Blasi Sturka 44
44
Josep kapka ba
1Plun ba sut pi luan ba ningkara, Josep ai watla pura wihtka ba ra win:
—Naha waitnika nani surunka ba, witin nani nahki brih waia sip ba praiska ba kat plun auhbi yas. Bara witin nani kumi bani plun atkan lalahka ba sin, kli surunka ra mangki swima. 2Bara yang kapki silbar ni daukan kapka ba, muihnika sirpi ba surunka ra mangks; bara plun atkan lalahka ba sin kli surunka ra mangki yas.
Bara utla pura wihtka ba, Josep adarka dîa daukaia win ba kat daukan. 3Josep sin adar win, yu nan baiwbia ra, titan pali ba ra, ai muihni nani ba ai dukia nani, ai daiwra nani ba bri mahka impakbia. 4Witin nani tawan ba wina taki kau laihura pali waras kan ba ra, Josep ai watla pura wihtka ra win:
—Baha uplika nani ba ninara man nina bliki was. Bliki alkma ba ra witin nani ra naku wis: ‘¿Man nani dîa muni yamni mai munan ba mana saura ni aibapisma? ¿Silbar kapka ba man nani dîa muni implikram, 5yang Dawanki bahara diara laiki di, baha wina smaya kaiki kan kapka ba?#44.5 Witin nani ai daukanka baku kan lî kâp kum bri smaya kaikaia. ¡Man nani diara saura pali daukram!’
6Josep watla pura kakaira ba uplika nani ba bliki alkan ba ra, Josep witin ra win bîla nani ba witin baha nani ra win. 7Josep muihnika nani ba pana witin ra win:
—¿Dîa muni man baku natka ra yang nani ra aisisma? Yu kumi sin yang nani kau bahmuna dukia daukras. 8Yang nani plun atkri lalahka surunki bilara kan ba saki Kenan wina kli bri sal maikri kaka, ¿nahki yang nani dawankam silbarka, apia kaka gulka ba, watla bîla wina implikamna? 9Mâsa, man ya pali surunka bîla wina baha kapka ba sakuma kaka, baha uplika lika pruaia kabia; bara yang nani sut sin man albikam takamna.
10Sakuna wihta tara ba pana witin nani ra win:
—Man nani dîa daukaia wiram ba kat daukan kabia; sakuna yang lika wisna, ya surunka bîla wina kâp ba sakuna ba, baha uplika baman yang albiki takbia; wala nani ba lika pri kama.
11Bara witin nani kumi bani, aihni pali ai surunka nani ba lanhki saki tasba ra swin; bara surunka nani ba lanhki sakan. 12Bara wihta ba surunka kumi bani ba bilara kâp ba plikan, muihnika almukka surunka ba wina, muihni sirpika surunka ba kat. Bara Benjamín surunka bilara kâp ba bâra kan sakan. 13Bara witin nani ai prâka kalkan, baha tânka marikan sari lâka tara. Baha ningkara witin nani sut kli ai dukia nani ba ai daiwra ra prahki, bara kli tawan ra tawi wan. 14Juda ai muihni nani aikuki, Josep watla ra kli wan. Witin kau ai watla ra bâra kan. Bara witin nani Josep mawanra tasba kat ai lal makupan, 15witin nani ai lal makupi kan, bara Josep witin nani ra win:
—¿Man nani baha dîa daukram? ¿Man nani damra walras sma, yang sât waitnika sna na, smaya kakaira kum sna ba?
16Juda witin ra win:
—¿Yang nani pana man ra dîa mai wimna ki? ¿Yang nani pâtkas na tânka ba nahki aisi param sakamna? Yang nani watawiki lâka ba Dawan kaikan. Bamna nanara yang nani sut man mihtam ra sna; albikam nani takri sa, ya man kapkam bri kan ba aikuki alba sna.
