LUKA 7
7
Yesu abikiyi boyi wa mokondji wa basoda
(Mt. 8.5-13)
1Ntango eilinya Yesu bokambeli na bato maloba mantso mango, akeke omboka ya kapelenaumu. 2Mokondji moko wa basoda ba Loma aika noyali wengumba yango. Aika na boyi wayi moko aika nomolingi be. Boyi wango aika na bololi makasi belebiyo na lowa. 3Ntango eyoka Mokondji wa basoda ba loma wango ntsango ya Yesu, atomaka bakotu baiyo ba Bayuda onva Yesu, te bamobondele mpo abikiya boyi wayi. 4Ntango ekoswa bango onva Yesu, bamobondeleke be mpendja mpo ake ekambi na bango mpo asunga Mokondji wa Basoda wango nokambeli te: Soda oyobo aompendja nabosenga bo lisungi djawu. 5Mpo akalolinga biyo Bayuda mpe alotongelaka ndaku ya eyanganelo. 6Bona Yesu akeke na bango ekambi, ntango eika ayi belebiyo na ndaku ya Mokondji wa basoda ba loma wango, Mokondji meni atomaka beyi baiyi baiyo te bakambela na Yesu te: Nkolo, mpa waa mitungisa, mpo too nakomi ka mpo nakoyamba ondaku yangai. 7Yango, naboniki te too nakoki ka mpo naya onva yawu. Kasi pa se etomo mpo boyi wangai abika, mpe akobika. 8Nakambeli bo mpo ngai meni naona mpe moto ontse ya Bokondji bo bato baiyo. Bakampa mitindo mpe nakabatosa. Naompe na Basoda ontse ya Bokondji bongai, ntango lintso ekabapa ngai mitindo onva moko wa bango te: Keke ongo, mpe ayi akake mpe ntango lintso ekapa ngai mitindo na moiyo te yakanga, akaya, ntango lintso likapa ngai mitindo na boyi wangai te: Kela mosala emubo akamokela. 9Ntango eyoka Yesu maloba mango, akanfaka be mpendja mpo djai, abongbanaka oboo bo djunda li bato ebaika nomobili, mpe akambelaka te: Nakambeli nabino, too naboni moto wa boyamboli bonene ndibe mopagano oyo ka eyala Wisalayele! 10Ntango evinya beyi ba mokondji wa basoda ba loma bango ondaku, bakulaka boyi wango asili nobiki be mpendja.
Yesu asekpisi elenge mumpele wa nfanyala wa bodjenge
11Ontsima, Yesu akeke wengumba mpoko nkombo ya yango Naine. Bayekoli bai na bato djunda mpendja baika nomobili. 12Ntango ekoswaka bango belebiyo na mpimo ya engumba yango, bakulanaka na bato baika nokeyi nakunda ebembe, eika ebembe ya nfana se moko wa nfanyala bodjenge. Bato djunda ba mboka baika nokei nayi ekambi mpo bake na mokunda. 13Ntango eboko Nkolo Yesu nfanyala wa bodjenge wango amoyokelaka mawa be, mpe akambelaka nayi te: Mpa kolela! 14Yesu apusanaka mpe akati epomba, bato ebatombaka epomba batemi; Yesu akambelaka te: Elenge mumpele, nakopeyi mitindo temesika! 15Nambala yawi, moto owaka avinyaka na bomoyi, ayali mpe abandaka bokambeli. Ontsima Yesu amovinyaka onva nyango wayi. 16Bato bantso banyalaka na ntsomo, baika notondi Kombo nokambeli: Mosakoli munene wa nguya abimi omanteyi ma biyo, mpe waa, Kombo ayani na salisa bato bayi. 17Ntsango ya Yesu epalanganaka omokili mo Yudeya mobimba, mpe omboka lintso li belebiyo ana.
Bayekoli ba Yowane mobatisi
(Mt. 11.2-11)
18Bayekoli ba Yowane mobatisi bakanolaka Yowane mambi mango mantso. Bona Yowane abiangaka bayekoli babale. 19Bona abatomaka onva Nkolo Yesu mpo bamuwa te: Yo awu Masiya okoya, too tokonga moto moiyo? 20Ntango ekoswa Bayekoli bango onva Yesu, bakambelaka nayi te: Yowane mobatisi alotomi onva yawu mpo tokuwa te: Yo awu Masiya okoya too tokonga moto moiyo? 21Se ontango eika Bayekoli ba Yowane ana, Yesu abikiyaka bato djunda na maloli mabango, abikiyaka mpe bato ebakangemaka na milimo mibe; ayutolaka mpe miyo ma bato djunda ebaika na lolanda. 22Ontsima, Yesu avinyelaka Bayekoli ba Yowane mobatisi te: Bokeke nakanola Yowane mambi emaboni bino, mpe emayoki bino: Bato ba lolanda bamabo, bato ebawa matoyi bamayoka, bato ba bileme ba maombola, bato ba mpasi ya maba bamakoswa peto, bato ebawa bamasekpa, mpe ntsango ndamu emasakolama onva babola. 23Bokanola waa Yowane te: Esengo na mpoli moto okale oba na ntembe mpoli ngai ka. 24Ntango evinyaka Batombi ba ntsango ba Yowane mobatisi babale, Yesu abandaka bosololi na djunda li bato mpoli Yowane. Ntango ebimiki bino wesobe, yo veti too bokeiki nalenda bafulele ebamanika na lopoko ka? 25Bona, eyalaka te too bokeiki namolenda nfango ka, bona bobimiki nalenda nde? Bokeiki nalenda mumpele oyati nfaali motuya? Too yo bona ka! Mpo bato ebakayata nfaali motuya be mpe bao na bomengo bakayala ondaku li Bakondji banene. 