लुका 7
7
रोमि कप्तानक बिस्वास
(मत्ति ८:५-१३)
1अनि येसुले आप्न सभे बातसब मानुकसिका सुनाइ सकल्के त कफर्नहुम सहर गेले। 2ओइ सहरम रोमि कप्तानक एक्दम दुलार नोकर बिरामि भइक मोरि लग्ल छले। 3जब उ कप्तानले येसुक बारेम सुनल्के त ओइले आप्न नोकरका अस्लि करि दिअ लागि येसुका बलाब यहुदि अगुवासिका पठाइल्के। 4अनि उ अगुवासब येसुलग जाइक बिन्ति कर्ति एनामे कहल्के, “उ रोमि कप्तान साँच्चेक तोर दया पाइलाहार लायकक छो। 5किरकि ओइले यहुदि जातका थुप्रे मयाँ कर्छो आ ओहेले हमर्सिक लागि एगो सभाघर पनि बनाइ देल छो।”
6ओहेस येसु ओकर्सिसङ गेले। अनि जब येसु कप्तानक घर पुग लग्ले त कप्तानले आप्न सङ्सिका यि खबर दैक येसुलग पठाइल्के, “हे प्रभु, तुइं आरो दुख नाइ कर् किरकि तोरा हम्र घरम स्वागत कर्लाहार लायकक हम नाइ स्यो। 7हम आप्नि पनि तोरलग आइलाहार लायकक नाइ स्यो। तर तुइं ओहेलगस एगो बचन कहि धिब त हम्र नोकर अस्लि हेतो। 8किरकि हम आप्नि बर्कि हाकिमसिक अधिनम स्यो आ हम्र अधिनम पनि अरु सिपाहिसब छो। एक जनाका ‘जो’ कह स्यो त उ जाइछो, दस्रोका एत ‘या’ कह स्यो त उ आब्छो। अनि आप्न नोकरका ‘यि कर्’ कह स्यो त ओइले कर्छो।”
9यि बात सुनिक येसुका अचम्म लग्ले। ओहेस आप्न पछा-पछा आइलाहार मानुकसिभर घुमिक येसुले कहल्के, “एत्का बिस्वास कर्लाहार मानुक त हम इस्राएलम पनि देख्ल नाइ स्यो।”
10अनि जब कप्तानक सङ्सब घुमिक घर पुग्ले त बिरामि भेल नोकर अस्लि भइसक्ल छले।
बिध्वाक मोर्ल बेटाका येसुले जिउँत कर्ल
11ओक्र दस्रो दिन् येसु नाइन सहर जाइत खुमा येसुसङ चेलासब आ अरु थुप्रे मानुकसब पनि गेले। 12अनि येसु सहरक मुल मुह्रालग पुग्ले त एगो लास बोकिक मोलामिसब जाइति छले। उ लास एगो बिध्वाक एकेगो बेटाक छले। उ बिध्वासङ मोलामि गेल्हार सहरक थुप्रे मानुकसब पनि छले। 13उ बिध्वाक अबस्ता देखिक प्रभु येसुका थुप्रे मयाँ लगिक बिध्वाका कहल्के, “तुइं नाइ कान्!” 14अनि येसुले अगाम जाइक अर्थिका छुइल्के त अर्थि बोक्लाहारसब थिङ्ङ ठेर्याइले। तब येसुले मोर्ल छउँराका कहल्के, “ए छउँरा, हम तोरा कह स्यो, उठ्!” 15येसुले कहति बितिन मोर्ल छउँरा उठिक बेठ्ले आ बज लग्ले। अनि येसुले उ छउँराका ओक्र मतारक जिम्मा लगाइ देल्के।
16पर्मेसोरक सक्तिसालि काम देखिक सभे जना डेराइले आ पर्मेसोरक पर्संसा कर्ति एनामे कहल्के, “आपन्सिक बिचम एक जना बर्कि अगमबक्ता आइल छो। पर्मेसोर आप्नि आप्न मानुकसिका बचाब लागि आइल छो।”
17पछास प्रभु येसुले कर्ल यि कामक चर्चा सभे यहुदिया पर्देस आ आस्पासक पर्देसम पनि फैलले।
युहन्नाक परस्न आ येसुक जबाफ
(मत्ति ११:२-१९)
18युहन्नाक चेलास्या पनि येसुले कर्ल यि कामक बारेम युहन्नाका सुनाइल्के। 19तब युहन्नाले आप्न दुइ जना चेलाका बलाइक येसुलग यि बात पुछ पठाइल्के, “हमर्स्या आस कर्ल मुक्ति देल्हार तुहिं स्या कि हमर्स्या आरो दस्रोका अस्याउँ?”
