လုကာ 6
6
အခန် (၆)
မငြီးဆောက်တေတာငြီးဗွယ်
(မဿဲ ၁၂:၁-၈။ မာကု ၂:၂၃-၂၈)
1မငြီးဆောက်တေတာငြီး အငြီးကု ကိုယ်တော်ယေရှုနောင် အာတပည့်ဖုန်းအွယ့် ကာလေးလိုကာ ဘွူ့ဖာထွို့ တပည့်တော်ဖုန်းအွယ့် ဒေ့လိုကာဘွူ့သာထွို့ ချီချော့ထန်ကေ့ အကုန့်ဖုန်း နောင်ကျွော့်ထွို့မဲ့ အန်လိုကာဘွူ့ကွောဖုန်း။ 2အွယ့်ခါ့ ဖာရိရှဲအဟန်ဟန်အွယ့် “နားက့နုဲင့် ကွက်တဟနာ အိုမိုးလိုကာ တာလီမိုးလ့ဟ မငြီးဆောက်တေတာငြီးကု နောင်ဂျူးဖုန်းဥပဒေအတွုန်ကု” ဒေါင့်လိုကာ အာကာနိန်းအွယ့်။
3ကိုယ်တော်အွယ့် “ခွမ့်ခမ်းဒါဝိဒ်နောင် အာတပည့်ဖုန်း ဘသာဝီတာခါ့ အာမိုးတဟနာဒွို နားက့ဖတ်ဖိုကာဟ လိတ်ကျမ်ကုနောဝ်#6:3 အကြောင်ခရာဒွိုးဘာဒွို ပျန့်တို ခွမ့်ခမ်းဒါဝိဒ်အွယ့် အိုစထွူ့စွာ့ထန်ဘာ ခွမ့်ခမ်းရှောလမုန်ခိန်းကုတိုဟနေ။ ။ 4ခွမ့်ခမ်းဒါဝိဒ်ဒီ့ နွူးကျိန်း ဗွယ်ဖရာယွမ်တော်ကွင်ကုထွို့#6:4 ဘသာဒေါင့်တို ဗွယ်ဖရာ တင့်တော်ထွို့ အွယ့်ခိန်ကာလတွင်ဒီ့ ဗိမာန်တော် ခအိုကောင်း အွယ့်ကြားမဲ့ စုံဘာဗွယ်ဖရာယွမ်တော် နိန်းအွယ့်ဟနေ။ အာချွော်တကိုးမြတ်#6:4 တကိုးမိုးနောင်ဂျုံထွို့ကပ်လှူစေးကန်းဗွယ်ဖရာ။ မေတွိုတွို မငြီးဆောက်တေတာငြီးအွယ့် ပုရောဟိတ်အပလားအွယ့် အန်လေတကိုးဇျီးနောင်တကိုးတ့၊ တကိုးဇျီးဒီ့မေကျွမ်ထွို့အွယ့် အန်လ့ဘို့ ပုရောဟိတ်အပလားဟို့။ အိုကပ်ခို့စေးကန်းဒါ ဗွယ်ဖရာထွို့ပုရောဟိတ်ဖုန်းဟို့ အန်ခွင်အိုဒါ တကိုးအွယ့်ဘာထွို့#6:4 တကိုးဒွို မိုးတိုနောင်ဂျုံထွို့ ပျန့်တိုတကိုးကပ်စေးကန်း ဗွယ်ဖရာတိုဟနေ။ မတွိုထွို့ မငြီးဆောက်တေတာကျွမ်ငြီးငြီးကု အန်လေဘာတကိုးတ့နောင် တကိုးဇျီးထွို့ တကိုးဇျီးအွယ့်ဘာအွယ့် ပုရောဟိတ်အပလားတိုးဟို့ ကျွမ်အန်။ အာအန်တိုးလီကာဟ အာဖီအန်ပါတုဲင်းထိုင် အာတပည့်ဖုန်း” ဒေါင့်နိန်းအွယ့်ထွို့ ကိုယ်တော်အွယ့် 5“ကပျန့်ဒါ ပလူးဖုခု#6:5ကဒေါင့်ဒါ ပလူးဖုဒွို ဓမ္မကျမ်ဇျီးကုဒီ့နေ့ထန်လိ ခမိန်ပလန်ပလန်ထွို့ ခရစ်တော် ဖီဖန်ဟောင့်ချာတိုး အာနန်တိုး။ငါးဒွို ပျန့်တို မငြီးဆောက်တေတာငြီး ဗွယ်ဟနေ” မိန့်ဆွက်ဒါ့နိန်းအွယ့်။
