Luk 2

Probhu Jisu Khrisṭoaʹ janam

(Mothi 1:18-25)

1Ana somai Romio raja Agostoaʹ rajjore âdmi lekhakolaʹ sanamkhoiʹaʹ nutum ollaʹte hukum makeʹkoe. 2Siriâren sasoniʹ Kuriniâoaʹ somairigi palhe jhikâ âdmi gunuko laʹte nutum ol holena. 3Nutum ollaʹte sanamkhoiʹgi nijeoaʹ nijeoaʹ ṭola caʹlaʹ lagonako.

4Josef tahalene Dâud#2:4 Josefaʹ janam khoiʹ 1000 bochor laka lahare Dâud tahelene miṭiʹ raja. gusṭiren âdmi. Anate Josefdo Gâlilnaʹ Nasarot ṭola khoiʹ raja Dâudaʹ janam ṭola Jihudiânaʹ Bethlehemre cane. 5Ânido aiʹren tilâkuniʹ Moriom saore engeketeʹ nutum ollaʹte aṛe cane, ana somaigi Moriomdo hamal tahelene. 6Ângkin jâkhni Bethlehemre tahelenakin tâkhnigi Moriomaʹdo gidrâ janamoʹaʹ somai hona. 7Aṛegi âniren palhe gidrâ janamne. Ar Moriomte Âni gidrâ lugrite poṭomketeʹ nâidâre dohokidie, karon ḍerare angko laʹte aka jaga bang tahalena.

Sorgodut ar dhoreko

8Bethlehem sorrigi maṭh talare nindâ somai dhorete angkoren bhiṛi pâl jogokosanako. 9Emon somai Probhuren miṭiʹ sorgodut caṭlaka angkoṭheʹ hiʹne. Tâkhni Probhuoaʹ mohima angkoaʹ câryunakha jhakjhakketeʹ lelnamniʹ. Niâ lelketeʹ dhoreko aima botornako. 10Sorgodutte angko metakeʹkoe, "Alo botoroʹape, karon ingdo apeṭheʹ aima hubnaʹ manja khobor agukâding. Niâ hubdo sanam âdmiko laʹte. 11Tihin Dâudaʹ ṭolare aperen Bacopeyiʹ janamkane. Ânigie Khrisṭo, Ânigie Probhu. 12Ar niâdo apeṭheʹ miṭiʹ cinhât hoʹhaʹ, apete lugrite poṭom ar nâidâre gitiʹ miṭiʹ gidrâ lel nameipehaʹ."

13Niâ somai âni sorgodut suliʹ saṭlaka aṛe arho aima sorgodutko lelnamnako. Angko Issoraʹ prosongsaketeʹ menlaʹ lagonako,

14"Sorgore Issoraʹ gourob hoʹtaiman,

dhârtire jekoaʹ cetanre Âni sontusṭogie angko âdmioaʹ sânti hoʹman."

15Sorgodutko angkoṭheʹ khoiʹ sorgore ca tayom dhorekodo ako talare lopornako, "Delabon, abodo Bethlehemre caʹabo ar je ghoṭonanaʹ katha Probhute abo lâioʹboe ana caketeʹ lelabo."

16Angko saṭlaka caketeʹ Moriom, Josef ar nâidâre gitiʹ Âni gidrâ sendra oṛoʹkidiako. 17Angkoṭheʹ Âni gidrâoaʹ bisoite akaṭaʹ lâiholena, Âni gidrâ lel tayom angkodo ana âdmiko lâioʹkeʹkoako. 18Ekeko dhorekoaʹ katha atenkedako angko sanamkhoiʹgi asarjogenako. 19Kheʹ Moriomdo anako katha monre dohokede. Ekeho bang lâioʹkoe, âni ana bisoite cintuʹtigi tahene. 20Anate dhorekodo âcur hiʹnako. Angko akaṭaʹ lelledako ar atenledako ana laʹte angkodo Issoraʹ prosongsa ar gourobsanako. Sorgodutkote angko alka metaleʹkoako ṭhik engkagi holena.

21Janamnaʹ aṭ dinnaʹ dinre jâkhni gidrâoaʹ sunnotnaʹ somai hona tâkhni Âniaʹ nutum doho hona Jisu. Engataʹ laiʹre sirjuʹ laharigi sorgodutte Âniaʹ niâ nutum doholeʹtaye.

Mundirre gidrâ Jisu

22Tayomte Mosiaʹ ân laka Moriomaʹ sâfuʹaʹ somai hontaya.#Lebiopustok 12:1-8 Anate Josef ar Moriomte Jisudo Probhuoaʹ lahare idiyilaʹte Jirusalem sohorre idikidiâkin, 23karon Mosiaʹ ânre ol menaʹa, "Palhe janamkanako nengkaniʹ sanam koragidrâdo Probhuoaʹ uddessote pobitrokanako mente saboʹkohaʹ,"#Jatrapustok 13:2; 11-13 24Niâ bâgiketeʹhoʹ, "Miʹ joṛa potam se barya paroa hopon" utsorgokoaʹ katha jemon Probhuoaʹ ânre ol menaʹa ana lakagi angkodo ana utsorge laʹte canako.

