ລູກາ 5

ພຣະເຢຊູຊົງເກວເລ້ສາວົກຈຸທຳອິດ

(ມທ 4:18-22; ມຣກ 1:16-20)

1ໝໍວັນ ຂະນະທີ່ພຣະເຢຊູເຈົ້າຕຶ້ງເອີ້ທີ່ແຄມທະເລສາບຄາລິເລ ປະຊາຊົນຕີ່ນເຕົ້າໂຮມກັນເອີ້ອ້ອມພຣະອົງ ເພື່ອຟັງພຣະທຳຂອງພຣະເຈົ້າ. 2ພຣະອົງເບິ່ງໜາມໂດກຫານລຳຈອດເຕີ້ເອີ້ແຄມຕ່າຝັ່ງທະເລສາບຄາລິເລ ກຸ່ນຊອກກ້າຕີ່ນສາຕີ່ຈາກໂດກນາ ແລ້ວຈຸປາກຳລັງຊ້າມອງເອີ້. 3ພຣະເຢຊູເຈົ້າຈຶ່ງຫລ່ອນຕີ່ອາໂດກ ຊຶ່ງເດ່ງຂອງຊີໂມນ ແລະໂຢເຈີຊີໂມນຖອຍໂດກສາຫ່າງຈາກຕ່າຝັ່ງໝໍອ້ອຍ ແລ້ວພຣະເຢຊູເຈົ້າກໍໂງ່ຍສວາຍອາໂດກ ແລະສັ່ງສອນປະຊາຊົນ. 4ເມື່ອພຣະເຢຊູເຈົ້າສັ່ງສອນຈົບແລ້ວ ພຣະອົງຈື່ງກ່າວແກ່ຊີໂມນວ່າ, “ຈົ່ງຖອຍໂດກສາຕີ່ສູ່ບ່ອນດາກຄູ່ ແລະຢ່ອນມອງຂອງຈຸເທົາສວາຍຈັບກ້າ.” 5ຊີໂມນຕອບວ່າ, “ພຣະອາຈານເອີຍ ຈຸຂ້ານ້ອຍຊອກກ້າຕະຫລອດເຕມ ຈົນອິດເມື່ອຍ ແລະນໍຕີ່ນມ່າເອເລີຍ, ແຕ່ເພື່ອ ຫນາມແກ່ທ່ານໂຢ ຂ້ານ້ອຍກໍຈະຢ່ອນມອງສວາຍຕາມແມງຂອງນາຍ.” 6ດັ່ງນາ ຈຸປາຈຶ່ງຕີ່ນຢ່ອນມອງສວາຍ ແລະຕ້ອງກ້າຈຳນວນເອ້ຈົນມອງຂອງຈຸປາກຳລັງຈະເເຫຣກ 7ຈຸປາກວັກສີເລ້ໝູ່ ທີ່ເອີ້ໂດກຫາກອູນຫລ່າຍຊ່ວຍ ຈຸປາຈຶ່ງຫລ່າຍຊ່ວຍ ແລະຈຸປາຕີ່ນກ້າບຳໂດກຕັ່ງຫານເກ້ ຈົນດາກເລີ່ມໂກຍລ່ອນໂດກ. 8ເມື່ອຊີໂມນຢັ່ກທີ່ກໍ່ແອ້ນໝໍຊື່ທີ່ໂຄ້ງວ່າເປໂຕໜາມເຫດການທີ່ເກີດເຫລັ່ງແລ້ວ ຮັນກໍຂາບສວາຍທີ່ຈີ່ງຂອງພຣະເຢຊູເຈົ້າ ແລະກ່າວວ່າ, “ພຣະເຢຊູເຈົ້າເອີຍ,ຖີນອູນຕີ່ຫ່າງຈາກຂ້ານ້ອຍແດ່ທ້ອນ ເພາະຂ້ານ້ອຍເດ່ງກຸ່ນບາບ.” 9ເປໂຕກັບໝູ່ເພື່ອນກຸ່ນຫາກໆຂອງຮັນ ທີ່ເອີ້ນຳກັນຕີ່ນງຶດປະຫລາດເປ້ເຊັມ ທີ່ຈຸປາຈັບກ້າຕີ່ນເອ້ແນວໜີ. 10ຢາໂກໂບ ແລະ ໂຢຮັນກອນອ້າຍຂອງເຊເບດາຍ ຢັ່ກຮ່ວມງານຂອງຊີໂມນ ກໍປະຫລາດເປ້ເຊັມຄືກັນ ແລ້ວພຣະເຢຊູເຈົ້າກໍກ່າວແກ່ຊີໂມນວ່າ, “ມ້າສູ່ເຢີ້ນ ຕັ້ງແດໜີຕີ່ ເທົາຈະນໍາກຸ່ນຫລ່າຍເຊື່ອໃນຈັກ.” 11ເມື່ອຈຸຮັນນຳໂດກຫລ່າຍເຕັ້ງແກ່ມຕ່າຝັ່ງແລ້ວ ຈຸຮັນກໍຕີ່ນປຽງວິດທຸກສິ່ງທຸກຢ່າງ, ແລະຍົກເລີກອາຊີບຊອກກາ້ຂອງປາຕິດຕາມພຣະເຢຊູເຈົ້າຕີ່ເພື່ອເດງສາວົກຂອງພຣະອົງ.

