1 Corintios 11
11
1'Ami 'oquiit'egue qomle jaỹim, 'ená'am da' séet'ec da' sequétapegue' so' Cristo.
Da' lasoxoc na' ỹauodipi da' netamen
2'Ami ỹaqáỹa', ỹátaqta 'ami ñitóot'eque, qá'a ỹátaqta jaỹim 'adeenataxachii, qataxa 'oquiit'egue da' ỹapaxaguenataxanaxac 'me 'ami sanema. 3Qaláxasa sétaaque da' 'auaỹáchiñiita da' so' Cristo naqaiso so' sega'me laqaic na' siỹaxadipi, qana'chi jaga' ỹauo 'en laqaic ga' loua, qana'chi ñi' Dios naqaiñi ñi' laqaic so' Cristo. 4Da' 'uo ga' siỹaxaua da' 'uo ga' laqailápo' da' netamen, 'uootaxa da' ỹa'n naua' l'aqtaqa ñi' Dios, jega'me ỹa'uo da' ne'uenáguec na' laqaic ỹasouaxat na' laqailápo'. 5Na'chi 'ená'am jaga' ỹauo da' sa 'te ỹa'uo ga' laqailápo' da' netamen, 'uootaxa da' ỹ'axa't naua' l'aqtaqa ñi'me Dios, jaga'me ỹa'uo da' ne'uenáguec na' laqaic ỹasouaxat da' sa 'te ỹa'uo ga' laqailápo'. 'Ená'am taa'le ỹichicot na' laỹoxot. 6Qá'a da' 'uo jaga' ỹauo da' sa 'te ỹa'uo ga' laqailápo', qana'chi n'óota da' nematáñi da' nepetec na' laỹoxot. Qaláxasa da' ỹima qonpecoxolégue ga' laỹoxot jaga' ỹauo 'uootaxa da' namadectelégue na' laqaic, qana'chi ma'le n'óota da' ỹa'uo ga' laqailápo'. 7Ga' siỹaxaua sa 'te ỹa'uo ga' laqailápo', qá'a ga'me mai'chi liquí'i ñi' Dios, qataxa ỹáatañi da' l'ónaxac ñi'me. Qaláxasa jaga' ỹauo ỹáatañi da' l'ónaxac ga' lé'em. 8Qá'a ñi' Dios joca'li ỹa'uo so' siỹaxaua, qana'chi sa 'te ỹachiỹoxotaỹi jaso' ỹauo. Jalsóta so' lé'em 'me chiỹaqaỹi da' qoỹa'uo jaso' ỹauo. 9Jaso' ỹauo qoỹa'uo da' lecochaxaua qoỹin so' lé'em, qana'chi sa 'te qoỹa'uo so' lé'em da' ỹasouaxat jaso' ỹauo. 10Na'chida 'me ỹ'éte'uo da' jaga' ỹauo n'óota da' ỹa'uo ga' laqailápo', qana'chi n'anaxat da' jaga'me huetalégue da' lamaxasóxonaxac ga' loua, qataxa ỹasouaxat na' piỹem lé'ecpi Dios lamaxa'spi. 11Qaláxasa naỹi da' s'amaqténaq so' Cristo, qaỹa 'te ga' siỹaxaua taa'le sa 'te ỹiuen jaga' ỹauo, qataxa jaga' ỹauo ỹiuen ga' lé'em. 12Qaláxasa qomle 'eesa da' jaso' ỹauo qoỹachiỹoxotaỹi so' lé'em, qana'chi nataq'en 'eesa da' ga' siỹaxaua chiỹaqáaue jaga' ỹauo, qaláxasa ỹima chiỹoqo'ot ñi'me Dios.
13'Ami mai'chi 'analoqchiñii da' ỹiỹamqáchiiñi da' jaga' ỹauo da' sa 'te ỹa'uo ga' laqailápo' da' 'uootaxa netaméetapecot ñi'me Dios. 14Qá'a da' mai'chi n'onataguec na' 'chi siỹaxadipi 'eet'oi: Ỹima qod'ailégue ga' siỹaxaua da' loilaỹoxot, 15qaláxasa jaga' ỹauo ỹátaqta ỹ'oxodaq qa'en da' loilaỹoxot, qá'a qoỹanem da' loilaỹoxot, da' qaidi laqailápo' na' laỹoxot. 16Qaláxasa qomle 'uo ga' sétaaque noqolgué'te' dójo', qana'chi n'óota da' ỹaỹáteeta da' qo'mi qaỹa 'te ga' qan'onataguec laqáỹa qataxa ỹima jen'me na'alo naua' lail jen' 'aléua jen'me ỹ'amaqtéetacpi ñi' Dios.
