Luk 3
3
Bâptisma emoʹiʹ Johonaʹ procar
(Mothi 3:1-10; Mark 1:3-5)
1Romio raja Tibirioaʹ rajotto ponero bochor somai
Jihudiâ prodisâmren marang sasoniʹ tahalene Pontio Pilât.
Tâkhni Herod Gâlil prodisâm
ar âniren boiha Filip Jituriâ prodisâm ar Trakhonitiâ sasonledakin,
Lusâniâ tahalene Obiliniren sasoniʹ.
2Ar Hanon ar Kaiyafa tahalenakin Jihudiren marang purohit. Ṭhik niâ somai Issor sansun jagare Sokhorioren hopontetʹ Johonṭheʹ Aiaʹ katha sodorkede. 3Anate Johondo Jordon Ganganaʹ sorkorenaʹ sanam jagare caketeʹ pap khoiʹ map nam laʹte mon âcurnaʹ bâptisma procarlaʹ lagone. 4Nâbi Jisaioaʹ boire akaṭaʹ ol menaʹa ṭhik ana lakaketeʹ niâko sanamaʹgi hona. Ol menaʹa,
"Sansun jagare miʹhor garjoketeʹ baṛesokokane,
Apedo Probhuoaʹ ḍahar sapretaipe,
Âniaʹ ḍahar sojhetaipe.
5Sanam burunala perejoʹhaʹ,
ḍhipuʹ ar buruko somanoʹhaʹ.
Ekṛong bekṛong ḍahar sojhoʹhaʹ,
bang saman ḍahar samanoʹhaʹ.
6Ar sanam âdmigi Issoraʹ baco lelnamkohaʹ.'" #Jisaio 40:3-5
7Tâkhni bâptisma engelaʹte, Johonṭheʹ aima âdmi oṛoʹketeʹ hiʹnako. Ânite angko metakeʹkoe, "He bingren gusṭiko Issoraʹ je sâsti agro hijuʹkana ana khoiʹ nir caloʹaʹ niâ buddhi ape ekete makaʹpeyako? 8Ape je pap khoiʹ mon âcurkaʹtenape ananaʹ upojukto jo apeyaʹ jiuire udukpe. Nijekoaʹ monre alo bhaboʹape je, apedo Abraham gusṭiren ar Jihudikanape mente oho bicâr hoʹtapeya. Ingte ape metapekâning, niâko diri khoiʹ Issorte Abrahamren gusṭi bano darekoe. 9Darenaʹ goṛare make lagogi menaʹa. Aka darere manja jo bang joʹa ana getʹketeʹ sengelre giṛi hoʹhaʹ."
10Tâkhni âdmikote Johon kulikidiako, "Tahale aledo itâʹ cikilehaʹ?"
11Johonte angko metakeʹkoe, "Judi jaheoaʹ barya anga thentaya tahale ekeoaʹ anga bânuʹtaya ânite âni miṭiʹ maimane. Ekeoaʹ jomaʹ menaʹtaya âniho engka rikimane."
12Ar khajna âdâionkhoiʹho bâptisma enge laʹte hiʹketeʹ Johon metakidiako, "Guru, aleyaʹ itâʹ rikiaʹ ucitʹ?"
13Ânite angko metakeʹkoe, "Ânre ja menaʹa ananaʹ ḍher alo engeyape."
14Ar sonnokoteho âni kulikidiako, "Aleyaʹ itâʹ rikiaʹ ucitʹ?"
Johonte angko metakeʹkoe, "Jorketeʹ ekeṭheʹ khoiʹho ṭhep alo engeyape. Ekeho âuṛiaʹ alo doskoape. Ar apeyaʹ darmatigi sontusṭo tahenpe."
15Ar âdmiko jâkhni Khrisṭoaʹ ḍahar bengetsanako tâkhni angko mon monte bhabnoʹsanako "Je Johongi paseʹ Khrisṭokane."
16Tâkhni Johonte angko sanamkhoiʹ metakeʹkoe, "Ingte ape daʹre bâptisma mapekâning, kheʹ emon miʹhor hijuʹkane, ekedo ing khoiʹho suktisâligie ar Âniaʹ jutânaʹ fitâ laraho bang ganoʹtingâ. Ânitedo pobitro atta ar sengelte bâptisma mapeheʹ. 17Haṭaʹdo Ânioaʹ tirigi menaʹa. Anate Ânido Aiaʹ guhum maṛeyaʹ khâriân sâfâketeʹ guhum kuṭhliʹre jaoreheʹ, kheʹ akaṭaʹ sengel tisho bang irijoʹa anare here jeretʹgiriheʹ." 18Arho aima nehor talate âdmikoṭheʹ Issoraʹ maonaʹ manja khobor Johondo procarkede.
