Impakan Sturka 10
10
Kruhkru tara nani blikan
1Dawan bui Moses ra win:
—Was king fero kaikaia, yang mita daukri witin ai uplika tara nani ba aikuki ai kupia karna upla bîla walras kaia. Bara baku yang bui witin nani bâk, warkki aihkakira nani dauki marikamni, yang warkki nahki daukaia sip sna ba. 2Bara man mita sin luhpiam bara mulam nani ra wiaia sma, yang nahki Idsip uplika nani ra lawaska kiki pulri ba, bara wark aihka tara nani sin witin nani tilara daukri ba. Baku man nani sin kaikaia sip sma yang sika Dawan sna ba.
3Moses bara Eran wal king fero kaikaia wan, bara witin ra win:
—Dawan Hibru nani Gâdka ba naku wisa: ‘¿Man ahkia kat yang ra ban ai wi kaisma, yang bui man ra bawaia apia? Upliki nani ba swis taki wabia bara yang ra nini mayunbia. 4Upliki nani ba swirka waras ban maipara buisma kaka, yang yauhka pali tasbayam purara kruhkru tara nani blikamni. 5Kruhkru ailal pali kabia, tasba mawan âpu daukbia, tasba pîs sin kaikma apia. Ais mâ auhan bara diara nani kum kum kau ikras yuyaka nani swin kau pâwi ba sut pibia, dus tara nani unta ra pâwi ba sin sut pibia. 6King watla, king uplika tara nani watla bara Idsip uplika nani sut watla ba kruhkru nani baman banhwan kabia. Man nani damikam bara aisikam nani sin kau naha sât dukia nani kaikras kabia. Bara witin nani piua wina man nani piuam kat sin, naha sât dukia takras kan ba, nanara bal takbia.’
Moses naha sut aisi si, bara witin kir tawi mahka king watla wina taki wan. 7Bara king fero uplika tara nani bila aisi, win:
—¿Ahkia kat naha waitnika na ban trabil wan muni ba takaskbia? King ba Israel luhpia nani ba swika mahka wabia bara ai Dawanka Gâd ra mayunbia. ¿King ba kaikras sa ki, Idsip ba danh sut sauhkan ba?
8King fero kli Moses bara Eran wal mata bliki bri balan bara witin nani ra win:
—Man nani Dawan Gâdkam ra puram suni mayunaia was. Sakuna kau waras sma ba ra ai wis, ani uplika wala sin man nani wal auya ba.
9Moses pana aisi, win:
—Yang nani luhpi nani ba, upla almuk nani, luhpi waitna, luhpi mairin nani, sîpki nani bara bîpki nani sut aikuki taki waia sna, kan yang nani ra baha yua ba lilia tara yua pali sa bamna.
10Kuna king fero pana aisi witin nani ra win:
—Param pali kaikisna, man nani lukankam ra saura brisma ba. ¿Bara man nani lukisma, Dawan ba man nani wal impaki wabia, ba mita yang bui man nani mai swirka luhpiam lupia nani sut aikuki mahka taki waia? 11Apia, baku lika sip apia. Man nani waitna almuk nani was, Dawan ra mayunaia baku brin mai dauki bamna.
Bara king fero adar yan Moses bara Eran wal ba ai mawan wina kangbi sakaia. 12Ban sakuna, Dawan mita Moses ra win:
—Idsip tasbaya purara klamhkla sâks, bara kruhkru nani bal diara pâwi nani ba sut pi âpu daukbia, tasbaya aiska ra ais mâ auhan ba mita diara nani kum ikras kan ba sut nanara pih âpu daukbia.
13-14Moses Idsip tasbaya purara ai kînka ba bukan, bara Dawan mita daukan lalma pâsa karna krawan baha yua aiska, tihmia aiska sin Idsip tasbaya purara.#Par M 9.2-3. Bara yu wala titan ra baha lalma payaska ba mita, kruhkru nani banhki takan. Pura luan baha sât kruhkru ailal kau kaikras kan, baha yua kat, kli sin ban baku baman kabia apia. 15Tasbaya aiska ba kruhkru nani mita bikan, tasba pali ba sin sip kaikras kan. Diara pâwi kan ba pi âpu daukan, dus nani lî klaswan mita sauhkras kan nani ba sin sut pin. Tawan aiska ra dus wahia kumi sin âpu kan, unta ra sin dus mâ nani sin sut âpu daukan.
16Bara king fero Moses bara Eran wal pat pali paiwan balan, bara witin nani ra win:
—Yang saura daukri man Dawan Gâdkam mapara bara man nani mampara sin. 17Ban sakuna, mamkabisna kau aima kumi pan yang saurki ba ban swih tiks, bara yang tâiwan puram suns Dawan Gâdkam ra, naha prura klalka na yang nani wina kitbi sâkbia.
18Moses king watla wina taki latara takan ba ra, Dawan ra makaban. 19Bamna Dawan mita pâsa krawi yabalka ba, muna tani ra lakan; bara pâsa karna pali muna tani wina yan krawan, kruhkru nani kata ba pâli Kabu Pauni ra baman bri si yakaban. Idsip tasbaya aiska ra kruhkru kumi sin takaskras kan. 20Ban sakuna, Dawan mita munan king fero kau kiama karna takan upla bîla walras pali, bara Israel luhpia nani ba swin taki waras kan.
Tihmia tara iwan ba
21Bara Dawan bila Moses ra win:
—Klamhkla kasbrika tani ra purara buks, bara Idsip tasbaya purara tihmia tara kum balbia, tihmia pali kabia ba mita pana pana sip kaikras, ai lal pruki banhwi kabia.
22Moses ai klahkla kasbrika purara bukan, bara tihmia tara kum#Law 105.28; Par M 16.10. bal iwan Idsip tasbaya aiska purara. 23Tihmia tara pali aihwa kan ba mita, upla nani ba ai lamara pana pana sip kikras kan, yu yumhpa ai watla nani wina latara takras kan. Ban sakuna, Israel luhpia nani watla lika ingni bri kan.
24Bara king fero bui Moses ba paiwi bri balan, bara win:
—Man nani was bara Dawankam ra mayuns, luhpiam lupia nani ba sut brih was, sakuna sîpkam bara bîpkam nani ba lika sut swis.
25Kuna Moses pana aisi, win:
—Apia, man baku wisma kaka, daiwan nani briaia sna ba, man mita saki aikma, bara yang nani baha bri sakripais dauki angki, Dawanki Gâdki ra mayunra yamni kulkan lâka ba dauki yabamna. 26Baha purkara sin, yang nani daiwri nani ba yang nani wal wabia, kumi sin nahara takaskaia apia, kan yang nani baha daiwra nani tila ba wina pliki saki, baha ni Dawanki ra tingki wi mayunra dauki yaia sna. Yang nani bahara kau taki waras sna kaka, nahki nanara pat nu kamna ani daiwra ba iki, sakripais dauki yaia sna ba.
27Ban sakuna, Dawan mita baku daukan, king fero ba kupia karna takaia bara upla nani bîla walras kaia, upla nani ba sin swika taki waras kaia. 28Baha purkara, king fero mita Moses ra win:
—Naha wina taki was, bara aman kaiki bas yang maiwan kaikaia kli balpara, kan man kli yang maiwanra bal buma yua ba lika, man pruaia sma.
29Bara Moses pana tawi win:
—Kasak pali aisaram, yang kli mai kaikamna apia.
Currently Selected:
Impakan Sturka 10: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
