1 Corintios 12
12
Na' lesetaxanaxatpi so' lepaqal ñi' Dios 'me ỹanem ñi' 'oonolec
1'Ami ỹaqáỹa', sétaaque da' 'auaỹáchiñii da' lasoxoc na' lesetaxanaxatpi so' lepaqal ñi' Dios 'me ỹanem ñi' 'oonolec, qá'a jaỹim 'aunachíitapeec.
2'Ami 'auaỹáchiñiita da' joca'li maliaxa da' sa 'te 'au'amaqténataxañii, qana'chi 'ami lesómaxanataqa da' 'oquíitapegue' na' 'chi nadénaqtac 'me sa detaqa. 3Chan'eesa sétaaque naỹi da' 'auaỹáchiñiita da' ga' ỹosáxanaxan so' lepaqal ñi' Dios, sa 'te 'enaac da' l'aqtac: “¡'Chi sa qoỹalaato' so' Jesús!” Qataxa qaỹa 'te ỹañoxot da' 'enaac: “¡Naqaiso so' Jesús 'me ỹisaliaxanec!” da' sa naqaiso so' Espíritu Santo da' ỹosáxanaxan.
4Sa 'te 'ena'a't na' nesetaxatpi 'me qoỹanem na' siỹaxadipi, qaláxasa 'oonolec so' lepaqal ñi' Dios 'me chiỹoqo'ot. 5Qataxa sa 'te 'ena'a't da' lasoxoc da' qod'onataxanot so' qadesaliaxanec, qaláxasa 'oonolec so'me s'onataxanaqtapecot. 6Qataxa sa 'te 'ena'a't da' lasoxoc da' l'onataxanaxac na' siỹaxadipi, qaláxasa na'chiñi ñi' Dios 'me ỹ'onataxanaxan ỹima jen'me. 7Ñi'me Dios ỹanem ñi' 'oonolec siỹaxaua ga' lesetaxanaxat 'me ỹichoxot so' lepaqal jiñi'me da' sétaaque lecochiỹa ỹima na' siỹaxadipi. 8Qana'chi jiñi'me 'uo na' ỹanem naua' letaxaỹaxaco naua' naỹátenaxanaxaco, chiỹaqaỹi qa'en so' lepaqal jiñi'me, qataxa 'uo na' ỹanem da' jalcote naua' laatetonaxanaxaco ỹátaqta sa nem. 9Ga' laqáỹa ỹanem da' let'ádaic da' lip'iỹáxac, chiỹoqo'ot qa'en so' lepaqal jiñi'me, qataxa 'uo na' n'óota qa'en na' leuaxaic. 10Qataxa 'uo na' ỹanem da' ỹí'et na' n'anecpi 'me sa qoỹauanápiỹi, qataxa 'uo na' ỹanem da' ỹ'axa't naua' l'aqtaqa ñi'me. Qataxa 'uo na' ỹanem da' ỹaateton jen'me sa 'te di'ỹoq 'chi qovínaxanaxaic, 'uootaxa na'chiso so' lepaqal jiñi'me. Qataxa 'uo na' ỹanem da' detaxaỹilo naua' n'aqtaqa ỹoda'alo. Qataxa 'uo na' ỹanem da' ỹaỹáte'n da' ỹ'axa't ga' naavlo naa'me n'aqtaqa. 11Qaláxasa na'chisóta so' 'oonolec lepaqal ñi'me Dios 'me chiỹoqo'ot ỹima jen'me. So'me na'chiso 'me mai'chi chiỹoqóchiỹi da' naloqtenéegue na' ỹodapecachi lesetaxanaxatpi da' ỹanem ñi' 'oonolec siỹaxaua.
Ỹima qo'mi soqotaqáta'uo da' 'oonolec nó'oquiaxac
12Qá'a so' Cristo 'ená'am da' 'oonolec nó'oquiaxac 'me jalcote na' loxosetpi. Qana'chi jen'me leuoxosetpi, temaqaidi da' jalcote, qaláxasa ỹoqotet'a't, 'oonolec da' nó'oquiaxac. 13Qá'a ỹiméda qo'mi, temaqaidi da' qo'mi judío lase', 'uootaxa sa 'te qo'mi judío lase', 'uootaxa qo'mi nelatáqa, 'uootaxa sa 'te qo'mi nelatáqa, ca'li qo'mi qonachiláxa'n, qana'chi so' lepaqal ñi'me Dios qo'mi ỹapotena't da' 'ená'am da' 'oonolec nó'oquiaxac. Qana'chi ỹima da' senaq qo'mi qonỹómaxanỹiilo so' 'oonolec lepaqal ñi'me Dios.
