लुका 6
6
येसु जिराइलाहार दिनक पनि प्रभु
(मत्ति १२:१-८; मर्कुस २:२३-२८)
1एक दिन् येसु जिराइलाहार दिनम गोहोमक खेतबाक जाइति छले त येसुक चेलास्या गोहोमक फर तोरिक हाथस मर्दिक खाइ लग्ले।#ब्यबस्था २३:२५ 2एना कर्ल देखिक फरिसिस्या येसुक चेलासिका कहल्के, “तोर्स्या जिराइलाहार दिनम जुन काम कर नाइ हब्छो ओहे काम किर कर्छ?”
3ओकर्सिक बात सुनिक येसुले जबाफ देल्के, “रजा दाउद आ ओक्र सङ्सिका भुख लग्ल जुमा रजा दाउदले कथि कर्ल छलो? तोर्स्या पह्र्ल नाइ स्या?#१ समुएल २१:१-६ 4ओइले त झन पर्मेसोरक मन्दिरम ढुकिक पर्मेसोरका चर्हाइल रोटि खेल्को आ आप्न सङ्सिका पनि खुवाइल्को। जुन रोटि पुजारि बाहेक आरो कक्राहु खाइलाहार अनुमति नाइ छलो।”#लेबि २४:९
5तब येसुले ओकर्सिका फेरि कहल्के, “मानुकक बेटा जिराइलाहार दिनक पनि प्रभु स्यो।”
हाथ सुखाइल मानुकका येसुले अस्लि कर्ल
(मत्ति १२:९-१४; मर्कुस ३:१-६)
6दस्रो जिराइलाहार दिनम येसु एगो सभाघरम जाइक सिछ्या देति छले। ओइलग एक जना दहिना हाथ सुखाइल मानुक छले। 7ओहेस धर्मगुरु आ फरिसिस्या येसुले जिराइलाहार दिनम ओक्रा अस्लि कर्लम येसुका दोस लगाब लागि मौका खोज्ति छले। 8तर येसुले ओकर्सिक मनक बात थाहा पाइक हाथ सुखाइल मानुकका कहल्के, “उठिक सभेक बिचम आइक ठेर्या।” ओहेस उ उठ्ले आ सभेक बिचम आइक ठेर्याइले। 9तब येसुले ओकर्सिका कहल्के, “तोर्स्याहि हम्रा कह, जिराइलाहार दिनम कथि कर अस्लि हेतो? भलाइ कर कि हानि? बचाब कि नास कर?” 10अनि येसुले चारोभर सभेका ताक्ति हाथ सुखाइल मानुकका कहल्के, “तोर सुखाइल हाथका तन्का।” ओइले सुखाइल हाथ तन्काइति बितिन चट्दबर अस्लि भेले।
11यि देखिक धर्मगुरु आ फरिसिसब पिटस खम-खम भइक येसुका कथि कर्ब कहिक सल्लाहा कर लग्ले।
येसुले आप्न बार जना चेलाका चुन्ल
(मत्ति १०:१-४; मर्कुस ३:१३-१९)
12एक दिन् येसु एगो पाहारम जाइक रातभोरि पर्मेसोरसङ पर्थना करिक बिताइल्के। 13अनि बिहान भेले त येसुले सभे चेलासिका आप्नलग बलाइक ओकर्सिक बिचस बार जनाका चुनल्के आ ओकर्सिका पेरेरित कहलाहार ना देल्के। 14उ बार जना चेलासब एकर्स्याहि स्यो– सिमोन जक्रा येसुले पत्रुस ना राखि देल्के अनि सिमोनक भाइ अन्दरियास, याकुब, युहन्ना, फिलिप, बारथोलोमाइ, 15मत्ति, थोमा, अल्फायासक बेटा याकुब, देसभक्त सिमोन, 16आ याकुबक बेटा यहुदा अनि यहुदा इस्करियोति जुन चेलाले येसुका धोखा देल्के।
येसुले थुप्रे मानुकसिका अस्लि कर्ल
(मत्ति ४:२३-२५)
17अनि येसु चेलासिसङ पाहारस उत्रिक सम्म भेल ठावम एले त ओइलग येसुक आरो चेलासब आ अरु थुप्रे मानुकसब पनि छले। ओकर्स्या चाहिं पुरा यहुदिया पर्देसस, यरुसलेम सहरस अनि समुन्द्रक काटम भेल टुरोस आ सिदोन सहरस आइल छले। 18ओकर्स्या येसुक सिछ्या सुन आ आप्न रोगसिस अस्लि हब लागि आइल छले। येसुले भुत लगिक दुख पाइल मानुकसिका पनि अस्लि करल्के। 19ओइलग भेल सभेले येसुका छुव खोजेक किरकि प्रभु येसुस निकल्ल सक्तिले सभेका अस्लि करेक।
धन्ये आ धिक्कार
(मत्ति ५:१-१२)
20तब येसुले आप्न चेलासिका ताक्ति कहल्के,
“हे गरिबसब, तोर्स्या धन्येक स्या!
