YouVersion Logo
Search Icon

लुका 5

5
येसुक सभेस सुरुक चेलासब
(मत्‍ति ४:१८-२२; मर्कुस १:१६-२०)
1एक दिन् येसु गनेसरेत#5:1 गनेसरेत : गालिल तालक दस्‍रो ना गनेसरेत छले। तालक काटम ठेर्याइल छले त ओइलग पर्मेसोरक बचन सुन आइलाहार मान्‍खक थुप्‍रे भिर लग्‍ले।#मत्‍ति १३:१-२; मर्कुस ३:९-१०; ४:१ 2ओइ तालक काटम येसुले दुइगो डुङ्‌ङाका देखल्‍के। तर माछ मार्लाहार मानुकसब चाहिं डुङ्‌ङास उत्‍रिक जालसब धोइति छले। 3उ दुइगो डुङ्‌ङाम एगो चाहिं सिमोनक छले। येसु ओहे डुङ्‌ङाम चहर्ले आ सिमोनका तालक काटस कन्‍हेक ओइभर लगाब कहल्‍के। अनि डुङ्‌ङाम बेठिक मानुकसिका सिछ्‌या दिअ लग्‍ले।
4जब सिछ्‌या दैसकल्‍के त येसुले सिमोनका कहल्‍के, “डुङ्‌ङाका गहिंर पानिभर लगा आ माछ मार लागि जाल छाँप!”
5यि बात सुनिक सिमोनले येसुका कहल्‍के, “हे प्रभु, हमर्स्‍या रात भोरि जाल छाँप्‍ल्‍यो तैयो एकोगो माछ मार नाइ सक्‍ल्‍यो। तर तुइं कहछ ओहेस हम जाल छाप्‍बो।”#युहन्‍ना २१:३ 6जब येसुले कहल जक्‍या जाल छाँपल्‍के त माछ एतेक पर्ले कि जाले फट लग्‍ले।#युहन्‍ना २१:६ 7ओहेस ओकर्स्‍या दस्‍रो डुङ्‌ङाम भेल सङ्‌सिका हाथस इसारा करिक सहयोग कर लागि बलाइल्‍के। अनि ओकर्स्‍या एले आ माछ एतेक मारल्‍के कि दुनुगो डुङ्‌ङा माछस भोरिक दुब लग्‍ले। 8यि देखिक सिमोन पत्‍रुसले येसुक अगाम ठेउन्‍या मारिक कहल्‍के, “हे प्रभु, हम पापि मानुक स्‍यो, तुइं हम्‍रलगस जो!”
9किरकि ओतेरा माछ मार्ल देखिक सिमोन आ ओक्‍र सङ्‌सिका अचम्‍म लग्‍ले। 10सिमोनसङ मिलिक माछ मार्लाहार जब्‍दिक बेटासब याकुब आ युहन्‍नाका पनि अचम्‍म लग्‍ल छले। तब येसुले सिमोनका कहल्‍के, “तुइं नाइ डेरा, किरकि आब् तुइं माछ नाइ मार्ब तर मानुकसिका जमा कर्ब।”
11येसुले कहल बात सुनिक ओकर्स्‍या डुङ्‌ङासब तालक काटम आनल्‍के आ सभे कथ्‍यो छोरिक येसुक पछा लगिक गेले।
येसुले कुस्‍टरोगिका अस्‍लि कर्ल
(मत्‍ति ८:१-४; मर्कुस १:४०-४५)
12एक दिन् येसु एगो सहरम गेल जुमा देहेभोरि कुस्‍टरोग लग्‍ल एक जना मानुकले येसुका देखिक लगम एले आ येसुक अगाम ठेउन्‍या मारिक बिन्‍ति कर्ति एनामे कहल्‍के, “हे प्रभु, तुइं चाहाब त हम्‍रा अस्‍लि कर सक्‍ब।”
