Apastil Nani Sturka 14

Pal Bernabé wal Iconio ra

1Iconio ra, Pal Bernabé wal Ju nani prias watla ra dimi, ai natka kan ba baku witin nani mahka upla smalkan, bara upla uya kasak lukan, Ju nani bara Ju apia nani sin. 2Sakuna tila Ju nani kasak lukras kan ba mita, Ju apia nani ra maisa pakan, wan muihni nani mapara saura lukaia. 3Apastil nani ba bahara piua wihka takaskan, bara ai kupia aiska ni sibrin âpu Dawan dukiara aisi kan. Gâd latwanka lâka dukiara aisi kan bamna, Dawan mita kau tâ baiki karnika sin yan, sain nani, wark aihka nani sin daukaia. 4Bara tawan uplika nani ba dakni wâl ra takan, kumi ba Ju nani hilpka taki kan, bara wala ba lika apastil nani hilpka. 5Ju nani bara Ju apia nani ba wihta nani aikuki lâ daukan, apastil nani ra rausauhkaia bara walpa ni sin sabaia. 6Sakuna Pal bara Bernabé wal baha kaikan ba ra, witin nani plapan Licaonia tasbaya ra, Listra ra, Derbe ra, ban baha tawanka nani kir, 7bahara sin swaki sakan lâka sturka ba smalki kan.

Listra ra Pal ra walpa ni saban ba

8Listra ra waitna kum kan sip wapras. Witin aisubi takan ba wina ai kuhma ba skahwa kan bamna, ban bahara iwi kan. 9Bara naha waitna lika Pal dîa aisi kan ba kat aman pali wali kan. Bara Pal waitnika ba kat tawi kaikan ba ra, ai dara walan nahki naha waitna kasak luki kan witin ba rawbia. 10Bara ai bîla baikra karna wini, win:

—¡Man minam ra wapni bus!

Bara waitnika kata ba pâli tit bûi, mahka wapan. 11Upla nani bâra banhwi kan ba kaikan dîa Pal daukan ba, bara witin nani sut ai bîla baikra karna wini aisin Licaonia nani bîla ra:

—¡Gâd nani upla baku taki wan tilara bal iwan sa!

12Witin nani mita Bernabé nina ba Zeus win, Pal ba Hermes win, kan witin sika kau aisi kan bamna. 13Bara Zeus prîska ba, ai tempelka tawan ra dimaika kat bri kan ba bui bîp nani, tangni nani diara sakahkaia dukia pain nani sut bri balan. Bara upla nani bâra banhwi kan ba sin aikuki asla takan, bîp nani iki sakripais baku dauki apastil nani ra mayunaia wisi. 14Sakuna Pal bara Bernabé wal baha sturka walan ba ra, ai kwalka nani kalki ban upla nani ba tilara dimi, ai bîla baikra karna winan:

15—Upliki nani, ¿dîa kan man nani naku dauki banhwisma ki? Yang nani na sin man nani wal baku upla sna. Sakuna nâra yang nani balri na, man nani ra sturi yamni ba mai smalkaia, naha diara bahki nani na swi si Gâd rayakira ba nina blîkma, witinka mita kasbrika pura, tasba, kabu nani ra dîa dîa baha nani bilara ba sut paskan bamna. 16Piua luan nani ra Gâd mita ban swin upla nani sut ba ai yabalka kat man tauki kaia, 17piua bani witin ba ya sapa tânka marikan, diara yamni dauki ba bâk: lî kasbrika purara ba wina wankisa, insla ra plun yan pâwisa, witin plun aitani wankisa yawan pih lilia kabia dukiara.

18Apastil nani naha diara nani sut aisin sakuna, ban karna kan upla nani bîp nani iki witin nani ra mayuni sakripais dauki yaban daukan ba takaskaia.

19Bara tila Ju nani aidrubi balan Antíoco wina, Iconio wina sin. Witin nani lika upla nani ra maisa kapi muni, Pal ra walpa ni saban. Witin nani luki banhwan Pal ba pruan kan, bamna tawan ba wina raski sakan. 20Sakuna kristian nani sut aidrubi bal Pal tnaya kir bûi banhwan, bara witin ba kli rawan. Ningkara tawan ra kli dimi wan; bara yu wala ra Bernabé wal Derbe ra wan.

21Pal Bernabé wal Derbe ra swaki sakan lâka sturka yamni ba smalkan, bara kristian kau manis takan. Ningkara witin nani kli Listra ra, Iconio ra, Antíoco ra sin wan. 22Baha pliska nani ra kristian nani sut ra tâ baikan, ban sin smalki kupia kraukan kasak lukan lâka ra bapi bûi kabia, bara sin win Gâd king aimaki tasbaya ra dimaia kaka, pât nani wahwaia sa. 23Bamna serts nani bani ra tâ uplika nani mangkan. Baha ningkara, Gâd ra luki plun piras kira ai pura suni, baha ba Dawan mihta ra mangkan, witin nani sut witinka ra kasak luki kan ba.

Pal Bernabé wal Sesaria wina kli Antíoco ra balan

24Ningkara witin nani Pisidia kuntrika bâk impaki, Panfilia tasbaya ra balan. 25Sturi yamni ba Perge tawanka ra sin smalkan. Ningkara witin nani Atalía ra balan. 26Bahara witin nani duri tara kum ra aimaki Antíoco ra balan. Baha pliska ra sika serts tâ upla nani mita witin nani ba Gâd latwanka mihta ra mangkan, bara nanara witin nani baha daukaia kata sut dauki tnata alkan kan. 27Witin nani Antíoco ra balan ba ra, serts uplika nani sut asla paiwan, bara baha nani ra win, dîa dîa Dawan bui witin nani ra daukan ba, bara nahki Gâd mita Ju apia nani ra sin yabalka ba sakan kasak lukaia dukiara. 28Bara Pal Bernabé wal bahara piua wihka takaskan kristian nani ba aikuki.

Currently Selected:

Apastil Nani Sturka 14: MSKTU

Highlight

Copy