Luk 14
14
Probhu Jisu Forisiaʹ oraʹre
1Miṭiʹ jiruʹaʹ dinre Jisu miṭiʹ Forisi netaoaʹ oraʹre jomlaʹ cane. Ar angkote Âni lokkhoisanako. 2Ar lelpe, udri ruâte nam miṭiʹ âdmi Âni samnere tahelene. 3Jisute dhormo masṭarko ar Forisiko kulikeʹkoe, jiruʹaʹ dinre manjakoaʹ ucit se bang? 4Kheʹ angkodo thirgi tahenako. Tâkhni Jisute âni sabketeʹ manjakidie ar tayomtedo bidâi makidie. 5Ar Ânite angko metakeʹkoe, "Ape bhitârre eke menaʹkoa, jahereʹ gidrâ se ḍangra jiruʹaʹ dinre indârare ujuʹngelenkheʹ ânite tâkhnigi âni oho rakabie?" 6Kheʹ angko dhormo netako niânaʹ uttor bang ma dareledako.
7Neotaonkhoiʹ âdmiko kalkaketeʹ sonmannaʹ jagako bacho engedako ana lelketeʹ Jisute angko cedoko laʹte niâ cetʹaʹ lopor metakeʹkoe, 8"Jâkhni jahete ape baplanaʹ bhojre neotapeyako tâkhni apedo sonmannaʹ jagare caketeʹ alo duruʹape, karon hoito ape khoiʹ arho sonmanuniʹ jahe neota hokana, 9Tahale ekete am ar âni neotakaʹbane, âni hiʹketeʹ am metamiheʹ, 'Niâ jagado âni bâgigurui.' Tâkhni to amdo giuʹketeʹ sanam khoiʹ latarnaʹ jagare duruʹlaʹ caʹmahaʹ.
10"Kheʹ am jâkhni neota nammahaʹ tâkhni borong sanam khoiʹ latarnaʹ jagare caketeʹ duruʹmahaʹ. Tahale ekete am neotakaʹmie ânite hiʹketeʹ am metamiheʹ, 'Gate, sonmannaʹ jagare caketeʹ durupme.' Tâkhni ekeko am saote duruʹ menaʹkoa, angko samnere amdo sonman nammahaʹ. 11Karon ekedo nijegi marangoʹe, ânido kâṭijoʹheʹ ar jahegi nije kâṭigoʹe, ânido marang bano hoʹhaʹ."
12Arho ekete Âni neotalidie, âniho Jisute metakidie, "Am jâkhni dupahar se nindâ manja manja jomaʹ teyarmahaʹ, tâkhni amren gateko, se amren boihako, se sorren âdmiko ar dhuni âdmiko alo neotakoam. Karon angkoteho naṛenaʹ badalte am neotamikohaʹ, ar amaʹ neota sodhngentamhaʹ. 13Kheʹ jâkhni amte bhoj makomahaʹ tâkhni range, lulhâ, khoṛa ar ândhuâ âdmiko ṭâhukomahaʹ. 14Anate am Issoraʹ âsirbad nammahaʹ, karon angkote amaʹ ana neota sod oho dareʹtamako. Jâkhni dhârmik âdmiko goiʹ khoiʹ jiuitʹ rakab hoʹhaʹ tâkhni amdo ananaʹ puroskar nammahaʹ."
Marang bhojnaʹ cetʹaʹ lopor
(Mothi 22:1-10)
15Ekeko jomlaʹ duruʹlenako angko talaren miʹhor niâ katha atenketeʹ Jisu metakidie, "Ekeko Issoraʹ Rajjore jomlaʹ duruʹkohaʹ angkodo dhonnogiâko."
16Jisu menkede, "Jahe miʹhor miṭiʹ marang bhoj maketeʹ aima âdmi neotakeʹkoe. 17Bhojnaʹ somai holenkheʹ ânite aiʹren kâmi âdmi metakidie ânite jate neotaonkhoiʹ metakoe, 'Hijuʹpe nitdo sanamgi sapro hokana.' 18Kheʹ angko sanamkhoiʹ bahnelaʹ lagonako. Palheuniʹ âdmite âni metakidie, ing thoṛa has kiringkâding, ana lellaʹ caʹlaʹ hoʹtinghâʹ. Nehormikâning ingdo bâgigiring.' 19Ar miʹhordo menkede, 'Ingte more joṛa ḍangra kiringkaʹkoing, angko purikkhakolaʹte caʹkâning. Nehormikânig ingdo bâgigiring.' 20Eṭaʹuniʹ ar miʹhor menkede, 'Ing baplakâning, niâlaʹte bang ca darenkâning.'
