လုကာ 5

အခန် (၅)

တပည့်အကီစွက်ဖုန်း

(မဿဲ ၄:၁၈-၂၂။ မာကု ၁:၁၆-၂၀)

1မငြီးအငြီးကု ကိုယ်တော်ယေရှုအွယ့် အိုထွိုင်တာ ဂင်္နေသရက်#5:1ဂါလိလဲသျှီအွိုင်နျန်းဒါ့ အဘာဟနေ။ ယောဟန်ကု သျှီအွိုင်အွယ့်ဘာအွယ့်ဟောင့် တိဗေရိပင်လယ်။ အထွော့်အို ၂၁ကီလိုမီတာ၊ အလေအို ၁၁ကီလိုမီတာ။ (ယော၊ ၆:၁၊ ၂၁:၁) သျှီ့အွိုင် ဆောင့်ကုခါ့ လူထုပရိသတ်ဖုန်းအွယ့် အီလေနာကာ ဗွယ်ဖရာတရာငိုတော်တာ တွိုလေးလိုကာ အာတီးကု။ 2ထွို့မဲ့ ကိုယ်တော်ယေရှုအွယ့် သျှီလေ ဖောင်ကျန်းတား အန်ငြီ့မာ့ အိုချာ့တာခေါင့်စွမ်ကု။ ကျောဝ်းငါးဖုန်းအဟန်ဟန်အွယ့်လဲ့ အိုဖောင်လောင် လင်းလင်ကာထွို့ အိုတီ့လိုကာ ပြက်ကျန်းတားဖုန်း။ 3အွယ့်ခါ့ ကိုယ်တော်ယေရှုအွယ့် ဖောင်အန်ငြီ့မာ့ကု ထန်ထန်ရှိမုန်ဖောင်လောင်ထွို့ မိန့်ဒေါင့် ဖီကပါး ပေါင်းယားကေ့နောင် ခေါင့်စွမ်အကျီ့အာ့။ ထွို့မဲ့ အာအွယ့် အိုနင်းတာဖောင်လောင်ထွို့ တေဟိုစွမ့်လေ ပလူးဖုန်း။

4ထွိုင်ဟိုစွမ့်ထွို့နိန်းအွယ့်ခါ့ ကိုယ်တော်အွယ့် “ဝါလေးနားဖောင် သျှီ့ယိုးဒိုင့်ထွို့ အီကျန်းတားတာ ချာ့လင်းနားပြက် ကျန်းတားလုဲင်” မိန့်ရှိမုန်နိန်းအွယ့်။

5ရှိမုန်အွယ့်လဲ့ “ဆရာ၊ က့ကြိုစာကျန်းထွို့လိတား ကန်ပိန်ဟလဲ့ လ့ဟ တားအာဘားဘာ။ ဒေါင့်မာလဲ့ ဆရာအန်ချန့်အွယ့်ကြားမဲ့ က့အီချာ့လင်းထိုင်ဒါ့ ပြက်ကျန်းတား” ဒေါင့်ချာဒါ့နိန်းအွယ့်။ 6ထွိုင်ချာ့လင်းနိန်းအွယ့်ခါ့ အာကာအွယ့် ကျန်းလ့လိုကာတားဟေတန် ဗွမ့်တွို့နောင် ပြက်ကွင်တကျေးဒါ။ 7အွယ့်ကြားမဲ့ အာကာအွယ့် ဖီကကျွယ်အာကာတာ နေ့ကျွော့်ဖီအချက်ထွို့ ဟောင့်လေဒါ့ ဖောဝ်ကျောဝ်းငါး ကအိုဒါ ဖောင်လငါ့လောင်စာဖုန်း။ ပလူးအွယ့်ဟို တွိုလေးကာထွို့မဲ့ ထွိုင်စူလိုကာတား ဖောင်အန်ငြီ့မာ့လူးကုခါ့ အာကာဖောင်အွယ့်လဲ့ ဗွမ့်တွို့နောင် ကွင်ဗင့်ဗင့်။

