Luk 4
4
Probhu Jisu papre giriyi laʹte kurumuṭu
(Mothi 4:1-11; Mark 1:12-13)
1-2Jisu pobitro attate pereʹketeʹ Jordon Ganga khoiʹ âcur hiʹne. Pobitro attaoaʹ âyurte Ânido cullis din sansun jagare âcurberoʹlaʹ lagone. Ana somai diabolte Âni lob uduʹketeʹ papre giriyi laʹte kurumuṭutigi tahene. Na cullis din Jisu itâʹho bang jomkade. Niâ laʹte ana dinko ca tayom Âni rangeʹkidiâ.
3Tâkhni diabolte Jisu metakidie, "Am judi Issorren Hopon hoʹam tahale men jate niâ diri piṭhâ banogena."
4Jisute diabol metakidie, "Pobitro boire ol menaʹa,
'âdmi eken piṭhâtedo bang bacoʹako.'"#Dosarbiboron 8:3
5-6Niâ tayom diabolte Âni miṭiʹ usul jagare idikidie ar sao saotigi dhârtinaʹ sanam rajjoko uduʹketeʹ metakidie, "Niâkonaʹ khomota ar mohima ingte Am mamuhuʹ. Karon niâko sanamaʹ ingi ma hokana. Ingte jahegi icchâ ânigi ana madareing. 7Amte judi ing ḍoboʹongam ar seoangam tahale niâko sanam Amaʹ hoʹhaʹ."
8Jisute âni uttorre metakidie, "Pobitro boire ol menaʹa,
'Apete aperen Probhu Issorgi upâsoneipehaʹ ar
Kebol Âniaʹgi seoeipehaʹ.'"#Dosarbiboron 6:13
9Tâkhni diabolte Jisu Jirusalem idikidie ar Mundirnaʹ coṭ moṭkare Âni tengosoketeʹ metakidie, "Am judi Issorren Hopontetʹ hoʹam, tahale naṛe khoiʹ ṭappoketeʹ latarre ujugob. 10Karon Pobitro boire ol menaʹa,
'Issorte Aiʹren sorgodutko Am bacomilaʹ hukum makoheʹ, jate angkote Am bacomiâko.'#Siringko 91:11
11Arho ol menaʹa,
'Angkote Am atangmikohaʹ
jate am dirite janga bang hasomiâ.'#Siringko 91:12
12Jisute uttorre âni metakidie, "Pobitro boire ol hokana,
'Amte amren nijeren Issor Probhudo alo purikkhayam.'"#Dosarbiboron 6:16
13Sanam lakanaʹ purikkha cabaketeʹ diaboldo Jisuṭheʹ khoiʹ cagene ar arho miṭiʹ sujug nam laʹte ḍahar bengetʹsane.
Gâlilre Probhu Jisu Khrisṭoaʹ upodes
(Mothi 4:12-17; Mark 1:14-15)
14Tayomte Jisu pobitro attanaʹ suktite Gâlil prodisâmre âcur cane ar Âniaʹ manja kâminaʹ khobor ana oncolnaʹ sanam jagare pasnogena. 15Ar Âni angkoaʹ somaj oraʹkore cetʹokolaʹ lagone ar sanamṭheʹ khoiʹ gourob namlaʹ lagone.
Jisu Nasarotre bang atanglidiako
(Mothi 13:53-58; Mark 6:1-6)
16Niâ tayom Jisu Nasarotre cane. Aṛegi Âni maranglene. Âni nijeoaʹ niom laka jiruʹaʹ dinre somaj oraʹre cane. Inâ tayom Âni sastro paṛhoʹ laʹte beretʹne.#4:16 Mosiaʹ ân lakate Jihudikodo soptanaʹ mucitʹ dinre jiruʹaʹ hukum ma holena.
