Pô Yê-su. Pô Yê-su mong Si-môn thong bican: “Hư nạn Si-môn anưk Yâng#1:42 Yâng: Dalam tha thanôn blah vak tangin nạn Yô-na., hư mưca bihu iêu nạn Sê-pha”, ar nạn Phi-e-rơ#1:42 Dwa angan Sê-pha (dalam xap A-ram) thong angan Phi-e-rơ (dalam xap Hi-lap) jang hu ar nạn “patau”..

Pô Yê-su iêu Phi-lip thong Na-tha-na-ên

43Harei hadei, Pô Yê-su ưng nao tapa nưgar Ga-li-lê. Bhô dwah Phi-lip thong bican laic: “Xang tui Ita.” 44Phi-lip nạn mưnuix Ƀêt-sai-đa, thubik mưdin thong Ar-rê thong Phi-e-rơ. 45Phi-lip dwah Na-tha-na-ên thong đôm: “Khol dahlak krung hu gōk Dê bloh Mô-se krung hu vak dalam hakum jakar, thong dôm pakat hôr lijang hu vak vơk; nan nạn Pô Yê-su, anưk Yô-sep, tak dhan Na-xa-ret.” 46Na-tha-na-ên đôm: “Hu kabha haget siam tabiak mưng Na-xa-ret bihu habar?” Phi-lip đôm: “Xang mưrai iơk!” 47Pô Yê-su ƀôh Na-tha-na-ên mưrai tom Bhô yơ đôm ka ong laic: “Sani nạn tha urang I-sra-ên biak, dalam ong ôh hu kabha lor kator.” 48Na-tha-na-ên pathau: “Ngak habar Gru thau dahlak?” Pô Yê-su thuuk: “Dahlau di tuk Phi-lip iêu hư, Ita krung hu ƀôh hư dok ala phun hara.” 49Na-tha-na-ên đôm: “Pathau Gru, Gru nạn Anưk Pô Lingik! Gru nạn patao bôl I-sra-ên!” 50Pô Yê-su thuuk: “Kaywa Ita đôm Ita ƀôh hư dok ala phun hara nan ka hư dial njaup halei? Mưca hư ƀôh dôm bruk prong hơl vơk.” 51Bloh Bhô bican: “Biak jơh, Ita đôm thong khol hư: Mưca khol hư ƀôh thôr riga pơh tabiak thong umat Pô Lingik trun tagôk ngok Anưk Mưnuix.”

Currently Selected:

Yâng 1: CJM2024

Highlight

Copy