Luk 12

Sotorko ar hub

(Mothi 10:26-27)

1Niâ bhitârigi hajar hajar âdmi jaoraketeʹ miʹhor ar miʹhor cetanre ujugoʹlaʹ lagonako. Tâkhni Jisute palhere Aiʹren celako metakeʹkoe, "Forisikoaʹ khâmi khoiʹ sabdhanoʹpe. Ana khâmido hoʹkana angkoaʹ bhonḍami.#12:1Khâmi Piṭhâ banoaʹ holongre khâmi maʹsanako jate piṭhâ fuluʹa. 2Jahanaʹgi nangka dapal bânuʹa, akaṭaʹdo oho sodoroʹa, ar akaṭaʹgi nangka baido bânuʹa, akaṭaʹdo oho baṛeʹa. 3Nutre akako menkadape anado marsalre atenoʹhaʹ. Bai jagare akako luturṭheʹ khayakhoyoledape anado chad cetan khoiʹ procar hoʹhaʹ."

Eken Issorgi botoroipe

(Mothi 10:28-31)

4"Gateko Ingren, Ingte ape metapekâning, ekekodo eken hormogi goiʹ dareʹako ar ana bâgiketeʹ jahanaʹ bang rikâ dareʹako angkodo alo botorokoape. 5Tahale eke botoroipehaʹ, Ingte ape ana lâiopekâning. Ape goiʹ tayom norokre giṛipeyaʹ khomota ekeoaʹ menaʹtaia, Ânido botoroipe.

6"Moreṭeʹ bagro ki eken bar paisate bang âkringoʹako? Taoreho angkodo miṭiʹho Issorte bang hiringkoe. 7Emon ki, apeyaʹ bohoʹnaʹ upkoho Âniaʹdo lekha menaʹtaia. Alo botoroʹape aima bagro khoiʹho apeyaʹ dam aima bisigitapeya.

Jisu laʹte alo giugoʹape

(Mothi 10:32-33; 12:32; 10:19-20)

8"Ingte ape metapekâning, jahetigi âdmiko samnere Ing sikâringe Âdmi Hoponteho ânido Issorren sorgodutko samnere sikâriyiheʹ. 9Kheʹ jahetigi Ing âdmiko samnere osikâringe ânido Issorren sorgodutko samnere osikâr hoʹhaʹ.

10"Âdmi Hoponaʹ biruddhe jahegi jahan katha menkheʹ ânido map ma hoʹhaʹ, kheʹ jahegi Pobitro Attaoaʹ nindilekheʹ ânido oho map ma hoʹa.

11"Âdmite ape jâkhni somaj oraʹre ar sasoniʹṭheʹ ar khomotasâli âdmiko samnere idipekohaʹ, tâkhni kalkate nijeoaʹ pokkhe menpehaʹ ana bisoite alo cintuʹape. 12Pobitro attatigi ape cetʹopeheʹ ana somai itâʹ menaʹ ucit."

Bemha dhuni âdmikoaʹ golpo

13Tayomte âdmiko tala khoiʹ miṭiʹ âdmite Jisu metakidie, "Guru, âlingren baba âling laʹte akaṭaʹ sompotti dohoṭhokade, ingren boiha ing suliʹ ana hâṭingelaʹ metai."

14Kheʹ Jisute âni metakidie, "Bicâraʹ se ape talare sompotti hâṭingketeʹ makoaʹ odhikar Ingdo ekete makâdingako?" 15Inâtayom Jisute âdmiko metakeʹkoe, "Sabdhan, sanam lakanaʹ lobh khoiʹ nije bacoʹpe, karon aima sompotti tahenreho angkoaʹ jiuido ana cetanre bang nirbhoroʹtakoa."

16Niâtayom Jisute âdmiko cetʹoko laʹte niâ cetʹaʹ lopor menkede, "Jahe miṭiʹ dhuni âdmioaʹ khetre aima fosol holentaya. 17Niâlaʹte âni mon monte cintuʹlaʹ lagone, 'Itâʹ cikiying? Ingâʹ to fosol doheyaʹ jaga bânuʹtingâ.'

18Accha, ing miṭiʹ kâminghâʹ, 'Ingâʹ kuṭhliʹko râputʹketeʹ marang marang naoa gola teyaringhâʹ ar ingâʹ sanam fosol doheinghâʹ. 19Tayomte ingdo nijegi metoʹinghâʹ, am laʹtedo aima bochor laʹte aima jinis jaora menaʹa. Jiruʹme, jomme nuime ar huboʹme.'

20'Kheʹ Issorte âni metakidie, 'E bemha! Tihin nindâgi amaʹ jiuido enge hoʹhaʹ. Tahale akako jinis am jaorakadam anakodo ekeyaʹ hoʹhaʹ?'

