Mark 15

Pilâtaʹ samnere Jisu

(Mothi 27:1-26; Luk 23:1-25; Johon 18:28-19:16)

1Setaʹrigi marang purohitkodo, harme netako ar dhormo masṭarko saote ar marang sobhaṛen sanam âdmiko saote miṭiʹ poramorsokedako. Angkote Jisu tol idiketeʹ Pilâtaʹ tire makidiako.

2Tâkhni Pilâtte Âni kulikidie, "Am ki Jihudikoren Rajakanam?" Jisute uttorketeʹ âni metakidie,

"Amgi mendam."

3Tayomte marang purohitko Jisuoaʹ cetanre aima dosaroplaʹ lagonako. 4Pilâtte âni arho kulikidie, "Am ki jahanaʹgi uttor bang maʹlap? Lelme, neko Amaʹ biruddhe tinâʹ obhijogdakoʹ"

5Kheʹ Jisu ar itâʹho uttor bang malede, inâte Pilâtdo asarjogene.

6Bacoaʹ porobnaʹ somaire Pilâtte âdmikoaʹ icchâ laka miṭiʹketeʹ bundi bâgikosane. 7Ana somai Barabba nutumte miṭiʹ âdmi bidrohiko saote jelkhanare tahalene, ekekote bidrohinaʹ somaire aimahor goiʹleʹkoako.

8Tâkhni aima âdmi cetanre caketeʹ Pilât metakidiako, "Amte ale laʹte miṭiʹ bundi mukti mai alka am lahate rikisanam." 9Pilâtte Jisu mukti maiaʹ asate angko uttorketeʹ metakeʹkoe, "Ape itâʹ engelaʹpe, ingte ape laʹte Jihudiren Raja bâgigiriying?" 10Ânite angko niâ katha kulikeʹkoe ceklaʹ bang marang purohitkote je hingsâte Jisu ânioaʹ tire malidiako ana âni baṛe namkede. 11Kheʹ marang purohitkote aima âdmi uskuleʹkoako jate angkote Jisu badalte Barabba koiketeʹ engeyako.

12Kheʹ Pilâtte arho aima âdmiko kulikeʹkoe, "Tahale apete Eke Jihudiren Raja metayape Âni cikâihuʹ?"

13Angko arho cilluketeʹ menkedako, "Ânioaʹ tire kaṭa bidketeʹ kurusre ṭangloipeʹ"#15:13 Ana somai niâ tahalena oporadhikoaʹ goiʹnaʹ upâi. Ar miṭiʹ oporadhi tire kaṭa ṭhokoketeʹ kurusre ṭangloketeʹ goiʹko sanako.

14Kheʹ Pilâtte angko metakeʹkoe, "Ceklaʹ? Ni itâʹ oporadhkade?"

Kheʹ angko jore cilluketeʹ menkedako, "Ânioaʹ tire kaṭa bidketeʹ kurusre ṭangloipeʹ"

15Tâkhni Pilâtte âdmiko sontusṭoko laʹte Barabba angko laʹte bâgikidie, ar Jisu kâṭhin câbukte dalketeʹ, Ânioaʹ tire kaṭa bidketeʹ kurusre ṭangloi laʹte sonnokoaʹ tire makidie.

Sonnokoaʹ ṭhaṭṭa tamasa

(Mothi 27:27-31; Johon 19:2-3)

16Tayomte sonnokote Jisu idiketeʹ disâmren marang sasoniʹ Pilâtaʹ oraʹnaʹ racare hiʹnako. Aṛe angkote angkoren dolren bâki sonnoko miʹsaote jaorakeʹkoako. 17Angkote Jisu beguni rongnaʹ angaʹ soroʹodiâko, ar jânumnaʹ mukuṭ banoketeʹ Ânioaʹ bohoʹre capokedako. 18Inâ tayom angkote Âni obhibadonketeʹ metailaʹ lagonako, "Jihudiren Raja nomoskarʹ" 19Ar angkote miṭiʹ painate Ânioaʹ bohoʹre daleilaʹ lagonako, Ânioaʹ hormore thuʹodiâko, ar ukhṛumketeʹ Âni seoaodiâko. 20Âni ṭhaṭṭa tamasaketeʹ tayomte angkote ana beguni rongnaʹ lugri boiʹketeʹ Ânioaʹ nijeyaʹ lugri soroʹodiâko. Toyomte angkote Ânioaʹ tire kaṭa bidketeʹ kurusre ṭangloi laʹte âni bahere idikidiako.

Kurus cetanre Jisu

(Mothi 27:32-44; Luk 23:26-43; Johon 19:17-27)

21Ar Simon nutumte miṭiʹ Kurinioren âdmi ṭolakhoiʹ ana ḍahartora hijuʹsane, âni tahalene Aleksandar ar Ruphren bot. Sonnokote âni Jisuoaʹ kurus goʹ idilaʹte baddhokidiako. 22Tayomte angkote Jisu Golgotha nutumnaʹ miṭiʹ jagare idikidiako. Golgothanaʹ ortho "Bohoʹ khulinaʹ jaga." 23Angkote Âni aso caboʹaʹ ran mesalonaʹ ânggurnaʹ pâurâ nuilaʹ makidiako, kheʹ Ânido ana bang nulede. 24Toyomte angkote Âni kurusre makidiako, ar sonnokote Ânioaʹ lugriko hâṭing laʹte gulibaṭketeʹ lellaʹ namkedako ekeyaʹ bhaggore akaṭaʹ paṛoʹa.