14Da' 'oonolec nó'oquiaxac sa 'te 'oonolec ga' lasoxoc, qá'a jalcote na' leuoxosetpi. 15Qomle 'enaac na' nichi: “Jaỹim sa 'te jaỹim nouaq, chan'eesa sa 'te soqotéta'uo da'me nó'oquiaxac,” da' 'enaac dójo', qaláxasa na'chi 'ená'am ỹoqotétauo. 16'Uootaxa jan' nequetéla da' 'enaac: “Jaỹim sa 'te jaỹim n'aite, chan'eesa sa 'te soqotéta'uo da'me nó'oquiaxac,” da' 'éeta da' l'aqtac, qaláxasa na'chi 'ená'am ỹoqotétauo. 17Qá'a da' nó'oquiaxac da' ỹima da' sega'me n'aite, qana'chi ¿jái'chogamaxa ned'ague gaua' lequetélalaaco? Qana'chi da' 'uootaxa ỹima da' nó'oquiaxac da' sega'me nequetélalaaco, qana'chi ¿jái'chogamaxa ned'ague gaua' nimiilaaco? 18Qaláxasa ñi' Dios ỹátaqta mai'chi naloqchíichiiñi da' ỹoqoteua'alo naua' l'acháqa'te naua' loxose'te da' nó'oquiaxac. 19Qá'a jen'me noxosetpi da' 'oonolec ga' lasoxoc, qana'chi ¿jái'te ga' p'aiỹi ga' nó'oquiaxac? 20Qaláxasa temaqaidi da' 'eesa da' jalcote na' noxosetpi, qaláxasa 'oonolec da' qonsócta'uo nó'oquiaxac.
21Chan'eesa jan' n'aite sa 'te 'enapéga na' nouaq da' 'enaac: “'Am sa 'te 'am souen;” qataxa na' naqaic sa 'te da' 'enapegalo naua' nichil: “Sa 'ami 'te soue'n.” 22Jaldáta da' ga' p'aiỹi na' neuoxosetpi ga' 'ená'am da' qaỹa 'te ga' ló'o, qana'chi naqaiga 'me ỹágueegue da' neuénaxanaxa. 23Qataxa ga' p'aiỹi na'me neuoxosetpi ga' sa 'te da' qad'átaxat, qana'chi naqaiga 'me ỹágueegue da' qadetelaxat. Qataxa ga' p'aiỹi ga' ỹátaqta qaỹa 'te ga' lodiac qasenaq, qana'chi naqaiga 'me ỹágueegue da' lodiac qasenaq. 24Qá'a sóxote sa 'te ỹouen da' qoỹodiáquen ga' 'uo da' li'ỹoxodic. Qana'chi 'éeta ñi'me Dios joca'li ỹ'axat da'me nó'oquiaxac, da' qaidi ga' p'aiỹi ga' 'ená'am da' qaỹa 'te ga' ló'o naqaiga ga'me ỹágueegue da' li'ỹoxodic qoỹin, 25qaidi sa 'te ỹodapecachi da'me nó'oquiaxac. Jaldáta da' ñi' 'oonolec lepogoxoit ga' laqáỹa da' lecochiỹa. 26Chan'eesa da' 'uo ga' p'aiỹi na' neuoxosetpi da' 'uo ga' ỹic'on, qana'chi ỹima jen'me daỹali. Qana'chi da' 'uo ga' p'aiỹi ga' qoỹi'ỹoxoden, qana'chi jen'me ỹátaqta ỹima da' netóotaỹi.
27Qá'a 'ami naqa'ami 'me ló'oquiaxac so' Cristo. Ñi' 'oonolec da' 'oñíita 'ansóquiita'uo da'me nó'oquiaxac. 28Na'chida 'me 'éet'ec ñi' Dios joca'li 'uo na' ỹanem da' l'onataxanaxac na' 'amaqténataxanaxaicpi. Ỹi'uáuaxachiiñi da' ỹidéuo na' lamaxa'spi qa'en so' Jesús. Ỹim, qataxa jec na' ỹ'axátac da' l'aqtac ñi' Dios. Ỹim, qataxa jec na' paxaguenataxanaxaicpi. Ỹim, qataxa jec na' ỹauáaque jen' n'anecpi 'me sa 'te qoỹauanápiỹi. Ỹim, qataxa jec na' natadénaac na' leuaxaic, qataxa na' lecochapéga na' 'uo da' lovic, qataxa na' nasoxola'. Ỹim, qataxa 'uo na' ỹanem da' dosiilo naua' n'aqtaqa 'me ỹoda'alo. 29Qana'chi ¿qo'li ỹima jodamaxa lamaxa'spi so' Jesús? Qataxa ¿qo'li ỹima da' letaxaỹáxanaxanecpi ñi' Dios? 'Uootaxa ¿qo'li ỹima da' paxaguenataxanaxaicpi? Qataxa ¿qo'li ỹima ỹí'et jodamaxa n'anecpi 'me sa 'te qoỹauanápiỹi? 30Qataxa ¿qo'li jodamaxa natadéetac na' leuaxaicpi? Qataxa ¿qo'li ỹima da' dosiilo naua' n'aqtaqa 'me ỹoda'alo? Qataxa ¿qo'li ỹima jodamaxa ỹaỹáte'n da' ỹ'axáteelo da' nédaaue naua' n'aqtaqa? Já'a, 'eesa da' sa 'te naq'áita dójo'. 31'Anpogoxóiñiỹapegue' qomle da' 'auacoñiiỹet na' ỹátaqta nó'in lesetaxanaxatpi ñi'me Dios. Qaláxasa jaỹim ỹátaqta 'ami saloxonalo da' nadíquiaxac 'me ỹágueegue da' lodiac.
Currently Selected:
1 Corintios 12: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.