21"Jahegi aiʹlaʹte dhon jaoreye kheʹ Issorṭheʹdo dhuni bangkane, ânioaʹ obostha nengkagi hoʹtaia"

Alo cintuʹape

(Mothi 6:25-34; Luk 12:22-31)

22Tayomte Jisute Aiʹren celako metakeʹkoe, "Niâlaʹte Ingte ape metapekâning, 'Itâʹ jompehaʹ mente jiuinaʹ bisoite, se Itâʹ sorogpehaʹ mente hormonaʹ bisoite alo bhabnoʹape. 23Karon jomaʹ khoiʹdo jiui ar lugri khoiʹdo hormo maranga. 24Kâuâoaʹ katha cintuʹpe, angkoto merho bang merako, getʹho bang gedako, angkoaʹdo bhanḍarho bânuʹtakoa, kuṭhliʹho bânuʹtakoa, kheʹ Issorte angkoho jomaʹ makoe. Ar apedo cereko khoiʹho tiniʹgi bang marangape! 25Ape talare eke cintâ bhabnaketeʹ aiaʹ âyu miʹ ghonṭa baṛho dareʹtene? 26Tahale niâ samanno kâmi judi ape bang rikâ dareʹape tahale eṭaʹ bisoiko laʹtedo cekelaʹ cintuʹape?

27"Cintâketeʹ lelpe, baha alkate hara rakapa. Anako to bang khaṭoʹako, anakonaʹ lugri cithriʹho bang baneyako. Kheʹ Ingte ape metapekâning, Solomon Raja nâniʹ jakjomok talare taheketeʹho niâkonaʹ miṭiʹ lakaho aiʹdo sajo bang darekane. 28Maṭhre akako ghas tihin menaʹa kheʹ anado gapa culhâre jeretʹ hoʹhaʹ, ana judi Issor nangkaketeʹ sajeye tahale he thoṛa pâtyuonkhoiʹko apedo tiniʹ ḍherketeʹ Ânite sajopeheʹ!

29"Ar itâʹ jompehaʹ, itâʹ nuipehaʹ niâkodo alo bhabnoʹape se alo cintuʹape. 30Karon dhârtiniʹ Ojihudiko niâko jinis nam laʹte bestoʹako, kheʹ aperen Baba Issordo baṛeye je, niâko sanam jinisnaʹgi apeyaʹdo dorkar menaʹa. 31Ana khoiʹ borong Issoraʹ Rajjonaʹ bisoite bestoʹpe, tahale nakodo ape ma hoʹhaʹ.

Sorgore dhuniʹpe

(Mothi 6:19-21)

32"E Ingren kâṭiʹ bhiṛi pâl, alo botoroʹape, karon aperen Babaoaʹ icchâ niâkana je, Aiaʹ rajjo Ânite ape mapeheʹ. 33Apeyaʹ bisoi sompotti âkringketeʹ rangeʹ oreʹonkhoiʹ danokope. Nijelaʹte nangkanaʹ ṭhepnaʹ beg saprepe, akaṭaʹdo tisho bang mareʹa, Sorgore nangkanaʹ dhon jaorepe akaṭaʹdo oho caboʹa, akaredo komroho bang hijuʹako, tejoho bang nosṭeyako. 34Cekelaʹbang akare apeyaʹ dhon aṛegi apeyaʹ monho tahentapehaʹ.

Sanam somai sapro tahenpe

35"Apeyaʹ ḍaṛa tolketeʹ ar ḍibiâ jolketeʹ sapro tahenpe. 36Apedo nangkankhoiʹ âdmi laka hoʹpe ekedo akoren mâlik laʹte ḍahar bengetʹketeʹ tahenako, jate âni baplanaʹ bhoj khoiʹ âcur hiʹketeʹ silping dalkheʹgi angkote duâr jhiʹ dareoiako. 37Mâlikte jeko kâmi âdmi bengetʹ tahente lelkoheʹ, angko kâmi âdmido dhonnogiâko. Ingte ape sârigi metapekâning, âni mâliktedo aiaʹ ḍaṛare lugri tolketeʹ angko khaokolaʹte duruʹkoheʹ ar aiʹtigi angkodo seoa jotonkoheʹ. 38Judi tala nindâ se nindânaʹ mucitʹ hate mâlikte hiʹketeʹ engkagi lelkoe, tahale kâmi âdmikodo dhonnogiâko.

39"Niâ katha ape baṛe dohepe, komro aka somai hijuʹheʹ oraʹren mâlik judi ana baṛeyehoteʹ tahale bengetʹ tahenehoteʹ ar âni komro aiaʹ oraʹrigi oho bolosoyehoteʹ. 40Apeho sapro tahenpe, karon aka hiluʹ ape gunânoʹpehaʹ je Ânido oho hijuʹe, inâ hiluʹgi Âdmi Hopondo hijuʹheʹ."

