Luk 13
13
Mon âcurpe bangkheʹ dhongsoʹpe
1Ana somaire tahenkhoiʹ koekṭeʹ âdmite Jisu Gâlilnaʹ bisoite lâiodiâko je, Rom sasoniʹ Pilâtte nako gâlilioko goiʹketeʹ akoren utsorgo ma janoaraʹ meyom suliʹ angkoaʹ meyomho mesallede. 2Niâ katha aten tayom Jisute angko metakeʹkoe, "Apedoki monedape je, angko Gâliliokodo nengka kosṭo bhogkadako karon angkodo eṭaʹ sanam gâlilioko khoiʹ ki ḍher pâpi tahelenko? 3Ingte ape metapekâning anado bang, kheʹ pap khoiʹ mon bang âcurtenlekheʹ, apeho sanamkhoiʹ angko lakagi dhongsoʹpehaʹ. 4Angko aṭharoṭeʹ âdmi goiʹlenako Silohonaʹ usul oraʹ angko cetanre ujugoʹaʹ karonte, ape ki moneyape je, Jirusalemren bâki âdmiko khoiʹ angkoaʹdo ḍher dos tahelentakoa? 5Ingte ape metapekâning, anado bang, kheʹ pap khoiʹ mon bang âcurlekheʹ apeho dhongsoʹpehaʹ."
Loa darenaʹ cetʹaʹ lopor
6Inâtayom cetʹoko laʹte Jisute niâ cetʹaʹ lopor lâiaʹkoe, "Jahe miṭiʹ âdmioaʹ ânggur khetre miṭiʹ loa dare rohe holena. Miʹ jhikâ âni hiʹketeʹ jorenaʹ khojkede kheʹ bang namlede. 7Tâkhni ânite mâli metakidie, 'lel, pe bochor khoiʹ niâ loa darere ing loa khojoʹkâning kheʹ itâʹgi bang namding. Anate niâ daredo maʹgirim. Cekelaʹte niâtedo has nosṭeheʹ?' 8Kheʹ mâlite âni metakidie, 'probhu, niâ bochordo anado dohogirim, ing ananaʹ câryunakha laketeʹ sahar maʹinghâʹ. 9Inâ tayom judi joʹa tahale to manjagi, bangkheʹ anado maʹgirimahaʹ.'"
Jisute jiruʹbarre kokyo kurihopon manjakidie
10Jaha miṭiʹ jiruʹaʹ dinre Jisute miṭiʹ somaj oraʹre cetʹokosane. 11Aṛedo emon miṭiʹ reja tahelene ekedo miṭiʹ kharap attate aṭharo bochor khoiʹ sab doholidie. Ânido kokyogi tahelene ar thoṛaho bang sojhaketeʹ tengo darensane. 12Jisute âni lelkidie ar sorre ṭâhuketeʹ metakidie, "Âiâ, amaʹ osuk khoiʹ am baconam." 13Niâ katha menketeʹ Jisu âni cetanre ti dohokeʹtene, ar tâkhnigi ânido sojhaketeʹ tengone. Ar Issoraʹ gouroblaʹ lagone.
14Jisute jiruʹaʹ dinre manjakokane mente miṭiʹ somaj oraʹren neta edreketeʹ âdmiko metakeʹkoe, "Kâmilaʹte cho dinto menaʹgiâ. Analaʹte Jiruʹaʹbarre bang hiʹketeʹ ana cho din bhitârre hiʹketeʹ manjoʹape."
15Tâkhni Probhute âni neta metakidie, "Apedo bhonḍogiâpe, jiruʹaʹ dinre ape sanamkhoiʹtigi ki aperen ḍangra se gadha gohal khoiʹ laraketeʹ daʹ khaokolaʹ bang idikoyape? 16Tahale nâi rejado Abrahamren hoporatkane, ekedo aṭharo bochor khoiʹ Soitante sabketeʹ tol doholidie, ana tol khoiʹ jiruʹaʹ dinre ki âni bacoyaʹ ucitdo bangkana?" 17Ânido niâko katha menlekheʹ tayomte ekeko Âniaʹ biruddhe tahelenako angkodo sanamkhoiʹgi giuʹnako. Kheʹ eṭaʹ âdmikodo Âniaʹ mohimanaʹ kâmi lelketeʹ hubnako.
