1 Corintios 10
10
Qouaqatelégue ga' nadénaqtac niquí'i da' sa qontamenot
1Qá'a sétaaque da' 'auaỹáchiñii, 'ami ỹaqáỹa', da' so' qadapidiipi da' ỹima jeso'me huet'ot so' ló'oc da' na'chiso dasolégue, qataxa ỹima jeso'me p'áinỹi jaso' huaxai lenaxat huaxai tóomaxadai. 2Da' 'éeta ỹima da' ladíquiaxac jeso'me josii'chi qodasótai'ỹi so' ló'oc qataxa josii'chi qop'áinỹi jaso' huaxai, da'me 'ená'am da' naqaida da' nachiláxac jeso'me, da' qaidi ỹoqoteuó'o qoỹin so' Moisés. 3Qataxa jeso'me siỹaxadipi ỹima ỹalíctac so' nalic 'me sa di'ỹoq, 4qataxa ỹima qonỹómỹi so' noxop 'me sa di'ỹoq. Qá'a qonỹómtapiỹi na' noxop 'me chiỹaqáaue so' qa' 'me sa di'ỹoq 'me náictapegue' jeso'me. Qana'chi so'me qa' naqaiso so' Cristo. 5Qaláxasa taqadíta jalcote so'me da' ñi' Dios sa ỹiỹamaxaden, chan'eesa vichii'ñalo jen' ỹileualégue jeso'me so' 'aléua totelégue.
6Ỹima da'me huánỹi jeso'me naqaida 'me qanapaxaguenataguec, da' qaidi sa 'te da' sipitaqá'a ga' sa nó'in, 'ená'am da' 'éeta jeso'me. 7Chan'eesa 'ami 'ena't da' 'auadénaxachii so'me da' 'uo na' netaméetapecot na' 'chi nadénaqtacpi. Qá'a naua' nidii's l'aqtaqa ñi' Dios 'enapega't: “So' siỹaxadipi ñíiñi. Ỹim, qana'chi ỹí'et so' liqui'ỹáxac qataxa niỹómtac. Ỹim, qana'chi ñíseguem da' ỹí'et so' leuálaxaỹaxac.” 8Nataq'en sa 'te qo'mi queséeguetaxaiqa, 'ená'am da' ỹí'et so'me da' 'uo na' ỹiqueséeguetetac. Chan'eesa ỹileu so' veintitres mil siỹaxadipi so' 'oonolec nolo'. 9Nataq'en sa 'te 'chi qad'iinec so' qadesaliaxanec, 'ená'am da' ỹí'et jeso'me da' 'uo na' d'iinaxanataxan. Chan'eesa 'uo na' ỹileu jeso'me joca'li detoxónỹi na' nanaicpi. 10Nataq'en 'ami 'ená'te da' 'anachíỹapegue' ñi' Dios, 'ená'am da' ỹí'et jeso'me ca'li 'uo na' quetapeelégue ñi'me. Qana'chi qoỹalaat, ỹalaat so' piỹem lé'ec 'me Dios lalaataxanaxanec.
11Ỹima dójo' 'uaueguet so'me qadapidiipi, da'me qoỹidíñi da' naloqtenaxanaxat da' sétaaque da' qo'mi qouaqatalo naỹi da' souqátaavlo naua' p'átreegue noloqo'te. 12Chan'eesa da' 'uo ga' nepétetapeela't da' qaỹa 'te ỹaqaliim, n'óota qomle neteláñi, qaidi sa 'te chiỹaqséguem. 13Da' 'anapiinaguiquii 'me 'ami huetalóo'te, da'me na'chi 'ená'am da' napiinaguec ỹima na' siỹaxadipi. Qaláxasa 'ami na'chiñi ñi'me Dios 'aup'íi'ỹa, qá'a ñi'me sa 'te da' 'ami ỹaseet'ema ga' 'anapiinaguiquii da' 'uootaxa sa 'te 'adaloiỹet. Jaldáta da' 'uootaxa da' 'uo ga' 'anapiinaguiquii, qana'chi ñi'me ỹa'uo ga' ladic, qaidi 'auaqanachichii da' 'adaloi'ỹaguet.
14Chan'eesa 'ami ỹaqáỹa', 'ami ñauotaxa'u, 'auasoỹíi'ỹem qomle da' qontamenot ga' nadénaqtacpi niquí'i. 15Jeda'me ỹitaxaỹaxac da' 'ami setaxaavlo, séet'em da' setaxaỹot ga' siỹaxaua ỹátenaxanaxaic, qana'chi 'ami mai'chi 'aueenachíiỹa da' senaac. 16Jan' ỹómaxaqui 'me qoỹiỹotái'ỹa da' qaidi ñitamnaxalégue, jan'me da' ỹivíta da' ñiỹómaxaỹi, qana'chi náaue da' qo'mi qoỹiuaxaỹaxana't ỹasouaxat naua' letauo' so' Cristo. Qataxa jan' pan 'me ñicolaxataxañi, jan'me da' ỹivíta da' salíinaq, qana'chi náaue da' qo'mi qoỹiuaxaỹaxana't ỹasouaxat da' ló'oquiaxac so' Cristo. 17Temaqaidi da' qo'mi jalcote, qaláxasa qadema da' salíinaq jaso' 'oonole pan, chan'eesa qo'mi sauenaq 'oonolec da' nó'oquiaxac.
