1 Corintios 9
9
Da' 'enec ga' lamaxasec so' Jesús
1'Eesa da' jaỹim huosóchiiñi, qataxa 'uo da' senec da' jaỹim lamaxasec so' Jesús. Qá'a jaỹim ñauá'ne' so'me 'me qadesaliaxanec. Qana'chi 'ami 'me 'ami sachiỹoxotaỹilo da' ỹ'onataxanaxac da' s'onataxaatapecot jeso'me. 2Da' 'uo na' sa 'te ỹ'amaqten da' jaỹim lamaxasec so' Jesús, qaláxasa 'ami sa 'te da' sa jaỹim 'au'amaqchíñii. Qá'a jaỹim 'auachiỹoxochiỹaỹi da' 'au'amaqchíñii so' qadesaliaxanec Jesús, naqaida 'me l'anaxat da' jaỹim lamaxasec jeso'me.
3Da'me ỹ'ataxac da' sedolégue jen'me jaỹim quetapeelégue senaac: 4Jaỹim saiỹet da' saconeguet ỹima jen'me jaỹim qoỹiqui'ỹáxanec qataxa na' jaỹim qonỹómaxanỹi, 5qataxa nataq'en da' 'uo jaga' ỹoua 'amaqténataxanaxai da' ñáicapegue', 'ená'am da' 'éeta na' lamaxa's laqáỹa' so' qadesaliaxanec Jesús, qataxa saua' lalémaxase'te laqaỹadésoda, qataxa so' Pedro. 6'Uootaxa ¿'aupichíitapega jodamaxa da' jaỹim qataxa so' Bernabé na'chiqomíite' da' sa 'te saxanaxañi da' ỹ'oqóchiỹi qad'onataxanaxac da' s'axátaqtac da' n'aqtac? 7¿Jái'chogamaxa siỹaxaua taa'le tauó'o da' huataxanaxalé'ec, qana'chi mai'chi neseetéetapeela't? Qataxa ¿jái'chogamaxa ỹaañi jan' uva, qana'chi sa 'te ỹalic jan' jala? Qataxa ¿jái'chogamaxa nouatoqo't jan' n'aanaxate, qana'chi sa 'te da' niỹómỹi jan' lóchi' 'me nesométac? 8Qataxa 'ená'te taa'le 'aupichíitapega da' 'chi siỹaxaua leenataxac jeda'me senaac, qá'a na' naqátaxacpi 'me chiỹoqo'ot so' Moisés nataq'en 'enaac dójo'. 9Qá'a di' nedétañi naqátaxac 'enaac: “'Ená'te 'aucoñida't ga' limic ga' 'adauégaxanaxala' huaca da' qoỹapiaxalégue na' trigo da' qonasola na' ló'oc.” 'Eesa da' ñi' Dios da' 'enaac joca'li dójo' da' sa nalgáta ga' nauégaxanaxala' huaca da' huaqátetapeelégue, 10na'chiqo'mi 'me daloqtenaxanalo. Da'me naqátaxac qoỹidíñi josii'chi da' qoỹauótaaque da' qanỹamaqtaguec, qá'a ga' siỹaxaua 'me naseecapíiseguem jen' 'aléua qataxa ga' nasolaac na' trigo ỹátaqta 'uo da' naquitaxac da' ỹaconeguet ga'me chiỹaqaỹi da' l'onataxanaxac. 11Da' qo'mi sanaqátapegoovlo da' 'oñíita jeda'me sa di'ỹaxa 'me chiỹoqo'ot so' lepaqal ñi' Dios, qana'chi ¿qo'li sa 'te lasoxoco' da' qo'mi ñaqataq jega'me di'ỹoqóchiỹi 'me chiỹaqáaue da' 'oñíita? 12Da' 'uo ga' 'ami 'ausiichíñii 'me 'uo da' 'enec da' l'onataxanaxac, qana'chi ¿qo'li sa 'te ỹágueego' ga' qo'mi 'ausiichíñiique?
Qaláxasa qo'mi sa 'te da' ñitaqá'a da'me qo'mi huet'oto. Jaldáta da' qo'mi ñiuénaxaguet ỹima jen' chaqáina, qaidi sa 'te sedóiquiaxanaxa't da' 'ónaxaic qadipí'ic 'me n'aqtaguec so' Cristo. 13'Ami sóxote 'auaỹáchiñii da' na' ỹilo'ogue da' n'onataxanaxac jiñi' tamnaxaqui let'ádaic di' Jerusalén, jen'me chiỹoxotaỹi da' neseeténaguec da'me l'onataxanaxac. Da'me ỹátaqta senaac 'eet'oi: Jen'me ỹilápegue' jaga' nec'oỹoxonaxalate da' ỹic'oi na' nachítaqtaxanaxat huaca lapat, jen'me 'me ỹalíctac na' qoỹiỹotái'ỹa lapat. 14Qana'chi naq'áita da' laqátaxac nataq'en so' qadesaliaxanec da' ga' ỹ'axátetapegueegue da' n'aqtac 'me nec'alaxaqui, jega'me naqaida 'me de'quétapiỹi da' l'aqtaxanaxac. 15Qaláxasa jaỹim sa 'te ñiteno'ot da'me jaỹim huet'ot, qataxa sa 'te da' sedétañi jeda'me, da' qaidi 'uo jaga' jaỹim 'auañimii. Qá'a ¡'onaxaico' da' seleu, qaidi qaỹa 'te ga' jaỹim neuótec jeda'me ỹamaic 'me jaỹim huet'ot!
