Apastil Nani Sturka 17

Tesalonaika ra blahwan takan ba

1Pal bara Silas wal impaki Anfípolis bara Apolonia bâk Tesalonaika tawanka ra balan. Bahara lika Ju nani priaska watla kum bâra kan. 2Pal ai natka kan ba baku, witin Ju nani priaska watla ra wih diman. Wik yumhpa bahara takaskan bara ris yua bani baha uplika nani wal aisi kan. 3Ulbanka nani tânka ba param aisi kan, Misaya ba pât wahwaia kan, witin pruan wina kli buaia kan ba sin. Bara sin win:

—Naha Jisaska dukiara aisisna na sika Misaya ba.

4Bamna tila Ju nani kasak lukan, bamna Pal bara Silas aikuki asla takan, Grik uplika nani ailal Gâd ra kasak luki nani kan ba sin, bara tara kulkan mairka nani sin uya. 5Sakuna Ju nani kasak lukras kan ba mita ai kupia baikan, bara waitna saura nani bahki baman yabal ra kirhbi tauki nani ba, asla paiwi, upla nani kupia turban. Witin nani mita Jasón watla ra pliki wan, Pal bara Silas wal bâra kaka, saki upla nani mihta ra mangkaia. 6Witin nani bahara sakras kan bamna, Jasón bara wan muihni tila nani alki raski, tawan wihtka nani mawanra bri si muni, bara ai tâ baiki winan:

—Naha waitnika nani mita sika tasba aiska na makupisa, ban naha kat sin balan, 7bara Jasón ai watla ra dingki brisa. Naha nani Rom kingka Sisar lâka mapara buisa. Witin nani sin wisa king wala kumi bâra sa, baha ba Jisas.

8Upla nani bara wihta nani kiama ra naha diara nani diman ba ra, baha nani sut kupia turban pali takan. 9Bamna tawan wihtka nani mita win, Jasón bara wan muihni nani sut lalah aibapbia. Bamna witin nani lalah aibapi, pri takan.

Pal bara Silas wal Berea ra

10Tihmia pat iwan, wan muihni nani mita Pal bara Silas wal Berea ra blikan wan. Witin nani nan Berea ra diman ba ra, Ju nani priaska watla ra wih diman. 11Naha Juka nani na kau upla painkira nani kan Tesalonaika nani ba wal. Witin nani ai kupia aiska ni Dawan bîla ba brin kan, bara yu bani Ulbanka nani ba tânka pliki kaiki kan, diara nani aisi kan ba kasak sapa. 12Baha nani ailal kasak luki banhwan, Grik mairka tara kulkan nani ba sin ailal, bara Grik waitna nani sin uya kasak lukan. 13Sakuna Tesalonaika ra Ju nani bâra banhwi kan ba walan, nahki Pal Dawan bîla ba Berea ra sin wih smalkisa, bamna bahara sin witin nani wih upla nani kupia turban. 14Wan muihni nani mita aihni pali Pal ba kabu un ra blikan wan. Silas bara Timoti wal lika Berea ra takaskan. 15Baha nani Pal yula kahbi auya kan ba, ban Atenas tawanka kat wan. Witin nani mahka kli ai bîla tawan ba ra, Pal mita win Timoti bara Silas wal ra wibia aihni trai kaiki witin ra balbia.

Pal Atenas ra

16Pal ba Atenas ra, Silas bara Timoti wal bîla kaiki kan ba ra, witin ai kupia ba sâp apia kan, baha tawanka ba aidul lâka ni banhwan kan kaikan bamna. 17Baha mita witin mita Ju nani priaska watla ra Ju nani ra bara Gâd ra luki mayuni uplika nani ra sin aisi kan. Ban pulaia pliska ra sin upla nani wal prawi ba bani ra aisi kan. 18Upla nani kum kum Epicuro smalkanka stadi muni kan ba bara wala nani Zenón smalkanka stadi muni kan ba sut witin wal mahka blahwan. Tila nani bila:

—¿Naha waitnika sturi aisasara pali na, dîa sip sa ki wan wiaia?

