Luk 6

Jiruʹaʹbar somondhe cedaʹ

(Mothi 12:1-28; Mark 2:23-28)

1Miʹdin Jiruʹaʹ dinre Jisu fosolnaʹ khet talate caʹsane. Âniren celako gele hotʹketeʹ tite ghaso ghasote jomlaʹ lagonako. 2Na lelte koekṭeʹ Forisi menkedako, "Jiruʹaʹ dinre akaṭaʹ rikâ ucit bangkana, ape ana rikâdape ceklaʹ?"

3Jisute uttorre angko metakeʹkoe, "Dâud ar âniren gateko jâkhni rangeleʹkoa tâkhni âni itâʹ cikâlede ana ki ape bang paṛhokanape? 4Ânito Issoraʹ oraʹre boloketeʹ Issor laʹte utsorgoyonaʹ piṭhâ engeketeʹ jomlede ar âniren gatekoho maleʹkoe. Kheʹ eken purohitko bâgiketeʹ ar ekeoaʹho jomaʹ ân bang tahelena." 5Mucitʹre Jisute angko Forisiko metakeʹkoe, "Âdmi Hopongi jiruʹaʹ dinren mâlikkane."

Lohor ti âdmi manjane

(Mothi 12:9-14; Mark 3:1-6)

6Ar miṭiʹ jiruʹaʹ dinre Jisu somaj oraʹre caketeʹ cedokosane. Aṛe emon miṭiʹ âdmi tahasane jeyaʹ jojma ti lohorngelentaya. 7Dhormoren masṭarko ar Forisikote Jisu dusi banoilaʹte manjate sor khoiʹ leleisanako. Anate angko lelkedako Jiruʹaʹ dinre Ânite ekeho manjaketeʹ Mosiaʹ ân râpude se bang. 8Kheʹ Jisute angkoaʹ monnaʹ katha baṛesantakoe, anate ekeoaʹ ti lohorngelentaya Ânite âni âdmi metakidie, "Beretʹketeʹ sanamkhoiʹaʹ samnere hiʹketeʹ tengon." Anate âni beretʹketeʹ tengone. 9Jisute dhormoren masṭarko ar Forisiko metakeʹkoe, "Ingte ape miṭiʹ katha kulipeliʹ, Jiruʹaʹ dinre manja kâmi rikâ ucit, se kharap kâmi rikâ ucit? Jiui baceyaʹ ucit, se nosṭogiriaʹ ucit?"

10Tayomte Âni câryuhate angkohate koyoʹketeʹ âni âdmi metakidie, "Amaʹ ti laheten." Âniho inâgi rikâkede, ar âniaʹ ti manjagentaya. 11Tâkhni angko dhormoren masṭarko aima edrenako ar "Jisu lie itâʹ cikâ jutuʹa ‍ana nijekoaʹ talare aloconelaʹ lagonako."

Baroṭeʹ celako prerit pod dan

(Mothi 10:1-4; Mark 3:13-19)

12Niâ tayom Jisu miʹdin koijonglaʹte Burure cane, ar Issorṭheʹ goṭa nindâ koijongte somai kaṭokede. 13Setaʹ lenkheʹ tayomte Ânite Aiʹren celako aiʹṭheʹ ṭâhukeʹkoe ar angko tala khoiʹ baroṭeʹ bachoketeʹ angko "Prerit" pod makeʹkoe.

14Angkodo honako Simon, ekeoaʹ nutumdo Ânite Pitor dohokeʹtaye.

Simonren boiha Andrio,

Jakob

ar Johon

Filip

ar Bortholomoi,

15Mothi

ar Thoma,

Alferen gidrâ Jakob,

Simon, ekedo moulobâdi metaisanako.#6:15 Simon emon miṭiʹ dolren âdmi tahalene ekeko Romio sasokaʹ biruddhe lâṛhâi sanako jeko Israyel disâm niontron sanako.

16Jakobren gidrâ Jihuda

ar Jihuda Iskariot, jete Jisu tainomte sotrukoaʹ tire sabsolidie.