25Setaʹ noṭa somaire angkote Âni kurusre makidiako. 26Jisuoaʹ biruddhe dosnaʹ katha olketeʹ Ânioaʹ bohoʹ cetanre ṭangokedako ar anare ol tahalena, "Jihudiren Raja." 27Ar angkote Âni saote arho barhor ḍakat kurusre makeʹkinâko, miʹhordo Ânioaʹ jojma hate ar eṭaʹhordo leṭra hate. 28#15:28 Niâ 28 pod mare boikore bânua kheʹ naoa boikore niâdo ol hokana.

29Ar eke âdmiko ana ḍahartora caʹsanako, angkoaʹ bohoʹ jhukuketeʹ Jisu nindâketeʹ metakidiako, "Ohe Am Mundir râputʹketeʹ arho pe din talare ana banoketeʹ rakapmahaʹ. 30Nije bacop kurus khoiʹ agroketeʹ"

31Ṭhik negkagi marang purohitko ar dhormo masṭarkote Jisu ṭhaṭṭaketeʹ nijeko talare menlaʹ lagonako, "Âni âdmite eṭaʹonko bacokosane, kheʹ nije bang boco darenkane. 32Khrisṭo, Israyelren raja nitoʹ kurus khoiʹ agro hijup, jate ale lelketeʹ pâtyu darenale" Jisu saote eke kurusre ma holena ângkinteho Âni ṭhaṭṭailaʹ lagonâkin.

Jisuoaʹ goiʹ

(Mothi 27:45-56; Luk 23:44-49; Johon 19:28-30)

33Tayomte dupahar baroṭa khoiʹ bikâl tinṭa dhâbiʹ goṭa disâm nutgi tahena. 34Ar bela tinṭa somai Jisu jore cilluketeʹ menkede, "Eloi, Eloi, lama sabaktani?" Jeṭaʹnaʹ ortho "Issor Ingren, Issor Ingren, ceklaʹ Amte Ing bâgigiridingâm?"#Siringko 22:1

35Ekeko sorre tenggo tahalenako, angko talare ekeko niâ katha atenketeʹ menkedako, "Lelpe, Ânite Elio ṭâhuikane." 36Miṭiʹ âdmi dâr caketeʹ miṭiʹ isponj âguketeʹ sirkâre lohotkede ar painate gutuketeʹ Ânioaʹ mocare tulketeʹ metakidie, "Tahesoʹ, leling Eliote Âni agroilaʹ hijuʹe se bang."

37Toyomte Jisu jore cillukede ar goiʹgene.

38Tâkhni Mundirnaʹ porda cetan khoiʹ latar dhâriʹ oreʹketeʹ barbhaggena. 39Ar eke senapoti Ânioaʹ samnere tenggo tahalene, ânite Jisu nengkaketeʹ gojoʹte lelketeʹ menkede, "Sârigi Ânido Issorren Hopon tahalene."

40Koekṭeʹ reja âdmi sâhing khoiʹ lelsanako, angko talare Salomi, Mogdolini Moriom ar kâṭiʹ Jakob ar Josiren engat Moriom aṛe tahalenako. 41Jâkhni Âni Gâlilre tahalene tâkhni neko reja âdmiko Âni saote sanam jagare caʹsanako ar Âni jotnoisanako. Arho aima reja âdmikoho aṛe tahalenako, ekeko Âni saote Jirusalemre hiʹlenako.

Jisuoaʹ topa

(Mothi 27:57-61; Luk 23:50-56; Johon 19:38-42)

42Ana din tahalena sapreyaʹ din (Orthat jiruʹaʹ dinnaʹ laha din). 43Tayomte âyupgena, Orimâthiâren Josef nutumiʹ miʹhor hiʹne, ânido tahalene marang sobharen miṭiʹ manotan hor, ânido nijegi Issoraʹ rajjo laʹte ḍahar bengetsane. Âni sâhusketeʹ Pilâtṭheʹ caloketeʹ Jisuoaʹ hormo koikede.

44Jisu je nâniʹ saṭlaka goiʹgene anate Pilâtdo asarjogene, anate ânite senapoti ṭâhuketeʹ kulikidie Âni goiʹkane se bang. 45Toyomte senapotiṭheʹ khoiʹ baṛeketeʹ, ânite Josef Jisuoaʹ hormo idisokidie.

46Josef miṭiʹ lugri kiringketeʹ kurus khoiʹ Jisuoaʹ hormo agroketeʹ ana lugrite poṭomkidie, ar buru getketeʹ banoaʹ miṭiʹ topare ana hormo dohokede. Inâ toyom âni topanaʹ mocare miṭiʹ diri guṛkuketeʹ topanaʹ moca bondokede. 47Âni akare dohohona ana jagado Mogdolini Moriom ar Josiren engat Moriom lelkedakin.

Currently Selected:

Mark 15: EKL

Highlight

Copy

Compare