Yohan 21
21
Pochong seh tebeih khäla Yĕsu la upuma awdawnei
1Äi pänäng Yĕsu la awlaw krängak Tibiri guda kawma etebeih tih a adawnei. Ni khäl che ni huih thänei hüt. 2Simon Pitol, Thoma (Phetih ting ini panei saw), Nathaniel (ani che Galila käh Kana nam känäng), Jebidi chaw häih awlaw Yĕsu käh aw hngaw pochong hnih etebeih, anih kheni äi la a utu ini mäi hüt. 3Simon Pitol la anih a tak, “Kei ngaw mawna kechetaih saw.” Anih la ini tak, “Keinih ha nang ängtu kini lo aih saw dä.” Äihi anih apranga thok ula long äng ini kawi. Äini yawn thiya äng anih la hngaw thekak ha bün u. 4Khoni thok tun khaw a Yĕsu guda kawma aja. Äini etebeih khälla ani Yĕsu ting hmawt u. 5Äi khaw a Ani la anih a hi, “Khanbawn khälo, ngaw nini bünei?” Anih la ini hawu, “Iha bün unga.” 6Ani la anih a tak, “Long set pawta nangnih käh kawn hiyän khäl äihi nini bünai.” Äidä anih la kawn ini hiyän ni latal hnäng ti u. Iyaäm kawn äng awbawng ngaw ini okei hüt.
7Yĕsu la khetnawk saw tebeih la Pitol a tak, “Ani che Boi dä!” Pitol la äi Boi dä ting yawk ni awat echeng äng khoneyal hiyawng bala tui äng chu. (Iyaäm ani la ukhaw wat bala dä mäihüt saw.) 8Awhngaw tebeih khälla ngaw luih saw kawn lalat ula long äng kawm pawta ini lo al. Anih kawm känäng umuk khra hnih huih dä ini hlawm hlaw ei saw. 9Kawma ana phaw al pänäng anih la mei alh choisaw ini hmuh awlaw hngat pai hnih ngaw mei alh dämäng ini hmuh, äiya ha mäi saw ha ini hmuh. 10Äi khaw a Yĕsu la anih a tak, “Tua nini mawn saw hngat pai hnih ngaw Kei khäka lo khäl.”
11Simon Pitol long äng chet bala äi kawn kawma olo al. Äi kawn äng khra ak gäl hngawgip gäl thek thum (153) ngaw len okei. Äi hiyawh ngaw kawn äng okei pänäng ha kawn takah. 12Yĕsu la anih a tak, “Lo chula ei khäl.” Tebeih khäl äng käh hngat la ha Ani a ini hiyeih saw sengkrih tawei u, “Nang che u äm?” Iyaäm Ani che Boi dä ting anih la ini hmawt khäh. 13Äidä Yĕsu äiya chet bala ha law bala anih a pek. Äi huih ngaw ha Ani la pek. 14Düsaw känäng thouwal pänäng Yĕsu la ni äng kräng thum etebeih tih a awdawnei.
Yĕsu la Pitol ihni kräuvei
15Anih la ini ei ok pänäng Yĕsu la Simon Pitol a ihi, “Yohan käh chaw Simon o, awhngaw la khrawng khet nawk saw thawka nang Kei a unung ni khet nawkei?” Pitol la krawn bala takal, “Ä, Boi o,” “Nang naw hmawt khäh Kei nanga kini khet nawk khäh.” Yĕsu la ani a tak, “Kei käh samphomah chaw#21:15 Yĕsu la atha yumtih sawng khäla samphomah chaw ting taksaw awlaw atha yumtih hngawk hngu chong krawng khäla thak saw. khäla sokhrei bäi.” 16Awlaw krängak Yĕsu la ani a hi, “Yohan käh chaw Simon o, nang Kei a ini khet nawkei?” “Ä, Boi o,” ani la krawn bala takal, “Nang naw hmawt khäh kei nanga kini khet nawk saw.” Yĕsu la ani a tak, “Kei käh samphomah#21:16 Niya Yĕsu la Ani a yumtih khäl käh krong hawu saw. khäla sokhrei bäi.” 17Awlaw krängak Yĕsu la ihi, “Yohan chaw Simon o, nang Kei a ini khet nawkei?” Pitol la ulung dukhah piei. Iyaäm nang Kei a ini khet nawkei ting Yĕsu la ani a kräng thum ihisaw koong. Äidä Pitol la Ani a tak, “Boi o, nang ükütni naw hmawt khäh, nang naw hmawt khäh kei nanga kini khet nawk saw!” Yĕsu la ani a tak, “Kei käh samphomah khäla sokhrei bäi.” 18Kei nanga lälä kini tak tun, nang nochong khrawngei khaw a awatcha sah ngei tila lala apei nechetaih khiyang dün laa nechet hnäng. Äini nang nachang khaw a nukut nodouweyei. Äidä pochongak la anang khonai awlaw chet do khiyang ti saw düna anang chih ei.#21:18 Ni kheu äng ni huih thänei nawk theih, Pitol krut äng dü aih saw 19(Ni kheu äng Yĕsu la hawu, Pitol ihuih dü aih lah saw äm awlaw Hnadaga a iba phiyaw aih saw äm.) Äi pänäng Yĕsu la ani a tak, “Kei ängtu lo!”#21:19 Awbawng khokum pänäng Rom mräh a Pitol a krut äng the ula ini tuk hipai.
Yĕsu la awhngaw tebeih krong hawu
20Pitol la uhnung pawtäng hleh ei bala sot ni, Yĕsu la ekhet nawk saw tebeih a hmuh. Ni tebeih dä lätal päi ini ei khaw a Yĕsu pum äng hngawng bala hawu hüttih, “Boi o, ula nanga lansu khäl kut äng anang awpaih saw äm?” 21Ani a hmu bala Pitol la Yĕsu a tak, “Boi o, ani iba thäneyei äm?” 22Yĕsu la Pitol a tak, “Kei krawnal nga saw sawgraw dä ani heng bala mäyeih saw kü hlüei khaw, nanga i äm? Nang Kei ängtu lo!” 23Äi koong ni tebeih dü hnawh ting Yĕsu a tämtih khäl khäka ni kheu khrih ei chak. Äini ni tebeih dü hnawh ting Yĕsu la hawu saw hiyah. Ani la hawu saw che, “Kei lo al ngasaw sawgraw ani heng bala mäiyeih saw Kei dä kühlü ei khaw, nanga i äm? 24Ni hnäh äi tebeih, ula ni khäl awhawu saw äm awlaw oyok saw äm, awlaw keinih kini hmawt khäh ani la sawksi pek saw khäl ihi khäh.”#21:24 Ni a tebeih hawu hmuei saw che Yohan, Yĕsu la khet nawk sum tih. Ni Yohan la Yĕsu käh bikawi khäl hmuh saw khäl ni sidawng pawi äng yok saw
Äpäih saw kheu
25Yĕsu la awlaw awbawng namaw nawkaih saw bi khäl ibi hüt. Äi khäl kheni dä khrawng khälla yo ula ini tawk khaw luhdül äng äi boih khäl jelh thaw hnawh.
Currently Selected:
Yohan 21: CSH
Highlight
Copy
Compare
Share
Want to have your highlights saved across all your devices? Sign up or sign in
©️2025 Bible Students Fellowship of Bangladesh
