Rut 1
1
Elimelèkh ròb kewarge eh umjog nòm Bètlehèm ma Moab
1-2Bil jènman mèn pemimpin rèꞌyak#1:1-2 mèn pemimpin rèꞌyak Èn jènman nak tèk-tik tok mèk-mok rajak rik beperintah èn Israꞌèl. Dak Allah napili bok natèrꞌèn pemimpin rèꞌyak nak untok mujagak bok mupimpin ma kaum sènꞌòy Israꞌèl. umbeperintah ma kaum Israꞌèl, mok chènrok tok mèk-mok mènhik èn kenèmbek tèk Israꞌèl nak. Dak bil nak èn kote Bètlehèm, èn tèk suku Yèhudah, mok néy babeh rik bekenëh Elimelèkh. Rik nak mok léh eh rik bekenëh Nayomi, dak wènar nak mok nar kuwòt babeh wèh rik bekenëh Mahlòn ròb Kiliyòn. Kewarge nak nòm suku Èprah, dak umgel èn kote Bètlehèm. Tapik sebab chènrok rik terok nak, umnak umperak tèk Israꞌèl nak dak umjog ma tèk mòy rik bekenëh Moab. Dak umgel èn anak betawon-tawon.
3Nòm kerek nak Elimelèkh, tòw Nayomi, nakebes. Dak Nayomi nagel samak nar kuwòt bèhbeh eh.
4Kuwòt bèhbeh Nayomi nak wèbabéy ma bèꞌbok nòm kaum Moab nak, kenëh wèh Orpah ròb Rut. Dak umnak néy kewarge nak umgèl-gel wèl èn Moab kirak-kirak sepuloh tawon.
5Nòm kerek nak, Mahlòn ròb Kiliyòn keꞌjèk wèkebes. Jadik Nayomi hòj tok mèk-mok wèl tòw eh atòw pon kuwòt eh.
Rut nahoh samak Nayomi ma Bètlehèm
6Bil Nayomi tik nagèl-gel èn Moab, nanak nakeyòkh gah TUHAN hòj nabetulong bok naꞌog nèygéy wèl ma kaum penili Eh èn Israꞌèl. Jadik Nayomi nabetabéh nammak ma Bètlehèm. Dak mènsaw bèꞌbok Nayomi keꞌjèk wèbetabéh wèmhoh samak rik nak. 7Dak umnak umperak nòm tempad umgel èn Moab nak.
Tapik bil umchèb-chib èn nòng ma tèk Yèhudah, 8Nayomi nachal ma wèh mènsaw eh, “Aléh, mak lah ma dékh amèk kaꞌan. Yék ipèꞌtak ma TUHAN nampèrnéh ma kaꞌan senayèkh Eh rik setiye, gerèk kaꞌan hòj kaꞌan pèrnéh ma yék bok ma tòw kaꞌan rik kèsbes. 9Bok yék ipèꞌtak ma TUHAN namꞌog tòw pay ma kaꞌan supaye kaꞌan dapad kewarge wèl.”
Dak Nayomi nachey ma mènsaw bèꞌbok eh nak, tande rik nak hòj namperak ma wènar nak. Tapik Rut ròb Orpah wèyam kerèꞌhik, 10dak wèchal ma Nayomi, “Hõy! Yar yamhoh ma hãk bok yamwèk ma kaum hãh!”