ພຣະເຢຊູເຈົ້າຊົງປິ່ນປົວກອນປານໝໍຢັ່ກອູນເຕົ່າພະຍາດຂີ້ທູດ

(ມທ 8:1-4; ມຣກ 1:40-45)

12ໃນຂະນະທີ່ພຣະເຢຊູເຈົ້າເອີ້ໃນໝໍເມືອງ ໃນເຂດຄາລິເລກໍ່ກອນປານໝໍຢັ່ກເດ່ງພະຍາດຂີ້ທູດບຳໂຕ ເມື່ອຫນາມພຣະເຢຊູເຈົ້າ ຮັນຈຶ່ງກຸ້ຍຂາບສວາຍຕໍ່ກາກມັດພຣະອົງ ແລະອ້ອນວອນຖີນວ່າ, “ພຣະອົງເຈົ້າເອີຍ ຖ້າທ່ານພໍໃຈ ກໍສາມາດໝິ່ນອູນຂ້ານ້ອຍໄຫສະອາດຕີ່ນ.” 13ດັ່ງໜີພຣະເຢຊູເຈົ້າຢຽດສີສາແຕະຕ້ອງຮັນ ແລະກ່າວວ່າ, “ຈັກພໍໃຈແລ້ວ ຈົ່ງເຕົ່າສະອາດແຫນ” ໃນທັນໃດນາກອນປານຢັ່ກນາກໍໜໍກໍ່ພະຍາດຂີ້ທູດແອ້ນຕໍ່ຕີ່. 14ແລ້ວພຣະເຢຊູເຈົ້າ ກໍສັ່ງຮັນວ່າ, “ມ່າເລົ່າເລື່ອງໜີສູ່ຢັ່ກໂໝຟັງ ແຕ່ຈົ່ງຕີ່ສະແດງໂຕຕໍ່ປະໂຣຫິດ ອູນຮັນກວດເບິ່ງເທົາ ແລະຈົ່ງຖວາຍຄຣຽງບູຊາຕາມທີ່ໂມເຊຕີ່ນສັ່ງເຕີ້ ເພື່ອພິສູດອູນທຸກກຸ່ນໜາມວ່າ ເທົາດີສະອາດແລ້ວ.” 15ແຕ່ຊື່ສຽງຂອງພຣະເຢຊູເຈົ້າ ກໍຕີ່ນຊ່າລືຕີ່ທົ່ວທູກແຫ່ງ ແລະປະຊາຊົນກໍຫລ່າຍເຕົ້າໂຮມກັນ ເພື່ອຟັງພຣະອົງ ແລະຮັບການຊົງໂຜດຮັກສາພະຍາດໂຣຄາຕ່າງໆຂອງຈຸຕົນອູນຫາຍດີ. 16ແຕ່ພຣະອົງຕີ່ນຈັ່ນຕີ່ສະຖານທີ່ປ່ຽວ ແລະະພາວັນນາອະທິຖານເຕີ້ມພຣະເຈົ້າ.

ພຣະເຢຊູເຈົ້າຊົງໂຜດກຸ່ນເປ້ຍໝໍຢັ່ກອູນເຕົ່າພະຍາດ

(ມທ 9:1-8; ມຣກ 2:1-12)

