Blasi Sturka 49
49
Jekob mahka pruaia ra ai bîla nani aisin ba
1Witin ai luhpia waitna nani ba sut paiwan bara witin nani ra win: “Man nani kau laimara bal bara naika man nani ra diara takaia ba mai wimna:
2“Jekob luhpia waitna nani, man nani kau laimara bal dîa aisisna ba walaia,
aisikam Israel aisi ba, man nani wals.
3“Ruben, man, luhpi nani sut almukka,
yang karniki wina man pas bal takram.
Pain kulkan lâka ba,
karna kaia lâka ba sin man pas briram.
4Sakuna man baman tâura ban kama apia,
man ba tingni kum lî aibanhwi takaskras ba baku sma.
Yapaiki ba man mita swira daukram,
yang mayi wala ba wal yapram ba ra.#Bla St 35.22.
5“Simian, Libai, man nani wal muihkam;
aiklabaia dukia nani brisma ba lika,
saura munaia lâka nani baman sa.
6Man nani asla aidrubi iwi lâ aisisma ba iwaikam ra,
yu kumi sin iwaia brin ai daukras.
Kupiam baiwi kan, bara man nani upla ikram,#Bla St 34.24-30.
bara kupiam baiki bîp wainhka nani mina nani ba sin krikram.
7¡Saura pali, âu, saura pali kama,
man nani kupiam baiwanka saura daiwan baku ba!
¡Man nani damhra ba sut pali,
yang bui Israel tasbaya aiska ra yakabamna!
8“Juda, muihkam nani man ra mamyunbia,
waihlam nani ba man mita nana kat alkma.
Muihkam pali nani ba, man mamwanra bal man ra bawbia.
9Juda, man, yang luhpi.
Man ba layan luhpia kum ai daiwra ikan ba pi si,
ai lal makupi bara bawi ba baku sma,
layan tara bawi ba baku.
¿Bara ya sin witin ra munka mahka bubia?#Kul K 24.9; Par M 5.5.
10Juda karnika bri ba,
upla kumi sin baha karnika ba witin wina dakbia apia.
Baha karnika dusa ai mihta ra ba sin,
upla wala witin wina dakbia apia.
Baha karnika dusa dawanka ba balbia kat,
bara upla sut ba witin ai bîla wali daukbia.
11Witin ulaia daiwra lupia ba wain kiwka nani ra wilki swisa,
witin ai prâka nani ba sin, wain laya ra tuskisa,
wain laya pali ba ni.
12Ai nakra nani ba wain laya mapla baku sa,
ai napa nani ba sin tialka laya ba wal sin, kau pihni pali sa.
13“Zabulón lika kabu un tasbaya nani ra iwbia,
kabu dwarka tara nani un ra praki wilkaika nani ra.
Sidón tasbaya piarkika ba kat
witin ai tasbaya piarkika bri kabia.#Kli S 33.18-19; Jas 19.10-16.
14“Isacar ba wark daiwra diara prahkaika kum sa
ai watla nani ra ris bri ba.
15Witin kaikan kuntrika ba kuntri pain kan;
bahara iwi, wan âuyapah ris bri kaia.
Bara witin ai wirhika ba kau ban twilki kaia apia lukan bamna,
baha kat mahka tasba ra iwan,
bara ai kupia lâka kat alba takan.
16“Dan, ai uplika nani ba pura wihtka aimaki kabia,
Israel kiamka ba wina witin nani ba kiamka wala kum baku takbia.
17Dan ba piuta kum baku yabal un kat iwi kabia,
aras nani bal lui ba mina plakura ra sami,
bara aras âiulra nani ba bataki kabia.
18“¡Dawanki, bîlam kaikisni, swaki ai sâks!
19“War aiklaklabra daknika kum bal aiklabi Gad pura lubia,
sakuna witin pana aiklabi kli pura lui nina bliki wabia.
20“Aser lika, plun ailal pali saki kabia.
King nani ra, king pata pali ba yabi kabia.
21“Neftalí ba, snapuka mairin baku
ban ani anira wapi wataukisa,
luhpa painkira nani sin baiki brisa.
22“Josep lika, dus kum lî tingni lamara mangkan pâwi ba baku sa.
Ai mâ nani sin ailal pali sakisa,
ai tnawa nani ba sin giadin pura bâk baila wala ra luisa.
23Pantamangka lalulkra nani ba witin ra
misbara kaikisa, trisbaya nani lulkisa
bara piu bani ai kupia turbisa.
24Sakuna Josep ai klahkla nani karna bri bamna,
ai trisbaika nani ba karna alki brisa;
tingki Jekob Gâdka karnakira ba ra;
tingki baha Sepadka nina ra, Israel kan kahbi ba.
25¡Tingki man aisikam Gâdka ra,
witin bui man ra hilp mai munbia bamna!
¡Karnika sut bri ba Gâdka ra,
witin yamni mai munbia!
¡Laih purara yamnika bâra ba,
yamnika ba wal, yamni mai munbia!
¡Kabu ra yamnika nani bâra ba yamnika ba wal sin!
¡Tialka laya manis bâra ba,
tukta yapti biara sahwaia yamnika ba wal sin!
26Aisikam man ra kau ai yamnika maikan
yang aisiki nani yang ra yamni ai munan ba wal.
Ban kaia ra ilka nani bâra ba yamnika nani ba,
Josep lal purara ban bâra kabia.
Baha yamnika nani ba briaia ba mata
ai muihni nani tila wina bâk sakan bamna.#Kli S 33.13-17.
27“Benjamín lika, yul wail prautkira baku sa;
titan ra ai daiwra ba alki pîsa,
tutni ra wîna nani kau ai pura luan ba yuisa.”
28Naha waitnika nani na sika Israel luhpia, kiamka 12 nani ba. Bara witin nani kumi bani ba, dîa ai yamnika ai aisika wina briaia kan ba, baha bîla nani aisin ba tânka ba kat kumi bani ra yamnika ba yaban.
Jekob pruan bara bikan ba
29Baha wina yu kum Jekob ai luhpia nani ra kli naku win: “Yang pat pruaia baila pali sna. Bamna pruamna ba ra aisiki nani raitka ra walpa untika ra, Efrón hitita ba tasbaya ai brih was, 30bahara Kenan tasbaya ra; wibia kaka Macpelá walpaya untika ba ra, Mamré lalma tani ra bâra ba. Baha tasbaya aiska ba sika Ebraham, Efrón wina atki brin ba, raiti tasbaya, bahara wan taya nani bikaia.#Bla St 23.3-20. 31Bahara Ebraham bikan, ai maya Sara sin,#Bla St 25.9-10. Aisak#Bla St 35.2 9. bara ai maya Rebeca sin. Yang sin bahara Lea bikri. 32Baha tasbaya bara walpaya untika ba, Ebraham bui hitita nani wina atki brin.”
33Bara Jekob naha lâka nani ba sut ai luhpia nani ra aisi yaban ba ningkara, witin kli aitnikan bara pruan.#Ap St 7.15.
Currently Selected:
Blasi Sturka 49: MSKTU
Highlight
Share
Copy
Want to have your highlights saved across all your devices? Sign up or sign in
© 2010 Bible Society in Nicaragua