Simion Jisuoaʹ somporkote menkede

25Tâkhni ‍Jirusalemre Simion nutumte miṭiʹ dhârmik ar Issor bhukti âdmi tahalene. Issorte tinre Israyelkoaʹ duk cabetakoheʹ ana somai laʹte âni ḍahar bengetsane. Pobitro atta âni cetanre tahelena. 26Ar Pobitro atta âniṭheʹ lâilede je, Probhuren Khrisṭo âuri lele dhâbiʹ ânido oho gojoʹe. 27Pobitro attaoaʹ talate Simiondo ana din Jihudikoaʹ Mundirre hiʹne. Mosiaʹ ân laka akaṭaʹ rikiaʹ dorkar ana riki laʹte Jisuren engat botte gidrâ Jisudo Mundirre agukidiâkin. 28Tâkhni Simionte Âni haokidie ar Issoraʹ gourobketeʹ metakidie,

29"He Probhu, nitoʹ am amaʹ rikit laka amren das sântite bidâi maikanam,

30-31karon ingdo ingâʹ barya metʹte amaʹ baco lelnamkiding. Akaṭaʹdo Am sanam disâmnaʹ samnere teyarkadam.

32Ojihudikoṭheʹ niâdo ḍahar uduʹkoaʹ marsalkana

ar Amren Israyel jâtkoṭheʹdo gourobnaʹ bisoikana."

33Simion Âni gidrâ bisoite akako menkede anate Âni gidrâren engat bot asarjonâkin. 34Niâ tayom Simionte angko âsirbadkeʹkoe ar Jisuren engat Moriom metakidie, "Issor niâgi ṭhikkade je, Âni gidrâ laʹte Israyelioko talaren aima âdmigi bicâroʹkohaʹ, ar aima âdmigi bacoʹkohaʹ. Ânido emon miṭiʹ cinhât hoʹheʹ ekeoaʹ biruddhoredo aima horgi katha menkohaʹ, 35ar anate angkoaʹ monnaʹ cintâ sodoroʹtakohaʹ ar ana bâgiketeʹho chorate soboʹkaʹ haso laka amaʹ ontorreho duk gathoʹhaʹ."

Hannaoaʹ sakkho

36Ar Hanna nutumte miʹhor nâbi tahelene, ânido Punuelren hoporatkane, Aseyaʹ gusṭire ânioaʹ janam holentaya, ânioaʹ aima boyos holentaya, ângkinaʹ baplanaʹ sat bochor tayom âniren jaoedo goiʹlene. 37Ar âni râṛiketeʹgi curâsi bochor boyos dhâbiʹ Mundirre taheketeʹ upâs ar koijong talate sing nindâ Issoraʹ seoesane.

38Âniho ṭhik ana somaire hiʹketeʹ Issor dhonnobad mailaʹ lagone, ar Issorte Jirusalem bacoiheʹ mente ekeko ḍahar bengetʹsanako angkoṭheʹ âni gidrâoaʹ katha menla lagone.

Josef ar Moriom Nasrotre âcur canâkin

39Probhuoaʹ ân laka sanamaʹgi cabaketeʹ Moriom ar Josef Gâlilre âkinaʹ nijeoaʹ ṭola Nasarotre âcur canâkin. 40Tayomte Jisu boyoste marangketeʹ suktimanne ar genteho perejoʹtigi tahene. Âni cetanre Issoraʹ daya tahelentaya.

Mundirre Jisu

41Bacoaʹ porob somai Jisuren engat bot sanam bochorgi Jirusalem caʹsanakin. 42Jisuoaʹ boyos jâkhni baro bochor tâkhni âricâli lakagi angkodo ana porobre canako. 43Ar porobnaʹ mucitʹre angko jâkhni oraʹ âcuroʹsanako tâkhni gidrâ Jisudo Jirusalemrigi tahangene. Kheʹ Âniren engat bot ana katha bang baṛesanakin. 44Ânido saoren âdmiko talare miniâ moneketeʹ ângkindo miʹ dinaʹ ḍahar calongenakin. Tayomte ângkindo akoren pânhâ ar gateko talare Jisu khojeilaʹ lagonâkin. 45Kheʹ Âni bang sendra namketeʹ ângkindo Âni sendra sendrate arho Jirusalemre âcur hiʹnâkin.

46Pe din tayom ângkinte Âni Mundirre namkidiâkin. Ânido guruko talare duruʹketeʹ angkoaʹ katha atensane ar angko kulikosane. 47Ar ekeko Âniaʹ katha atensanako, angko sanamkhoiʹgi Âniaʹ buddhi ar uttorre aima asarjo genako. 48Âni lelketeʹ asarjogenakin ar Âniren engatte Âni metakidie, "Gidrâ, âling suliʹ cekla nengka bebohar kedam? Lel, amren bom ar ing tiniʹ cintâketeʹ am sendramikanaling."

49Ânite ângkin metakeʹkine, "Abantedo cekelaʹ Ing sendrangsanaban? Aban ki bang baṛesanaban je Ingren Babaoaʹ oraʹrigi Ingdo tahanlaʹ hoʹtinghâʹ?" 50Kheʹ Ânite ângkin akaṭaʹ katha metakeʹkine, ana ângkin bang bujhu dareledakin.

51Tayomte Âni ângkin suliʹ Nasarotre âcur cane ar ângkinaʹ kathanaʹ baddhore tahane. Âniren engatdo niâko sanamaʹgi monre gathoketeʹ dohokede. 52Tayomte Jisu gen ar boyoste Issor ar âdmioaʹ dayate marangolaʹ lagone.

Currently Selected:

Luk 2: EKL

Highlight

Copy

Compare