Goṭa ar khâminaʹ cetʹaʹ lopor
(Mothi 13:31-33; Mark 4:30-32)
18Tâkhni Jisudo menkede, "Issoraʹ Rajjodo kalkana? Itâʹ suliʹ Ingdo naṛenaʹ tulonailiʹ? 19Anado goṭa jang laka akaṭaʹdo jahe miʹhor engeketeʹ aiaʹ baganre merkede. Tayomte anado dareketeʹ hara rakabniʹ. Ar cerekodo hiʹketeʹ ananaʹ ḍhârre kondhaʹ banokedako."
20Jisu arho menkede, "Ingdo itâʹ suliʹ Issoraʹ rajjonaʹ tulonâinghâʹ? 21Issoraʹ rajjodo khâmilaka. Miṭiʹ reja khâmi engeketeʹ pe mon holong salaʹ mesalkede, anate sanam holonggi fuluketeʹ rakabna."
Sakra duâr
(Mothi 7:13-14; 21-23)
22Ar Ânido ṭola ṭolare ar sohor sohorre cetʹokote cetʹokote Jirusalem hate caʹsane. 23Miṭiʹ âdmite Jisu kulikidie, "Probhu, pap khoiʹ baco ki kebol thoṛa âdmigi namkohaʹ?"
Tâkhni Ânite angko metakeʹkoe, 24"Sakra duârte bolonlaʹ aima kurumuṭipe. Karon Ingte ape metapekâning, aima horgi bolonlaʹte kurumuṭikohaʹ kheʹ oho darenako. 25Karon jâkhni oraʹniʹ mâlik beretʹketeʹ duâr singe, tâkhni apedo baherre tengoketeʹ duâr dal dalte menpehaʹ, 'E Probhu, ale laʹte duâr jhig.' Kheʹ Ânite ape niâ uttor mapeheʹ, 'Apedo aka khoiʹ hiʹkanape Ingdo bang baṛeing.' 26Tâkhni apedo menpehaʹ, 'Aledo Am salaʹ jom nukadale, ar Amteto aleyaʹ ḍahar ḍaharte cetʹokosanam.' 27Kheʹ Âni menheʹ, Ingte ape metapekâning, Ingdo bang baṛeing, apedo aka khoiʹ hiʹkanape. E odhârmikko, Ingṭheʹ khoiʹ sâhingoʹpe.
28"Ana jagare apedo ragpehaʹ ar ḍaṭa keṭmeṭetenpehaʹ. Karon lelkopehaʹ, Abraham, Isahak, Jakob ar nâbiko sanamkhoiʹgi Issoraʹ rajjore menaʹkoa, ar apedo baherre oṛoʹgiripe hoʹkana. 29Ar âdmiko purub, pachya, utâr ar dâkhin hate khoiʹ hiʹketeʹ Issoraʹ rajjore bhojre duruʹkohaʹ. 30Ar lelpe, ekeko mucitʹre menaʹkoa angkodo lahoʹkohaʹ ar ekeko lahare menaʹkoa angkodo mucitre paṛoʹkohaʹ."
Jirusalem laʹte Jisuoaʹ duk
(Mothi 23:37-39)
31Ana somai koekṭeʹ Forisi Jisuṭheʹ hiʹketeʹ metakidiako, "Am naṛe khoiʹ cangen, karon Herodte Am goiʹmilaʹ namde."
32Ânite angko metakeʹkoe, "Ape caketeʹ âni toyo metaipe, 'Lelpe, tihin ar gapa Ingte kharap atta coṭaʹkokâning ar rugiko manjaʹkokâning ar pe dinre Ingâʹ kâmido cabetenhuʹ.' 33Jagi hoʹman, tihin, gapa ar meyang hiluʹ tayom Ingdo caloʹtigi tahenlaʹ hoʹtinghâʹ, karon nangka bang ho darena je, Jirusalemnaʹ baherre jahe nâbi goiʹ darenako.
34"Jirusalem, hai Jirusalem amtedo nâbiko goiʹkoam ar amṭheʹ jeko kol hokana angkodo dirite capatʹkaʹkoam. Simte alka nijeren hoponko akoaʹ ḍena latarre jaorakoako ṭhik engkagi Ingte tiniʹ jhikâ amren âdmiko Ingṭheʹ jaorakolaʹ namkâding, kheʹ apedo bang râjikanape. 35Lelpe, apeyaʹ oraʹ ape laʹte ekengi ujuʹ tahenhaʹ. Ar Ingte ape metapekâning, apete Ingdo ado oho lelnamengape, tiniʹdin dhâbiʹ ape bang menpehaʹ, 'Dhonnogie Âni, ekedo Probhuoaʹ nutumte hijuʹkane.'"#Siringko 118:26
Currently Selected:
Luk 13: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