21Âni kâmi âdmi âcur caketeʹ aiʹren mâlik niâko katha baṛesokidie. Anate oraʹniʹ mâlik edreketeʹ aiʹren kâmi âdmi metakidie, 'Amdo taṛatâṛi sohornaʹ ḍahar ḍaharte ar guli gulire cap ar rangeʹ oreʹ, lulhâ, ândhuâ ar khoṛa âdmiko naṛe agukom.'
22"Nako sanam rikâ tayom âni kâmi âdmi menkede, 'Mâlik, amaʹ hukum lakagi sanam rikâ hokâniʹ kheʹ nitoʹho jaga menaʹgiâ. 23Niâte mâlikte kâmi âdmi metakidie, 'Sohor barhenaʹ ḍahar ḍaharre ar saṛak saṛakre cap ar naṛe hijuʹ laʹte âdmiko aima nehorkom, jate ingâʹ oraʹ pereʹngena. 24Ingte ape matapekâning, ekeko palhere neota holena angkodo ekegi ingâʹ niâ bhoj oho jom namako.'"
Cela hoʹaʹ bisoite upodes
(Mothi 10:37-38)
25Jisu sao saote aima âdmi caʹsanako. Jisudo angko âdmi hate âcurketeʹ menkede, 26"Je Ingṭheʹ hijuʹheʹ ânitedo jate aiʹren engat, bot, girthân, gidrâ, boiha ar mesra, emon ki, nijeoaʹ jiui dhâbiʹ Ing khoiʹ ḍher bang dulâre. Ana bangkheʹ âni Ingren cela bang ho darene. 27Jahegi nijeyaʹ kurus goʹketeʹ Ingâʹ tayom tayomte bang hijuʹe ânido Ingren cela bang ho darene.
28"Ape talare judi Jahegi miṭiʹ usul oraʹ teyarlaʹ name, tahale ânido ki ana oraʹ teyar lahare khorocnaʹ oho hisâbe, ana oraʹ mucit laka ṭhep ânioaʹ menaʹtaya se bang? 29Karon roda gatho tayom judi âni ana oraʹ mucitʹ bang dareʹe, tahale tiniʹ âdmi ana lelkohaʹ, sanamkhoiʹtigi ânido ṭhaṭṭailaʹ lagoʹkohaʹ, menkohaʹ, 30'Âni âdmido gathelaʹ ehoblede kheʹ caba bang darelede.'
31"Judi miṭiʹ raja eṭaʹ ar miṭiʹ rajaoaʹ biruddhe lâṛhâilaʹ caʹe, tahale ânido palhere duruʹketeʹ cintuʹe, 'Bis hajar sonno laite eke ingṭheʹ lâṛhâilaʹ hijuʹkane, eken dos hajar sonno laite ingte âni badha ma dareinghâʹ ki?' 32Judi âni bang dareʹe, tahale ânido eṭaʹ raja sâhingre tahantigi âdmi kolketeʹ âni suliʹ sântinaʹ bisoite kuliyiheʹ."
33Mucitʹre Jisu menkede, "Analakagi ape talaren judi jahegi bhabna cintâketeʹ aiaʹ sanamaʹ bâgiketeʹ bang hijuʹe tahale ânido Ingren cela bang ho darene."
34"Bulungdo manjagiâ, kheʹ judi anarenaʹ sad nosṭongena, tahale anaredo arho kalkate sad âcur âgu jutuʹhaʹ? 35Tâkhni anado bang khetre, bangdo sahar dirire lagoʹa âdmiko anado barhere giṛigiriako.
Ekeyaʹ atenaʹ lutur menaʹtaya ânido atenmane."
Currently Selected:
Luk 14: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
