Impakan Sturka 11
11
Tawahkia nani prubia win ba
1Dawan bui Moses ra win:
—Kau klala kum king fero ra bara Idsip uplika nani sut purara bri balaia sna. Baha ningkara, king fero bui man nani ba ban mai swika taki wama apia, sakuna witin mita mai kangbi mai sâkbia. 2Bamna nanara Israel luhpia nani ra wis, waitna, mairin nani sut, Idsip uplika nani aikuki ai lamara iwi nani ba ra, gul dukia nani bara silbar dukia nani prisant makabia.
3Dawan daukan Idsip uplika nani ba, Israel luhpia nani ba mapara ai kupia ra latwan kaikaia. Baha purkara, king fero uplika tara nani ba, Moses ba waitna aihka tara pali kulkan kabia, bara Idsip uplika nani sin Moses dukiara baku lukan kabia.
4Moses bui king fero ra win:
—Dawan ba naku wisa: ‘Tihmia lilapas ra Idsip tasbaya aiska bâk yang lui wamni, 5bara Idsip uplika nani watla bîla bani ra luhpia waitna tawahkia ba pruan kabia. King fero luhpia tawahkia king iwaika ra iwi ba wina, ban albika mairin aya akbaika ra wark taki ba, luhpia tawahkia nani ba sut, baku sin daiwan nani tawahkia ba sin pruan kabia. 6Idsip tasbaya aiska ra, upla nani ba ai kârma kalki ini kabia, sari lâka latwanka tara ba mita. Baha prais kau baku takras kan ba, bara kli sin baku takbia apia.’ 7Baku man nani kaikma, Dawan mita Israel luhpia nani ba aihka sakisa Idsip uplika nani ba wina. Israel luhpia nani tilara, yul nani kumi sin, upla ra bara daiwan ra sin akbi kabia apia.
8Bara Moses naha bîla aisi, win:
—Man uplikam tara nani ba sut yang ra ai kaikaia balbia, ai lula kriki yang ra makabi ai wibia: ‘Uplikam nani sut ninam bliki nani ba brih, man nani mahka taki was.’ Sakuna yang taki wamna apia.
Baku aisin bara Moses ai kupia baiwan, king mawan wina mahka taki wan. 9Baha ningkara, Dawan mita Moses ra win:
—King fero lika man nani bîlam walbia apia, baha mita yang warkki aihkakira nani ba kau ailal daukamna Idsip tasbaya ra.
10Bamna Moses bara Eran wal naha warkka aihkakira nani sut pali king fero mawanra daukan, sakuna Dawan aisin ba baku, witin bui Israel luhpia nani ba swin taki waras kan Idsip wina.
Currently Selected:
Impakan Sturka 11: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