ပလူးကျွော့်ပန်ချို့ဒိုင့် အိုစီ့စာ အပလား
(မဿဲ ၁၂:၉-၁၄။ မာကု ၃:၁-၆)
6မငြီးဆောက်တေတာငြီး လငါ့ငြီးကု ကိုယ်တော်အွယ့် အိုဟိုစွမ့်တာ ဓမ္မာရုံကုတွင် ပလူးကျွော့်ပန်ချို့ဒိုင့် အိုစီ့စာ အပလားအွယ့် အိုအွယ့်ကုပါ။ 7မငြီးဆောက်တေတာငြီးကု မေကုဖီ ပလူးအပလားပလားအွယ့် ဖီကကွင်မို့ အီယွူကျီ့ အကြောင်ခရာတာ ဖာရိရှဲနောင် ကျမ်ဒါဆရာဖုန်းအွယ့် အိုပွိုင်းဟွိုင့်ဘို့လိုကာ ကိုယ်တော်။ 8ဒေါင့်မာလဲ့ ပလူးအွယ့်ဟို အိုယူထွို့ အိုကြံလိုကာ နိန်းမာဒွို အိုသိကြိုင်လိ အွယ့်ကြားမဲ့ ကိုယ်တော်အွယ့် “တထွိုင်ထန်ထွို့ လေအိုထွိုင်တာ ပလူးကားကအို မေငါ့ကုလုဲင်” ထွိုင်မိန့် ပလူးကျွော့်ပန်ချို့ဒိုင့် အိုစီ့စာအွယ့်ပလား နိန်းအွယ့်ခါ့ ပလူးအွယ့်ပလားအွယ့် တထွိုင်ထန်တာထွို့ အိုထွိုင်တာ။
9ထွို့မဲ့ ကိုယ်တော်အွယ့် “ငါးအီ တစီ့နားက့ တာအဘာ။ မငြီးဆောက်တေတာငြီးကုဒွို မိုးဘာ တခိုနောင် မိုးဘာ တလီခိုဟ မေဟလဲ့ ကယ်ပလူးအပလားလားဆက်နောင် မိုးစီ့ပလူးအပလားလားဆက်ဖုန်းအွယ့် ကမာဘာဒွို ညီနောင်ပညတ်” တစီ့အာကာ နိန်းအွယ့်ထွို့ 10လှည့်ဟွိုင့်လေး ပလူးအိုခွူ့အတီးကုစာဖုန်းကားကအို ထွို့မဲ့ “ယောင်ထန် နားကျွော့်လုဲင်” ထွိုင်မိန့် ပလူးကျွော့်ပန်ချို့ဒိုင့် အိုစီ့စာ နိန်းအွယ့်ထွို့ ပလူးအွယ့်ပလားလဲ့ ထွိုင်ယောင်ထန်ကျွော့်ခါ့ အာကျွော့်အွယ့် ပြန်ပျန့်ချာတွို့နောင် အခိုပကတိ။ 11ထွို့မဲ့ ဖာရိရှဲဖုန်းနောင် ကျမ်ဒါဆရာဖုန်းအွယ့် ဒေါသထန်လိုကာထွို့ အာကာချင်ချင် တွုန်ပင်လိုကာ အီမိုးဘာကိုယ်တော်ယေရှုနိန်းမာ။
သာဝက#6:12ကဒေါင့်ဒါ သာဝကဒွို ပျန့်တို ကလွိုက်ရွေစေချာစေးကန်းဒါ တပည့်တော်ဖုန်း ဟနေအပလား။ အစီ့ငြီ့ပလား
(မဿဲ ၁၀:၁-၄။ မာကု ၃:၁၃-၁၉)