17Sakuna Josep kli win:
—Man nani aisisma ba baku lika apia sa. Sakuna ya kapki bri kan ba, baha uplika baman albiki takbia. Man nani wala nani sut lika pât luha banhwisma, bara sip sma kupiam kumi mahka aisikam ra waia. Upla kumi sin trabil mai munbia apia.
Judas ba Benjamín tâwan Josep ra makabisa
18Bamna Juda ba Josep lama pali ra wan bara win:
—Âu, yang bui man ra puri sunisni, dawanki, du pliskam, yang lika man wal baman wiria aisaia brin ai daukisa. Pliskam pali, yang ra lawpara, man na king fero wal baku tara sma, man wal aisisna ba king fero wal aisisna baku sa. 19Man sika yang nani ra makabi walram yang nani aisiki ba kau raya sa sapa bara muihki wala sin kau brisna sa sapa. 20Bara yang nani pana mai wîri, âu yang nani aisiki almuk kumi brisna bara muihki sirpi sin kum kau bâra sa, yang nani papiki almuk pali takan ra muihki lupia ba baikan. Yang nani sin mai wîri papiki ai plasni ba latwan pali sa, yapti kumi luhpia nani ba tila wina kau witin baman kumi ai lamara bri ba mita, kan baha plasni kankika ba sika pat pruan bamna. 21Bara man mita yang nani ra makabram muihki lupia ba kaikan mai daukisa bara bri balamna wiram. 22Bara yang nani mai wîri, papiki muihki ba sip swika balbia apia, ai luhpia ba yang nani bri balamna kaka aisiki ba prubia. 23Sakuna man pana wan wiram, muihki sirpi ba bri balras sna kaka, yang nani mamwanra ai kaikaia apia wiram.
24“Yang nani waitla ra kli tawi wari bara man dîa wan wiram ba, yang nani baha sut papiki ra wîri. 25Bara aisiki yang nani ra ai win: ‘Man nani kli plawar atkaia was’; 26sakuna yang nani pana wîri: ‘Yang nani sip wamna apia, muihki sirpi ba sin yang nani aikuki blîkma kaka lika. Witin ba yang nani wal waras sa kaka, baha waitnika mawan ba yang nani sip kaikamna apia.’ 27Bara papiki yang nani ra naku ai win: ‘Man nani nu sma mayi yang ra luhpi waitna wâl baiki aikan; 28witin nani wina kumika ba, yang laima wina taki wan ba yua wina, witin ai mawan ba yang kli kaikras sni. Yang kasak daira walisna, daiwan wail kum mita witin ba alki kalki yuya sirpi ra dauki pin. 29Bara nanara man nani kli luhpi wala na sin yang laima wina saki brih wama, bara witin ra sin kli diara saura kum takbia kaka, naha dama na sari bri ban prubia; sakuna baha pâtka ba man nani pâtkira kama, yang dama takri na sari lâka tara bri ban pruamna sa kaka.’
30“Papiki rayaka ba sika naha tukta waitna na. Bara yang nani kli tawi wamna ba ra, muihki na yang nani wal kli waras kabia kaka, 31yang aisiki kaikbia tukta ba âpu kabia bara witin ba kat prubia. Bara aisiki almuk ba sari mita baku prubia ba ra, baha pâtka ba yang nani purira kulkan kabia. 32Baha mita tukta ba rayaka dukiara aisiki ra yang pramis takri ai rayaka ba main kaikaia. Yang sin wîri: ‘Muihki sirpi na kli bri sal maikras kamna kaka, yang lika man mamwanra pâtkira kamna rayaki yua nani sut ra.’ 33Baha ba mita yang bui man ra puri sunisni, pliskam pali, tukta ba watlika ra yang na man albikam takaisna. Bara witin ba swis muihki nani aikuki mahka wabia. 34Baha apia kaka, ¿yang nahki papiki mawanra wih buamna muihki ba yang wal waras kaka? Yang papiki sari wirha tara bribia ba yang kaikaia brin ai daukras.
Currently Selected:
Blasi Sturka 44: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