16Qá'a da' jaỹim s'axáteegue da' n'aqtac 'me nec'alaxaqui, qana'chi sa 'te da' ñi'ỹoxodéetapiỹi, qá'a jaỹim qoỹamaxalégue da' sé'et. Qana'chi ¡jaỹim choxodaicolec qomle da' sa s'axáteegue jeda'me! 17Chan'eesa da' mai'chi ñachiỹoxola't da' ỹiinataxac da' sé'et jeda'me, qana'chi 'uo taa'le jaga' ỹaso'vi. Qaláxasa da' 'eesa jaỹim qoỹamaxalégue da' sé'et jeda'me, qana'chi ỹátaqta 'eesa da' jaỹim ỹamaxalégue jeda'me ñi'me Dios. 18Chan'eesa naqaida 'me ñiseeténaguec da' ỹamaic da' s'axáteegue da' n'aqtac 'me nec'alaxaqui, qana'chi sa 'te jaỹim qoỹiseetéetac. Qana'chi sa 'te taa'le ñiteno'ot da' jaỹim huet'ot da' 'uootaxa se'quétapiỹi da' ỹ'aqtaxanaxac.
19Temaqaidi da' qaỹa 'te ga' jaỹim lelatac, qaláxasa sacona da' sega'me jaỹim lelatac ỹima na' siỹaxadipi, qaidi ỹátaqta jalcote na' siỹaxadipi 'me ỹauéguec da' ỹ'amaqten so' Cristo. 20Da' souétaaue na' judío lé'ecpi, qana'chi sadénaxat da' ladíquiaxac jen'me, qaidi ñauec jen'me. Jen'me quétapegue' da' ladíquiaxac na' chiỹoqo'ot so' Moisés 'me naqátaxacpi. Qataxa jaỹim sauaxaỹot na' naqátaxacpi, temaqaidi da' sa 'te da' ỹátaqta sequeelo naua' naqátaxaco. 21Qataxa da' souétaaue na' sa 'equegue na' naqátaxacpi 'me chiỹoqo'ot so' Moisés, qana'chi sadénaxat da' ladíquiaxac jen'me, qaidi ñauec jen'me, temaqaidi da' 'eesa da' jaỹim sequétapegue' da' ladíquiaxac na' laqátaxacpi ñi' Dios, qá'a sóxote da' souet'ot jen' laqátaxacpi so' Cristo. 22Qataxa da' souáaue na' maliaxa sa d'añiiỹi da' lip'iỹáxac, qana'chi sadénaxat da' sega'me sa 'te d'añiiỹi da' ỹip'iỹáxac, qaidi nataq'en ỹauéguec jen'me. Ỹátaqta siquichiilo naua' ladíco ñi' 'oonolec na' ỹodapecachi siỹaxadipi, da' qaidi 'uo ga' ỹadíiuo da' 'uo ga' ỹic'alaqtac jen'me. 23Naqaida ỹima séet'ec ỹasouaxat da' n'aqtac 'me nec'alaxaqui, qaidi jaỹim siviteguet nataq'en ga' chiỹaqaỹi jeda'me n'aqtac.
24'Ami sóxote 'auaỹáchiñii da' 'uootaxa 'uo ga' qomitaxac, qana'chi ỹima ỹátaqta naqalégoq na' noqomitétac, qaláxasa 'oonolec ga' taỹot ga' nemataxanaxat. Chan'eesa 'ami ỹátaqta 'alachichii da' 'analóosaxaquii qomle, qaidi 'auacoñiiỹet ga' mataxanaxat. 25Ỹima jen'me niỹamaxateta't da' tauó'o ga' qomitaxac, ỹátaqta ỹima nodeneguet na'me d'axanataxanaac. Jen'me ỹí'et dójo', qá'a sétaaque da' lemataxanaqte jaga' jaxa'do 'me 'chi 'epaq laỹoqte 'me loquíchiỹi, qana'chi láso. Qaláxasa qo'mi sétaaque da' qademataxanaqte jaga'me qaỹa 'te loiquiaqa'. 26Jaỹim sa 'chi taa'le sa selo'ogue da' ñaqalégoxosoxoc. Qataxa da' ñi'uaxánaxac sa 'te da' 'chi se'uaxaatapeecda. 27Jaldáta da' ỹátaqta mai'chi ñi'uaxaala't da' ỹalaq qasen na' ỹapat, qaidi sa 'te ỹisamaxáỹi da' sapaxaguen ga' ỹaqáỹa, ỹim, qana'chi sa ñateneuo.
Currently Selected:
1 Corintios 9: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.