12အငြီးကု ကိုယ်တော်ယေရှုအွယ့် အီဆုတောင်တာတာ စွာ့ထန်ခေါင့်လောင်ထွို့ ဆုတောင်တာ ဗွယ်ဖရာဆောင့် ကန်အဟအာ့။ 13မွိုင်ထွိုင်လီ့ထွို့ ဟောင့်စုတပည့်ဖုန်းကားကအို အာဆောင့်ထွို့မဲ့ ရွေထန်ပလူးအွယ့်ဟိုကု အစီ့ငြီ့ပလားထွို့ အေ့ပျန့်သာဝကဖုန်း။
14ပလူးအွယ့်ဟိုဖုန်းဒွို ပျန့် ရှိမုန် ကိုယ်တော်ကဖီစေးကန်းဒါနျန်း ပေတရုနိန်းအွယ့်နောင် အာပွော်ခု အန္ဒြေ၊
ယာကုပ်၊
ယောဟန်၊
ဖိလိပ္ပု၊
ဗာသောလမဲ၊
15မဿဲ၊
သောမ၊
အာလဖဲဖုခု ယာကုပ်၊
ကဟောင့်ဒါ ပလူးရက်မျို ရှိမုန်#6:15ရှိမုန်ဒွိုပျန့်တိုဂျူးပလူးမျိုဖုန်း ဖီကလွှတ်ထန်ကေ့ရောမတအုပ်ချုပ်ခင်လားတာ ကတွိုက်ဒါ အကျွိုကု အကျွိုဇျီးစာ အပလား။၊
16ယာကုပ်ဖုခု ယုဒနောင်
ငါ့လိုင်ဒွို အီပျန့် ပလူးဖောက်ကိုယ်တော်သစ္စာစာ ယုဒရှကာရုတ်#6:16ယုဒရှာကာရုတ်ဒွို သစ္စာဖောက် ကိုယ်တော် တအန်ခံသစ္စာပွဲ ကန်စာ့စွက်ကုထွို့ လ့နောင်တ ကသစ္စာဖောက်နိန်းအွယ့်တာထွို့ မိုးစီ့ချာတိုး နန်။ (မ၊ ၂၇:၅) ကာဟနေ။
စွမ့်တာနောင် ကုတာ
(မဿဲ ၄:၂၃-၂၅)
17ထွို့မဲ့ ကိုယ်တော်အွယ့် နောင်အာသာဝကဖုန်း အိုခေါင့်အွယ့်ဘာလောင် ကြွာ့လင်းတာထွို့ အိုထွိုင်တာ ဟန်ဒွမ့်ရပ်ကု။ နောင်တပည့်ဖုန်းဟေတန်ထွို့ လူထုပရိသတ် အို ယုဒကန်၊ ဂျေရုဆလင်ဝိန်း၊ တုရုနောင် ဇိဒုန်ဝိန်း သျှီ့စွမ်တီးအဘောင့်လောင်ကု ကအိုဒါ ဝိန်းဖုန်းဟေတန်ကုစာဖုန်းအွယ့် အိုတွိုလေးလိုကာ အွယ့်ကုပါ။ 18အာကာအွယ့် အီနာလိုကာကိုယ်တော်ယေရှု ဟိုစွမ့်တာဖုန်းနောင် အီကုလိုကာ အာကာရောဂါတာ တွိုလေးလိုကာတိုဟနေ။ ကိုယ်တော်အွယ့် ကုဖီလူးတွို့ ပလူးမိစ္ဆာတလီခိုဟအိုပူစာဖုန်း ကားကအို။ 19ကိုယ်တော်ဆောင့်အွယ့် တန်ခိုတော် ကုတမာဖီဒါ ပလူးကားကအို တစာ့ရောဂါဖုန်း အိုအွယ့်ကြားမဲ့ ပလူးကားကအိုအွယ့်လဲ့ ဖီကခွိုင်းဒါလိုကာ ကိုယ်တော်တာ ကြိုစာလိုကာဟနေ။
ပလူးပျော်စွင်စာဖုန်း
(မဿဲ ၅:၁-၁၂)
20ထွို့မဲ့ ကိုယ်တော်အွယ့် မေငါ့ခွယ်မူလေး တပည့်ဖုန်းဆောင့်ထွို့
“ဒွိုးခါ့ အိုခုဲင် ဆင်ရယ်လိုကာဒါ နားက့ဖုန်း ဟွမ့်ခိုပျော်စွင်လိုကာတာလုဲင်။