17ໝໍວັນໃນເວລາ ພຣະເຢຊູເຈົ້າກຳລັງສັ່ງສອນເອີ້ ຈຸຟາຣີຊາຍແລະຈຸທຳມະຈານບາງກຸ່ນ ໂງ່ຍເອີ້ໃນບ່ອນນາດ້ວຍ ຈຸປາຕີ່ນຫລ່າຍຈາກບ້ານທົ່ວແຂວງຄາລີເລ, ແລະຈາກແຂວງຢູດາຍ ແລະຈາກນະຄອນເຢຣູຊາເລັມ. ຣິດເດດອຳນາດຂອງພຣະເຈົ້າ ຕໍ່ສະຖິດເອີ້ກັບພຣະອົງເພື່ອໂຜດກຸ່ນເຈັບໄຂໄດປ່ວຍເຕົ່າພະຍາດ. 18ໃນຂະນະທີ່ພຣະເຢຊູເຈົ້າກໍາລັງສັ່ງສອນກໍກໍ່ກອນປານບາງກຸ່ນຫາມກຸ່ນເປ້ຍໝໍຢັ່ກ ເອີ້ເຫລັ່ງບ່ອນລຳຫລ່າຍ ແລະຕຶມກອນປານຢັ່ກນາຫລ່ອນຕີ່ໃນຍ່າເພື່ອປຽງຮັນຕໍ່ໜ້າພຣະເຢຊູເຈົ້າ. 19ເມື່ອຊອກຄະເນ້ຫລ່ອນນໍຕີ່ນເພາະກໍ່ກຸ່ນເອ້ ຈຸປາຈຶ່ງເຫລັ່ງເຫລັ້ງກະບອງຍ່າ ແລະຢ່ອນກຸ່ນເປ້ຍກັບບ່ອນລຳ ສວາຍຕາມປ່ອງຕິດ ຖີນຕໍ່ກາກມັດພຣະເຢຊູເຈົ້າ ທ່າມກາງປະຊາຊົນ. 20ເມື່ອພຣະເຢຊູເຈົ້າຕີ່ນຫນາມຄວາມາເຊື່ອຂອງຈຸປາ ພຣະອົງຈຶ່ງກ່າວແກ່ກຸ່ນເປ້ຍນາວ່າ, “ກອນປານເອີຍ ບາບກຳຂອງເທົາຕີ່ນຮັບການອູນອະໄພແລ້ວ.” 21ຈາກນາ ຈຸທຳມະຈານກັບຈຸຟາຣີຊາຍ ຈຶ່ງເລີ່ມຄິດວ່າ, “ກຸ່ນໜີແມ່ນຢັ່ກໂໝ ທີ່ກຳລັງເລົ່າໝິ່ນປະໝາດພຣະເຈົ້າ? ກໍ່ແດພຣະເຈົ້າໝໍອົງເທົ່ານາທີ່ອູນອະໄພບາບກຳຕີ່ນ?” 22ພຣະເຢຊູເຈົ້າຮູຄວາມຄິດຂອງຈຸປາ ຈຶ່ງຫານຈຸປາວ່າ, “ເດ່ງໝ່າເດຈຸເທົາຈຶ່ງຄິດເຊັ່ນໜີ 23ຈົ່ງໂຢ້ຈັກແດ່ວ່າ ເກ້ໂໝສີ່ແຮ່ກວ່າ ທີ່ຈະເລົ່າວ່າ, ບາບກຳຂອງເທົາຕີ່ນຮັບການອູນອະໄພແລ້ວ,ຫລືຈະເລົ່າວ່າ, ‘ຈົ່ງຢີ້ນເຫລັ່ງ ແລະຍ່າງຕີ່’ 24ແຕ່ບັດໜີຈັກຂາດອູນຈຸເທົາໜາມວ່າ ຈັກເອງຄືບຸດມະນຸດກໍ່ສິດອຳນາດຫລ່າຍຈາກພຣະເຈົ້າເຕັ້ງແຜ່ນຕິດໂລກທີ່ຈະ ອູນອະໄພບາບກຳຂອງມະນຸດຕີ່ນ.” ດັ່ງນາ ພຣະອົງຈຶ່ງກ່າວແກ່ກຸ່ນເປ້ຍວ່າ, “ຈັກສັ່ງເທົາອູນຕຶ້ງເຫລັ່ງ ຍົກເລ້ບ່ອນລຳຂອງເທົາ ແລະກັບເວັ່ນຍ່າແຫນ.” 25ໃນທັນໃດນາ ກຸ່ນເປ້ຍກໍຕຶ້ງເຫລັ່ງຕໍ່ໜາ້ຈຸປາທຸກກຸ່ນ ຮັນຕີ່ນຍົກເລ້ບ່ອນລຳຂອງຕົນ ແລະກັບເວັ່ນຍ່າພ້ອມຕັ່ງສັນລະເສີນພຣະເຈົ້າ. 26ຈຸປາທຸກກຸ່ນຕ່າງກໍງຶດປະຫລາດເປ້ເຊັມເອ້ທີ່ສຸດ ແລະກ່າວສັນລະເສີນພຣະເຈົ້າ. ສິ່ງທີ່ຂະເຈົ້າຕີ່ນໜາມໝິ່ນອູນປາຈຸເທົາແປກໃຈ, “ແລະຈຸປາກໍເລົ່າກັນວ່າ ຈຸຈັກຕີ່ນໜາມສິ່ງອັດສະຈັນໃນເປ່ຍໜີ.”