17Ânido nâbi Jisaioaʹ ol boi#4:17 Jisuoaʹ somai âdmikodo janoyaraʹ hartare olsanako ar anado guṛyuketeʹ dohesanako. Lahatedo nit laka kagajnaʹ boido bang tahelena. ma holena. Guṛyu kagaj sojhaketeʹ Âni ana jaga namkede akaredo ol menaʹa,
18"Probhuren atta Ing cetanre miniâ,
karon Ânitigi Ing bacho#4:18 Mare niomnaʹ somairedo âdmikoaʹ bohoʹre sunum dulketeʹ bacho engekosanako. engekâdinge
jate Ing rangeʹoreʹ âdmikoṭheʹ manja khobor procar dareʹing.
Ânite Ing bundikoṭheʹ sâdhinotanaʹ katha,
andhrakoṭheʹ lel namaʹ katha
lâiko laʹte metakâdinge,
jekoaʹ cetanre ottacar hoʹkana,
Ânite Ing angko bacoko laʹte kolkâdinge.
19Niâ bâgiketeʹ Probhute Ing lâi laʹte kolkâdinge je,
nitoʹ Âniaʹ daya lelaʹ somai hiʹngekantaya."#Jisaio 61:1-2
20Niâ tayom Âni ana guṛyu kagaj arho guṛyuketeʹ kormocâri maketeʹ duruʹne. Somaj oraʹren sanam âdmioaʹ metʹ Âniaʹ cetanre paṛontakoa. 21Ar Ânite angko metakeʹkoe, "Pobitro sastronaʹ niâ katha atenkedape anado tihingi purunna."
22Âdmiko sanamkhoiʹ Ânioaʹ prosongsakedako ar Ânioaʹ niâ manja manja dayanaʹ katha atenketeʹ asarjonako. Angko menkedako, "Nâido ki Josefren Hopon bangkane?"
23Jisute angko metakeʹkoe, "Ape niâ colti katha niscoi ing metangpehaʹ, 'Ḍaktar, nijegi manjob.' Arho menpehaʹ, Kofornâhumre Amaʹ akako kâminaʹ katha ale atenkadale, anako sanam nitoʹ nijeoaʹ ṭolare kâmiketeʹ uduʹkome!'" 24Âni arho menkede, "Ingte ape sârigi metapekâning, eke nâbigi Aiaʹ nijeoaʹ ṭolaren âdmikote bang atangiâko."
25Niâ katha sârigiâ je, "Elioaʹ somaire jâkhni pe bochor bang daʹlede ar goṭa disâmre akal holena. Tâkhni Israyel disâmre aima râṛi reja tahelenako. 26Kheʹ Israyelren ekeṭheʹho Eliodo bang kol holena, kebol Sidon elakanaʹ Sârifot ṭolaren miṭiʹ bidesi râṛi rejaṭheʹ kol holiniʹ.
27"Nâbi Ilisaiaʹ somaire Israyel disâmre aima kusṭo rugi tahalenako, kheʹ angko ekeho bang manjakaʹkoe, eken Surio disâmren Namangi manjalidie."#4:27 Sidonnaʹ Sorifot tahalena Eṭaʹjâtkoaʹ sohor. Surio sohorren Namanho miʹhor Eṭaʹjât tahalene. Jisu menlede je, Issor praigi Eṭaʹjâtkoṭheʹ caʹsane karon angko Jihudiko khoiʹ Jisuoaʹ katha atenlaʹ ḍher agrohi tahan sanako. Jihudikote Eṭaʹjâtko ghinâko sanako anate angko Jisuoaʹ kathate aima edren sanako. Eṭaʹjât: Sidonnaʹ Sorifot tahalena Eṭaʹjâtkoaʹ sohor. Sirio sohorren Namanho miʹ hor Eṭaʹjat tahalene. Jisu menlede je, Issor praigi Eṭaʹjâtkoṭheʹ caʹsane karon angko Jihudiko khoiʹ Jisuoaʹ katha atenlaʹ ḍher agrohi tahansanako. Jihudikote Eṭaʹjâtko ghinâkosanako anate angko Jisuoaʹ kathate aima edren sanako.
