LUKA 8

Banyala ebabilaka Yesu

1Ontsima ya djambi django, Yesu aika nokeyi obingumba mpe omboka. Mpoli boteyi bato ntsango ndamu ya Bokondji bo Kombo. Bayekoli Djomi nababale bakeke mobembo ekambi nayi. 2Banyala baiyo mpe bakeke ekambi na Yesu. Abikiyaka banyala baiyo ana na milimo mibe mpe abikiyaka baiyo na mpasi. Moko wa banyala bango eika Maliya oika moto wa mboka ya Magadala. Abenginyaka Badjabulu ntsambo onva yayi. 3Nfanyala moiyo omanteyi ma banyala meni eika Djane, Nfali wa Kuza. Aika mokambi wa Mokondji Elode. Nfanyala moiyo omanteyi mabango eika Suzani. Eika mpe na banyala baiyo djunda ebabikiyaka Yesu. Banyala bango bantso basungaka Yesu na Bayekoli bayi na mosolo.

Lisese li moyoni wadjala

(Mt. 13.1-9 ; Mk. 4.1-9)

4Bato djunda ba bingumba bi ndenge nandenge bayanganaka ondjinga ndjinga wa Yesu. Yesu asololaka na bango asalelaka lisese eti akambelaka te: 5Moyoni moko abimaka mpoli boyoni mboto odjala djayi. Ntango eika ayi noyoni, nkabo ya mimboto ekpaka obolayi bo ndjela. Bato baika nomboli olikolo li django mpe nyoni lilileke. 6Nkabo ntsiyo ekpaka omabanga: Ntango ebimaka django, miyomaka, mpo mpiyo too eika omoyika. 7Nkabo ntsiyo ekpaka omanteyi ma mintolo: Mintolo miyolaka ekambi namiyona miango, mpe mintolo mimi finaka. 8Kasi mboto ntsiyo likpaka ontse ndamu libotaka: Mibimaka mpe mibotaka mbuma munkama na munkama. Ontsima ya Yesu bokambeli bona, akambelaka na mungongo makasi te: Moto ona matoyi mpoli boyoki ayoka!

Ntina Ya masese

(Mt. 13.10-17 ; Mk. 4.10-12)

9Ontsima Bayekoli bayi bamuwaka, ndimbola ya lisese django. 10Mpe Yesu abayanolaka te: Kombo aboboniyi bino mambi ma nkuku emadjangaka boyebani boo, mpoli Bokondji bo Kombo. Kasi mpoli bato ebampa oyala Bayekoli ba ngai ka, namabakambelela mambi emabo na masese, mpo balenda kasi too bakobo ka, bakoyoka kasi too bakososolo ka.

Yesu amalimbola lisese li moyoni

(Mt. 13.10-23 ; Mk. 4.13-20)

11Sikanga ndimbola ya lisese yo bo: Mumboto yo ndibe liloba li Kombo. 12Mboto elikpaka ondjela, yo bato ebakayoka liloba li Kombo, kasi Satana akaya nalilongola omitema mi bango, mpo mpa bayambola mpe mpa babika. 13Mboto ekpaka ontse ya mabanga yo bato ebakayoka ntsango ya Kombo, bakaeyambola na esengo. Kasi too bakatika liloba li Kombo te libota minkanga omitema mi bango ka, yango bakayambola se nanfa ntango, kasi ontango ya mimekako, bakatika boyamboli Kombo. 14Mimboto emikpaka omanteyi ma minkinga mi mintolo, yo bato ebakayoka liloba, kasi ntango ekake bango ondjela li bango mitungisi, bomengo mpe bisengo bi mokili emubo bika bafina mpe too bakayola ka. 15Mboto elikpaka ontse ndamu, yo bato ebakayoka liloba li Kombo bakalibomba omitema na bosolo mpe nabolamu, mpe likabota mimbuma na bokangi mitema!

Nfinda omanteyi ma lisasu

(Mt. 4.21-25)

16Yesu akobaka bokambeli te: ntango emayonginya moto nfinda, too akamoliba na lisasu ka too akamote ontse ya ntange ka. Akamote ndi weteli ya puu, mpo mopa puu mpoli moto wantso okokpela ondaku. 17Mpo eloko yantso ebombemi, ekobima opuu, mpe eloko yantso elibemi ekokpama mpe ekobima opuu. 18Yango, bokeba nandenge emayoka bino; mpo Kombo akopa boyebi be na moto oyebi, kasi moto odjangi boyebi Kombo akolongola boyebi eboyamboli ayi na bobe te aona vango.