किरकि पर्मेसोरक राज्ये तोर्सिएक स्यो।
21हे अखन भुखाइलाहारसब, तोर्स्या धन्येक स्या,
किरकि तोर्स्या खाइक अघाइब।
हे अखन कान्लाहारसब! तोर्स्या धन्येक स्या,
किरकि तोर्स्या लबर्ब।
22“धन्ये स्या तोर्स्या, जब मानुकस्या तोर्सिका मानुकक बेटाका बिस्वास कर्ल कारनस हेला कर्तो, समाजस निकालि देतो, निन्दा कर्तो आ बद्नाम कर्तो!#१ पत्रुस ४:१४ 23उ दिन् तोर्स्या खुसिस नाच् किरकि तोर्सिक लागि सोर्गम बर्कि इनाम छो। किरकि एकर्सिक पुर्खास्या पनि अगाहिक अगमबक्तासिका एनाहिमे दुख दैक् सताबोक।”#२ इतिहास ३६:१६; पेरेरित ७:५२
24“तर धिक्कार अखन धनिक भेल्हार्सिका!
किरकि तोर्स्या आप्न जिबनम सुख पाइसक्ल स्या।
25धिक्कार, अखन अघाइक खाइलाहार्सिका!
किरकि तोर्स्या भुख्ले रहब।
धिक्कार, अखन हाँस्लाहार्सिका!
किरकि तोर्स्या सोकम परिक कान्ब।
26“धिक्कार, अखन सभे मान्खस पर्संसा पाइलाहार्सिका! किरकि तोर्सिक पुर्खास्या पनि ठक् अगमबक्तासिक एनाहिमे पर्संसा करोक।
आप्न दुस्मनसिका मयाँ कर
(मत्ति ५:३८-४८; ७:१२)
27“तर हम्र बात सुन्लाहार सभेका हम कह स्यो, आप्न दुस्मनसिका मयाँ कर् आ हेला कर्लाहार्सिका भलाइ कर्। 28तोर्सिका सराप देल्हार्सिका आसिक धि आ तोर्सिक अप्मान कर्लाहार्सिक लागि पर्थना कर्। 29कुन्हुँले तोर एगो गालम मार्तो त ओक्रा दस्रो गाल पनि थापि धि आ तोर होर्निं छिन्लाहारका जमासब पनि लगाब धि। 30तोरसङ माङ्लाहारका धि आ तोर चिज-बिज लेल्हारसङ फेरि नाइ माङ्। 31अरु मानुकस्या तोरसङ जेहेन बेबहार कर्ल चाहाछ, तुहुँ ओक्रसङ ओहोने बेबहार कर्।#मत्ति ७:१२
32“तोर्स्या मयाँ कर्लाहारका मत्रे मयाँ कर्ब त कथि बर्कि काम कर्ल झन? पापिस्या पनि त आप्न मयाँ कर्लाहारका मयाँ कर्छो। 33अनि तोर्स्या भलाइ कर्लाहारका मत्रे भलाइ कर्ब त कथि बर्कि काम कर्ल झन? पापिस्या पनि त ओनाहिमे कर्छो। 34तोर्स्या मानुक देखिक तिर सक्लाहारका मत्रे रिन धिब त कथि बर्कि काम कर्ल झन? किरकि पापिस्या पनि त तिर सक्लाहारका रिन देछो। 35तर तोर्स्या चाहिं आप्न दुस्मनसिका मयाँ कर् आ ओकर्सिक भलाइ कर्। फिर्ता पाइलाहार आस नाइ राखिक रिन धि। तब तोर्सिक इनाम बर्कि हेतो अनि तोर्स्या महान पर्मेसोरक सन्तान हेब किरकि पर्मेसोरले बैगुनि आ पापि सभेका मयाँ कर्छो। 36जेहेन तोर्सिक पर्मेसोर बाप दयालु छो, तोर्स्याहु ओहोने दयालु बन्।