Sanam jagare Probhu Jisuoaʹ upodes

(Mothi 4:23-25; 5:1-12)

17Tayomte Jisu Aiʹren celako saote engeketeʹ buru khoiʹ agroketeʹ miṭiʹ saman jagare caketeʹ tengone. Aṛe Âniren aima cela jaoralenako. Niâ bâgiketeʹ Jihudiâ prodisâm, Jirusalem sohor ar Sor ar Sidon#6:17 Sor ar Sidon Sor ar Sidonredo tahalena Ojihudikoaʹ sohor. Nado Israyel disâmnaʹ uttârnaʹ marang ganga kandhare tahalena. nutumte marang Ganga dhârinaʹ barya sohornaʹ elaka khoiʹho aima âdmi aṛe tahalenako. 18Angko Âniaʹ katha aten laʹte ar ruâ khoiʹ manjoʹ laʹte Âniṭheʹ hiʹlenako. Ar jeko kharap atta talate kosṭo namsanako angko manjoʹsanako. 19Tâkhni sanam âdmi Âni joṭetilâʹte kurumuṭilaʹ lagonako, karon Âniaʹ bhitri khoiʹ sukti oṛoʹketeʹ sanamkhoiʹ manjakosane.

20Tayomte Jisu celako hate koyoʹketeʹ menlaʹ lagone,

"Rangeʹ âdmiko apedo dhonnogiâpe,

ceklabang Issoraʹ Rajjodo apeyaʹgiâ.

21Apedo dhonogiâpe, jeyaʹ nitoʹ rangeʹ menaʹatapeya,

karon apedo biʹpehaʹ.

Apedo dhonnogiâpe ekeko nitoʹ raʹdape,

karon apedo nandanpehaʹ.

22"Apedo dhonnogiâpe, jâkhni Âdmi Hoponlaʹte âdmikote ape ghinâpeyako,

somaj khoiʹ oṛoʹgipeyako ar nindâpeyako ar apeyaʹ nutum mocare bang âgilaʹ namako.

23Ana somai apedo kusiʹape ar hubte eneʹape, karon Sorgore ape laʹte marang puruskar menaʹa. Karon angko sanam âdmikoren sederen âdmiko nâbiko cetanreho nengka rikisanako.

24"Kheʹ botor, dhuni âdmiko,

karon apedo nitoʹ santona namkadape.

25Botor bi âdmiko

apeto rangeʹpehaʹ.

Botor jeko nandankanape,

apedo duk nampehaʹ ar ragpehaʹ.

26"Apedo botor, jâkhni sanam âdmi

apeyaʹ prosongseyeko.

Karon nako sanam âdmiren sederen âdmikodo engkaketeʹgi

bhonḍo nâbikoaʹho prosongsesanako.

Dusmânko dulârkope

(Mothi 5:38-48; 7:12)

27"Kheʹ ape jeko atendape, Ingte ape metapekâning, apete aperen dusmânko dulârkope. Jekote ape ghrinâpeyako, angkoaʹ monggolpe. 28Jete ape sarapeyako, angko âsirbadkoape. Jeko ape suliʹ kharap bebohar rikiako, angko laʹte koijongpe. 29Ekete am miʹhatenaʹ johare dalmie ânido ar miṭiʹ johareho dalsoiam. Ekete amaʹ cadre iditame, ânido angaho engesoiam. 30Jahegi amṭheʹ koyako, angkodo makoam, jahete amaʹ jahanaʹ jinis iditamlekheʹ ana ar âcurketeʹ aloʹ koyam. 31Âdmiṭheʹ khoiʹ ape alka bebohar namlaʹ namape apeho angko suliʹ engkagi beboharape.

32"Ekekote ape dulârpeyako, apete judi angkogi kebol dulârkoape, tahale anaredo prosongsarenaʹ itâʹ menaʹa? Pâpi âdmitehoto niâ lakagi dulârkoyako. 33Ekekote apeyaʹ manja kâmi rikâtapeyako apete judi angkoaʹgi manja kâmiape tahale anaredo prosongsanaʹ itâʹ menaʹa? Pâpi âdmihoto ana rikiako. 34Jekoṭheʹ khoiʹ ape âcur namaʹ asoʹape, judi angkogi ṭhep panca makoape tahale anaredo prosongsanaʹ itâʹ menaʹa? Namkohaʹ mentigito pâpi âdmikote pâpi âdmi panca makoako. 35"Kheʹ apetedo aperen dusmânko dulârkope ar angkoaʹ manja kâmi rikâpe. Ar itâʹgi âcur namaʹ asa bangketeʹ panca makoape. Tahale apelaʹte marang puroskar menaʹa, ar apedo sanam khoiʹ marangutâriʹ Issorren gidrâ hoʹpehaʹ, karon ânite okritoggo ar kharaponkhoiʹho mayaokoye. 36Aperen Baba jemon mayaiʹkane apeho engkagi mayaiʹ hoʹpe.