Wala nani bila:

—Gâd wala nani smasmalkrika talia sa.

Witin nani naku aisi kata, kan Pal lika aisi kan Jisas dukiara, witinka pruan wina kli buan ba dukiara sin. 19Bamna Pal ba Areópago ilka ra brih wan. piua bani baha pliska ra sika witin nani asla taki kan, dîa dîa kra aisaia bri kan kaka. Bara baha uplika nani mita makabi walan:

—¿Sip sna ki yang nani kaikaia baha smalkanka raya man bri balram ba? 20Diara aihka pali nani wan wisma bamna, yang nani want sna kaikaia naha tânka na dîa sa sapa.

21Atenas uplika nani bara tringsar nani bahara iwi ba sut diara bahki nani ra ai piua nani tikras kan, sakuna diara raya kum kaka lika walaia laik kan bara aisaia sin.

22Bamna Areópago ilka ra, Pal baha nani lilapas kat ai mina ra bûi, win:

“Atenas waitnika nani, yang kaikisni man nani ba gâd nani ba kakulkra pali sma. 23Kan yang naha tawanka ra wapi tauki kapri, man nani puram sunisma ba pliska nani ra sin, bara altar kum kaikri; bahara bîla nani ulban kan ba lika naku kata: ‘Gâd kum ra kaikras ba.’ Bamna pain sa, baha Gâdka man nani kaikras kuna puram suni mayunisma ba, baha pali Gâdka dukiara sika yang aisisna ba.

24‘‘Gâd bui tasba paskan ba bara dîa dîa baha bilara ba, witin sika kasbrika pura bara tasba Dawanka. Witin lika upla bui paskan tempelka sâtka nani ra iwras sa, 25bara sin nit apia sa upla kum bui witin dukiara diara kum daukbia, kan witin bui sika yawan sut ra rayaka ba wankisa, baku sin pâsa bara diara wala nani ba.

26‘‘Waitna kumi wina baman witin bui nisan nani sut paskan, baha nani ba tasba aiska ra iwbia dukiara; bamna piua ba bara anira witin nani iwaia ba sin marikan sa, 27witin nani ba Gâd ra plikbia dukiara, bara ban kra, pliki tauki baku, witin wal prawi banhwaia sip kabia, kuna rait pali Gâd lika yawan kumi bani wina laihura apia sa. 28Kan yawan lika Gâd ra raya sa, aiawisa bara wan wingka puhbisa; baku sin tilam wina sinskira aisasara tila nani naku aisin: ‘Yang nani na sin Gâd taika sna.’ 29Gâd taika nani sa kaka, ¿dîa kan yawan lukaia Gâd ba gul, silbar kra, walpa ni upla ai mihta ni paskan lilka baku kulkaia? 30Gâd lika patitara piua ra upla nani diara tânka kaikras kan ba mapara ai nakra prakan kan. Sakuna naiwa yua ra lika plis bani ra upla nani iwi ba sut ra param wisa, ai saurka nani ba wina ai kupia lakaia sa. 31Gâd yu kumi mangkan sa, naha tasba aiska na lâka wapni kat daukaia,#Law 9.8. waitna kumi witin bâk sakan ba mita. Naha dukiara tânka aiska wan marikan sa, Jisas pruan wina bukan bamna.”

32Pruan nani kli buaia dukiara aisin walan ba ra, tila nani mita lawaska kikan. Wala nani bila:

—Kau pain kabia piua wala ra kli naha aisanka na walaia.

33Bara Pal witin nani tila wina mahka taki wan. 34Sakuna upla kum kum ai nina blikan, kasak sin lukan. Witin nani tilara kata Dionisio, witinka Areópago uplika kum, bara mairin kumi nina Dámaris, bara kau wala nani sin.

Currently Selected:

Apastil Nani Sturka 17: MSKTU

Highlight

Copy