ພຣະເຢຊູເຈົ້າຊົງເລືອກເລ້ເລວີອູນເດ່ງສາວົກຂອງພຣະອົງ

(ມທ 9:9-13; ມຣກ 2:13-17)

27ຫລັງຈາກເຫດການໜີເກີດເຫລັ່ງ,ພຣະເຢຊູເຈົ້າກໍສາຈາກຍ່ານາ.ຂະນະທີ່ຍ່າງຕີ່ນາພຣະອົງຕີ່ນໜາມກຸ່ນ ເກັບພາສີໝໍຢັ່ກຊື່ວ່າ ເລວີ, ໂງ່ຍເອີ້ທີ່ດ່ານພາສີ ພຣະເຢຊູເຈົ້າຊົງກ່າວກັບຮັນວ່າ, “ຈົ່ງຕາມຈັກຫລ່າຍເເລະເດ່ງສາວົກ” , 28ຈາກນາ ລ່າເລວີກໍສະຫລະເຫດທຸກສິ່ງຢີ້ນເຫລັ່ງເເລະຕາມພຣະເຢຊູຕີ່ເພື່ອເດ່ງສາວົກຂອງພຣະອົງ 29ຕໍ່ຫລ່າຍ ເລວີກໍຕີ່ນຈັດງານອັນລຽ້ງເກ້ເນ້ເຫລັ່ງໃນຍ່າຂອງຕົນເພື່ອຖວາຍກຽດແກ່ພຣະເຢຊູເຈົ້າ ແລະ ກໍ່ກຸ່ນເກັບພາສີກັບກຸ່ນຫາກແອ້ນເດ່ງຈໍານວນຫຼວງຫຼາຍຫລ່າຍຮ່ວມນໍາດ້ວຍ. 30ຈາກນາ ຈຸຟາຣີຊາຍກັບຈຸທຳມະຈານ ຢັ່ກທີ່ເດ່ງລ່າຂອງຈຸປາ ຕີ່ນຈຸ້ມຕຳໝິຕໍ່ຈຸສາວົກຂອງພຣະພຣະເຢຊູເຈົ້າ,ຈຸປາຫານວ່າ, “ເດ່ງໝາເອເທົາຈຶ່ງອັນແລະໂຍກັບກຸ່ນເກັບພາສີ ແລະ ກຸ່ນບາບ#5:30 ກຸ່ນເກັບພາສີ ແລະ ກຸ່ນບາບ ໝາຍເຕັ້ງຊາວຢິວທຸກຄົນເຊື່ອວ່າຈຸປາຕີ່ນຮັບຄວາມລອດພົ້ນຍົກເວັ້ນກຸ່ນທີ່ກໍ່ບາບເອ້ທີ່ສຸດ, ເຊິ່ງຄົນເກັບພາສີເດ່ງກຸ່ນໜໍປະເພດທີ່ຖືວ່າເດ່ງກຸ່ນທີ່ກໍ່ບາບຮ້າຍແຮງ, ດັ່ງນາພຣະເຈົ້າຈະໜໍຊົງຊ່ອຍຈຸປາ. ຊາວຢິວທີ່ຮັກສາກົດບັນຍັດຂອງພຣະເຈົ້າສ່ວນເອ້ຈະໜໍລ່ອນຕີ່ໃນບ້ານຂອງກຸ່ນເກັບພາສີ ຫລື ຮັບປະທານອາຫານຮ່ວມກັນກັບຈຸປາເຫຼົ່ານາ?” 31ພຣະເຢຊູເຈົ້າຕອບປາວ່າ, “ກຸ່ນທີ່ກໍສຸຂະພາບດີໜໍຈໍາເປັນຕ້ອງກໍ່ໝໍປິ່ນປົວ ກໍ່ແດກຸ່ນເຈັບໂສ່ເທົ່ານາທີ່ຕ້ອງການໝໍ. 32ຈັກນໍຕີ່ນຫລ່າຍເພື່ອໂຄ້ງເລ້ກຸ່ນຊອບທໍາ,ແຕ່ຫລ່າຍເພື່ອໂຄ້ງເລ້ກຸ່ນບາບອູນວິດເປ້ເຊັມໂກເລ້ເປ້ເຊັມເບີ້ຍ.”