13तब येसुले आप्‍न हाथस ओक्‍रा छुइक कहल्‍के, “हम चाहास्‍यो, तोर रोग अस्‍लि हउस।” ओहे जुमा चट्‌दबर ओक्‍र कुस्‍टरोग अस्‍लि भेले। 14तब येसुले ओक्‍रा आग्‍या दैक कहल्‍के, “देख्, यि बात तुइं कक्‍राहु नाइ कह्‌य! तर तुइं जाइक सुरुम मन्‍दिरक पुजारिका देखा आ मोसा अगमबक्‍ताले कहल जक्‍या सभे मानुकसिका अस्‍लि भेल पर्मान दिअ लागि भेटि#5:14 भेटि कहल खुसि भइक पर्मेसोरका देल्‍हार चिज स्‍यो। चर्हा।”#लेबि १४:१-३२
15तर येसुक चर्चा झन आरो चारोभर फैलति गेले। ओहेस थुप्‍रे मानुकसब येसुक सिछ्‌या सुन आ आप्‍न रोगसिस अस्‍लि हब लागि आब लग्‍ले। 16तर येसुले कखन्‍यो मानुकसिका छोरिक सुन्‍सान ठावम जाइक पर्थना करेक।
येसुले हबा लग्‍ल रोगिका अस्‍लि कर्ल
(मत्‍ति ९:१-८; मर्कुस २:१-१२)
17एक दिन् येसुले सिछ्‌या देत जुमा धर्मगुरु आ फरिसि दलक मानुकसब येसुक काटेम बेठ्ल छले। ओकर्स्‍या गालिल आ यहुदिया पर्देसक सभे ठावस अनि यरुसलेम सहरस आइल छले। येसुसङ रोगका अस्‍लि कर्लाहार पर्मेसोरक सक्‍ति छले। 18ओहे जुमा एक जना हबा लग्‍ल बिरामिका ओक्‍र बिछोना सहित बोकिक मानुकस्‍या आनल्‍के। ओकर्स्‍या बिरामिका येसुलग लगाब खोजेक। 19तर येसु भेल घरम मानुकसब खचाखच भोरिक बेठ्ल कारनस ओकर्स्‍या येसुलग लगाब नाइ सकिक घरक छानिम चहर्ले आ खप्‍राका हताइक हबा लग्‍ल बिरामिका ओक्‍र बिछोना सहित रसे-रसे येसुक अगाम झारल्‍के। 20येसुले ओकर्सिक बिस्‍वास देखिक हबा लग्‍ल बिरामिका कहल्‍के, “ए भाइ, तोर पाप छेमा भेलो।”
21येसुले कहल बात सुनिक धर्मगुरु आ फरिसिसब आपसम एनामे बज लग्‍ले, “पर्मेसोरक निन्‍दा कर्लाहार यि कोन स्‍यो? पाप छेमा त पर्मेसोर बाहेक आरो कुन्‍हुँ कर नाइ सक्‍तो।”
22येसुले ओकर्सिक बात थाहा पाइक एनामे कहल्‍के, “तोर्स्‍या आप्‍न मनम किर एहेन बात सोच्‍छ? 23कथि कह लागि सजिलो छो, ‘तोर पाप छेमा भेलो’ कह कि ‘उठिक हिंठ्’ कह? 24तर तोर्सिका यि बात थाहा हउस कि मानुकक बेटाका यि सन्‍सारम पाप छेमा कर्लाहार अधिकार छो।” तब येसुले हबा लग्‍ल बिरामिका कहल्‍के, “हम तोरा कह स्‍यो, उठ् आ आप्‍न बिछोना बोकिक घर जो।”
25येसुले कहति बितिन उ हबा लग्‍ल बिरामि ओकर्सिएक अगाम जुरुक्‍के उठ्‌ले आ आप्‍न बिछोना बोकिक पर्मेसोरक पर्संसा कर्ति आप्‍न घर गेले। 26एहेन सक्‍तिसालि काम देखिक ओइलग आइल सभे मानुकसब छक पर्ले आ डेराइले। अनि पर्मेसोरक पर्संसा कर्ति एनामे कहल्‍के, “आजु त हमर्स्‍या अचम्‍मक काम देख्‍ल्‍यो!”
येसुले लेबिका बलाइल