ကွက်တဟနာမေဒေါင့်ဘာအွယ့် ဗွယ်ဖရာသာသနာတော်ဒွိုလဲ့ ပျန့်တို နားက့တာတိုဟနေ။
21ဒွိုးခါ့ ကအိုဝီလိုကာဒါတာစာဖုန်း ဟွမ့်ခိုပျော်စွင်လိုကာတာလုဲင်။
ကွက်တဟနာမေဒေါင့်ဘာအွယ့် နားက့ဒွို အီအန်အို့ ကွို့ကွို့လိုကာဘာတိုတာ။
ဒွိုးခါ့ ကအိုငွိုလိုကာဒါတာစာဖုန်းလဲ့ ဟွမ့်ခိုပျော်စွင်လိုကာတာလုဲင်။
ကွက်တဟနာမေဒေါင့်ဘာအွယ့် နားက့ဒွို အီတငါးလိုကာဘာတိုတာ ဟနေ။
22ကွက်ယွမ်အန်ပလူးဖုခု အွယ့်ကြားမဲ့ မေလွှသျှီလိုကာ နားက့ခါ့လဲ့ယောဝ်း၊
ခံဘာပလားဖီပေခါ့လဲ့ယောဝ်း၊ ခံဘာဒေါင့်စော်ကားဖုန်းထွို့
ခံဘာပလားဒေါင့်ရျုံလဲ့ယောဝ်း ပျော်စွင်လိုကာလုဲင်။
23မေပျန့်နိန်းအွယ့်ခါ့ ဟွမ့်ခိုအာရထွို့ တန်ဘုတ် ကျူကာတာလုဲင်။ ကွက်တဟနာမေဒေါင့်ဘာအွယ့် ဝိန်းခမ်းကု နားက့အီလ့ဘာဒါ ဆုလာဘ်ဒွို ဒူယွမ်တွို့တာ။ ထျက်အကီခါ့ကာ အာကာ ဖာ့ပလာဖုန်းဒီ့လဲ့ မိုးလိုကာ အရိယာဆူတော်ကောင်ဖုန်း နောင်နိန်းအွယ့် အွယ့်ကြားမဲ့ဟနေ” မိန့်နိန်းအွယ့်။
ပလူးကြုံဘာတခုဲင်စာဖုန်း
24ထွို့ဒါ့ ကိုယ်တော်အွယ့်
“ဒေါင့်မာလဲ့ ပလူးချမ်စာစာဖုန်း၊ နားက့ဒွို အီကြုံဘာဒူယွမ်တွို့ တခုဲင်ဖုန်း။
ကွက်တဟနာမေဒေါင့်ဘာအွယ့် နားက့ဒွို အိုလိုကာဘာနောင် ဖဝဝေ့ကျွမ်အွယ့်ကြားမဲ့ဟနေ။
25ဒွိုးခါ့ကု ပလူးကအိုအန်အို့ကွို့ဘာတာစာဖုန်းဒွို အီကြုံဘာဒူယွမ်တွို့တခုဲင်။
ကွက်တဟနာမေဒေါင့်ဘာအွယ့် အာကာဒွို အီကြုံလိုကာဘာ တအိုဝီ အွယ့်ကြားမဲ့ဟနေ။
ဒွိုးခါ့ကု ပလူးကအိုတငါးဒါတာစာဖုန်းဒွို အီကြုံဘာဒူယွမ်တွို့တခုဲင်။
ကွက်တဟနာမေဒေါင့်ဘာအွယ့် အာကာဒွို အီငွိုလိုကာဘာတာနောင် တသ့ပီတကူလား အွယ့်ကြားမဲ့ဟနေ။
26ပလူးဖုန်း မေဒေါင့်အန်ဖရာ နားက့ခရာအွယ့် နားက့အီကြုံဘာတခုဲင်။
ကွက်တာဟနာမေဒေါင့်ဘာအွယ့် အာကာ ဖာ့ပလာဖုန်းဒီ့လဲ့ ဒေါင့်အန်ဖရာလိုကာ အရိယာဆူတော်ကောင် ယောင်ဆောင်စာဖုန်း နောင်နိန်းအွယ့်အွယ့် အွယ့်ကြားမဲ့ဟနေ” မိန့်နိန်းအွယ့်ဟနေ။
အန်ဒင်မေတ္တာ ရန်ဆူလုဲင်
(မဿဲ ၅:၃၈-၄၈၊ ၇:၁၂)