8ထွိုင်သျှီ တာပျန့်ထန်နိန်းအွယ့်ထွို့ ရှိမုန်ပေတရု#5:8ကိုယ်တော်ယေရှုအွယ့် ဖီရှိမုန်နျန်း ပေတရု နိန်းအွယ့်ထွို့ နောင်ဟေဘရူးငိုဒွို လုံအဓိပ္ပာယ်လ့နိန်းအွယ့်။ အွယ့် အိုနင်းခေါက်လင်းတာ ကိုယ်တော်ယေရှုခင်ထိကုထွို့ “ဗွယ်၊ ငါးဒွို ပျန့်တို ပလူးအပျက်စရိုက်လီခိုဟဟေစာတို အွယ့်ကြားမဲ့ အိုငါးဆောင့် စစွာ့ထန်ကေ့လုဲင်” လျှောက်ဒင်နိန်းအွယ့်။ 9အကြောင်ခရာဒွို ပျန့်တို ရှိမုန်နောင် ဖောဝ်ကျောဝ်းငါးလငါ့ဖုန်းအွယ့် ဟွမ့်ဆန်လွမ်ငါပွမ်း အာကာကျန်းလ့တား ဟေငါးလွမ် အွယ့်ကြားမဲ့ဟနေ။ 10အွယ့်ကုအွယ့် ကပျန့်ဒါ ရှိမုန်ဖောဝ် ဇေဗေဒဲဖုခု ယာကုပ်နောင် ယောဟန်ကာလဲ့ ဟွမ့်ဆန်ဆန်လိုကာ။

ထွို့မဲ့ ကိုယ်တော်ယေရှုအွယ့် “ကျန်စကန်မာ။ နားဒွို တေဒွိုးမမေငါ့ ခရားအီကျန်းတား စုဝေပလူးဖုန်းထွို့ အီမိုးဘာ ဖီပျန့်ထန်ငါးတပည့်#5:10ကျမ်အထိကုဒီ့ တျန်စေးကန်း ကျန်းပလူး နိန်းအွယ့်။” မိန့်ရှိမုန်နိန်းအွယ့်။ 11ထွိုမဲ့ အာကာအွယ့်လဲ့ ထွို့ထန်လိုကာဖောင် ခေါင့်စွမ်လောင်ထွို့မဲ့ ဖီကြွ့လူးကေ့ တာကားကအိုထွို့ လေးတွဲ့လိုကာ ကိုယ်တော်ယေရှုကန်စာ့။

ကုတမာဖီ နူနာရောဂါစာအပလား

(မဿဲ ၈:၁-၄။ မာကု ၁:၄၀-၄၅)

12ထွို့မဲ့ ကိုယ်တော်ယေရှုအွယ့် အိုဝိန်းအဝိန်းကုခါ့ ပခု အိုပျန့် ဒူယွမ်တွို့နူနာရောဂါစာ အိုအပလား။ အာအွယ့် ထွိုင်သျှီကိုယ်တော်ထွို့ ဝယ်လင်းထွို့မဲ့ “ဗွယ်၊ နားအလိုမေအိုဒွို မိုးတမာကင်ဖီဒါတို တစာ့ရောဂါ အွယ့်ကြားမဲ့ ကုဖီကေ့ ငါးနူနာရောဂါမွန်” ကျွူ့လျှောက်နိန်းအွယ့်။

13အွယ့်ခါ့ ကိုယ်တော်အွယ့် ယောင်ကျွော့်ထွို့ ခွိုင်းပလူးအွယ့်ပလားထွို့မဲ့ “ငါးအလိုအိုတို၊ တမာကင်ကျိန်းလုဲင်” ထွိုင်မိန့်နိန်းအွယ့်ထွို့ ပလူးအွယ့်ပလားရောဂါအွယ့် တမာကင်ကျိန်းတွို့ အလိုင်ချင်။

14ထွို့မဲ့ ကိုယ်တော်အွယ့် ရောဂါကတမာကျိန်းဒါနောင်နိန်းဒွိုးဒွို ကျန်ဒေါင့်နေ့မာ လမားမားမာထွို့ “လေးပုရောဟိတ်#5:14ဟွိုင့် (၁:၅) ဒီ့လုဲင်။ ဆောင့်ထွို့မဲ့ နေ့လေ အကြောင် နားရောဂါ တမာကျိန်းလိထွို့လုဲင်။ ထွို့မဲ့ နားရောဂါ ကတမာကျိန်းဒွို ပလူးဖုန်း ဖီကသိတာ လေပူဇော်တာ နောင်မောရှေပညတ်ကျမ်ကု ကနေ့ထန်စေးကန်းအတွုန်လုဲင်” မိန့်နိန်းအွယ့်။

15ဒေါင့်မာလဲ့ ကိုယ်တော်စတင်းဒွို ယိမ်းကျွက်ကျက်လေ အနယ်နယ်အရပ်ရပ်ကု အွယ့်ကြားမဲ့ ပလူးဖုန်းဟေတန်အွယ့် အီနာလိုကာ ကိုယ်တော် တဟိုစွမ့်ချက်ဖုန်းနောင် အီကုအာကာရောဂါတာ လေးစုရွန့်လိုကာတာ။ 16ဒေါင့်မာလဲ့ ကိုယ်တော်အွယ့် စစွာ့ထန်တိုးတာထွို့ ကုဲင်းလေဆုတောင်တိုတာ ရပ်အိုယားနောင်ပလူးကု။