18Cha' píiỹa so' lec'óqo'tepi so' Israel. Jeso'me ỹalíctac so' nachítaqtaxanaxat huaca lapat 'me qoỹaneuo, jen'me qoỹiuaxaỹaxana't ỹasouaxat jen'me nachítaqtaxanaxat. 19Sa 'te taa'le senapéga da' 'uo ga' 'enec ga' 'chi nadénaqtac, 'uootaxa na' nachítaqtaxanaxat lapat da' 'uootaxa sa 'te 'ená'am ga' laqáỹa. 20Da'me séetapega 'eet'oi: Jen' sa 'te ỹaateton ñi'me Dios, jen'me da' ỹivíta da' ỹa'uo na' lachítaqtaxanaxat, qana'chi jen'me lachítaqtaxanaxat ỹanot na' lamaxa'spi so' qadó'o paiỹac, qana'chi sa 'te naqaiñi ñi' Dios. Qana'chi sa 'te siỹamaxaden da' 'aualquíi'uo na' lamaxa'spi so' qadó'o paiỹac. 21Sa 'auañoxochii da' 'anỹómiiỹi jaga' ỹómaxaqui 'me náaue da' qoỹ'amaqten so' qadesaliaxanec, nataq'en táxa 'anỹómiiỹi jaga' ỹómaxaqui 'me náaue da' qoỹ'amaqten na' lamaxa'spi so' qadó'o paiỹac. Qataxa sa 'auañoxochii da' 'aualíquii ga' nalic 'me náaue da' qoueenategue so' qadesaliaxanec, nataq'en táxa 'aualíquii ga' nalic 'me qoỹanot na' lamaxa'spi so' qadó'o paiỹac. 22¿Qo'li sétaaque jodamaxa dec'álaxan qasenaq so' qadesaliaxanec? ¿Qo'li qo'mi p'asodáiỹi da' ñapagaqalégue so'me?
Da' nesóxodic naqaida da' ỹilo'ogue da' qadasoxoc
23'Eesa naale da' n'aqtac da' 'enaac: Ñi' 'oonolec sa 'te da' qoỹ'iláxatem ga' sétaaque ỹí'et, qaláxasa sa 'te ỹima na' nasoxocpi da' n'ónaxat ga' siỹaxaua. Já'a, 'eesa da' ñi' 'oonolec sa 'te da' qoỹ'iláxatem ga' ỹí'et, qaláxasa sa 'te ỹima da' nichíiseguem qa'en. 24Qaỹa 'te ga' ỹilótaaque ga' mai'chi laỹamaxac. Jaldáta da' ỹiláaque ga' laỹamaqa' ga' laqáỹa.
25'Ami 'aualíquii ỹima qomle na' lapat 'me chiỹaqáaue jega' menaxaqui. 'Ená'te 'aunataxañiitapeelégue ga' chiỹoxogue, qaidi sa 'te sa ỹiỹamaxañi da' 'adeenataxaquii. 26Qá'a jen' 'aléua qataxa jen'me huetalégue, ỹima jen'me lalémaxaset ñi' qadesaliaxanec.
27Qomle 'uo ga' maliaxa sa 'te d'amaqténataxan da' 'ami 'enapegalo da' 'adiqui'ỹáxauai, qana'chi ỹima 'aualíquii na'me 'ami ỹanema. 'Ená'te da' 'aunataxañiitapeelégue ga' chiỹoxogue, qaidi sa 'te da' sa ỹiỹamaxañi da' 'adeenataxaquii. 28Qaláxasa qomle 'uo ga' 'ami d'aqtaxanema, 'enaac: “Jénjo' lapat, jen'me nachítaqtaxanaxat da' qoỹanot ga' 'chi nadénaqtac,” qana'chi 'ená'te da' 'aualíquii, qaidi sa 'te 'au'quemaqchichii ga' 'ami d'aqtaxanema, qataxa qaidi sa 'te da' sa ỹiỹamaxañi da' neenataxac. 29S'axátetac da' leenataxac ga' siỹaxaua laqáỹa, qana'chi sa 'te naqaida da' 'adeenataxac.
Qaláxasa qomle 'uo ga' 'enaac da' l'aqtac, 'eet'oi: “¿'Éeta toqo' 'chi da' 'en 'alóqtapiỹi di' ỹiuel ga' leenataxac ga' ỹaqáỹa da' 'uootaxa 'uo ga' salíctac? 30Qá'a da' ñitameelégue ga' janoq da' sanot da' ñitónaxac ñi' Dios, qana'chi ¿'éeta toqo' 'chi jaỹim qodictapeelégue ỹasouaxat ga'me salic?” 31Qomle 'uootaxa 'au'quíỹi, 'uootaxa 'anỹómii, 'uootaxa 'uo ga' 'av'íchii laqáỹa, n'óota qomle da' 'auañiỹóoue ỹima da' qoỹi'ỹoxoden ñi' Dios. 32'Ená'te taa'le 'uo ga' 'adasouaqtaquii na' judío lé'ecpi, 'uootaxa sa 'te judío lé'ecpi, 'uootaxa na' ỹ'amaqtéetac ñi' Dios. 33Jaỹim ỹátaqta sepacapégue' da' ỹima qoỹiỹamaxadéeta ga' sé'et. Qana'chi sa 'te mai'chi selótaaque da' mai'chi ỹaỹamaxac. Jaldáta da' sétaaque da' ỹiỹamaxañi na' ỹaỹi, qaidi qonec'alaxatéegue.
Currently Selected:
1 Corintios 10: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.