Mark 14

Jisu goiʹgiṛiʹaʹ kurumuṭu

(Mothi 26:1-16; Luk 22:1-6; 1 Korinthio 11:23-25)

1Bacoaʹ porobnaʹ ar begor khâmi piṭhânaʹ porobnaʹ bar din tayom. Marang purohitko ar dhormo masṭarkote baiketeʹ Jisu sabeilaʹ ar goiʹ girilaʹte upâi sendre sanako. 2Kheʹ angko menkedako, "Porob somaido bang, âdmiko talare golmal ho darena."

Boithoniâre Jisuoaʹ bohoʹre reja so sunum makede

3Jisu jâkhni Boithoniâre kusṭo rugi Simonaʹ oraʹre tahekane. Ana somai âni jâkhni jomsane tâkhni miṭiʹ reja âdmi miṭiʹ poṛ dirinaʹ bâṭite dâmi ar naḍnaʹ so sunum âgukede. Bâṭi râputʹketeʹ âni Jisuoaʹ bohoʹre ana naḍnaʹ so sunum dulkede. 4Aṛe ekeko tahalenako angko talare koekṭeʹ âdmi edreketeʹ miʹhor armiʹhoraʹ talare loporlaʹ lagonako, "Nengketeʹ dâmi so sunum ceklaʹ nosṭokede? 5Niâ so sunum âkringlekheʹto peso dinâr#14:5 Peso dinâr mane hoʹkana, miʹ bochornaʹ mujri. khoiʹho ḍher namoʹahoteʹ ar ana rangeʹoreʹ âdmi ma jutuʹahoteʹ." Na menketeʹ angko reja âdmite âni alejilaʹ lagonako. 6Kheʹ Jisu menkede, "Thiruʹpe, âni tahesoipe, ceklaʹ apete âni duk maikanape? Ânito Ing laʹte manja kâmigi rikâde. 7Rangeʹkodo sanam somai ape talare menaʹkoa, ar jâkhni ichâ tâkhnigi apete angko goro darekopehaʹ, kheʹ Ingdo apete sanam somai bang nameng ape. 8Âni akaṭaʹ darekade ana rikâkade. Ing topang laʹte sapṛonglaʹ âni laharigi Ingâʹ hoṛmo cetanre so sunum ojoʹokâdinge. 9Ingte ape sârigi metapekâning, dhârtinaʹ jaha jagarigi Issoraʹ maonaʹ manja khobor procar hoʹhaʹ, ar aṛe ni reja âdmiaʹ katha disâ dohe laʹte âniaʹ na kâmi naʹ kathaho men hoʹhaʹ."

10Natayom ṭhâkuâʹ Jihuda Iskarioth nutumte angko baṛoṭeʹ celako talareʹ miʹhor Jisu sabsoi laʹte marang purohitkoṭheʹ cane. 11Angkodo Jihudaoaʹ katha atenketeʹ kusinako ar âni ṭhep maikohaʹ mente rikitkedako. Tâkhni Jihudate Jisu sabsoi laʹte sujog sendrelaʹ lagone.

Probhuaʹ mucâtʹ bhoj

(Mothi 26:17-30; Luk 22:7-23; Johon 12:21-30)

12Khâmihin piṭhâ porobnaʹ palhe dinre bacoaʹ porobren bhiṛi hopon bhoj laʹte utsorgo hoʹsanako. Anate celakote Jisu kulikidiako, "Am ar abo laʹte bacoaʹ porobnaʹ bhojdo akare caketeʹ teyarlaʹ mendam?"

13Tâkhni Jisute Aiʹren barya cela na menketeʹ Jirusalemre kolkeʹkine, "Aban sohorre caʹban. Aṛe emon miṭiʹ koṛa âdmi lel nameibanhaʹ, eke miṭiʹ ṭhilite daʹ idide. Aban âniaʹ tayom tayom caʹaban. 14Âni akaṭaʹ oraʹre bolonheʹ ana oraʹren mâlik metaiaban, 'Guru menkede, celako saote akare Ing bacoaʹ porobnaʹ bhoj jom dareʹhuʹ Ingaʹ ana pânhâ oraʹ akare? 15Anate ânite aban cetan talarenaʹ miṭiʹ sajonaʹ marang oraʹ uduʹobanheʹ. Aṛegi abo laʹte jomaʹ sanamaʹgi teyarban."

