Apastil Nani Sturka 16

Timoti ba Pal bara Silas aikuki auya

1Pal bara Silas wal impaki witin nani Derbe ra wan, baha wina Listra ra balan. Bahara sika lalukra kum wal prawan nina ba sika Timoti; witin ba Ju lalukra mairin kum luhpia, ai aisika lika Grik kata. 2Wan muihni nani Listra ra bara Iconio ra iwi kan ba sut mita, witin dukiara diara pain man aisi kan. 3Pal brin daukan Timoti ba witin wal taukbia, bamna witin ba bri si Aisa sainka daukan, Ju nani baha kuntrika ra iwi kan ba kupia sauhkaia apia ba mata. Kan upla nani sut pat kaikan, witin aisika ba Grik kan ba. 4Bara tawan bani witin nani luan ba, wan muihni nani sut mihta ra mangkan, apastil nani bara tâ uplika nani Jerusalem ra bara banhwi ba mita, dîa witin nani ai mihta ra lâ mangkan ba. 5Bamna serts nani ba kau bapi buan kasak lukan lâka ra, bara kristian nani lika piua bani ailal taki kata.

Pal diara aihka kaikanka bâk Macedonia waitnika ba kaikan

6Spirit Holikira adar yaras kata Asia ra sturi yamni ba smalkaia. Bamna witin nani Frigia bara Galesha tasbaika bâk impaki, 7ban Misia tasbaya lainka kat balan. Baha wina Bitinia tasbaya ra luaia lukan, sakuna Jisas Spiritka mita bahara waia adar yaras kan. 8Bamna witin nani Misia ba laihku lui, Troas ra iwi wan. 9Bahara Pal tihmia ra diara aihka latan kaikan, Macedonia waitnika kumi ai mina ra bûi witin ra makabi win: “Macedonia ra lui bal, hilp wan muns.” 10Pal naha diara aihka kaikan ba ra, yang nani mahka ridi taki banhri Macedonia ra waia. Bamna lukri baha ba kasak pali Dawan mita paiwi kan, Macedonia ra wih Dawan sturka yamni ba yang nani smalkaia.

Pal Silas wal Pilipai ra

11Bamna yang nani Troas wina duri tara aimaki, ban impaki Samotracia ra bal banhri, yu wala lika Neápolis ra. 12Baha wina yang nani Pilipai ra wari; naha tawanka ra lika Rom uplika pali nani iwi kan ba, Macedonia tilara tawan kau tara kulkan kan ba. Bahara yang nani piua wiria takaski banhri. 13Ris yua kum ra, yang nani tawan ba wina lata tani ra taki wari, awala un ra. Upla nani ai natka kan, bahara wih ai pura sunaia. Bamna yang nani mahka iwi, mairin nani bahara bal asla takan nani ra Dawan sturka yamni ba smalki banhri. 14Witin nani wina kumi ba nina Lidia, Tiatira tawanka wina, kwala painkira mapla balianta wauhi âiatkra kan. Mairka ba Gâd ra mayuni kan, bara witin sin bâra wali kata; Dawan mita ai kupia ba ilingkan, Pal dîa aisi ba aman pali walaia. 15Witin lika ai watla uplika nani sut ba wal tahbi daukan. Ningkara yang nani ra makaban:

—Yang na kasak Dawan ra tawri lukisma kaka, man nani bal waitla ra dimi takasks.

Bamna witin taibi ai munan takaskaia.

16Yu kumi yang nani pura sunaia pliska ra taki auna kan ba ra, tukta mairin kum wal prawi banhri; witin sukia, diara kaikaia piritka bri kata. Witin alba kan, bara diara kaikaia warkka dauki ba wina ai dawanka nani ba lalah uya pali saki yabi kan. 17Naha tuktan mairin na mahka Pal bara yang nani ninira wapi wini, ban aisi, win:

—¡Naha waitna nani na lika Gâd Laih Purara iwi ba dukia dadaukra nani sa, man nani ra sin maisam pakisa swaki sakan yabalka ba dukiara!

18Yu ailal baku dauki kan. Ban piua kum kat Pal kupia sauhkan, bara tawi baha piritka saura tukta mairin ra kan ba ra win:

—Jisas Kraist nina ra yang mai wisna, witin ba wina taks.

Bara baha minitka ra pirit saura witin ba swin.

