Yâng 2

Rapajan anưd Pô Yê-su tak Ga-li-lê thong Yu-đê

(2:1 – 12:50)

Đam likhah tak Ka-na

1Harei ya klau, hu tha đam likhah tak dhan Ka-na dalam nưgar Ga-li-lê; amek Pô Yê-su hu ƀok tak nan. 2Pô Yê-su thong dôm anưk xêh Bhô lijang bihu daa tamưbha đam payak. 3Tuk alag xrok, amek Pô Yê-su đôm thong Bhô: “Khol nhu ôh dok alag tra.” 4Pô Yê-su thuuk: “Pathau muk, bruk ni hu tavak tave haget tal muk thong dahlak? Tuk vag dahlak ô ka tal.” 5Amek Bhô đôm thong dôm urang ragxa laic: “Ong nan pađar haget yơ xang ngak yau nan.” 6Tak nan hu nam boh blu mưng patau angui ka bruk jamưah tui adat caƀat Yo Thaic, yāup boh padang bihu dwa klau dhung#2:6 dhung: Yāup dhung padang nôic 38 lit. ia. 7Pô Yê-su pađar khol nhu: “Xang tuh ia ka bak dôm blu ni.” Khol nhu tuh bak tal pabah. 8Bloh Bhô gilaic pađar: “Urak ni xang jhok tabiak, ba nao ka urang khik mong đam payak.” Nan yơ khol nhu ba nao ka urang nan. 9Tuk urang khik mong đam payak tavan ia krung hu thrơh jiơng alag bloh (min ôh thau alag mưrai mưng halei, dok dôm urang ragxa krung hu jhok ia yơ thau), ong iêu pacei mưtau 10thong đôm: “Abih drei jang payak alag bingi dahlau, bloh tuk mưnuix urang mưnhum ralô pajơ mưng payak alag nje hơl, min xaai yơ khik alag bingi ka tal urak ni.” 11Sani nạn nưm crih ya tha Pô Yê-su krung hu ngak tak dhan Ka-na dalam nưgar Ga-li-lê, thong sahadah xêh mưlang Bhô birau mưng dôm anưk xêh Bhô. 12#Mat 4:13.Hadei di nan, Bhô thubik thong amek, dôm adei, thong dôm anưk xêh trun nao dhan Ka-ƀê-na-um, thong dok tak nan hadôm harei.

Pô Yê-su pagah hacih Huji

(Ma-thi-ơ 21:12-13; Mag 11:15-17; Lu-ka 19:45-46)

13Rija Gan Tapa bôl Yo Thaic jek tal, Pô Yê-su nao tagôk dhan Yê-ru-sa-lem. 14Bhô ƀôh dalam Huji hu dôm ra pablei limo, pabo, katrau thong dôm urang xalih jiên dok tak nan. 15Bhô pacan tha ƀek havei mưng talei, tiaup abih tabiak truh huji, takung bih pabo, limo; thaic jiên anưd ra xalih jiên thong blơk paban khol nhu. 16Bhô pađar dôm urang pablei katrau laic: “Xang ramik klāk dôm paka truh libik ni, jôi ngak ka thang Amư Ita jiơng libik pablei talei.” 17Dôm anưk xêh Bhô kanal vơk panôic krung hu vak: “Tian tatang tiak ka thang Pô cuh pađiak dahlak.” 18Dôm urang Yo Thaic tanhi Bhô: “Gru hu nưm crih halei piêh xakrưn ka khol dahlak ƀôh Gru hu gon ngak kabha ni?” 19#Mat 26:61; Mat 27:40; Mag 14:58; Mag 15:29.Pô Yê-su thuuk: “Xang yah huji ni, dalam klau harei mưca Ita darap vơk.” 20Mưnuix Yo Thaic gilaic đôm: “Mưnuix urang darap huji ni dalam pāk pluh nam thun, min Gru mưca darap vơk dalam klau harei habar?” 21Min Bhô đôm ka huji anưd rup pabhap Bhô. 22Ywa nan ka, tuk Bhô mưng lôg mưtai diup vơk, dôm anưk xêh kanal Bhô krung hu đôm kabha ni, yơ dial Agal Nưbi thong panôic Pô Yê-su krung hu bican.

23Dalam tuk Pô Yê-su dok tak dhan Yê-ru-sa-lem dalam binhôr Rija Gan Tapa, ralô urang ƀôh dôm thunau crih Bhô ngak yơ dial angan Bhô. 24Min Pô Yê-su ôh jao kloh drei ka khol nhu kaywa Bhô thau pajip abih drei. 25Bhô ôh hajat thei ngak kaxan ka urang halei ô, kaywa êng Bhô thau pajip abih kabha dalam tian mưnuix.

Currently Selected:

Yâng 2: CJM2024

Highlight

Copy