26Bona, bobimiki nalenda nde? Bobimiki nalenda Mosakoli? Iyo! Yo veti Yowane ao Mosakoli! Kasi ngai namabokanola Yowane ao Mosakoli munene omanteyi ma Basakoli. 27Mpo Yowane yo moto wango makomi makambela mpo djayi te: Kombo akambelaka te: Nakotoma motombi wangai wa ntsango oboo vawu, ayi akokomiya ndjela oboo vawu. 28Namakokanola te, Yowane mobatisi aleki bato baiyo bantso ebabotuvaka. Kasi moto odjangi ntina obokondji bo Kombo aomunene bomoleki ayi! 29Ntango eyokaka bango, bato bantso, na babafutisi ba mpako, bayambolaka te Kombo aona ntina, mpo Yowane mobatisi abapaka batisimo. 30Kasi Bafalisayo na Balakisi ba mibeko mi Mose, baboyaka boyamboli mokano mo Kombo mpoli bango meni, mpo baboyaka bokuli Batisimo onva Yowane. 31Ontsima akambelaka te: Sikanga nakoki nokanisela bato ba Nkolo ebabo neni? Baondenge nde? 32Bakokani na bana batini ebayali ondomba nene, mpe bamakambela moko na moko te: Tobetiki ndjendje li midjiki mpoli bino! Kasi too bobiniki ka. Tokoyembeliki ndjembo li matanga kasi too boleliki ka! 33Nakambeli bona mpo Yowane mobatisi ayaniki, aponiki boleyi bo pete mpe too aiki nonyueyi manga ka, mpe bokambeli te, aona milimo mibe. 34Kasi nfana wa moto ayani, aika noleyi mpe nonyueyi, kasi bokambelaka te: Aona lokoso mpe monyueyi wa manga, nfeyi wa bafutisi ba mpako mpe bato ba masumu. 35Kasi vanya bo Kombo bo mabonono te bosembo olobiko lo bato bantso ebakabobila.
Yesu akpelaka ondaku ya Simona mofalisayo
(Mt. 26.1-13 ; Yn. 12.1-8)
36Mokolo moko, Simona, oika moto wa mboka ya Bafalisayo abiangaka Yesu mpo bale ekambi naayi, Yesu akeke ondaku yayi mpe ayalaka mpoli boleyi. 37Nfanyala moko wa masumu aika omboka yango, ayokaka te Yesu amale ondaku ya Moto wa Bafalisayo wango, ayaka na molangi moko mo mali ma motuya mpe ntsolo ndamu mpe akeke ongo. 38Atemeke belebiyo na makolo ma Yesu abandi boleli. Mbende djayi libobiyaka makolo ma Yesu, alikondoloko na nyindja djayi li mutu. Amopeyi bizu mpe amokobi mali mango omakolo. 39Ntango eboko Moto wa mboka ya Bafalisayo obiangaka Yesu bona, amikambelaka ontse ya motema te: Moto oyo ayi noyala mosakoli wa Kombo veti, ndiki ayebi biyaleli bi nfanyala oyo mpo aomoto wa masumu! 40Kasi Yesu akambelaka nayi te: Simona, naona djambi libobokanoli. Simona akambeli nayi te: Iyo! Nakobondeli Molakisi onkanola. 41Ontsima, Yesu amokanolaka lisolo eti: "Mokolo moko eika na moto moko abekiyaka bato babale mosolo. Abekiyaka biteni bi palata nkama litano na moko mpe biteni ntuku litano naomoko. 42Kasi ndenge edjangaka bango mosolo mpoli bofuti nyongo ya moto wango, abapaka bolimbisi bango bantso. Omanteyi ma bato babale bango moto nda okomolinga boleki?" 43Simona amoyanolaka te: Nakanisi yo moto okuli bolimbisi na nyango djunda bona Yesu akambelaka nayi te: Eyano yawu yo ndamu. 44Bona Yesu abongbanaka onva nfanyala wango mpe akambelaka na Simona te: Kanisa djambi edjuti nokela nfanyala oyobo. Awu ombiangiki ondaku yawu, kasi too onkumisiki ka mpo ompa mayi nasukola makolo ma ngai. Kasi nfanyala oyobo asukoli makolo ma ngai na mbende djai mpe amakunyoli na nyindja djayi. 45Too ombekoliki naba bizu ka. Kasi, banda eyani ngai anga ondaku yawu, nfanyala oyobo apeyi makolo ma ngai bizu mbala be. 46Too ompeiki lokumu ka mpo okoba mali o mutu mo ngai. Kasi ampeyi lokumu akobi makolo ma ngai malasi. 47Namabokanola bino, bolingo bonene ebolakinyi ayi emalakinya te masumu mayi djunda malimbisami. Kasi moto olimbisami nfa botini akalakinya mpe bolingo botini. 48Bona Yesu akambelaka na nfanyala wango te: Masumu mawu malimbisami. 49Bato baiyo ebayalaka omesa baika nomuiwu te: Moto nda okalimbisa masumu? 50Kasi Yesu akambelaka na nfanyala wango te: Obikisami mpo ondjamboliki ngai, keke na kimiya.
Currently Selected:
LUKA 7: LIE
Highlight
Share
Copy
Want to have your highlights saved across all your devices? Sign up or sign in
Likila Bible by Beyond Translation is licensed under Creative Commons Attribution-ShareAlike 4.0 License.