ຄຳຖາມເລື່ອງການຖືສິນອຸດອາຫານ

(ມທ 9:14-17; ມຣກ 2:18-22)

33ໃນເວລານາກໍ່ບາງກຸ່ນກໍເລົ່າກັບພຣະເຢຊູເຈົ້າວ່າ, “ຈຸສາວົກຂອງໂຢຮັນຖືສິນອຸດເກອັນເອີ້ເລື້ອຍໆ ແລະ ໝິ່ນພິທີພາວັນນາອະທິຖານ ເຖິງພຣະເຈົ້າ ແລະ ຈຸສາວົກຂອງຈຸຟາຣີຊາຍກໍໝິ່ນເຊັ່ນນາ ແຕ່ຈຸສາວົກດັງຄົງອັນ ແລະ ໂຍ.” 34ພຣະເຢຊູເຈົ້າຕອບວ່າ, “ເທົາຄິດວ່າ ຈະອູນແຂກໃນງານແຕ່ງດອງຕ້ອງອຸດເກ້ອັນເອີ້ບໍ? ໃນເມື່ອເຈົ້າບ່າວເອີ້ກັບຈຸປາ? 35ແຕ່ກໍ່ໝໍວັນຫລ່າຍເຕັ້ງເມື່ອເຈົ້າບ່າວຈະຕ້ອງພາກຈາກຈຸປາຕີ່ ເມື່ອນາແຫຼະ ຈຸປາຈະຖືສິນອຸດເກ້ອັນ.” 36ຫລັງຈາກນາ ພຣະອົງດັງຕີ່ນກ່າວແມງອຸປະມາໜີ ສູ່ຈຸປາຟັງວ່າ, ໜໍກໍ່ຢັ່ກໂໝດອກ ທີ່ກະແສກອ້າວເບີ້ຍ ເພື່ອໃຊ້ຕາບອ້າວໂກ່ໝິ່ນດັ່ງນາ ກໍຈະໝິ່ນອູນອ້າວເບີ້ຍແຫກເຂີຍຕີ່ ແລະ ແຜນຕ່ອນເບີ້ຍກໍໜໍສົມກັບອ້າວໂກ. 37ເຊັ່ນດຽວກັນ ໜໍກໍ່ຢັ່ກໂໝດອກ ທີ່ເລ້ດາກອະງຸ່ນ ເບີ້ຍເຕີ້ມຕຸ່ຍໂຄດໂກ່, ເພາະດາກອະງຸ່ນເບີ້ຍຈະໝິ່ນເຈີຕຸ່ຍໂຄດແຫຣກດາກອະງຸ່ນຈະໂກຍສາ ແລະຕຸ່ຍໂຄດກໍເຂີຍຕີ່ເໝືອນກັນ 38ດ້ວຍເຫດໜີ ດາກອະງຸ່ນເບີ້ຍຕ້ອງເຕີ້ມເຕີ້ໃນຕຸ່ຍໂຄດເບີ້ຍ. 39ແລະໜໍກໍ່ຢັ່ກໂໝດອກ ທີ່ຂາດໂຍດາກອະງຸ່ນເບີ້ຍ ຫລັງຈາກໂຍດາກອະງຸ່ນໂກແລ້ວ ເພາະຈຸປາເລົ່າວ່າ ເກ້ໂກ່ໜີແຫຼະດີກວ່າ. #5:39 ແລະໜໍກໍ່ຢັ່ກໂໝດອກ ທີ່ຂາດໂຍດາກອະງຸ່ນເບີ້ຍ ຫລັງຈາກໂຍດາກອະງຸ່ນໂກແລ້ວ ເພາະຈຸປາເລົ່າວ່າ ເກ້ໂກ່ໜີແຫຼະດີກວ່າ. ດາກອະງຸ່ນໂກ່ໃນທີ່ໜີສະແດງເຕັ້ງວີທີລ່າໂກ່ ແລະ ແມງສອນຂອງຊາວຢິວ, ສ່ວນດາກອະງຸ່ນເບີ້ຍສະແດງເຖິງວິທີລ່າເບີ້ຍແລະແມງສອນຂອງພຣະເຢຊູເຈົ້້າ, ພຣະເຢຊູເຈົ້າໝາຍເຖິງກຸ່ນຢັ່ກນາໜໍເຕັມໃຈທີ່ຈະຮັບສິ່ງເບີ້ຍໆເພາະວ່າວິທີໂກ່ໆຮັນດີກວ່າ

Currently Selected:

ລູກາ 5: PNX

Highlight

Copy