Impakan Sturka 12
12
Dawan Insalka bal kaiki lui wan ba
1Idsip tasbaya ra Dawan mita Moses bara Eran wal ra bal aisi, naku win:
2“Naha katka na man nani tara kulki kaia sma, mani tâ katka ba. 3Israel luhpia nani sut ra wis naha kati yua matawalsip aimakbia ba ra, witin nani naku daukbia: witin nani ai watla bîla bani dukiara, sîp lupia kum, apia kaka guts lupia kum briaia. 4Utla bani ra upla maura baman mita wîna ba sut sip piras sa kaka, utla dawanka ba mita ai lamara iwi uplika nani ba paiwi aikuki nahki piaia sip ba praiska kat, yui pi wîna ba danh daukbia. 5Daiwra ba, sîp sapa, guts sapa, kum bribia, mani kum bri ba. Bara daiwra wîna ba, sunu bara watawan âpu pali kaia sa. 6Daiwan ba main kaiki bri kabia, yu mahka tutni tawi ba ra, upla kumi bani ai daiwra ba ikbia. 7Bara wîna ba, ani watla bilara pibia ba, daiwra tâlia ba wiria bribia bara ai durka playka nani un ra bara dur pura nani ra sin tâlia ba wal yûkbia. 8Bara wîna ba sin tihmia iwbia ba ra pauta ra duki, brit îs âpu dauki angki, dus wahia tahpla nani aikuki dauki pibia. 9Daiwan wîna pîs lupia kum sin raya, apia kaka piaki man nani pipara. Daiwan aiska, lal ba, mina nani ba, dikia dikia biara bilara sin angkaia sma. 10Yu wala dukia wisi pîs sirpi kum sin suni swiaia apia sa; wîna pîs takaskbia ban kra sip piras sa kaka, angki tikaia sa. 11Baku sin baha daukisma ba ra, mahka impakaia prâmka dimi, sûskam dingki, dusam mihtam ra brih kira daiwan wîna ba piaia sma. Kan baha yua ba lilia tara yua kabia, Dawan bal kaiki lui wan ba yua,#Lib 23.5; Kul K 9.1-5; 28.16; Kli S 16.1-2; Mt 26.2-29; Mk 14.1-25; Lk 22.1-19; 2 Ko 5.7. witin ra mayunra dauki yaia yua. 12Baha tihmika yang lika Idsip tasbaya aiska ra lui wamna, bara Idsip uplika nani watla bîla bani ra, luhpia tawahkia bani ba ikamni; daiwra luhpia tawahkia nani ba sin, bara Idsip gâdka nani ba lâka sin daukamni. Yang Dawan, baku aisisna.
13“Bara tala durkam nani purara, durkam playka nani ra yukram ba mita mairikbia, man nani baha watla ra dimisma. Bara tnamyak lui wamna, baku yang bui Idsip uplika nani luhpia tawahkia nani baman iki lui wamna, sakuna man nani luhpiam nani lika kumi sin ikamna apia, yang tala ba kaikamna ba ra, wamtla wina laihku lui wamna. 14Baha yua ba man nani kupiam kraukaia yua kum kabia, ban kaia ra. Naha yua, piu aula bani, man nani bui yang ra lilia tara dauki aiki kama, bara lâ kum luhpiam nani ra sin smalki kama ban kaia ra. 15Witin nani wik kum brit îs âpu dauki pi kabia. Baha mita baha yua pas ba wina man nani wamtla nani ra îs âpu kaia sma. Wik kum ba bilara, ya kabia sin sakuna brit îs wal daukan ba pibia kaka, uplika ba, Israel tila wina ai mawan ba tikan kabia. 16Baha pas yua ba wina bara wik kum alkuya yua ba, man nani aidrubi Dawan ra puram sunaia sma. Baha yua nani ra man nani wark takaia apia sma, dîa piaia ba baman ridi sakaia sma upla bani dukiara. 17Brit îs âpu dauki piaia yua ba,#Imp St 23.15; 34.18; Lib 23.6-8; Kul K 28.17-25; Kli S 16.3-8. lâ tara kum sa kulki aikaia sma. Mani bani baha piua ba kat, lilia tara dauki kaia sma. Baku sin baha yua ba kupiam krauki kaia sma, yang bui Idsip tasbaya wina mai sakri ba. Lâka ba, man nani bara luhpiam nani, mulam bara masrakam nani tilara ban kulki kaia sa. 18Mani tâura, kati pas dimi lapta yua 14 aimakuya tutnika ba wina, brit îs âpu pima, ban baha katka bilara lapta 21 yua aimakuya ba tutnika ba kat. 19Wik kum ba man wamtla bilara îs âpu kaia sa; kan ani uplika baha yua nani tilara îs bri britka pibia kaka, witin ba Israel luhpia nani tila wina ai mawan ba tikan kabia, tringsar kabia, apia tasbaya luhpia kabia sin wal baku kulkan kabia. 20Bamna ani tasbaya ra kama kra, sakuna baha yua ra plun kum îs wal daukan pata sa kaka, pipara. Man nani anira kama kra, kuna baha yua nani ra brit îs âpu baman piaia sma.”