16Tâkhni ângkin cela caketeʹ sohore bolonâkin, ar Jisu akalka menlede, ṭhikʹ angkagi lelnamkedakin ar bacoaʹ porobnaʹ bhoj sapṛokedakin.

17Bela dubu lenkheʹ Jisu Aiʹren baṛoṭeʹ celako laite aṛe cane. 18Angko jâkhni duruʹketeʹ jomsanako, ana somai Jisu menkede, "Ingte ape sârigi metapekâning, ape talare miʹhorte ṭhâkuâketeʹ Ing sabsongheʹ, ar âni Ing suliʹgi jomde."

19Jâkhni celako atenkedako tâkhni angko bhabnanako ar miʹhor armiʹhor saote loporlaʹ lagonako, "Âni ki ingkâning, Probhu?"

20Jisute angko metakeʹkoe, neko baṛoteʹ talaren miʹhor, eke Ing saote miʹ bâṭire jomaʹ jomde. 21Âdmi Hoponaʹ bisoite alka ol menaʹa, engkagi Ânido gojoʹe, kheʹ botor âni âdmi ekete Âdmi Hopon sutrukoaʹ tire sabsoiheʹ! Âni âdmiaʹ janam bang holentaikheʹ borong âniaʹ pokkhe manja hoʹahoteʹ."

22Jom nu caʹkana, emon somai Jisu piṭhâʹ engeketeʹ dhonnobad makede ar ana kecaʹ kecaʹketeʹ celakoaʹ tire maketeʹ menkede, na engepe, nado Ingaʹ hormokana."

23Natayom Jisu baṭi engeketeʹ dhonnobad makede ar celako makeʹkoe. Angko sanamiʹgi ana mog khoiʹ ânggur rase nukedako. 24Tâkhni Ânite angko metakeʹkoe, "Nado Ingâʹ meyomkana akaṭaʹdo sanamkhoiʹ laʹte ma hoʹhaʹ. Âdmiko laʹte Issoraʹ naoa cukti Ingâʹ na meyomtigi câlu tahanhaʹ. 25Ingte ape sâriaʹgi metapekâning, tindhâbiʹ Ing Issoraʹ rajjore ânggur rase arho naoate bang nuding indhabiʹ ar Ing ana bang nuing."

26Ana tayom angko miṭiʹ siringketeʹ oṛoʹketeʹ Joitun burure canako.

Pitorte Jisu osikârkidie

(Mothi 26:31-35; Luk 22:31-34; Johon 13:36-38)

27Jisute Aiʹren celako metakeʹkoe, "Ape sanamkhoiʹ Ing bâgiketeʹ cagenpehaʹ. Ceklaʹ bang pobitro sostorre ol menaʹa,

'Ingte dhorekoiʹ goiʹ girihuʹ,

anate bhiṛiko pasnogenkohaʹ.'

28Tobe Ing goiʹ khoiʹ jiuitʹ beretʹ lenkheʹ tayom Ing apeyaʹ laharigi Gâlilre caʹhuʹ."

29Tâkhni Pitorte Âni metakidie, sanamkhoiʹte Am bâgiketeʹ câʹreho ingdo bang câʹing."

30Jisute âni metakidie, "Ingte am sârigi metamkâning, tihing setaʹ nutre sim barjhikâ kukru laharigi am pe jhikâ menmahaʹ je, amte Ing bang cinhungam."

31Kheʹ Pitor arho jorte menkede, "Ing judi Am saote gojoʹlaʹho hoʹtingâ taoreho ing tisho bang mening je, ingte Am bang lelkaʹmeing." Celakoho ana miʹ kathagi menkedako.

Getsimâni baganre Jisuoaʹ koijong

(Mothi 26:36-46; Luk 22:39-46)

32Ana tayom angko Getsimâni nutumnaʹ miṭiʹ jagare canako. Aṛe Jisu Aiʹren celako metakeʹkoe, "Ing tinâkhâniʹ koijonghuʹ inâkhâniʹ ape naṛe duruʹ tahanpe." 33Na menketeʹ Ânite Pitor, Jakob ar Johon Aiʹ saote engekeʹkoe ar monre aima haso ar kosṭo namlaʹ lagone. 34Ânite angko metakeʹkoe, "Dukte Ingâʹ jiui oroʹgenkantingâ. Ape ing saote naṛe ceton tahanpe."

