Rut 2
2
Rut natèrbuk ma Boas
1-3Bil néy is Rut, sènꞌòy Moab nak, nasemany ma Nayomi, “Oy jak belok, boléh ke yék imwèk ma selay bok imros menéh? Yék ichèn imtèrbuk ma sènꞌòy rik méj hup bok naꞌor yék imkèrjak nòm yek sènꞌòy rik umtèg-tòg menéh, supaye imros ènsekh rik umperak nak.”#2:1-3 Èn Hukom Tuhan, Tuhan hòj naꞌor ma sènꞌòy Israꞌèl supaye muperak ènsekh hasil èn selay umnak mase umtèg-tòg, bok kalòw mok menéh rik kèꞌlek ma tèk, haros umperak keꞌjèk, supaye sènꞌòy hèl-hal boléh umros bok umgéy. Gerèk nak lah Tuhan naꞌor ma sènꞌòy Israꞌèl mutulong ma mèn balakh, kuwòt règ-rég, sènꞌòy nòm jerok, ròb sènꞌòy gèhnih rik umhèl-hal. (Néh ma bukuk mèn Imam, 19:9–10; 23:22; ròb bukuk Terènlos 24:19–22). Dak Nayomi nachal ma Rut, “Nak aléh, wèk lah.” #Im 19:9,10; Ter 24:19.
Jadik Rut naperak dak nawèk ma selay. Dak nanak natekèd nachèb-chib nòm yek sènꞌòy rik umtèg-tòg menéh, dak naros menéh rik umnak tok umrès-ros. Had terènhad iRut nakerèꞌjak èn selay Boas — néy sènꞌòy sakèy Elimelèkh, tòw Nayomi nak. Boas nak sènꞌòy rik kaye bok behormad geb.
4Dak bil nak rik Boas nalãj nòm kote Bètlehèm ma selay eh nak. Boas nachal selamad ma sènꞌòy rik umtèg-tòg menéh nak, “Yék ipèꞌtak supaye TUHAN mok samak nyob!” Dak umnak umsaꞌod ma Boas, “Kandék kipèꞌtak ma TUHAN namteꞌèl méj ma hãk!”
5Dak Boas natanyak ma ketuwe sènꞌòy rik kerèꞌjak nak, “Nòm kewarge chok rik benaléh nak?”
6Ketuwe nak nasaꞌod, “Rik nak sènꞌòy nòm jèꞌrok rik nalãj ma doh samak Nayomi nòm tèk Moab. 7Atèk babok nak nasemany ma yék, ‘Tulong or lah che yék imkèrjak nòm yek sènꞌòy rik umtèg-tòg bok imros menéh èn gagid menéh rik hòj umchekòd nak.’ Nòm yèhyah tèk rik nak sejèkh nakerèꞌjak, had natarak agat hék èn kelòj dékh nèysòy.”
8Jadik Boas nawèk ma Rut, dak nachal ma rik nak, “Aléh, keyòkh lah ma yék. Tok payah lah hamwèk ma selay mòy bok hamros menéh. Kèrjak lah èn selay idoh hék samak bèꞌbok rik umkerèꞌjak untok yék èn anuh. 9Néh lah èn lok bèhbeh nak umtèg-tòg menéh, bok hoh lah samak bèꞌbok gèhnih nak. Yék hòj ihuwok ma bèhbeh nak supaye agok mupèk-pek ma hãk. Dak bil hãk hasagòl, wèk lah bok chuwoh òng nòm mèn tabol rik hòj umsèd nak.”
10Dak Rut natud èn sòy Boas, dak natanyak, “Nahey ihãk bok hagorgèr ma yék, sampéy hateꞌèl méj geb ma yék gerèk doh? Yék doh kedak sènꞌòy Israꞌèl; yék had sènꞌòy nòm jerok!”
11Boas nasaꞌod ma Rut, “Yék hòj ikeyòkh tentang kenèmbek hal rik hãk hateꞌèl untok belok babok hãh nòm kerek tòw hãh hòj nakebes. Bok yék ilèkh hãk hòj haperak ma apak ròb amèk hãh, bok ma tèk asal rik hãh. Dak halãj ma tèk doh bok hagel samak kaum mòy rik hãk tok hakèlnal. 12Sebab hãk hòj hateꞌèl hal-hal rik méj nak, yék ipèꞌtak ma TUHAN namtèrlos namteꞌèl méj ma hãk. Hãk halãj ma TUHAN untok namjagak, gerèk amèk chèp nak najagak ma kuwòt eh èn dadak kènyèng eh. Dak yék ipèꞌtak ma TUHAN, Allah Israꞌèl, supaye namꞌog ibuk hal rik méj ma hãk.”
