Blasi Sturka 16
16
Agar bara ai luhpia Ismael wal
1Sarai ba sip Ebram ra luhpia baiki yaras kan. Sakuna witin ai albika mairin kumi bri kan, mairka ba Idsip wina kan, nina ba Agar. 2Bara Sarai mita ai maya Ebram ra win:
—Man kaikisma, yang na Dawan mita biairapara ai daukan; bamna yang mamkabisni, man albiki mairin Agar wal bris, bara baku ban witin wina yang luhpi nani brimna.
Bara Sarai makaban ba, Ebram yamni kulkan. 3Bara Sarai ai maya Ebram ba yan ai albika mairin Idsip wina ba wal bribia. Baha piua ra witin nani pat mani matawalsip iwi kan Kenan tasbaya ra. 4Ebram Agar wal brin bara Agar kwihra tiwan. Witin kwihra tiwan ba ai dara walan ba ra, Sarai ba ai nakra ra saura kaikan. 5Bara Sarai bila Ebram ra win:
—Agar yang ra bahki ai kulki ba pâtka ba, man puramra sa. Yang mita sika mairka ba man mairkam maikri, sakuna witin ai luhpia kum briaia sa, bara nanara witin kau tara ai dara walisa bara yang ra bahki ai kulkisa. Sakuna Dawan mita wan wibia ya ba pâtkira ba, man, apia kaka yang.
6Bara Ebram pana Sarai ra win:
—Kaiks, albikam ba man mihtam ra sa; dîa daukma taim kau yamni takaia ba kat witin wal dauks.
Bara Sarai mita mahka witin ra saura munan, bamna Agar ba mahka plapan. 7Sakuna Dawan insalka witin wal prawan upla iwras tasbaya ra, Sur ra waia yabalka ra lî kârma kum lama kat, 8bara witin ra makabi walan:
—Agar, Sarai albika mairin, ¿man ani wina aulma, bara anira sin auma?
Bara witin pana aisi, win:
—Dawanki, Sarai mawan wina plapisna.
9Bara Dawan insalka ba bila witin ra win:
—Dawankam mairin lamara kli tawi was, bara diara sut ra witin ai bîla wali bas.
10Baha purkara Dawan insalka sin witin ra win:
“Kiamkam ba sin ailal pali daukamni,
ailal pali upla sip kulki sâkbia apia.
11Man sin nanara kwihra sma bara luhpiam waitna kum brima,
bara witin ai nina ba man Ismael#16.11 Hibru ra Ismael, baha tânka ba Gâd walisa. mâkma,
kan man inankam ba Dawan walan bamna.
12Witin biriku wail luhpia baku prautkira kabia;
witin lika upla sut mapara aiklabi kabia,
bara upla sut sin witin ai mapara kabia,
sakuna ai watla ba lika alki bri kabia,
ai muihni nani ai mapara kabia sin.”
13Agar Dawan wal aisin bamna, witin ai nina ba naku mâkan “Dawan diara kaiki ba”, kan witin naku aisin bamna: “Dawan bui yang ra ai kaikan bara yang kau raya sni.” 14Baha mita baha layawanhta ba nina sin naku mâkan: “Witin raya ban ba, ai kaiki ba layawanhta.” Baha layawanhta ba Cadés bara Béred wal lilapas ra bâra sa.
15Bara Agar, Ebram ra luhpa waitna kum baiki yaban,#Gal 4.22. bara witin ai nina ba Ismael mâkan. 16Ebram 86 mani bri kan Ismael baikan ba ra.
Currently Selected:
Blasi Sturka 16: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