35Ana tayom Jisudo thoṛa sâhingre caketeʹ hasare umâʹketeʹ koijonglaʹ lagone jate sombhob hoʹlekheʹ na duknaʹ somai Âniṭheʹ khoiʹ jate sâhingoʹa. 36Âni menkede, "Baba, Amṭheʹto sanamaʹgi sombhobgiâ. Na duknaʹ mogdo Ingṭheʹ khoiʹ Am idime. Taoreho Ingâʹ ichâlaka jate bang hoʹa, kheʹ Amaʹ ichâlakagi hoʹman."

37Tayomte Jisu celakoṭheʹ âcur hiʹketeʹ lelkede angko jâpitngekadako. Ânite Pitor metakidie, "Simon, am jâpitdam? Miʹ ghonṭaho ki Ing saote bang benget tahe darelenam? 38Ebhengi tahanpe ar koijongpe jate Soitanaʹ purikkhare alo paṛoʹape. Attare icchâ menaʹa, kheʹ hormodo durbolgiâ."

39Tayomte Jisu arho caketeʹ analakagi koijongkede. 40Ar Âni âcur hiʹketeʹ lelkede arho angko jâpitngekadako, karon angkoaʹ met jâpitte hamalngelentakoa. Celakote Jisu itâʹ uttor mailaʹko ana bang bujhu dareledako.

41Pe jhikâ âcur hiʹketeʹ Ânite angko metakeʹkoe, "Ape nitoʹho jâpitdape ar jiruʹkanape? Jotesṭo hokana. Somai sorre hiʹkana. Lelpe, Âdmi Hopon nitoʹ pâpikoaʹ tire sabsoikohaʹ. 42Beredpe, delabon, ekete Ing suttrukoaʹ tire sabsonheʹ ânido sore hiʹngekane."

Jisu gereptar ne

(Mothi 26:47-56; Luk 22:47-53; Johon 18:2-12)

43Ar Jisu tâkhniho katha mensane, emon somai Jihuda aṛe hiʹne. Angko baroṭeʹ celako talare âniho miʹhor tahalene. Âni saote aima âdmi chora ar hapako laite hiʹnako. Marang purohit, dhormo masṭar ar harme netakote neko âdmiko kolleʹkoako.

44Jisu ekete sabsolidie âni angko âdmi saote miṭiʹ cinhât ṭhiklede. Âni menlede, "Eke ingte cumâinghâʹ, Ânigi Âni âdmikane. Apete Ânigi sabeipe ar jogoketeʹ idiyipe." 45Ar Jihuda sojha Jisuṭheʹ caʹketeʹ menkede, "Guru" Na katha menketeʹgi ânite Jisu cumâkidie. 46Tâkhni angko âdmikote Jisu sabkidiako. 47Ekeko Jisuṭheʹ tenggo tahalenako angko talaren miʹhor nijeyaʹ chora oṛoʹkede ar sanam khoiʹ marang purohitren das dalketeʹ âniaʹ miṭiʹ lutur getgirikeʹtaye.

48Jisute angko âdmiko metakeʹkoe, "Ingdo ki ḍâkatkâning je, ape chora ar hapa laite Ing sabenglaʹ hiʹkanape? 49Ingto dinâmhiluʹgi ape talare tahaketeʹ Mundirre cedopesâning, kheʹ tâkhnito apete Ing bang sabkâdingape. Oboso sastronaʹ katha purunoʹhaʹ." 50Tâkhni Âniren celako sanamkhoiʹ Âni bâgiketeʹ nirgenako.

51Ar miṭiʹ kora kebol miṭiʹ cadra soroʹketeʹ Jisuoaʹ tayom tayom caʹsane. 52Âdmikote jâkhni âni sabkidiako tâkhni âni cadre dohoketeʹ oryonggi nirgene.

Marangsobha lahare Jisu

(Mothi 26:57-68; Luk 22:54-55, 63-71; Johon 18:19-24)

53Tayomte âdmikote Jisu saote engeketeʹ sanam khoiʹ marang purohitaʹ oraʹ canako. Aṛe marang purohit, harme neta ar dhormo masṭarko miʹsaote jaoranako. 54Pitor sâhing khoiʹgi Jisuoaʹ tayom tayom caʹ caʹte sanam khoiʹ marang purohitaʹ racare caketeʹ bolone. Aṛe kormocâriko saote duruʹketeʹ âni sengel joroʹlaʹ lagone.