11-13Tapik Nayomi nachal wèl, “Aléh, agok lah hoh ma yék. Yék tok boléh imjagak ma kaꞌan. Yék doh hòj jajak; tok iꞌès-as imbabéy ma sènꞌòy mòy. Bok yék pastik tok boléh imyos kuwòt bèhbeh iwèl untok wèmjadik tòw kaꞌan!#1:11-13 Èn adad agama sènꞌòy Yahudi, Tuhan naꞌor ma umnak muteꞌèl gerèk doh: Kalòw néy babeh nakebes èn tèk-tik tok bekuwòt, sakèy babeh eh haros naselòg bok najagak ma balakh eh nak supaye namdapad kuwòt rik umꞌanggap kuwòt sènꞌòy rik kèsbes nak. Yab layèg doh yék imbabéy ma tòw pay yéh, dak yab imyos nar kuwòt bèhbeh rik pay wèl, mok ke kaꞌan kaꞌamdeh ma kuwòt pay nak wèmberayak? Kaꞌan sanggob ke kaꞌamgel dèꞌrik sampéy bilok-bilok? Hõy, aléh. Nèsgos yéh doh hòj lebéh laꞌes nòm kaꞌan nak, sebab TUHAN nateꞌèl laꞌes ma yék! Jadik mak lah hék ma dékh amèk ròb apak kaꞌan.”
14Dak Nayomi ròb mènsaw bèꞌbok eh umya-yam kerèꞌhik wèl. Dak Orpah nachëy ma Nayomi dak nachal selamad ma rik nak, dak naperak. Tapik Rut had nachab keheb ma Nayomi.
15Nayomi nachal ma Rut, “Néh lah, Orpah hòj namak ma kaum rik eh bok ma mèn alëj umnak. Wèk lah samak rik nak.”
16Tapik Rut nasaꞌod, “Agok lah or yék imperak ma hãk! Perak lah yék imhoh samak hãk. Yék akal iwèk ma tempad rik hãk hawèk dak igel èn tempad hãk hagel. Kaum hãk akal najadik kaum yék. Dak Allah hãk akal najadik Allah yék.
17Sampéy ma kènbes pon yék akal igel samak hãk! Yék akal ikebes èn tempad hãk hakebes, dak akal umkep yék èn anak. Perak lah TUHAN namhukom ma yék terok geb kalòw yék tok itèlꞌèl ilok rik ipèrhod nak!”
18Bil nak Nayomi nabelekh Rut had nasered untok namhoh samak rik nak. Jadik Nayomi tok nahèꞌwok wèl ma Rut.
19Dak Nayomi ròb Rut wècha-chib wèl ma Bètlehèm. Bil wèlòy ma Bètlehèm, sènꞌòy rik gèl-gel èn anak umgahmak gelènyꞌich bok umtèrjekh gah nak ma kenèmbek kote Bètlehèm nak. Dak bèꞌbok rik gèl-gel èn anak umtanyak kaban rik um, “Nayomi lah rik nak?”
20Tapik Nayomi nasaꞌod ma umnak, “Agok lah kòw ma yék ‘Nayomi,’ rik bemaksod ‘beꞌadés!’ Kòw lah ma yék ‘Mara,’ rik bemaksod ‘ngèm-ngòm,’ sebab TUHAN Rik Paléng Bekuwase hòj naꞌuy ma nèsgos yék laꞌes geb.”#1:20 Èn kuy sènꞌòy Yahudi kenëh “Nayomi” nak bemaksod “behéd.” Tapik “Mara” nak maksod eh “kedèg.” Èn kuy Ibrani nak, umchal “behéd” untok genahmak enadés, dak “kedèg” nak umdéh untok genahmak ngòm geb.
21Dak Nayomi nachal, “Bil nèng-nèng tòp iperak nòm Bètlehèm doh, yék tik mok kenèmbek kewarge yéh bok isey nòm nèsgos yéh. Tapik puꞌdoh TUHAN hòj natèrmak yék ma doh bok yék tok mèk-mok ilok-ilok wèl. TUHAN Rik Paléng Bekuwase hòj naꞌuy ma yék iderite bok naꞌuy ibuk hal laꞌes umbelakuk ma yék. Jadik agok lah kòw ma yék ‘Nayomi’ wèl!”
22Gerèk nak lah nabelakuk nèꞌmak Nayomi nòm tèk Moab samak Rut, mènsaw eh nòm Moab nak. Nayomi ròb Rut wèlòy ma Bètlehèm bil musim sènꞌòy umtekèd umtèg-tòg menéh barli.
Currently Selected:
Rut 1: KKT
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.