27ကိုယ်တော်အွယ့် “ဒေါင့်မာလဲ့ ငါးအီဒေါင့်နားက့ ကအိုနာလိုကာဒါတာစာဖုန်း။ အန်ဒင်ကာမေတ္တာ ရန်ဆူလောင်လုဲင်။ မိုးဖီကာ ပလူးအိုလွှသျှီက့စာဖုန်း တခိုလုဲင်။ 28ပလူးအိုပျားဒါ နားစာဖုန်းဒွိုလဲ့ ဖီကပျန့်တခိုတာ ဆုတောင်ဖီလိုကာ ဗွယ်ဖရာဆောင့်လုဲင်။ ပလူး ကနှိပ်စက်ဒါနားစာ ကားကအိုဖုန်းတာဒွိုလဲ့ ဆုတောင်ဖီပါလုဲင်။ 29ပလူးအပလားပလားဒွို မေပလင် နားမေငါ့အဒိုင့်အွယ့် ဖီပလင်ပါဒါ့ မေငါ့ဒါ့အဒိုင့်လုဲင်။ ပလူးအပလားပလားဒွို မေကျွူ့ နားကန်ကျိန်းခူနောင့်လဲ့ ဖီပါဒါ့ နားကန်ကျိန်းကုန်ကုလုဲင်။ 30ပလူးကကျွူ့ဒါ တာတကျွိုကျွိုနားဆောင့်စာ ကားကအိုဖုန်းဒွိုလဲ့ ဖီလှူလိုကာလုဲင်။ ပလူးအပလားပလားဒွို မေချွော်စေးကန်း နားတကလွိုင်ဖုန်းအွယ့် ကျန်ကျွူ့ချာမာ ပလူးအွယ့်ပလားဆောင့်မာ။ 31ဗွမ့်နောင်နန်တိုး ဘာတခံ ပလားဆက်ဆံအတွုန် ဆက်ဆံဖီလိုကာ ပလားလောင်နိန်းအွယ့်လုဲင်။
32မေအန်ဒင်ဘို့မေတ္တာ ပလူးအန်ဒင်မေတ္တာ က့နန်လောင်စာဟို့အွယ့် ဗွယ်ဖရာဒွို အီအန်ဖရာဒါနားနိန်းမာ။ ကွက်တဟနာမေဒေါင့်ဘာအွယ့် အပျက်စရိုက်လီခိုဟစာဖုန်းမသဲ ပြန်အန်ဒင်ချာဒါလိုကာမေတ္တာ ပလူးအန်ဒင်မေတ္တာ အာကာလောင်စာဖုန်း။ 33နားမေ ပြန်ခိုချာဒါဘို့ ပလူးကခိုဒါ နားလောင်စာဖုန်းဟို့အွယ့် ဗွယ်ဖရာဒွို အီအန်ဖရာဒါနားက့ နိန်းမာ။ အပျက်စရိုက်လီခိုဟစာဖုန်းမသဲ အိုမိုးဒါလိုကာ နိန်းအွယ့်။ 34မေဖီငှာဘို့ပလူး အိုထင်တို အီပြန်ဖီချာဒါစာဖုန်းဟို့အွယ့် ဗွယ်ဖရာဒွို အီအန်ဖရာဒါနားက့ နိန်းမာ။ အပျက်စရိုက်လီခိုဟစာဖုန်းဟို့မသဲ အိုဖီငှာလိုကာ ပလူးပြန်ဖီချာဒါ့ အာကာစာဖုန်း။ 35တွိုနားက့ဒွို အန်ဒင်မေတ္တာ ရန်ဆူဖုန်းထွို့ မိုးဖီကာ တခို အာကာတာလုဲင်။ ဖီငှာလိုကာဘီဆံ နောင် လီအိုမောင့်ဟ ပြန်လ့ချာဒါ့လုဲင်။ နားက့ မေမိုးနိန်းအွယ့်အွယ့် အီလ့အကျိုဒူထွို့ အီပျန့်လိုကာ အစွိုင်းမြတ်စွက် ဗွယ်ဖရာဖုဖုန်း။ ကွက်တဟနာမေဒေါင့်ဘာအွယ့် ဗွယ်ဖရာဒွို ပလူးလီသိဟ ကေဇူစာဖုန်းနောင် ပလူးယုတ်ဖုန်းလောင်လဲ့ အိုအန်ဒင်တိုမေတ္တာ အွယ့်ကြားမဲ့ဟနေ။ 36ဗွမ့်နောင် နားက့ဖာ့ ဗွယ်ဖရာဒွို အန်ဒင်မေတ္တာ ဂရုဏာ ပလူးကျွမ်ပလားပလားလောင် နားက့ဒွိုလဲ့ အန်ဒင်လိုကာ မေတ္တာဂရုဏာလုဲင်” မိန့်နိန်းအွယ့်။