20ओहेस ओकर्स्या येसुलग आइक पुछल्के, “बप्तिस्मा देल्हार युहन्नाले हमर्सिका तोरलग यि बात पुछ पठाइल छो, ‘हमर्स्या आस कर्ल मुक्ति देल्हार तुहि स्या कि हमर्स्या आरो दस्रोका अस्याउँ?’”
21ठिक ओहे समैम येसुले थुप्रे मानुकसिक रोग आ भुत लग्ल मानुकसिका अस्लि कर्ति छले। अनि थुप्रे अन्धासिका पनि अस्लि कर्ति छले। 22ओहेस येसुले युहन्नाक चेलासिका कहल्के, “तोर्स्या जे देख्ल आ सुन्ल स्या, एहे बातसब युहन्नाका कह कि अन्धास्या देख्छो, नेङ्रासब हिंठ्छो, कुस्ट रोगिसब अस्लि हब्छो, बहिरास्या सुन्छो, मोर्ल मानुकसिका जिउँत कर्छो आ दुखि गरिबसिका खुसिक खबर सुनाइ छो।#यसैया ३५:५-६; ६१:१ 23हम्र बारेम सङ्खा नाइ कर्लाहार मानुक धन्येक स्यो।”
24पछास युहन्नाक चेलासब घुमिक गेले त येसुले मानुकसिका युहन्नाक बारेम एनामे कह लग्ले, “तोर्स्या उजाड ठावम कथि देख गेल छल? हबाले हिलाइल खरिका? 25यि नाइ स्यो त कथि देख गेल छल? कथि छग्बर कप्रा पिन्लाहार मानुकसिका? छग्बर कप्रा पिन्लाहार आ मौज-मज्जा कर्लाहारसब त रजाक दर्बारम रहछो। 26एहो नाइ स्यो त कथि देख गेल छल? अगमबक्ताका? हँ, हम साँच्चेक तोर्सिका कह स्यो, अगमबक्तास पनि बर्किका देख्ल स्या। 27किरकि युहन्ना उ मानुक स्यो, जक्र बारेम धर्मसास्तरम एनामे निख्ल छो, ‘देख्, हम आप्न दुतका तोरस अगा पठाइ स्यो। ओइले तोर अगा-अगा तोर लागि पैरा तयार कर्तो।’#मलाकि ३:१ 28हम तोर्सिका कह स्यो, जनिक कोखस जनम भेलभोरि युहन्नास बर्कि यि सन्सारम कुन्हुँ नाइ छो। तैयो जुन मानुक यि सन्सारम सभेस कन्कि छो, उ पर्मेसोरक राज्येम युहन्नास बर्कि हेतो।”
29येसुक बात सुनिक सभे मानुकस्या आ कर् उठाइलाहार्स्या पर्मेसोरक आग्या साँच्चेक ठिक स्यो कहिक सुइकार करल्के किरकि ओकर्स्या सभेले युहन्नास बप्तिस्मा लेल छले।#मत्ति २१:३२; लुका ३:१२ 30तर फरिसि आ धर्मगुरुस्या चाहिं पर्मेसोरस आइल आग्याका इन्कार करल्के किरकि ओकर्स्या युहन्नास बप्तिस्मा नाइ लेल छले।
31तब येसुले कहल्के, “यि पुस्ताक मानुकसिका हम कथिसङ तुलना करुँ? ओकर्स्या केहेन छो? 32ओकर्स्या त बजारम बेठिक आपसम एना कहति बज्लाहार बच्चा-बुच्चिसि जक्या स्यो, ‘हमर्स्या तोर्सिक लागि बस्लि बजाइल्यो तर तोर्स्या नाइ नाच्ल। हमर्स्या तोर्सिक लागि सोक कर्लाहार गित गितकाइल्यो तर तोर्स्या नाइ कान्ल।’ 33किरकि बप्तिस्मा देल्हार युहन्नाले न त रोटि खाबोक न त अङ्गुरक मध पिओक् तर तोर्स्या कहक एक्रा भुत लग्ल छो। 34तर मानुकक बेटा खाइति पिति तोर्सिलग एलो अनि तोर्स्या कहछ, ‘देख्न देख् खखर, मत्बालि, कर् उठाइलाहार आ पापिसिक सङ्!’ 35तर बुद्धि पाइक ओहे अन्सार कर्लाहार्स्या मत्रे बुद्धि ठिक स्यो कहिक पर्मान देछो।”