21Bamna Moses, Israel almukka nani sut ba paiwi bara baha lâka nani ba witin nani ra win: “Man nani was sîp lupia kum, apia kaka guts lupia kum saki bris, man wamtla bîla dukiara; bara iks Insal luan Yua ba daukaia. 22Tâlia ba baul bilara brima, bara hisop tnawa nani mihtam banhki wilki brih, bara baha ni tala ra buski durkam purara bara playka nani ra yûks. Ningkara durkam ba praki swis, upla kumi sin tihmia ra kli latara takaia apia, ban titan kat. 23Baha tihmia, Dawan Idsip uplika nani ba ikaia bahak bal lui wabia. Sakuna tala ba dur playka nani ra yukan ba kaikbia ba ra, watla ba tnaya walak lui wabia. Baku witin mita sauhki tatikra insalka ba swika wamtla ra dimbia apia.#Hib 11.28. 24Naha adarka na lâ kum man nani mita kulki kaia sma, bara kiamkam nani sut mita sin kulki kabia ban kaia ra. 25Dawan tasba maikaia pramis mai munan ba tasbaya ra dimma ba ra, witin bui man nani ra pramis mai munan ba baku, naha yua na kulki liliaka ba dauki kama. 26Bara luhpiam nani mita mamkabi walbia: ‘¿Baha yua liliaka dauki ba dîa tânka dukiara?’ 27Bara man nani bui witin nani ra wima: ‘Naha daiwra na sakripais daukisa, Insal luan Yua ba dukiara luki, Dawan ra mayunra yaia. Baha yua ra, Dawan Idsip uplika nani luhpia tawahkia nani iki lui wan. Yawan Israel luhpia nani, Idsip ra iwi kan ba watla ra lika dimras, laihku lui wan. Baku wan taya nani ba swaki sakan.’ ”
Bara Israel luhpia nani sut ba ai lula kriki Dawan ra mayunra yaban. 28Ningkara witin nani taki wan, bara Dawan mita dîa daukaia Moses bara Eran wal ra win ba, witin nani baha kat daukan.
Luhpia tawahkia nani prui tiwan ba
29Tihmia lilapas ra, Dawan mita Idsip uplika nani luhpia tawahkia kumi bani ba ikan,#Imp St 4.22-32. baku sin king fero luhpia tawahkia, king iwaika ra kan ba, silak ra mangkan nani kan ba luhpia tawahkia kat sut pruan, baku sin daiwan lupia nani tawahkia kat sin sut pruan. 30King fero, ai uplika tara nani bara Idsip uplika nani sut watla bilara, witin nani tihmia yapi si buan ba ra, sari lâka bara inanka tara pali baman kan, Idsip aiska ra. Utla bîla kumi sin, upla pruras watla ba âpu kan, witin nani ai tilara. 31Baha pali tihmika king fero bui Moses bara Eran wal ra paiwi, witin nani ra win:
—Man nani taki was upliki nani tila wina, Israel luhpia nani sin brih taki was. Dawankam ra wih mayuns man nani aisaram ba baku. 32Bîpkam bara sîpkam nani sut sin brih was, man brin mai dauki kan ba baku, man nani taki was. Bara yang dukira Dawan ra puri suns.