ကျန်ကျေရင်ဆုံဖြတ်မာ ပလားမာ
(မဿဲ ၇:၁-၅)
37ထွို့ဒါ့ ကိုယ်တော်အွယ့် “ကျေရင်ဆုံဖြတ်လိုကာမာ ပလားမာ၊ အွယ့်ကြားမဲ့ နားက့လဲ့ အီခံဘာဟ တကျေရင်ဆုံဖြတ်။ ကျန်အန်ဒင်အပျက်မာပလားမာ၊ အွယ့်ကြားမဲ့ နားက့လဲ့ အီခံဘာဟ အန်ဒင်အပျက်။ ခွင်လွှတ်ဖီပလားလုဲင်၊ မေမိုးနိန်းအွယ့်အွယ့် နားက့ဒွို အီခံဘာ တခွင်လွှတ်ဟနေ။ 38လှူဖီကာပလားလုဲင်။ နားက့လဲ့ အီပြန်လ့ချာဒါ့ဟနေ။ နားက့ ပြန်လ့ချာဒါ့ခါ့လဲ့ အီခံဘာ စူသိပ်ထွို့ စီကွူထွို့မဲ့ စူဖီနားက့ခရောင်ကုတွိုတွို့ဝေ့ပလုဲင်း#6:38 ကုန်ဆယ်အပလားဒီ့ ပလားမေလေအန်ပလီးတာ အာဆောင့်ခါ့ အာစူဖီဝေ့ဝေ့တွို့နောင်ခရောင်။ ကစူဖီခါ့အွယ့်လဲ့ ဖီကဒိုဟေ ဖီသိပ့်ထွို့ စီကွူထွို့မဲ့ ဖီစူဖီဟနေ။။ ကွက်တဟနာမေဒေါင့်ဘာအွယ့် ဗွမ့်နောင် နားက့ကဖီဒါပလားအတွုန် ဗွယ်ဖရာဒွို အီပြန်ဖီချာဒါ့တို နားက့” မိန့်နိန်းအွယ့်။
39ထွို့မဲ့ ကိုယ်တော်အွယ့် မိန့်ပလူးအွယ့်ဟိုနောင် တတိုက်တွုန်အဘာဒီ့ “ပလူးမေးသျှီ့ အပလားအွယ့် အီအွမ့်နေ့ဒါနဲ့ ပလူးမေးသျှီ့ဒါ့ အပလား ကလေ့။ အာကာအန်တငြီ့အွယ့် လင်တေးလူးကာဒါ တအောင့်ကု မေဟနောဝ်။ 40တပည့် ဒါပွမ်းလွို့ထိုင် ဆရာဒွို လီအိုဟ။ ဒေါင့်မာလဲ့ မေလေ့ကင့်ဖီဝေ့ဝေ့ တပည့်အွယ့် အာဒွို အီပျန့်ထန်ဒါနောင် အာဆရာ။
41နားနုဲင့် လီဒင်စတိဟ တတီတို့ကျ တျာတွိုင်ကလုံ နားက့မေ့ကုထွို့၊ ကွက်တဟနာ အိုသျှီတဖွမ် အိုနားဖောဝ်မေးကု။ 42လီသျှီဟ တတီတို့ကျ တျာတွိုင်ကလုံ အိုနားက့မေးကုထွို့ ‘ဖောဝ်၊ ငါးချီ့ဖီ တဖွမ် အိုနားမေးကုဒွို’ မိုးနိန်းမာ အီဒေါင့်ဒါနားဖောဝ်နိန်းအွယ့်။ ဆူတော်ကောင်ယောင်ဆောင်စာဖုန်း၊ ချီ့ထန်ယားကီကေ့ တတီတို့ တျာတွိုင်းကလုံ အိုနားက့မေးကုလုဲင်။ အွယ့်ကြားမဲ့ အီချီ့ထန်ဖီ တဖွမ် အိုနားက့ဖောဝ်မေးကုတာ နားက့ အီသျှီဒါ ရှင်ရှင်လင်လင်” မိန့်ဆွက်ဒါ့နိန်းအွယ့်။