ကုဖီပလူးအိုလေဖြတ်တာစာ

(မဿဲ ၉:၁-၈။ မာကု ၂:၁-၁၂)

17အငြီးကုအွယ့် ကိုယ်တော်ယေရှု အိုဟိုစွမ့်တာခိန်း အိုဂါလိလဲကန်၊ ယုဒကန်၊ ဂျေရုဆလင်ဝိန်းဖုန်းကု ကအိုဒါ ဒုန့်ကားကအိုဖုန်းကုထွို့ ကလေးလိုကာဒါ ဖာရိရှဲ#5:17ဖာရိရှဲကဒေါင့်ဒါဒွို နောင်ဂရိဖာစာငိုဒွို ပျန့်တိုပလူးအိုခွယ်ခို့တာစာဖုန်း။ နောင်ဟေဘရူးငို ပလူးခွယ်စွာ့စာ၊ ပလူးအိုခို့တိုးတာစာဖုန်း အဓိပ္ပာယ်ထန်နိန်းအွယ့်။ ယေရှုခရစ်တော်ကာလကုဒီ့ အာကာဒွို အိုတည်ခွိုင့်တိုနောင် ဖာစာရေ လ့အာဏာ အဖွဲ့အစွိုအဘာတိုထွို့ ဖာ့လွဲထန်ကေ့နောင် တရေရွယ်အထိ့ကုထွို့ ထွိုင်ကန်စာ့ထန် ပျန့်ထန်လိုကာတို ပလူးမိုးနန် မိုးဖာစာရေစာဖုန်း။ ဖုန်းနောင် ကျမ်ဒါဆရာဖုန်းအွယ့်လဲ့ အိုနင်းလိုကာတာ အွယ့်ကုပါ။ ဗွယ်ဖရာဒွို ဖီစေးကန်း ကိုယ်တော် တန်ခိုတော် မိုးတမာကျီ့ဒါ ပလူးဖုန်း တစာ့ရောဂါဖုန်း။ 18အွယ့်ခါ့တွင် ပလူးအဟန်ဟန်အွယ့် ဒင်လိုကာ ပလူးအိုလေဖြတ်တာစာအပလား တလျာ့လောင်ထွို့ ယိုးကျိန်းကာ ယွမ်ကုထွို့ ကြိုစာချာ့လိုကာ ကိုယ်တော်မေငါ့ကု။ 19ဒေါင့်မာလဲ့ ယွမ်ကုဒီ့ ပလူးဖုန်း အိုဟေငါပွမ်း အွယ့်ကြားမဲ့ ကွင်မို့ဟ ကလေ့ အီနွူးကျိန်းယွမ်ကုအွယ့်ကြား ထန်လိုကာ ယွမ်ခူလောင်ထွို့ အောင့်ကေ့ ထာ့ဘူ့ထွို့မဲ့ နောင်တလျာ့ထူ ဖီစီဆျာလင်းလိုကာ ပလူးဖုန်းတခို့ကုကအိုဒါ ကိုယ်တော်ယေရှုမေငါ့ကု။

20ပလူးအွယ့်ဟို တယွမ်အန်ဒူတျာမာ ကိုယ်တော်ထွိုင်သျှီခါ့ “ဖောဝ်၊ ခွင်လွှတ်ဖီလိထွို့ နားအပျက်ဖုန်း” မိန့်ပလူးအိုလေဖြတ်တာစာနိန်းအွယ့်။

21အွယ့်ခါ့ ဖာရိရှဲဖုန်းနောင် ကျမ်ဒါဆရာဖုန်းအွယ့် “ပလူးအိုဒေါင့်စော်ကားဒါ ဗွယ်ဖရာစာဒွို ပျန့်လမာ။ ဗွယ်ဖရာအပါးဟို့ ခွင်လွှတ်ဒါ အပျက်စရိုက်လီခိုဟ” အိုယူလိုကာနိန်းအွယ့်။