55Marang purohitko ar marang sobharen âdmikote Jisu goiʹ giri laʹte Ânioaʹ biruddhe sâkkhi sendrakosanako, kheʹ aka sâkkhigi angko bang namledako. 56Aima âdmigi Jisuoaʹ biruddhe âuṛiaʹ sâkkhi maledako, kheʹ angkoaʹ sakkho bang milulentakoa.

57Mucitʹre thoṛa âdmi beretketeʹ Jisuoaʹ biruddhore niâ âuṛiaʹ sâkkhi makedako, 58"Alete Âni niâ katha mente atenkâdiale, âdmi teyaraʹ niâ Mundir Ing râputʹ giriyihuʹ ar pe dinnaʹ talare emon miṭiʹ Mundir teyarhuʹ akaṭaʹdo âdmikoaʹ teyaraʹdo bangkana." 59Kheʹ taoreho angkoaʹ sakkho bang milulena.

60Tâkhni sanam khoiʹ marang purohit âdmikoaʹ talare tenggoketeʹ Jisu kulikidie, Am ki jahanaʹ uttorgi bang maʹlap? Am biruddhe âdmiko itâʹ sakkho maʹkanako? 61Kheʹ Jisudo uttor bang maketeʹ thirketeʹ tahane. Ana tayom sanam khoiʹ marang purohitte arho Âni kulikidie,

"Am ki Âni Khrisṭokanam, poromdhonno Issorren Hopon?" 62Jisu menkede, "Inggi Ânikâning. Ape sanamdareiʹ Issoraʹ jojma ti hate Âdmi Hopon duruʹ tahente leleipehaʹ ar sermanaʹ bâdri saote agro hijuʹte lel nameipehaʹ."

63Tâkhni sanam khoiʹ marang purohit aiaʹ lugri oreʹketeʹ menkede, "Aleyaʹ ar sâkkhinaʹ itâʹ dorkar? 64Apeto atenkedape je, Ânite Issor opomankidie. Ape itâʹ moneyape?" Angko sanamkhoiʹte Jisu dos maketeʹ gojeiaʹ sâsti mailaʹ mente ṭhikkedako. 65Tâkhni koekṭeʹ âdmi Ânioaʹ hormore thuʹodiako ar Ânioaʹ moca poṭomketeʹ Âni ghusiketeʹ metakidiako, "Aleyaʹ bhobisotnaʹ katha lâime, ekete Am dalkeʹmiâko?" Natayom kormocârikote Âni idiketeʹ thapailaʹ lagonako.

Pitorte pe jhikâ Jisu osikârkidie

(Mothi 26:69-75; Luk 22:56-62; Johon 18:15-18)

66Pitor jâkhni latarre racare tahasane, tâkhni sanam khoiʹ marang purohitren miṭiʹ cakrâni aṛe hiʹne. 67Ânite Pitor joroʹte lelketeʹ âni hate manjate koyoʹketeʹ menkede, "Amhoto Âni Nasarotio Jisu saote tahalenam."

68Kheʹ Pitor osikârketeʹ menkede, "Am itâʹ mendam ana ingdo bang baṛeing, ar bang bujhuding." Tayomte Pitor barhenaʹ duârṭheʹ cane, ar tâkhnigi miṭiʹ sim kukrukede.

69Cakrânite jâkhni Pitor aṛe lelkidie, ekeko aṛe tenggo tahalenako angko arho menkedako "Ni âdmi angkorengi miʹhorkane. 70Pitor arho osikârkede.

Niâ tayom aṛe duruʹtaha thoṛa âdmite Pitor metakidiako, "Sâriaʹgi amdo angkoren miʹhorkanam, karon amdo Gâlilrenkanam."

71Kheʹ Pitor nijegi sarapne ar rikitketeʹ menlaʹ lagone, "Ape Ekeyaʹ somporke mendape, Ânido ingte bang cinhuing."

72Ar tâkhnigi dosar jhikâ sim kukruketeʹ rakapne. Anate Jisu na je katha menlede, "Sim bar jhikâ kukru laharigi am pe jhikâ menmahaʹ je, amte Ing bang lelkâdingâm," Ana katha tâkhni Pitor disâkede. Ar tâkhnigi âni raglaʹ lagone.

Currently Selected:

Mark 14: EKL

Highlight

Copy

Compare