(मत्‍ति ९:९-१३; मर्कुस २:१३-१७)
27पछास येसु ओइ घरस निक्‍लिक गेले त जाइत खुमा लेबि#5:27 लेबि : मत्‍तिका लेबि कहिक पनि चिनेक। कहलाहार एक जना कर् उठाइलाहारका कर् उठाइलाहार ठावम बेठ्‌ल देखिक येसुले ओक्‍रा कहल्‍के, “हम्‍रा पछ्‌या।” 28ओहेस लेबि उठ्‌ले आ सभे कथ्‍यो छोरिक येसुसङ गेले।
29अनि लेबिले आप्‍न घरम येसुक लागि बर्कि भोज देल्‍के। ओइ भोजम कर् उठाइलाहार आ अरु थुप्‍रे मानुकसब पनि आइल छले। 30यि देखिक फरिसि आ धर्मगुरुस्‍या गन-गन करिक येसुक चेलासिका एनामे कह लग्‍ले, “तोर्स्‍या किर कर् उठाइलाहार आ पापिसिसङ बेठिक खाइछ?”#लुका १५:१-२
31येसुले ओकर्सिक बात सुनिक जबाफ देल्‍के, “निरोगिका डाक्‍टरक खाँचो नाइ पर्छे तर रोगिका पो पर्छे। 32ओनाहिमे हम धर्मिसिका नाइ तर पापिसिका आप्‍न पापस पस्‍चताप कर् कहिक बलाब आइल स्‍यो।”
उपबासक बारेम परस्‍न
(मत्‍ति ९:१४-१७; मर्कुस २:१८-२२)
33तब ओकर्स्‍या येसुका कहल्‍के, “बप्‍तिस्‍मा देल्‍हार युहन्‍नाक चेलास्‍या त घरि-घरि उपबास रहछो आ पर्थना कर्छो। फरिसिसिक चेलास्‍या पनि ओनाहिमे कर्छो तर तोर चेलास्‍या चाहिं किर खाइति पिति रहछो?”
34येसुले ओकर्सिका जबाफ देल्‍के, “कथि दुल्‍हा बर्यातिसिसङ रहल जुमा ओकर्सिका उपबास रह लगाब सक्‍ब? 35तर उ दिन् अबस्‍से एतो जब दुल्‍हाका ओकर्सिस अलग करि देतो, उजुमा ओकर्स्‍या उपबास रहतो।”
36तब येसुले ओकर्सिका एगो उखान कहल्‍के, “कुन्‍हुँ मानुकले लया कप्‍राका काटिक पुर्ना कप्‍राम नाइ टाल्‍छे। ओइले एना कर्तो त लया कप्‍राका पनि बिगार्तो आ लया कप्‍राक टुक्‍रा पुर्ना कप्‍रासङ सुहाइबो नाइ कर्तो। 37ओनाहिमे कुन्‍हुँ मानुकले तजा अङ्‌गुरक मधका पुर्ना छल्‍लाक झोलाम#5:37 छल्‍लाक झोलाम : उ समैम एहेने छल्‍लाक झोलाम पिलाहार चिजसब बोकेक। घालिक नाइ राख्‍छे। तर कुन्‍हुँले राख्‍तो त तजा अङ्‌गुरक मधले पुर्ना छल्‍लाक झोलाका फुटाइक मध हराइतो आ झोला पनि नास हेतो। 38ओहेस तजा अङ्‌गुरक मधका लयाइ छल्‍लाक झोलाम घालिक राख चाहि। 39कुन्‍हुँ मानुकले पुर्ना अङ्‌गुरक मध पिक लया अङ्‌गुरक मध मन नाइ पराइतो किरकि ओइले कहतो, ‘पुर्नाइ अङ्‌गुरक मध अस्‍लि छो।’”

Currently Selected:

लुका 5: DANU

Highlight

Share

Copy

None

Want to have your highlights saved across all your devices? Sign up or sign in