अरुका दोस नाइ लगा
(मत्ति ७:१-५)
37“अरुका दोस नाइ लगा अनि तोराहु दोस नाइ लगाइतो। अरुक गल्ति नाइ खोज अनि तोरो गल्ति नाइ खोज्तो। आप्न बिरोधिका छेमा कर् तब तोराहु छेमा करि देतो। 38#मत्ति ७:२; मर्कुस ४:२४अरुका धि तब तोराहु देतो। दाबि-दाबिक हिलाइ-हिलाइक टोकेटोक भोरिक तोरा देतो। किरकि जुन नापस तुइं अरुका नापिक धिब ओहे नापस तोराहु नापिक देतो।”
39 #
मत्ति १५:१४
तब येसुले ओकर्सिका एगो उदाहरन दैक कहल्के, “एगो अन्धाले दस्रो अन्धाका पैरा देखाब नाइ सक्तो। ओकर्स्या ओना कर्तो त दुनु जना खल्टाम खस्तो। 40कुन्हुँ चेला आप्न गुरुस बर्कि नाइ हब्छे तर पुरा सिछ्या पाइसकिक आप्न गुरु जक्या बन सक्तो।#मत्ति १०:२४-२५; युहन्ना १३:१६; १५:२०
41“तुइं आप्न भाइक आँखिम भेल सिन्का देख्छ तर आप्ने आँखिम भेल ढेङ किर नाइ देख्छ? 42जब कि तोर आप्ने आँखिम ढेङ्छो त तुइं आप्न भाइका ‘ए भाइ, हम तोर आँखिम भेल सिन्का निकालि देबो’ कहिक केनामे कह सक्छ? ए कप्टि! अगा तुइं आप्ने आँखिम भेल ढेङ्का निकाल अनि पो आप्न भाइक आँखिस सिन्का निकाल लागि छर्लङ देख सक्ब।
गाछ अन्सारक फर
(मत्ति ७:१६-२०; १२:३३-३५)
43“कुन्हुँ अस्लि गाछम खराब फर नाइ फर्छे न त खराब गाछम अस्लि फर फर्छे। 44सभे गाछ ओक्र फरस चिनाइछे किरकि कुन्हुँ मानुकले काँटक झाङस आँम नाइ तोर्छे न त अङ्गुरे तोर्छे।#मत्ति १२:३३ 45एनाहिमे अस्लि मानुकले आप्न मन भित्रिस अस्लिए बात निकाल्छे तर खराब मानुकले आप्न मन भित्रिस खराबे बात निकाल्छे। किरकि मान्खक मन जुन बातस भोर्ल रहछे ओहे मुहस बाहार निकल्छे।#मत्ति १२:३४
दुइ खालक घरक जग
(मत्ति ७:२४-२७)
46“तोर्स्या हम्र कहल बात नाइ मान्छ त किर हम्रा प्रभु, प्रभु कहछ? 47जुन मानुक हम्रलग आइक हम्र कहल बात सुनिक मान्छो उ केहेन मानुक स्यो, हम तोर्सिका कह स्यो। 48उ एगो घर बनाइलाहार मानुक जक्या स्यो, ओइले गहिंर खोनिक आप्न घरक जग पाख्नक उप्रिम बनाइ छो। अनि जब पानि परिक बर्कि बाहार आब्छे आ ओइ घरम ठोकाइछे त उ घरका हिलाब पनि नाइ सक्छे किरकि उ घरक जग जोर्गर बनाइल छले। 49तर हम्र बात सुनिक पनि नाइ मान्लाहार जगे नाइ खोनिक घर बनाइलाहार मानुक जक्या स्यो। जब पानि परिक बाहार आब्छे आ ओइ घरम ठोकाइछे त उ घरक सत्यानास हब्छे।”
Currently Selected:
लुका 6: DANU
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