33Idsip uplika nani, Israel luhpia nani ra aihni pali munan ai tasbaya wina mahka taki wan. Kan witin nani lukan baha nani tâwan witin nani sin sut prui tiwbia. 34Bara Israel luhpia nani sut, ai plawarka krauhnika îs âpu ridi dauki brin kan ba, kwala ra sruki brin bara ai pahpaya ra suni twilkan. 35Uplika nani ba Moses dîa daukaia win ba kat daukan. Baha purkara, Israel luhpia nani Moses adarka kat, Idsip uplika nani ra gul bara silbar ni daukan dukia nani bara kwala nani sin makaban. 36Bara Dawan mita ban baku daukan Idsip uplika nani Israel luhpia nani ra ai kupia pihni lâka ra, witin nani dîa makaban ba sut yaban. Baku natka ra Israel luhpia nani mita Idsip uplika nani dukia sut mihta dakbi brih wan.#Imp St 3.21-22.
Israel luhpia nani Idsip wina taki wan
37Israel luhpia nani mahka taki wapan Ramsés wina Sucot ra. Mairin bara tuktan nani ailal kan ba lika, kulki kaikras kan. Sakuna waitna nani baman suldiar aimakaia manka alkan ba 600,000 kulkan kata. 38Upla sâtka wala nani sin sut kau kulkras kan ba dakni tara pali witin nani tnaya ra taki wan. Baha purkara bîp nani, sîp bara guts nani sin ailal pali kata. 39Bara plawar krauhnika îs âpu daukan nani Idsip wina brih takan ba wal, kik nani angkan. Kan witin nani piua aitani briras kan, yabal pata plun nani ridi daukaia, Idsip uplika nani mita ai tasbaya wina istikira pali kangbi sakan bamna.
40Israel luhpia nani ba Idsip tasbaya ra mani 430 iwan,#Bla St 15.13; Gal 3.17. 41Bara 430 mani alkan ba manka ra, Dawan uplika nani aiklaklabra daknika tara ba sut mahka Idsip tasbaya wina taki wan. 42Baha tihmika ra, Dawan mita witin nani ba aihwaki kaiki kata, Idsip wina brih sakaia dukiara. Baha tihmika ba sika, Dawan aihwaki kaikan ba tihmika. Bahamna Israel luhpia nani sin Dawan ra pain kulkan ba lâka ra, baha tihmia ra aihwakaia kan ba ra, baha aihwakaia piua kulkan ba sin ban kulki kaia kan, ai kiamka nani sut ra sin.
Insal luan Yua lâka nani ba
43Bara Dawan mita Moses bara Eran wal ra naku win:
“Insal bal luan Yua lâka nani ba naku sa: Upla tringsar kumi sin, daiwan wîna sakripais daukan ba wina piaia apia. 44Sakuna lalah ni atki brin albika nani ba, witin nani pat Aisa sainka mangkan sa kaka, baha nani lika wîna sakripais daukan ba piaia sip sa. 45Impapakra nani, wark taki ai mana bri uplika nani ba, baha nani ba sin sip pibia apia sa. 46Baha ba utla bîla kumi ra baman piaia sa. Sakripais daukan wînka ba, pîs kum sin utla bîla wina latara sakaia apia sa; baku sin, daiwan dusa ba kumi sin krikan kaia apia sa.#Kul K 9.12; Jn 19.36. 47Israel luhpia nani sut ba, naha yua ba lilia tara daukaia sa. 48Upla tringsar man nani tilamra iwisa kaka, bara witin sin brin daukisa Insal luan Yua Liliaka ba daukaia, Dawan ra mayunra yabaia dukiara, tâura man bui witin ai watla bilara waitna nani sut ba Aisa sainka mangkaia sma. Baha ningkara lika witin nani sip kabia man nani lamamra bal Insal bal lui wan Yua liliaka tara ba daukaia. Baku lika witin ba naha tasbaya luhpia pali aihwa baku kulkan kabia. Sakuna Aisa sainka mangkras uplika nani ba, kumi sin naha daiwra wîna ba wina pibia apia. 49Lâ sâtka kumi baman kaia sa. Tasbaya luhpia nani bara tringsar nani man nani tilamra iwi ba, sut lâka ba aikuki kumi kulkan kabia.”#Kul K 9.14.
50Moses bara Eran wal ra dîa daukaia Dawan mita win ba, Israel luhpia nani baha kat bîla wali daukan. 51Bara baha yua ra sika Dawan mita Israel uplika aiklaklabra daknika nani ba, sut Idsip tasbaya wina brih sakan ba.
Currently Selected:
Impakan Sturka 12: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
