1 Corintios 8
8
Ga' nalic 'me qonetameelégue da' qoỹanot ga' nadénaqtac
1Naỹi 'ami s'axatema da' ladic ga' nalic 'me qonetameelégue da' qoỹanot ga' nadénaqtac niquí'i, qá'a jaỹim 'aunachíitapeec. Ỹátaqta 'eesa da' qadema saatetonaq dójo', na'chi'ami 'aviñíiỹaac. Qaláxasa da'me naatetonaxanaxac ỹ'oxoneguet da' ni'ỹoxodénaxac ga' siỹaxaua. Qaláxasa da' nesóxodic ỹátaqta nichíiseguem qa'en. 2Da' 'uo ga' nepétetapeela't da' 'uo na' ỹaỹáten, ga'me maliaxása sa 'te da' daỹátenataxan, qá'a maliaxása da' sa 'te ỹátaqta lasoxoc da' laatetonaxanaxac. 3Qaláxasa da' 'uo ga' noqopita ñi' Dios, qana'chi jiñi'me ỹátaqta ỹaatetóota ga'me.
4Chan'eesa ga' nalic 'me qonetameelégue da' qoỹanot ga' nadénaqtac niquí'i, saỹátenaq da' na' nadénaqtacpi 'me huetalquéna ỹátaqta qaỹa 'te ga' nesáaque, qá'a 'oonolec ñi'me qan'étoqo't, qaỹa 'te ga' laqáỹa. 5Temaqaidi da'me 'uo na' qontameetapecotpi 'me sa di'ỹaxa net'ot na' piỹem qataxa huetalégue jen' 'aléua, qá'a ỹátaqta jalcote na' qoỹíitapega net'alpi 'me sa di'ỹaxa qataxa na' nasoxola'pi, 6qaláxasa qo'mi saỹátenaq da' 'oonolec ñi' qan'étoqo't 'me qadet'a. Jiñi'me 'me l'onatac ỹima jen'me huetalquéna, qataxa qo'mi ỹ'e't da' qo'mi lalémaxase'te. Qataxa 'oonolec so' qadesaliaxanec, lenaxat Jesucristo, jeso'me ỹachiỹoxotaỹi qa'en ñi' Dios ỹima jen'me huetalquéna, ỹivid'alo qo'mi.
7Qaláxasa sa 'te ỹima da' qoỹaỹáten dójo'. Qá'a 'uo jen' naỹá'ac da' netamenot na' nadénaqtacpi joca'li, da' maliaxa quéta naỹi da' 'uootaxa ỹalic na' nalic, 'ená'am qa'en ga' nalic 'me qoỹanot ga' nadénaqtac. Qana'chi da' netouénaxac 'me maliaxa sa 'te d'añiiỹi, qana'chi nom'aguet da' qoỹisepaxanaqtet. 8'Eesa da' na' nalic sa 'te sachiỹoxotaqaỹi da' qo'mi ỹiỹamaxadéete' ñi'me Dios. Qá'a ga' nalic da' salíinaq, sa 'te naqaiga da' qo'mi ỹaueegueta da' nó'in qadasoxoc; 'uootaxa da' sa 'te salíinaq, qaláxasa sa 'te qo'mi ỹaueegueta da' sa nó'in qadasoxoc. 9Qaláxasa 'ami 'anchiliiỹo'o' da'me 'adasoxoquii 'me huosóchiiñi da' sa 'te da' 'uo qomle ga' 'adasouaqtaquii jen' maliaxa sa 'te d'añiiỹi da' lip'iỹáxac. 10Saloqtenaxana 'am 'me 'auaỹáten dójo'. Da' 'uootaxa 'oñii'ñisop da' 'auqué'e ga'me huá'a da' qoỹi'ỹoxoden ga' nadénaqtac, qana'chi 'uootaxa 'am ỹauáachiỹi ga' 'adaqáỹa 'me maliaxa sa 'te d'añiiỹi da' lip'iỹáxac, qana'chi ga'me 'adaqáỹa 'uootaxa sa ỹ'añaxachiỹi lauel da' nataq'en di'quiỹápee'uo ga' nalic 'me qoỹanot ga' 'chi nadénaqtac. 11Qana'chi 'am, 'me 'uo da' 'adaatetonaxanaxac, qana'chi 'auqataqtet ga' 'adaqáỹa 'me maliaxa sa 'te d'añiiỹi da' lip'iỹáxac, jega'me 'me nataq'en ỹileualégue so' Cristo. 12Qana'chi da' 'au'quemaqchichii da' netouénaxac ga' 'adaqaỹai 'me sa 'te d'añiiỹi da' lip'iỹáxac, qana'chi 'ená'am da' na'chiso so' Cristo 'me 'au'quemaqchichii. 13Chan'eesa jaỹim da' 'uo ga' sasouaxateguet ga' ỹaqáỹa ỹasouaxat ga' nalic 'me salic, qana'chi n'óota taa'le sa 'te salic ga' lapat, qaidi sa 'te sasouaqtaxan.
Currently Selected:
1 Corintios 8: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.