22ဒေါင့်မာလဲ့ ကိုယ်တော်ယေရှုအွယ့် အိုသိပလူးအွယ့်ဟို အိုယူနိန်းဒွိုးအွယ့်ကြားမဲ့ “နားက့ ဘာတဟနာ အိုယူလိုကာနိန်းဒွိုး။ 23‘ခွင်လွှတ်လိထွို့ နားအပျက်ဖုန်း’ ဒေါင့်နိန်းအွယ့်နောင် ‘ထွိုင်ထွို့ စစွာ့တာလုဲင်’ ဒေါင့်နိန်းအွယ့်ဒွို ကမာဘာပေါင်းယူ့။ 24ဒေါင့်မာလဲ့ ငါးပလူးဖုခု#5:24ပလူးဖုခု ကဒေါင့်ဒါဒွို ပျန့်တို ပလူးအို ဗွယ်ဖရာဆောင့်လေး။ ထွို့မဲ့ ခရစ်တော်ဒွို ဖီဖန့်ဟောင့်နေ့တိုး နန်တိုးတိုဟနေ။ဒွို ခွင်လွှတ်ဖီဒါ အပျက်စရိုက်လီခိုဟ ကမ်ဖာလောကဒွိုးဘာကု အခွင်အာဏာအိုဒွို ငါးအီနေ့ဖီ ဖီနားက့ ကသိလိုကာ” မိန့်နိန်းအွယ့်ထွို့ “ငါးအီဒေါင့်ဒွို၊ ထွိုင်လုဲင်၊ ချွော်နားတလျာ့ထွို့ ကျိန်းချန်းယွမ်လုဲင်” မိန့်ပလူးအိုလေဖြတ်တာစာအွယ့်ပလား နိန်းအွယ့်။ 25ထွိုင်မိန့်နိန်းအွယ့်ထွို့ အလိုင်ချင် ပလူးအွယ့်ပလားအွယ့် အိုထွိုင်ထန်တာ ပလားကားကအိုမေငါ့ကုထွို့ ဆျန်လင်း တလျာ့အာကအိုစို့ဒါအွယ့်ဘာထွို့မဲ့ အန်ဖရာ ဗွယ်ဖရာထွို့ ကျိန်းချာဒါ့ယွမ်။ 26ပလူးကသျှီလိုကာဘာဒါ တပျန့်အွယ့်ဘာစာဖုန်း ကားကအိုအွယ့်လဲ့ စကန်ဟွမ့်ဆန်ထန်လိုကာထွို့ အန်ဖရာလိုကာ ဗွယ်ဖရာထွို့မဲ့ “ဟန်ငြီးလိုင် က့သျှီလိုကာဘာလိထွို့ အမှုထူဆန် ဟွမ့်ဆန်ခရာဖုန်း” အချင်ချင်ဒေါင့်လိုကာနိန်းအွယ့်။

ရွေကောက်လေဝိ

(မဿဲ ၉:၉-၁၃။ မာကု ၂:၁၃-၁၇)

27ထွိုင်ပျန့်ထန်နိန်းအွယ့်ထွို့ ကိုယ်တော်ယေရှုအွယ့် အိုအွယ့်ကုပါ စစွာ့ထန်ကေ့ထွို့မဲ့ ထွိုင်သျှီလေး တခွမ်ကျက်စာအပလား ကနျန်းဒါ လေဝိ#5:27လေဝိကဒေါင့်ဒါဒွို ပျန့်တို အိုဂျူးပလူးမျို (၁၂) နွယ်ကု ကလင်းဒါ လေဝိခွိုအနွယ်ဝင်။ အာနျန်းလငါ့ဒွို ပျန့်မဿဲဟနေ။အွယ့် အိုနင်းတာ နန်ကြာ ကကျက်စို့ဒါတခွမ်ကုခါ့ “လေးတွဲ့ငါးကန်စာ့ဒွို” မိန့်နိန်းအွယ့်။ 28အွယ့်ကြားမဲ့ လေဝိအွယ့် ဖီကေ့ကေ့ ကပျန့်ဒါ အာတမိုး တမိုးကျက်တခွမ်ထွို့ စထွိုင်တွဲ့လေး ကိုယ်တော်ကန်စာ့။

29ထွို့မဲ့ လေဝိအွယ့် မိုးတအန်မွိုင်ဟပွဲဒူ ကိုယ်တော်တာ။ တခွမ်ကျက်စာဖုန်းနောင် ကန်သျှန်လငါ့ဖုန်းလဲ့ အန်အို့ကိုကိုလိုကာနောင် အာကာ။ 30ဖာရိရှဲဖုန်းနောင် အာကာကု ကျမ်ဒါဆရာဖုန်းအွယ့် “နားက့ဒွို ကွက်ဟနာ အိုအန်ကိုအို့ကိုကာနောင် တခွမ်ကျက်စာဖုန်း၊ ပလူးအပျက်စရိုက်လီခိုဟစာဖုန်း” ဝေဖန်ဒင်အပျက်လိုကာ ကိုယ်တော်နောင် အာတပည့်ဖုန်းနိန်းအွယ့်။