Sa 'te qoỹoden da' niqui'ỹáxac 'me náaue da' qoueenategue so' qadesaliaxanec
17Qaláxasa da' sidíñi naỹi da' samaxalo 'ami, sa 'te da' ñitóot'eque da' 'ami, qá'a da'me 'ademáxaquii sega'me naqaida 'me 'ami n'áxa't, taichaqai'me 'ami n'ónaxa't. 18Qá'a da' 'uáichiiñi ỹ'aqtac senaac: Ñaquiáxatapeelégue da' naale da' ỹivíta da' 'adimii'ỹa't da' 'antamiñii, qana'chi qoỹíitapega nedot'a't da' 'ami colqátaỹilo. Qana'chi cada'acolec 'eesa'me da' s'amaqten da'me. 19Qá'a ¡'ami 'auviñii da' 'aucolqáiỹi da' ỹodapecachi na' 'auasoilégue na' siỹaxadipi, qaidi di'ỹoq na' ỹátaqta 'eesa 'amaqténataxanaxaic! 20Da'me chiỹoxouó'o da' 'ami colaxaỹilo, qá'a naale ỹivíta da' 'av'íchii da' niqui'ỹáxac 'me náaue da' qoueenategue so' qadesaliaxanec, qana'chi da'me 'adiqui'ỹáxaquii sa 'te naqaiso jeso'me 'aueenachíiỹa. 21Qá'a da' ỹivíta di' lalóqo' da' 'au'quíỹi, qana'chi ñi' 'oonolec 'uáiñi da' dequé'e, qana'chi sa 'te deuátaxanaac. Chan'eesa 'uo na' ỹoqouat, qataxa 'uo na' ỹivídet'ec da' lotaxa. 22¿Qaỹauoo' jonaamaxa 'ad'acháqa'chídii' da' 'au'quii'ñalo qataxa 'anỹómii'ñalo? Jeda'me 'oñíit'ec dójo', qana'chi 'ená'am da' 'au'otáñiitac na' 'adaỹi 'me ỹ'amaqtéetac ñi' Dios, qataxa 'aua'uóỹii da' l'alóxo na'me qaỹa 'te dí. ¿Jái'te 'éeta ga'me 'ami senapegalo? ¿Qo'li 'ami siỹamaxadéete'? ¡'Axai', sa 'te siỹamaxaden dójo'!
Da' niqui'ỹáxac 'me náaue da' qoueenategue so' qadesaliaxanec
(Mateo 26.26-29; Marcos 14.22-25; Lucas 22.14-20)
23Qá'a jaỹim sachiỹoxoto'ot so' qadesaliaxanec da'me napaxaguenataxanaxac 'me sóxote 'ami sanema da' so'me pí'ỹaq ca'li sétaaque da' qoỹaneuo so' qadesaliaxanec Jesús, qana'chi lasáq'a jaso' pan. 24Qana'chi ỹanot da' netónaxac ñi' Dios. Ỹim, qana'chi necolaxachiñi jaso' pan, qana'chi 'enaaco': “'Aualíquii jénjo'; naqáina na' mai'chi ỹapat 'me tát'a da' qoỹicolaxatapiỹi da' qaidi 'ami nec'alaxatréegue. 'Av'íchiitac qomle dójo', qaidi sa 'te jaỹim 'aupetelaqaiỹet.” 25Qana'chi ca'li sóxote ỹim da' liqui'ỹáxac, qana'chi ỹitaxa ỹacona jaso' ỹómaxaqui. Qana'chi 'enaaco': “Jánjo' ỹómaxaqui, naqána jan' náaue da' dálaxaic ỹamaxataxac 'me ỹátaqta táchidiñi qa'e'n naua' mai'chi ỹitauo'. Qana'chi da' ỹivíta da' 'anỹómiiỹi, qana'chi ỹitaxa jaỹim 'aueenachíiỹa.” 26Chan'eesa da' ỹivíta da' 'aualíquii jánjo' pan, qataxa 'anỹómiiỹi jánjo' ỹómaxaqui, qana'chi 'ená'am da' 'au'axáchiitac da' leleuaxa so' qadesaliaxanec Jesús, cha ỹivíde'ta ga' nolo' qomle n'iỹílaq.
Da' lasoxoc da' niqui'ỹáxac 'me náaue da' qoueenategue so' qadesaliaxanec
27Chan'eesa da' 'uo ga' ỹalic jan' pan, 'uootaxa niỹómỹi jan' ỹómaxaqui 'me náaue da' qoueenategue so' qadesaliaxanec, qana'chi da' 'uootaxa qaỹa 'te 'enec qa'en, na'chi 'ená'am da' sa 'te ỹodiáquenaac da' ló'oquiaxac qataxa naua' letauo' jeso'me. 28Chan'eesa ñi' 'oonolec ỹiuen da' cha'li 'uáiñi da' naỹáteetela't. Ỹim, qaama'le ỹalic jan' pan qataxa da' niỹómỹi jan' ỹómaxaqui. 29Qá'a da' 'uootaxa dequé'e qataxa niỹom, qaláxasa da' sa taỹapíỹi lauel da' ỹalíctac da' ló'oquiaxac so' qadesaliaxanec, qana'chi da'me liqui'ỹáxac qataxa da'me niỹómaxac 'ená'am da' ỹiỹáxataaque ga' ne'uaxánaguec. 30Chan'eesa jalcote da' 'oñíita 'me 'uo na' ỹilhuaac qataxa sa d'aiséguem. Qataxa nataq'en sóxote 'uo na' qaỹa. 31Qaláxasa da' mai'chi ñiloxola't qo'mi, qana'chi ñi' qadesaliaxanec Dios sa 'te qo'mi 'eet'eque da' qo'mi ỹi'uaxa'n. 32Qaláxasa ñi'me da' 'uootaxa ỹilá'a ga' qadesamaxataxac, qana'chi qo'mi ỹi'uaxa'n, qá'a sétaaque da' sa 'te salegaxáaue ga' ne'uaxánaguec na' loico ló'olpi jen'me 'aléua.
33Chan'eesa 'ami ỹaqáỹa', da' ỹivíta da' 'adimii'ỹa't da' 'au'quíỹi, qana'chi ñi' 'oonolec ỹiuatá'a ga' laqáỹa da' liqui'ỹáxaua. 34Qomle 'uo ga' ỹoqouat, qana'chi n'óota da' di'quiỹá'ña ga' mai'chi l'acháqa', qaidi ñi' Dios sa 'te ỹa'uo ga' 'ane'uaxánaguiquii, ỹasouaxat da'me 'oñíit'ec da' 'ademáxaquii. Qana'chi naa'me nasoxoco laqáỹa' mai'chi siỹamaxachidíñi qomle 'ami sivitalo da' 'ami sec'atalo.
Currently Selected:
1 Corintios 11: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.