13Dak Rut nachal ma Boas, “Yãng, hãk méj geb hup hãh ma yék! Yab yék kedak nòm kuli bèꞌbok hãh pon, tapik hãk hacharak ma yék nòm hup nèjméj hãh bok hasèrjuk ma hup yéh iꞌadés.”
14Bil nèygéy ès-is, Boas nakòw ma Rut, “Jok lah èmga-géy. Chelok lah ruti doh ma kuwoh.” Jadik Rut nagel samak sènꞌòy rik umkerèꞌjak. Dak Boas naꞌog ma Rut menéh rik hòj umpegoh nak. Rut nagéy sampéy nabehik, dak tik mok nadol ènsekh menéh wèl.
15-16Pas nak Rut nated bok nawèk supaye namrès-ros wèl. Dak Boas naꞌor ma bèhbeh rik kerèꞌjak untok rik nak, “Perak lah Rut namros menéh barli nak. Bok kalòw nanak naros èn gagid menéh rik hòj nyob chekòd pon, agok lah huwok ma rik nak. Tapik tulong lah ròj maròp-maròp tangkéy menéh rik hòj nyob chekòd nak untok Rut, dak tëh ma tèk supaye nanak dapad namros.”
17Jadik Rut narès-ros wèl menéh èn selay nak sampéy hòj lèngꞌakh. Bil Rut hòj nagèrsëj menéh barli nak bok nagém, nadapad menéh rik ibuk geb.#2:17 ibuk geb Tèks asli kitab: Kirak-kirak néy èpah. Èpah nak néy enukor èn jènman Kitab, tapik mèn pakar Kitab tik tok pastik maròp kiloh enènjoh eh. 18Dak Rut namak ma kote bok naꞌèn hasil eh nak, dak napèrnéh ma belok babok eh menéh rik hòj naros naꞌtèk. Dak Rut naꞌog ma Nayomi ènsekh nèygéy rik nanak nadol atèk.
19Nayomi natanyak ma Rut, “Èn lok lah hakèrjak is doh bok hadapad menéh rik ibuk gerèk doh? Yék ipèꞌtak ma Allah supaye namteꞌèl méj ma sènꞌòy rik betulong ma hãk!”
Dak Rut naꞌoglèkh ma belok babok eh tentang sènꞌòy rik bemilik selay èn lok nanak nakèrjak. Rut nachal, “Is doh yék ikèrjak èn selay Boas.”
20 #
Im 25:25. Nayomi nachal ma mènsaw eh, “Aléh, Boas nak sakèy rik ah! Rik nak lah néy sènꞌòy rik seteréd bejagak ma kewarge ar bok ma tèk ar, sebab rik nak sakèy ah rik tilok. Yék ipèꞌtak ma TUHAN namteꞌèl méj ma Boas! TUHAN nak selaluk napèrnéh senayèkh Eh rik setiye, ma ar rik tik gès-gos bok ma tòw ah rik kèsbes.”
21Dak Rut nachal, “Tabeh wèl, Boas nachal ma yék, ‘Kèrjak hãh lah èn anuh samak sènꞌòy rik kerèꞌjak untok yék sampéy umtèrsòj kenèmbek nègtòg menéh yéh.’”
22Dak Nayomi nachal ma Rut, “Méj lah che rèk nak, aléh! Hek, hãk patod hamkèrjak wèl samak bèꞌbok rik kerèꞌjak untok Boas. Kalòw hãk hakèrjak èn selay sènꞌòy mòy, mungkin akal sènꞌòy umpèrjèd ma hãk.”
23Jadik Rut tik nahoh nakerèꞌjak wèl samak bèꞌbok gèhnih èn selay Boas nak, dak naros menéh barli ròb gandom sampéy hòj sòj ma musim nègtòg. Dak Rut tik nagel samak belok babok eh.
Currently Selected:
Rut 2: KKT
Highlight
Share
Copy
Want to have your highlights saved across all your devices? Sign up or sign in
© 2025 Wycliffe Bible Translators, Inc.