31ကိုယ်တော်ပြန်ဖရေချာဒါ့ အာကာဒီ့ “ပလူးခရိုင်ဆန်စာဖုန်းဒွို အီအိုလူဘစီဆရာ လီမေဟာ။ ပလူးလီခရွိုင်ဆန်ဟစာဖုန်းဟို့ အိုလူဘစီဆရာ။ 32နောင်နိန်းအွယ့်အွယ့် ငါးလေးဒါဒွို ပလူးတွို့မှန်စာဖုန်းတာ လီမေဟာ။ ဒေါင့်မာလဲ့ ငါးလေးတို ပလူးအပျက်စရိုက်လီခိုဟစာဖုန်း ဖီကလ့လိုကာ နောင်တတာတို” မိန့်နိန်းအွယ့်။

တတစီ့ ဆိုင်နောင် ရှောင်စာ

(မဿဲ ၉:၁၄-၁၇။ မာကု ၂:၁၈-၂၂)

33ထွို့မဲ့ ပလူးအဟန်ဟန်ဖုန်းအွယ့် “ငွုတ်သျှီမင်္ဂလာဆရာယောဟန်တပည့်ဖုန်းဒီ့ အစင်စင်ရှောင်ကာစာထွို့ ဆုတောင်လိုကာတာ။ ဖာရိရှဲတပည့်ဖုန်းဒီ့လဲ့ ကုဲင်းမိုးမိုးလိုကာနောင်နိန်းအွယ့်အွယ့်။ ဒေါင့်မာလဲ့ တွိုနားတပည့်ဖုန်းနုဲင့် အိုအန်အို့လိုကာတိုတာထွို့ ကွက်တဟနာ လီရှောင်ကာဟစာ နောင်ပလားလငါ့ဖုန်း” တစီ့လိုကာ ကိုယ်တော်ယေရှု နိန်းအွယ့်။

34ကိုယ်တော်အွယ့် “ပလူးလေးမင်္ဂလာပွဲစာဖုန်းဒွို မေအိုကိုနောင် သတို့သားခိန်း ဖီကရှောင်လိုကာစာ နားက့အီမိုးဒါလိုကာနောဝ်။ လမားလဲ့ လီမိုးဟာနိန်းအွယ့်ဟာ။ 35ဒေါင့်မာလဲ့ မေတွိုအခိန်း ဟောင်စွ့ာကေ့ သတို့သား အာကာကုခါ့ အာကာဒွို အီရှောင်လိုကာတိုစာဟနေ” မိန့်နိန်းအွယ့်။

36ထွို့မဲ့ ကိုယ်တော်အွယ့် ဒေါင့်နေ့အာကာ တတိုက်တွုန်အဘာဒီ့ “အီပလောဝ်ကန်ကျိန်းမေ့တာ လမားလဲ့ လီအေ့ကေ့ဟာ ကန်ကျိန်းတ့ဟာ။ မေစပလောဝ်နိန်းအွယ့်အွယ့် ကန်ကျိန်းတ့ဒွို အီကေ့ကေ့တိုဟနေ။ ကပလောဝ်ကျီ့ဒါ ကန်ကျိန်းတ့ဒီ့လဲ့ အီလွိုက်နောင် ကန်ကျိန်းမေ့ လီမေဟာ။ 37စပျစ်သျှီ့တ့ဒွို လမားလဲ့လီစူဟာ တဖီ့ဘုတ့်မေ့ကုဟာ။ မေစူနိန်းအွယ့်အွယ့် စပျစ်သျှီ့တ့ဒွို မိုးသကျေးကေ့ဒါ တဖီ့ဘုတ့်မေ့ထွို့ စပျစ်သျှီ့ဒီ့လဲ့ အီလင်ကာကေ့ထွို့ မဲ့ တဖီ့ဘုတ့်လဲ့ အီကေ့ကေ့ဟနေ။ 38အွယ့်ကြားမဲ့ စပျစ်သျှီ့တ့ဒွို အီစူဘာဘို့ တဖီ့ဘုတ့်တ့ကုဟို့။ 39ပလူးကအို့ထွို့ဒါ စပျစ်သျှီ့ဇျီးစာဖုန်းကားကအိုဒီ့ ဒေါင့်ကာ စပျစ်သျှီ့ဇျီးဒွို ပေါင်းအွီထိုင်ထွို့ အီဘသာအို့ဒါ့ စပျစ်သျှီ့တ့ လီမေဟာ” မိန့်လေနိန်းအွယ့်။

Currently Selected:

လုကာ 5: KVT

Highlight

Copy