Blasi Sturka 14
14
Ebram bui Lot swaki sakisa
1Baha yua nani ra Amrafel ba Sinar kingka kan, Arioc ba Elasar kingka bara Quedorlaómer lika Elam kingka bara Tidal ba Goím kingka. 2Naha kingka nani mita Sodoma kingka Bera, Gomora kingka Birsá, Adma kingka Sinab, Seboím kingka Seméber, Bela Sóar kingka nani sut mapara war daukan. 3Bara baha kingka nani matsip ba sut ai suldiarka nani ba Sidim ilka bîla ra asla daukan, Kabu Pruan ba baha ilka bîla lamara sa. 4Witin nani 12 mani Quedorlaómer lâka munhtara dukia dauki kan, sakuna 13 mani kat lika kingka nani matsip ba luki kaikan mapara buaia. 5Bara mani 14 alkan ra, king Quedorlaómer ai suldiarka nani aikuki, king wala nani sin witin wal kan ba ai suldiarka nani aikuki asla aidrubi Astarot Carnaim ra balan, bara bahara aiklabi, refaíta nani ra pura luan. Baha wina Ham ra zuzita nani ra pura luan; ningkara emita nani Savé-quiriataim ra kan nani ba ra pura luan. 6Baku sin Hor uplika nani Seír ilka ra kan nani ra sin, wal aiklabi pura luan bara nina bliki plis kum El-parán upla iwras tasbaya lama kat wan. 7Baha wina Quedorlaómer ai uplika nani wal aikuki kli tawi balan, bara En-Mispat ra wan, nina wala ba Cadés; bara Amalec uplika nani tawanka nani sut ai yabalka ra kan ba sauhki lui wan. Amorreo nani tawanka nani wal sin baku daukan, witin nani Hasesón-tamar tasbaya ra iwi banhwi kan.
8Bara Sodoma, Gomora, Adma, Seboím bara Bela kingka nani matsip ba, Sidim ilka bîla ra taki wan. 9Quedorlaómer Elam kingka ba, Tidal Goím kingka ba, Amrafel Sinar kingka ba bara Arioc Elasar kingka ba mapara balan. King matsip ba mita king wala nani walhwal mapara aiklaban. 10Sidim ilka bîla aiska ra târ layawanhta nani manis upla mita salhkras ba bâra kan, târ laya babatni baha bilara aibanhwi kan, Sodoma bara Gomora kingka wal, swak takaia wisi plapan bara baha layawanhta nani ra kauhan. King wala nani yumhpa ba lika il nani tilara plapi swak takan.
11Bamna king walhwal ba Sodoma bara Gomora ra wih diman ai pata nani bara diara pain mana tara dukia nani bri kan ba sin sut brih mahka wan. 12Bara Lot, Ebram luhpia diwra ba sin Sodoma ra iwi kan, bamna witin nani Lot sin brih wan ai dukia kukanka nani sut ba wal. 13Sakuna waitna kumi baman tila ba wina plapi swak takan. Bara witin balan bara Ebram Hibru waitnika ra sturka ba sut win. Witin amorreo usupum untika ra ai uplika nani Mamré, amorreo ba, Escol muihnika wala Aner nani aikuki bahara iwi kan.
14Ebram walan ai luhpia diwra ba priski brih wan ba; bara witin ai dukia dadaukra nani, ai watla bilara aisubi taki pâwan nani sut ba paiwan balan baha lika waitna 318, baha nani mihta ra aiklabaia dukia nani ba mangki si, bara mahka kingka nani ba nina blikan Dan tawanka kat. 15Bara tihmia ra king nani ba ai dara walras kan, Ebram ai uplika nani aikuki wih dimi aiklaban. Bara witin nani plapan, swiras nina blikan Hobá kat wan, Damaskus tawanka yahbra tani ra ba. 16Baha ningkara diara nani brih wan ba sut kli mihta dakbi brin, Lot dukia nani sut aikuki. Baha purkara mairin bara upla wala nani brih wan kan ba sut sin kli dakbi brin.
Melkisedek bui Ebram ra yamni munan
17Abram Quedorlaómer bara king wala nani bâra kan ba sut wal aiklabi pura lui si kli tawi balan ba ra, Sodoma kingka ba bal takan, Ebram wal prawaia bara ai lakula daukaia, Savé ilka bîla kat. Baha ilka bîla ba sika King Ilka Bîla ba. 18Bara Melkisedek, Salem kingka, Gâd Laih Purara iwi ba prîska ba sin, witin brit bara wain wal Ebram ra balan ba ra, 19naha bîla nani aisi Ebram ra yamni munan:
“Gâd Laih Purara iwi ba,
kasbrika pura tasba sin papaskra ba mita
yamni pali mai munbia.
20Bara Gâd Laih Purara iwi ba nina ba mayunan kabia,
witin mita sip mai daukan waihlam nani pura luram ba.”
Bara Ebram witin diara nani sut dakbi brin ba wina, matawalsip wina kumi saki baha mana Melkisedek ra yaban.#Hib 5.6-7.17. 21Bara Sodoma kingka ba bila Ebram ra win:
—Upla nani ba baman yang ra aik, bara diara nani sut mihta dakbi balram ba lika, sut man bris.
22Sakuna Ebram pana Sodoma kingka ra naku win:
—Gâd Laih Purara iwi ba ra yang mihti bukri, kasbrika pura bara tasba sin papaskra ba, 23Man dukiam nani ba wina diara kumi sin yang brimna apia, trit kum pan sin, apia kaka sûs awa kum pan sin, sûski unta wilkaia dukiara, ban kra man wimara sîa yang mita sika Ebram ba yuyakira daukri. 24Bamna yang duki lika diara want apia, sakuna duki dadaukra nani pat plun pin ba dukiara lika. Waitna nani yang wal asla wan ba, wibia kaka, Aner, Escol bara Mamré, witin nani ai sirka bribia.
Currently Selected:
Blasi Sturka 14: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