येसुले पापि जनिका छेमा कर्ल
36अनि एक जना फरिसिले येसुका खनाइ खाइ लागि आप्न घरम बलाइल्के त येसु उ फरिसिक घरम जाइक खनाइ खाइ लागि बेठ्ले। 37यि बात ओइ सहरक एगो पापिनि जनिले थाहा पाइक एगो सिङ्मरमरस#7:37 सिङ्मरमर् कहल पाखन् स्यो। बन्ल भराम अत्तरक तेल लइक येसु भेल घरम एले।#मत्ति २६:७; मर्कुस १४:३; युहन्ना १२:३ 38अनि उ जनि पछाभरस कान्ति आइक येसुक टाङलग ठेर्याइले आ आप्न लोरस येसुक टाङ्का भिजाइक आप्ने केसस पोछिक टाङम चुम्मा लेल्के आ अत्तरक तेल घोँस लग्ले। 39यि देखिक येसुका खनाइ खाइ लागि बलाइलाहार फरिसिले आप्न मनम एनामे सोच लग्ले, “यि येसु साँच्चेक अगमबक्ता रहते त ओक्रा छुइलाहार जनि केहेन पापिनि स्यो कहिक थाहा पाइते।”
40ओहे जुमा येसुले उ फरिसिका कहल्के, “ए सिमोन, तोरा एगो बात कहक छो।”
सिमोनले कहल्के, “हे गुरु, कहन त।”
41तब येसुले कहल्के, “एक जना मालिकलगस दुइ जनाले कर्जा लेल छले। एक जनाले चाँनिक पाँच सइ डलर आ दस्रोले चाँनिक पचास डलर। 42तर दुनु जना गरिब भेल कारनस कर्जा तिर नाइ सकल्के। ओहेस ओकर्सिक मालिकले दुनु जनाक कर्जा मिनाहा करि देल्के। ले आब् तुइं कह त यि दुइ जनाम कोन उ मालिकका बेसि मयाँ कर्तो?”
43सिमोनले उत्तर देल्के, “हम्र बिचारम बेसि कर्जा मिनाहा पाइलाहार्ले।” येसुले कहल्के, “तुइं ठिके कहल।”
44तब येसुले उ जनिभर घुमिक सिमोनका कहल्के, “यि जनिका ताक्त, हम तोर घरम एल्यो तर तुइं हम्रा टाङ धोब लागि पनि पानि नाइ देल। तर अइले त हम्र टाङ्का लोरस भिजाइक आप्ने केसस पोछल्को। 45तुइं हम्रा गालम चुम्मा लइक स्वागत नाइ कर्ल तर यि जनिले त हम आइल लगस टाङम चुम्मा लिअ छोर्ल नाइ छो। 46तुइं हम्र केसम तेल लगाइक सम्मान नाइ कर्ल तर अइले त हम्र टाङम अत्तरक तेल लगाइ देल छो। 47हम तोरा कह स्यो, एक्र जतेक पाप छलो उ सभे छेमा भेल छो। ओहेस अइले हम्रा थुप्रे मयाँ कर्ल छो। तर जक्र पाप कनेके छेमा भेल रहतो ओइले मयाँ पनि कनेके कर्तो।”
48तब येसुले उ जनिका कहल्के, “तोर सभे पाप छेमा भेल छो।”
49यि बात सुनिक खनाइ खाइ लागि बेठ्ल मानुकस्या आपसम एना कह लग्ले, “पाप छेमा कर्लाहार यि कोन स्यो?”
50तर येसुले उ जनिका कहल्के, “तोर बिस्वासले तोरा बचाइल छो। आब् तुइं अस्लिमे जो।”
Currently Selected:
लुका 7: DANU
Highlight
Share
Copy
Want to have your highlights saved across all your devices? Sign up or sign in
© 2024 (Active), Mother Tongue Translators Society and Wycliffe Bible Translators, Inc. All rights reserved.