တမွိုင်နောင် တသာ
(မဿဲ ၇:၁၆-၂၀၊ ၁၂:၃၃-၃၅)
43ဗွမ့်နောင် တမွိုင်ဖုဒွို လီသာဒါဟ တသာလီဖုဟထွို့ တမွိုင်လီဖုဟဒွိုလဲ့ လီသာဒါဟာ တသာဖုဟာ။ 44ဟွိုင့်တသာထွို့ ဒေါင့်ဒါလိတမွိုင်ခရာ။ ဗွမ့်နောင် လီဒေ့ဒါဟ တယွူ့သာ တဟွော်မွိုင်ကုထွို့ အိုတွိုင်ကျုံးကုထွို့ အီဒေ့ဒါ စပျစ်သာ လီမေဟာ။ 45ပလူးခိုဒွို နေ့ထန်ဒါဘို့ တခိုဖုန်း ကအိုဒါ အာသ့သာကုဟို့။ ပလူးလီခိုဟဒွို နေ့ထန်ဒါဘို့ တလီခိုဟဖုန်း ကအိုဒါ အာကာသ့သာကုဟို့။ နားက့နာပလောင်ကု ကထန်ဒါ ငိုဖုန်းဒွို အိုနေ့ထန်တို နားက့သ့ အခြေအနေ။
ပလူးစူ့ယွမ်စာအန်တငြီ့
(မဿဲ ၇:၂၄-၂၇)
46“နားက့နုဲင့် ဟို့လီနာကာဟ ငါးငိုထွို့ ကွက်တဟနာ အိုဟောင့်လိုကာငါး ‘ဗွယ်၊ ဗွယ်’ နိန်းအွယ့်။ 47လေးငါးဆောင့်ထွို့ နာငါးတရာတော်ဖုန်းထွို့မဲ့ လွိုက်နာစာဖုန်း ကဒေါင့်ဒါဒွို ဗွမ့်ပလူးနိန်းမာ ငါးအီဒေါင့်နေ့နားက့။ 48ပလူးအွယ့်ပလားဒီ့ ဗွမ့်နောင် ခွော်ယိုးယိုးဟန် တွိုတွို့ လုံရန်းကု ထွို့မဲ့ ကစူ့ဒါယွမ်စာတို။ မေကြုံဘာနောင် သျှီ့မွိုတာထွို့ သျှီ့လိုးသျှီ့ဖုန်း မေလင်ကလွမ်ခါ့ ယွမ်အွယ့်မာ့ဒီ့ တေခွိုင့်ခွိုင့်စေးကန်းတို အွယ့်ကြားမဲ့ တစီစွိုအိုဟထွို့ အီခံဒါတိုခရိမ်ရိမ်။ 49ဒေါင့်မာလဲ့ ပလူးနာငါးတရာတော်ထွို့ လီလွိုက်နာဟစာဒွို ဗွမ့်နောင် ပလူးလီချာ့ဟတန်တွုန်ထွို့ စူ့ယွမ်စာ။ မေကြုံဘာနောင် သျှီ့မွိုတာထွို့ သျှီ့လိုးသျှီ့ မေလင်ကလွမ်ခါ့ ယွမ်အွယ့်မာ့ဒီ့ အီပလုဲင်စွူတွို့ အလိုင်ချင်ထွို့ အီကေ့ဘာဒူယွမ်တွို့တာ” မိန့်နိန်းအွယ့်။
Currently Selected:
လုကာ 6: KVT
Highlight
Share
Copy
Want to have your highlights saved across all your devices? Sign up or sign in
Lahta Bible by Beyond Translation is licensed under Creative Commons Attribution-ShareAlike 4.0 License.