Nyango wa Yesu na banfa mama bayi

(Mt. 12.46-50 ; Mk. 3.31-35)

19Nyango wa Yesu na banfa mama bayi bayaka onva yayi, kasi too bakoka boyangani nayi belebiyo mpoli mpika ya bato. 20Moto moko akambelaka na Yesu te: Nyango wawu na banfa mama bawu ebati batemi sika ondjeyi bao na mpowa bakobo. 21Yesu akambelaka na bango bantso te: Nyango wangai na banfa mama ba ngai yo bato ebakayoka liloba li Kombo mpe ebakalitosa.

Yesu ayeki lopoko

(Mt. 8.23-27 ; Mk. 4.35-41)

22Mokolo moko Yesu na Bayekoli bayi bakpelaka ovato mpe akambelaka na bango te: Toke ongambo ntsiyo ya libeke. Bona bakeke. 23Ntango eika bango nokeyi, Yesu abetemaka mpongi. Nambala yawi lopoko lololi lobandaka bokeli olibeke, mpe vato bo bango bobandaka bonyali na mayi mpe bango bantso bakoswaka na likama linene. 24Bona, Bayekoli bakeke onva Yesu bamoyumola nokambeli te: Molakisi, Molakisi, tokosweyi belebiyo na lowa! Yesu atemeke sika mpe apeyi mitindo na lopoko na mayi mpe kimiya munene avinyaka. 25Bona Yesu akambelaka na Bayekoli bayi te: Boyamboli bobino bondo? Kasi bakanfaka, batilaka mpe baikanuwani bango na bango te: Moto oyobo aonda? Amapa mitindo na lopoko mpe na mbonge bima motosa?

Yesu abikiyi moto wa molimo mobe

(Mt. 8.28-34 ; Mk. 5.1-20)

26Yesu na Bayekoli bayi Bakoswaka omongo belebiyo na engumba ya Gelaza, ongambo ntsiyo ya libeke wetuka ya Galileya. 27Ntango eunyuaka Yesu ovato akulanaka na moto moko wa mboka yango aika na Badjabulu omanteyi. Akoboko nfa ntango ndayi, too aika noyati nfaa ka too aika mpe noyali ondaku ka, kasi aika noyali ondaku elikunda bango bato o mamalita. 28Ntango eboko mumpele wango nobo Yesu, anfanaka na bololi, mpe amivaka ontse ya makolo ma Yesu mpe anfanaka te: Yesu nfana wa Kombo oleki olikolo! Olingi nde na ngai? Nakobondeli, mpa kompa etumbu! 29Moto wango akambelaka bona mpo Yesu apaka mitindo na molimo mobe nfango te mobima omanteyi mayi. Bamongandaka na ngoli omaboko mpe makolo bamobombaka na minyololo aika se nomiteni. Mpe Djabulu aika nomotombi weteli ya esobe. 30Yesu amuwaka te: Nkombo yawu nda? Mumpele ayanolaka te Nkombo ya biyo mampinga. Akambelaka nkombo yango mpo milimo mibe djunda mikpelaka onva mumpele wango. 31Bona Badjabulu bakongoko Yesu te mpakabatoma o lifelo. 32Ntango eika djambi meni nosalemi, eika na motango munene mo ngulu lindaku lika noleyi minkinga mi ngomba eika belebiyo ana. Badjabulu bayongaka Yesu te abapa eposa bakpela ongolu mpe ayi abapaka eposa yabokpeli ongulu. 33Bona, milimo mibe mibimaka onva moto mpe mikpelaka obolanga bo ngulu. Ontsima, likotolaka ekoto mpendja ongomba ya mabanga omanteyi ma libeke mpe lilindaka liweyi. 34Ntango eboko bato ebaika nobateli ngulu mambi emakoswelaka ngulu, bakotolaka nabotili bakeyi nakanola bato ba mboka mpe nganda mambi emalekaka. 35Ontsima, bato bakeke ongo nalenda djambi elisalemaka. Bakoswaka weteli eika Yesu mpe baboko moto wango obikiyaka Yesu na milimo mibe ayali omakolo mayi na kimiya. Mumpele meni ayataka nebe mpe aika mpendja nebe. Ntango eboko bato te babanga Yesu. 36Bato ebaboko djambi elisalemaka bakanolaka bato ebayaka ndenge ebikiyaka Yesu moto wango na milimo mibe. 37Ontsima bato ba etuka eika belebiyo na engumba ya Gelaza bayongaka na Yesu te atika eteli ya bango, mpo baika nomotili be. Yesu na Bayekoli bayi bakpelaka waa o mato mpe batikaka eteli yango bavinyaka ongambo ntsiyo ya libeke. 38Oboo bo Yesu bolongbeyi weteli yango, Moto obikiyaka Yesu na milimo mibe wango amoyongaka te, nakobondeli, ontika nake ekambi nawu. Kasi Yesu aboyaka mpe akambelaka nayi te. 39Vinya odjoko mpe omboka yawu keke nakanola bato bantso mambi emabokeleli Kombo. Yango, moto meni akeke obingumba akanolaka bato bantso te, Yesu ankeleli mambi malamu mpendja.