28Niâ katha atenketeʹ somaj oraʹniʹ sanam âdmi aima edregenako. 29Angko beretʹketeʹ Jisudo sohornaʹ baherre ṭhelohore idikidiako, ar angkote Ânido ana buru cetanre idikidiako akaṭaʹnaʹ cetanredo ana sohor tahalena. Jate angkote Âni aṛe khoiʹ latarre ujuʹ dareyako. 30Kheʹ Ânido angko âdmi talatigi cagene.
Jisute miṭiʹ kharap atta tâṛyukidie
(Mark 1:21-28)
31Tayomte Jisu Gâlil prodisâmnaʹ Kofornâhum sohorre cane ar jiruʹaʹ dinre âdmiko upodes makolaʹ lagone. 32Âniaʹ cedaʹte âdmiko asarjogenako, ceklaʹ bang Ânioaʹ cetʹokoaʹ khomota tahekantaya.
33Ana somaj oraʹre emon miṭiʹ âdmi tahelene je kharap attate namlidie. Âni garjoketeʹ menkede, 34"He Nasarotio Jisu, ale suliʹdo Amaʹ itâʹ dorkar? Amte ki ale dhongsole laʹte hiʹkanam? Ing baṛeing Am ekekanam Amgito Issorreʹ Âni Pobitro horkan." 35Jisute âni kharap atta dhamkoketeʹ metakidie, "Thirup! Nâi bhitâr khoiʹ oṛoʹgen." Tâkhnigi âni kharap attate âni âdmi sanamkhoiʹ talare macroketeʹ ujuʹkidie ar âniaʹ jahanaʹ bang khutiketeʹ âni bhitâr khoiʹ oṛoʹgene.
36Niâte sanamkhoiʹ asarjoketeʹ nijeoaʹ talare menlaʹ lagonako "Niâ, kalkanaʹ katha? Odhikar ar khomota saote Ânite kharap attako hukum makoe ar angkodo oṛoʹhijuʹako." 37Ana tayom ṭolanaʹ sanam jagare Jisuoaʹ manja katha pasnogena.
Jisute aima âdmi manjakeʹkoe
(Mothi 8:14-17; Mark 1:29-38)
38Niâ tayom Jisu somaj oraʹ bâgiketeʹ Simonaʹ oraʹ cagene. Simonren anhartetʹ aima ruâlene. Âni manjai laʹte Jisu nehorkidiako. 39Tâkhni Jisu Simonren anhartetʹaʹ sorre tengoketeʹ ruâ dhamkokidie. Anate ânia ruâ cabagentaya, ar âni tâkhnigi beretʹketeʹ angkolaʹ jom nuiaʹ bebosthelaʹ lagone.
Arho aima âdmi Jisute manjakeʹkoe
40Bela ḍubu somai âdmikote sanam ruâonkhoiʹ Jisuṭheʹ agukeʹkoako. Angko aima lakanaʹ ruâte namleʹkoe. Jisu angkoaʹ hormore ti maketeʹ angko manjakeʹkoe. 41Aima âdmiaʹ tala khoiʹ kharap attako oṛoʹgenako. Angko kharap attako cilluketeʹ menkedako, "Amdo Issorren Hoponkanam." Âni je Khrisṭokane ana angko baṛesanako. Niâ laʹte Ânite dhamkoketeʹ angkoaʹ moca bondokeʹtakoe.
Jisudo eṭaʹ eṭaʹ sohorte cane
(Mark 1:35-39)
42Setaʹ bera Jisu ana jaga bâgiketeʹ miṭiʹ sansun jagare cagene âdmikote Âni sendrahore angkodo Âniṭheʹ cagenako ar jate Âni akoṭheʹ khoiʹ bang cagene, anate Âni akoṭheʹ sab dohoilaʹ kurumuṭukedako. 43Tâkhni Jisute angko metakeʹkoe, "Arho aima jagare Ing Issoraʹ Rajjonaʹ manja khobor procarlaʹ hoʹtinghâʹ karon niâ laʹtigi Issorte Ingdo kolkâdinge."
44Niâ tayom Ânido Jihudiâ disâmre aima somaj oraʹre procarlaʹ lagone.
Currently Selected:
Luk 4: EKL
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
