Blasi Sturka 43
43
Benjamín Idsip ra brih wan ba
1Plun tiwan tara ba kuntri aiska ra kau tara taki kan. 2Bara Idsip wina plun atki bri balan pata ba, Jekob ai luhpia nani aikuki sut pin. Bamna Jekob ai luhpia nani ra kli win:
—Man nani kli plun atkaia was bara plawar wiria atki bri bal yawan wan piaika.
3Bara Juda ai papika ra win:
—Aisiki, baha waitnika yang nani ra param pali ai win: ‘Man nani muihkam sirpi ba nâra bri balras kama kaka, man nani sin yang maiwanra balpara.’ 4Baku bamna, witin ba yang nani wal blîkma kaka lika, yang nani patam atkaia wamna; 5sakuna man bui witin ba blikras sma kaka, yang nani sin wamna apia. Waitnika ba yang nani ra ai win: ‘Man nani muihkam sirpi ba nâra bri balras sma kaka, man nani sin yang maiwanra balpara.’
6Bara Israel bila naku win:
—¿Dîa kan man nani ban saura ai munisma? ¿Dîa muni man nani waitnika ba ra wiram muihkam wala brisma ba?
7Witin nani pana witin ra win:
—Kan waitnika ba sika yang nani ra diara tânka ailal makabi wali kan, yang nani dukira, taiya nani dukiara sin. Witin naku yang nani ra makabi walan: ‘¿Man nani aisikam ba kau raya sa? ¿Man nani muihkam wala kau brisma ki?’ Bara yang nani sip kau diara wala lika wiras, tânka ba kat lika aisi banhwaia kapri. ¿Yang nani nahki daira walaia kapri witin naku wan wiaia kan ba: ‘Man nani muihkam sirpi ba yang ra bri bal nâra?’
8Juda ai papika Israel ra win:
—Yawan raya kaia brin mai daukisa kaka, muihki sirpi ba yang nani wal blîks. Yang bui witin ba main kaiki kama. Bara yang nani mahka Idsip ra wamna. Baku lika man, yang nani bara wan luhpia nani sin prubia apia. 9Yang wîni tara na wal, muihki sirpi rayaka ba dukiara man ra pramis takisna. Witin ra dîa takbia kaka, baha mana ba man bui yang wina saki bris. Witin na kli naha kat bri sal maikras sna kaka, rayaki yua nani sut ra, man mamwanra yang pâtkira kamna. 10Yawan nâra ban wihka naha bîla kaikras kata kaka, pat aima wâl plun atki balan kaia kan.
11Bara ai aisika pana witin nani ra win:
—Natka wala ra diara daukaia yabalka wala âpu sa, bamna man nani naku dauks: man nani surunkam bilara, waitnika ba prisantka kum brih was. Wan kuntrika ra diara kau pain ba dukia nani ba wina bri si yas: wan taya ra aubaia batanka, nasma laya, isint kîa pain ba, sîka, amans mâ nani baku. 12Lalahka kli maikan ba bara nanara plun atkaisma lalahka ba sin brih was. Kli maikan balram lalahka ba, witin ai mihta kat mangks, ban kra mistik taki maikan kra. 13Bamna nanara man nani mahka bus, muihkam sin brih was bara waitnika ba ra kli was. 14Gâd karnika tara sut bri ba, baha waitnika kupia ra munbia man nani ra umpira mai kaikaia. Muihkam Simian silak wina saki maikbia, bara Benjamín sin pri swibia. Yang maipa ra, yang na luhpias baku ban naku takaia win sa kaka, luhpias yakan takaskamna si.
15Bara witin nani prisant sâtka nani brih waia ba brin, lalah kata ba sin brin, kli plun atkaia lalahka ba brin bara Benjamín sin. Bara witin nani mahka Idsip ra wan. Bara witin nani Josep mawanra dimi wan. 16Josep kaikan, Benjamín sin witin nani aikuki balan bara utla bîla lalka ra win:
—Naha waitnika nani na waitla ra brih was, bîp kum iki bara plun piaks, bara yang lika witin nani aikuki wan lal kat pata ba pimna.