Eṭaʹiaʹ bicâr

(Mothi 7:1-5)

37"Eṭaʹonkhoiaʹ dos alo sabbereyape, anate apeyaʹhoʹ dos bang sab hoʹa. Eṭaʹonkhoiʹ sâsti namaʹ joggo mente alo monekoape, anate apeho sâsti namaʹ joggo mente oho moneʹape. Eṭaʹonkhoiʹ mapkope anate apeyaʹhoʹ map hoʹhaʹ. 38Danpe, anate apeho ma hoʹhaʹ, aima bisiketeʹ, ota otate, jhiku jhikute umṛu ujugoʹ lakaketeʹ apeyaʹ gochare ma hoʹhaʹ, karon alka apete songketeʹ makoape analakagi ape laʹte song hoʹhaʹ."

39Tayomte Jisute Aiʹren celako cedkolaʹte niâ cetʹaʹ lopor lâiaʹkoe, "Miṭiʹ andhra âdmite ki ar miṭiʹ andhra âdmi ḍahar uduʹ dareye? Tahale ki ângkin barhorgi gaṛhaʹre oho ujuʹgoʹakin? 40Celado guru khoiʹdo bang marngako, kheʹ jahegi purâte cetʹ namako, angkodo guru laka hoʹako.

41"Amren boihaoaʹ metʹre je ghansar menaʹa ana kebol leldam, kheʹ amaʹ metʹre je marang kaṭnaʹ ṭukrâ menaʹa anado ceklaʹ bang leldam? 42Amaʹ nijeoaʹ metʹre je marang kaṭnaʹ ṭukrâ menaʹa anado jâkhni bang lokkhodam tâkhni kalkate amren boiha meta dareyam, 'Boiha, amaʹ metʹre je ghansar menaʹa, hijub, ana oṛoʹgiritâming. Ceklaʹ am na katha mendam? Bhonḍo, palhere amaʹ metʹ khoiʹ marang kaṭnaʹ ṭukrâ oṛoʹgirime, tahale amren boihaoaʹ metʹre je ghansar menaʹa, ana oṛoʹgiri laʹte manjate lelnammahaʹ."

Loya dare ar jo

(Mothi 7:16, 18-20)

43"Miṭiʹ manja darere kharap jo bang joʹa, arho kharap darereho manja jo bang joʹa. 44Jo tigi dare cinhuʹa. Âdmido jânumjhâilâ khoiʹ loa ar jânum jhâilâ khoiʹ ânggur bang godako. 45Manja âdmido aiaʹ ontor pereʹ manja khoiʹgi manja jinis oṛoʹketeʹ âgie, ar kharap âdmido aiaʹ ontor pereʹ kharap khoiʹgi kharap jinis oṛoʹ âgie. Âdmioaʹ ontor jeṭaʹte pereʹ tahana mocato ana kathagi mene.

Geni ar bemaʹ âdmi

(Mothi 7:24-27)

46"Ar apete ceklaʹ ing 'Probhu, Probhu,' mente ṭâhungape, othoco ing ja mening ana bang rikiape? 47Jahegi ingṭheʹ hiʹketeʹ ingâʹ katha atene ar ana lakaketeʹ kâmie ânido eke laka ingte ape ana lâiopekâning? 48Ânido emon miṭiʹ âdmi laka, je oraʹ bane laʹte khâyuʹgoiʹ has laketeʹ diri cetanre roda makede. Tayomte bannaʹ daʹ âtuketeʹ ana oraʹ cetanre ujuʹna, kheʹ ana oraʹ bang hilu darelede, karon anado keṭeʹketeʹgi bano hoʹlena.

49"Je ingâʹ katha atene othoco analaka bang kâmie ânido emon miṭiʹ âdmi laka, je has cetanre roda bang maketeʹgi oraʹ banokede. Tayomte bannaʹ daʹ âtuketeʹ jhâkhni ana oraʹ cetanre ujuʹna tâkhni ana oraʹ râputʹketeʹ ekebâri dhongsogena."

Currently Selected:

Luk 6: EKL

Highlight

Copy

Compare