Nfana wa Yailo mpe nfanyala okataka ntsonge ya nfaa ya Yesu

(Mt. 9.18-26 ; Mk. 5.21-43)

40Ntango evinyaka Yesu wetuka ya Galilaya, djunda li bato bamoyambaka na esengo mpo baika nokongi bovinyeyi vayi. 41Bona mumpele moko nkombo yayi Yailo aika mokambi wa eyanganelo ayaka na ngbangema oboo bo Yesu mpe amobondeleke te bake ondaku yayi. 42Mpo nfana wayi aika na bololi makasi belebiyo na lowa. Aika se na nfana wayi moko wango aika na mbula djomi na mbale. Yesu akeke nayi ekambi, mpe ntango eika bango nokeyi djunda li bato baika nofini Yesu nkako lintso. 43Omanteyi ma djunda li bato django eika na nfayala moko aika na bololi bobotangi makila bokelaka mbula djomi na mbale, ailinyaka biloko biayi bintso ebika onva ba Dokotolo kasi na moto moko too akokaka bomobikiyi ka. 44Akpelaka omanteyi ma djunda li bato ontsima ya Yesu mpe akataka ntsonge ya nfaa yayi, mpe makila mayi mailaka bobimi Nambala yawi. 45Mpe Yesu abauwaka te: Moto nda onkati? Bato bantso bayanganaka, bona Petelo na bato ebaika nayi bakambelaka te: Molakisi, bato djunda bamakotukinya mpe nokofini nkako lintso mpe omauwa te moto nda okokati? 46Kasi Yesu akambelaka te: Moto moko ankatiki nanko, mpo nayokiki nguya ebimiki omanteyi ma ngai. 47Ntango eboko nfanyala te too akoki nomibomba waa ka, yango ayaka noatangani nabotili mpe angbangemaka omakolo ma Yesu. Oboo bo bato bantso, akanolaka ntina ekataka ayi Yesu mpe ndenge ebikaka ayi Nambala yawi. 48Ontsima, Yesu akambelaka nayi te, nfana wangai wa nfanyala,boyamboli vawu onva ngai bosili nokobikiya. Keke Kombo akoba bokopeyi kimiya wayi. 49Ntango eika Yesu nokambeli na nfanyala wango, moto autaka ondaku ya Yailo oika Mokambi wa ndaku ya mayanganelo mpe akambelaka na Yailo te, Nfana wawu wa nfanyala aweyi! Yango, mpa kotungisa waa Molakisika. 50Ntango eyokaka Yesu mambi emakambelaka moto wango, akambelaka na Yailo te, Mpakotila, kasi ondjambola kaka, nakomobikiya na lowa. 51Ntango ekoswaka Yesu ondaku ya Yailo, akpaka se Bayekoli bayi bato Petelo, Yowane, na Djake na baboti ba nfana wa nfanyala mpe bakpeli osambele eteli ebetemaka ebembe ya nfana wa nfanyala. 52Bato bantso ondaku ongo baika noleli mpe nobeti mantolo mpoli lowa lo nfana wa nfanyala. Yesu akambelaka na bango te: Botika boleli, mpo too aweyi ka aondi beta. 53Ntango eyokaka bato bona, banfekeke mpo bayebaka te nfana asili aweyi. 54Kasi Yesu akeke onva nfana wa nfanyala mpe amokataka weboko mpe akambelaka na mungono mololi te: Nfana wa nfanyala motini, yunfa! 55Nambala yawi nfana meni wa nfanyala avinyaka na bomoyi mpe atemi sika. Yesu apaka baboti bayi mitindo te bamopa eloko ya boleyi. 56Baboti bayi bakanfaka mpendja, kasi Yesu abapaka baboti bayi mitindo te mpa bakanola bato djambi elisalemaka.

Currently Selected:

LUKA 8: LIE

Highlight

Copy