17Josep watla wihtka ba witin ra dîa daukaia win ba kat daukan. Witin mita tâ bri waitnika nani ba Josep watla ra brih wan. 18Sakuna waitna nani ba sibrin dauki kan, Josep watla ra brih auya kan bamna. Bara ai mânka ai tilara pana pana aisi kan:
—Naha na diara kum wan munaia kuninka daukisa. Bisi wan lalahka briras kli wankata ba lalahka tâwan, nâra wan brih aula. Nanara baha lalahka mana wan taya wina sakaisa wan daiwra nani aikuki, wark wan dingki alba baku wan bri kaisa.
19Bamna witin nani utla durka dimaia lama kat wan ba ra, utla bîla wihtka ba lamara wan, sturi aisaia, 20bara witin nani bui witin ra win:
—Wihtki, man nu sma bisi yang nani plun atkaia dukiara nâra balri ba, 21sakuna yabal ra tihmia yapaia pliska ba kat yang nani wari ba ra, surunki nani ba lanhki kaikri bara kumi bani surunka bilara, plun atkri lalahka ba bâra mangkan kan sakri. Lalahka ba, plun mana dîa kulkan ba praiska ba kat kan. Bara lalahka ba yang nani nâra kli bri balri sa man ra maikaia. 22Baha purkara yang nani kli plun atkaia lalahka sin bri balri sa. Sakuna bisi plun atkri lalahka kan ba, ya mita kli surunki ra mangkan uplika ba lika yang nani tânka briras sna.
23Bara utla wihtka ba pana witin nani ra win:
—Man nani kupiam alki bri bas, si bripara. Sip sa man nani Gâdkam, aisikam ba, witin bui man nani surunkam ra lalah ba kli mangkan kaia, plun mana aibapram lalahka ba.
Baha aisin bara witin taki wan. Simian witin nani ra bri balan, 24bara witin nani sut Josep watla bilara brih diman. Lî diaia yaban, mina nani sin sikban, ai daiwra nani ra sin plun dakakan. 25Bara Josep muihnika nani ba, prisant nani bri balan ba blaki ridi daukan, wan lal kat witin balbia ba ra yabaia, kan witin nani pat walan kata dinar pata tara ba witin aikuki iwi piaisa.
26Josep ai watla ra wih diman ba ra, witin nani ba witin ai mawanra bal ai lula kriki, ai lal tasba kat makupan, bara prisantka bri balan ba witin ra yaban. 27Bara Josep witin nani ra makabi walan:
—¿Man nani yamni balram ki?
Bara ai aisika dukiara sin makabi walan:
—¿Aisikam yamni sa ki, witin pat almuk pali sa man nani ai wiram baku? ¿Witin kau raya sa ki?
28Witin nani kli witin ra ai lal makupi kulkanka yabi bara win:
—Yang nani lika man albikam sna na, aisiki witin kau raya sa, ai wîna sin kau yamni sa.
29Josep ai nakra ai tnaya ra kaikan bara Benjamín kat kang kaiki, witin wal aisa kumi yapti kumi muihnika ba, bara win:
—¿Naha namna man nani muihkam sirpika ba, witin dukiara man nani sturi nani aisi katma ba? Yang luhpi, Gâd yamni mai munbia.
Witin baku aisin ba ra, 30Josep witin kau sip ai kupia priski briras kan, alai inan daukan. Bamna plapi ai rumka ra wih diman, bara bahara ai durka praki ban ai bîla baikra saki inan. 31Witin wirâ ai kupia aimakan ba ra ai mawan sikbi bara kli bal takan. Bara ai uplika nani ra win: “Man nani plun ba mahka tibil ra kahs.”
32Witin nani tibil kum ra, Josep piaia pata baman kahban, bara muihnika nani piaia pata ba lika tibil wala ra kahban. Bara Idsip uplika nani Josep wal plun piaia paiwan ba pata sin, tibil wala ra kahban. Kan Idsip uplika nani lâka ra, lâ apia kan witin nani Hibru nani aikuki asla iwi plun piaia. 33Witin nani mahka plun piaia iwan ba ra, Josep mita ai muihni nani ra win, man nani lâ kat tibil ra iws, kau almukka ba tâura, bara baha wina ningka ba ai lamara bara baku kau ban sirpika ba kat iwbia. Josep baku lâ mangkan bara witin nani sirang iwi pana pana ai mawan ra tawi kaiki kan. 34Bara Josep witin ai tibilka ba wina witin nani ra plun yaban. Sakuna Benjamín ra kau plun ailal yaban, wala nani ra baku praiska yabras kan. Witin ai muihni nani aikuki plun pi bara diara di lilia pali takan.
Currently Selected:
Blasi Sturka 43: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