Ekekane pâtyuyuniʹ kâmi âdmido

(Mothi 24:45-51)

41Tâkhni Pitor menkede, "Probhu, amte ki niâ cetʹaʹ lopor ale metalekanam, se sanamkhoiʹ makokanam?"

42Uttorre Probhu menkede, "Âni pâtyuyuniʹ ar geni kâmi âdmi ekekane, ekedo mâlikʹte âiʹren kâmi âdmiko ṭhik somaire jomaʹ hâṭingketeʹ makoaʹ bhar maiheʹ? 43Âni kâmi âdmido dhonnogie, ekedo âiʹren mâlik hiʹketeʹ angka kâmite leleye. 44Ingte ape sârigi metapekâning, âni mâlikte aiaʹ sanam bisoi sompottinaʹ bhar âni maiheʹ.

45"Kheʹ âni dâsi judi mon monte mene, Ingren mâlikdo hijuʹte dirumoʹheʹ anate âni kâmi âdmitedo kâmi âdmiko dalkolaʹ ar jom nu tayom pâurâ nuketeʹ nisuʹe. 46Tahale âni kâmi âdmi aka hiluʹ ar aka somai oho asoʹe, ana hiluʹ ar ana somairigi âniren mâlikdo hijuʹheʹ, ar ânido bar ṭukrâketeʹ binpâtyuonkhoiʹaʹ talare ânioaʹ jagado ṭhiktaiheʹ.

47"Ekeṭaʹ kâmi âdmi aiʹren mâlikaʹ icchâ baṛeketeʹho bang saprokane, se mâlikaʹ icchâ laka bang kâmikade, ânido aima sâsti namheʹ. 48Kheʹ ekedo begor baṛeteʹ sâsti namaʹ kâmikadeʹ, ânido thoṛagi sâsti namheʹ. Ar jahegi ḍher ma hokana, âniṭheʹ khoiʹdo ḍhergi koi hoʹhaʹ ar ekedo ḍher bhar ma hokana âdmiko âniṭheʹ khoiʹdo ḍhergi koikohaʹ."

Miʹhor ar miʹ horaʹ biruddhore

(Mothi 10:34-36)

49"Ingdo niâ dhârtire sengel jollaʹ hiʹkâning. Ingdo asoʹkâning niâdo joloʹlaʹ lagokana. 50Ingdo miṭiʹ bâptisma engelaʹ hoʹtinghâʹ, ar ana tin dhâbiʹ bang hoʹa in dhâbiʹ Ingâʹ kosṭo oho caboʹtingâ. 51Apedo itâʹ monedape, Ingtedo dhârtire sânti mapelaʹte hiʹkâning? Bang, anado bang, Ingtedo sânti mapelaʹtedo bang hiʹkâning borong âdmiko talare bibhet ghoṭe laʹte hiʹkâning. 52Nit khoiʹ miṭiʹ oraʹren more hor hâṭinggenkohaʹ, pe hor bar horaʹ biruddhe ar bar hor pe horaʹ biruddhe,

53Angkodo nangka hâṭingoʹkohaʹ botdo hoponaʹ biruddhe

ar hopontetʹdo botaʹ biruddhe.

Engatʹdo hoporaoaʹ biruddhe

ar hoporatdo engataʹ biruddhe.

Anhardo kiminaʹ biruddhe

ar kimindo anharaʹ biruddhe caʹkohaʹ."

Somai bujhilaʹ hoʹhaʹ

(Mothi 16:2-3)

54Ana tayom Jisute âdmiko metakeʹkoe, "Ape pachya hate bâdri lelkheʹgi menape, 'Daʹ hijuʹkana,' ar anagi hoʹa.' 55Arho dâkhinnaʹ hoikheʹ menape, 'Garamheʹ, ar anagi hoʹa.' 56Apedo bhonḍokanape! Apedo dhârti ar sermanaʹ ceharanaʹ ortho bujhu dareʹape, kheʹ niâ bortoman somainaʹ obostha bujhu bang dareʹape, nado alkanaʹ?

Somossanaʹ mimangsepe

(Mothi 5:25-26)

57"Akaṭaʹdo ṭhikgiâ, anado ape nijegi cekelaʹ bang bicârdape? 58Apedo jâkhni bâdi suliʹ bicârokṭheʹ caʹape, ḍaharrigi âni suliʹ mimangsangeyape, ana bang holenkheʹ paseʹ ânite ape bicârokaʹ tire mapeheʹ, ar bicârokte ape sonnokoṭheʹ jimâpeheʹ ar sonnokotedo ape jelkhanare idipekohaʹ. 59Ingte am metamikâning, mucitʹnaʹ paisa bang emoʹ dhâbiʹ amdo itâʹtigi jel khoiʹ oho oṛoʹ namoʹam."

Currently Selected:

Luk 12: EKL

Highlight

Copy

Compare