Johonaʹ kâminaʹ mucitʹ
19Sasoniʹ Herod rajaren nije boiharen girthân Herodiâ suliʹ Herodaʹ je kharap somporko ar âniaʹ arho aima kharap kâmi laʹte Johonte âniaʹ dos uduʹleʹtaye. 20Anate raja Herodte Johon bundiketeʹ jelre bharolidie. Niâte âniaʹ kharap kâmiko suli niâ kharap kâmiho salaʹna.
Jisuoaʹ bâptisma
(Mothi 3:13-17; Mark 1:9-11)
21Ekeko âdmi Johonṭheʹ hiʹlenako angko bâptisma enge somai Jisuho bâptisma engekede. Bâptisma enge tayom Jisu jâkhni koijongsane tâkhni serma jhiʹgena. 22Ana somai pobitro atta paroa lakaketeʹ Âni cetanre agro hiʹne ar serma khoiʹ na katha atenna, "Amgiâm Ingren dulârniʹ Hopon, Am cetanre Ingdo aima sontusṭogiying."
Jisuoaʹ gusṭinaʹ poricoi
(Mothi 1:1-17)
23Tiris bochor laka boyosre Jisu Âniaʹ kâmi ehobkeʹtene. Âdmiko monesanako Ânido Josefren gidrâkane.
Josefdo Eliren gidrâkane,
24Elido Mottotren gidrâkane,
Mottotdo Lebiren gidrâkane,
Lebido Molkiren gidrâkane,
Molkido Jannairen gidrâkane, ar
Jannaido Josefren gidrâkane.
25Josefdo Mottothiren gidrâkane,
Mottothido Amosren gidrâkane,
Amosdo Nuhumren gidrâkane,
Nuhumdo Isliren gidrâkane,
Islido Nogiren gidrâkane.
26Nogido Maṭren gidrâkane,
Maṭdo Mottothiren gidrâkane,
Mottothido Simionren gidrâkane,
Simiondo Josefren gidrâkane,
Josefdo Judaren gidrâkane,
27Judado Johanaren gidrâkane,
Johanado Risâren gidrâkane,
Risâdo Surubbâbilren gidrâkane,
Surubbabildo Solṭielren gidrâkane,
Solṭieldo Neriren gidrâkane,
28Nerido Molkiren gidrâkane,
Molkido Oddiren gidrâkane,
Oddido Kosomren gidrâkane,
Kosomdo Ilmadomren gidrâkane,
Ilmadomdo Erren gidrâkane.
29Erdo Jihosuoren gidrâkane,
Jisudo Iliesren gidrâkane,
Iliesdo Jorimren gidrâkane,
Jorimdo Mottotoren gidrâkane,
Mottotodo Lebiren gidrâkane,
30Lebido Simionren gidrâkane,
Simiondo Judaren gidrâkane,
Judado Josefren gidrâkane,
Josefdo Jonomren gidrâkane,
Jonomdo Iliakimren gidrâkane,
31Iliakimdo Miliâren gidrâkane,
Miliâdo Minnâren gidrâkane,
Minnâdo Mottothren gidrâkane,
Mottothdo Nathonren gidrâkane,
Nathondo Dâudren gidrâkane,
32Dâuddo Jisoyren gidrâkane,
Jisoydo Obedren gidrâkane,
Obeddo Boyosren gidrâkane,
Boyosdo Solomonren gidrâkane,
Solomondo Nohosonren gidrâkane,
33Nohosondo Omminadobren gidrâkane,
Omminadobdo Odmanren gidrâkane,
Odmando Orniren gidrâkane,
Ornido Hisronren gidrâkane,
Hisrondo Perosren gidrâkane,
Perosdo Jihudaren gidrâkane,
34Jihudado Jakobren gidrâkane,
Jakobdo Isahakren gidrâkane,
Isahakdo Abrahamren gidrâkane,
Abrahamdo Terohoren gidrâkane,
Terohodo Nahoren gidrâkane,
35Nahordo Sorugren gidrâkane,
Sorugdo Riuren gidrâkane,
Riudo Pelogren gidrâkane,
Pelogdo Eborren gidrâkane,
Ebordo Selohoren gidrâkane,
36Selohodo Koinonren gidrâkane,
Koinondo Orfoksodren gidrâkane,
Orfoksoddo Semren gidrâkane,
Semdo Nohoren gidrâkane,
Nohodo Lemokren gidrâkane,
37Lemokdo Mothuselhoren gidrâkane,
Mothuselhodo Honokren gidrâkane,
Honokdo Jerodren gidrâkane,
Jeroddo Mohollelren gidrâkane,
Moholleldo Koinonren gidrâkane,
38Koinondo Inosren gidrâkane,
Inosdo Sethren gidrâkane,
Sethdo Adomren gidrâkane,
Adomdo Issorren gidrâkane.
Currently Selected:
Luk 3: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