19Sakuna tukta mairin dawanka nani kaikan, nanara witin nani sip kli witin bâk lalah sâkbia apia, bamna Pal bara Silas wal ra alki lilia dauki taukaia pliska ra bri si, wihta nani mihta ra mangkan. 20Witin nani mita Pal Silas wal ba Rom wihtka nani mawanra bri si, naku aisin:

—Naha waitnika nani Ju nani sa, bara wan tawanka ra bal trabil bukisa. 21Witin nani wan smalki ba natka yawan sip alki daukbia apia, kan Rom uplika nani sna.

22Bara upla nani sut witin nani mapara buan, wihtka nani mita sin adar yan kwalka nani ba taya wina daiki si, klala ni wipbia. 23Witin nani ra uya wipan ba ningkara, silak ra mangkan, bara silak watla main kakaira ra sin adar yan, pain pali aihwaki bri kabia. 24Silak watla main kakaira baha adarka brin ba ra, Pal bara Silas wal ba silak watla bîla un pali tani kat bri si, mina nani sut dus unta daukan ba ra dingki priskan.

25Sakuna tihmia wâl bakriki ra, Pal bara Silas wal ai pura suni Gâd ra lawana aiwani kan, bamna upla nani silak ra kan ba witin nani ra wali kan. 26Tisku baku kan, tasba nikban, bara silak watla playka nani ba sut sin nikban kata. Baha sim piua ra silak watla durka nani sut ba kwawan, bara silak ra mangkan uplika nani ba sut wilkan nani kan ba lanhwi kauhan. 27Silak watla main kakaira ba yapan wina kupia krawan buan ba ra, kaikan silak watla durka nani sut lika param baman kan. Bara ai sordka saki ai mihta ni pruaia luki kan, witin lukan silak ra mangkan uplika nani sut ba taki plapan. 28Sakuna Pal ai tâ baiki winan:

—¡Man wînam ra watawi munpara, kan yang nani sut nâra sna!

29Bara silak watla main kakaira ba lamp kum makabi, witin ban plapi diman, sibrin mita ai wîna sut tatatwi kan, bamna Pal bara Silas wal mina kat kauhan. 30Ningkara, Pal bara Silas wal ba silak wina saki, makabi walan:

—Mâsa nani, ¿yang dîa daukamna bara ai swaki ai sakan kabia ki?

31Witin nani bila:

—Dawan Jisas Kraist ra kasak luks, man bara wamtla uplika nani sut.

32Witin nani mita Dawan sturka yamni ba witin ra smalkan, bara watla uplika nani sut ra sin. 33Baha sim tihmika silak watla main kakaira ba mita witin nani ba bri si insauhkanka nani ba sikban; bara witin ba tahbi daukan, watla uplika nani sin sut. 34Ningkara, witin nani ba ai watla ra bri si plun dakakan. Bara witin ai watla uplika sut aikuki lilia pali kan, nahki witin nani Dawan ra kasak lukaia lâka alkan ba dukiara.

35Titan ra wihta nani mita suldiar nani blikan, silak watla main kakaira ra maisa pakbia Pal bara Silas wal ba lanhkaia. 36Bara silak watla main kakaira ba Pal ra win:

—Wihta nani wina adar aikan sa man nani mai lanhkamna, bamna nanara man nani sip sma liliakira mahka taki waia.

37Sakuna Pal mita suldiar nani ra win:

—Yang nani na Rom tawanka suliarka nani sna, bara lâika sin daukras kira upla sut mawanra ai wipi silak ra sin ai mangkan, ¿bara nanara yukuwi pali ai saki banhwaisa? ¡Sip apia! Witin nani pali bal naha wina ai sakaia sa.

38Aihwawakra nani mita baha tânka nani ba sut wihta nani ra win. Wihta nani sibrin takan, baha nani ba Rom tawanka suliarka nani sa walan ba ra. 39Wihta nani wan, bara Pal bara Silas wal ra makaban ai pâtka nani ba swih tikbia, bara saki muni ban sin makaban tawan ba wina mahka taki wabia. 40Witin nani silak wina takan, bara Lidia watla ra wih diman. Ningkara wan muihni nani ba kaikan, bara baha nani ra tâ baiki muni, baha wina mahka wan.

Currently Selected:

Apastil Nani Sturka 16: MSKTU

Highlight

Copy