1 Corintios 7
7
Qouaqáta da' n'onáxac
1Naỹi 'ami s'axatema da' 'aunataxañiitapeelégue ca'li jaỹim 'andenaqchiñíỹa jaso' 'ad'aqtaquii lemalate. Qana'chi jaỹim senapéga da' n'óota da' ga' siỹaxaua sa 'te huó'on. 2Qaláxasa ỹasouaxat da' jalcote jen' quétaaue da' lequeséeguetaxa, qana'chi n'óota ga' 'oonolec siỹaxaua ỹa'uo jaga' lalémaxasete loua, qataxa jaga' ỹauo ỹa'uo ga' lalémaxaset loua. 3Qataxa ga' siỹaxaua 'me sóxote huó'on ỹátaqta ỹilot'eguet jaga' loua. Qana'chi 'ená'am jaga' ỹauo ỹátaqta ỹilot'eguet ga' loua. 4Jaga' ỹauo 'me sóxote huó'on, jaga'me sa 'te lalémaxaset da' lapáchiỹaxac. Na'chi 'ená'am ga' lé'em, ga'me sa 'te lalémaxaset da' lapáchiỹaxac. Qá'a da' 'uona't, qana'chi jaga' ỹauo lalémaxaset ga' lé'em, qataxa ga' lé'em lalémaxasete jaga' ỹauo. 5Qana'chi sa 'te nemáatapega't gaa'me. Jaldáta nichoxotet'a't gaa'me da' ỹauótee ga' lalóqo't da' ma'le namaqa'ña't da' sétaaque da' ỹátaqta nañaateguet da' netamnaxa'j. Qaláxasa da' ỹim, qana'chi ỹitaxa ỹipaquet'egue da' namaqa'ña't, qá'a sa qoue da' ỹasouaxat da' sa 'te naỹáteetela'salo, qana'chi so' paiỹac qadó'o Satanás 'uo ga' ladíiuo da' 'uo ga' lesamaxataxa'j.
6Ỹima da'me 'ami s'axatema, da'me mai'chi ỹichínataxanaxac, qana'chi sa 'te samaxasoxolégue. 7Jaỹim diaqa't ỹiuel naale da' jaỹim 'oñí'ỹam, qaláxasa ñi' Dios ỹanem ñi' 'oonolec na' ỹodet'a't lesetaxanaxat. Ga' 'oonolec mai'chi 'uo ga' lasoxoc, qataxa ga' laqáỹa laqáỹa.
8Jen'me samaxaicpi qataxa jaga' p'ai sanem da' ỹ'aqtac da' n'óota qomle da' sa 'te huó'on, 'ená'am jaỹim. 9Qaláxasa qomle sa 'te ỹaqanatet dójo', qana'chi n'óota da' ỹátaqta huó'on, qá'a sa ỹiỹamaxañi da' maliaxa lauáqtapega qa'en da' l'onáxac.
10Qaláxasa na' sóxote huó'on 'uo da' ỹaqátaxac da' jaga' ỹauo 'ená'te cá'ai ga' loua. Dójo' ỹaqátaxac sa 'te ỹalémaxaset, jeda'me chiỹoqo'ot so' qadesaliaxanec. 11Qaláxasa qomle da' 'uootaxa cá'ai ga' loua, qataxa da' sa 'te ỹitaxa v'iỹílaxaguet, qana'chi n'óota qomle da' sa 'te huó'on. Qana'chi 'ená'am nataq'en ga' lé'em sa 'te cá'ai jaga' loua.
12Na' 'amaqténataxanaxaicpi laỹi da' mai'chi ñachiỹoxola't da' senaac, qana'chi sa naqaiso so' qadesaliaxanec. Da' 'uo ga' 'uootaxa loua jaga' sa 'te d'amaqténataxan, jaga'me da' ỹiỹamaxadéeta da' quétapegue' ga'me, qana'chi ga' lé'em n'óota da' sa 'te cá'ai. 13Da' 'uo jaga' 'uootaxa loua ga' sa 'te d'amaqténataxan, qana'chi ga'me da' ỹiỹamaxadéeta da' quétapegue' jaga'me, qana'chi jaga' ỹauo sa 'te da' cá'ai. 14Qá'a ga' lé'em da' sa 'te d'amaqténataxan ỹivídai'ỹa da' liỹamaxadénataxanaxac ñi' Dios, qá'a ỹasouaxat da' 'uoneguet jaga' 'amaqténataxanaxai, qataxa jaga' ỹauo da' sa 'te d'amaqténataxan ỹivídai'ỹa da' liỹamaxadénataxanaxac ñi' Dios, qá'a ỹasouaxat da' 'uoneguet ga' 'amaqténataxanaxaic. Qá'a taa'le sa 'te 'éeta da'me, qana'chi da' 'adec'óxoquii 'ená'am na' lec'oqtepi na' sa 'te d'amaqténataxan. Qaláxasa naỹi sóxote da' 'ami liỹamaxadénataqa ñi'me Dios. 15Qaláxasa ga' lé'em, 'uootaxa jaga' ỹauo 'me sa 'te d'amaqténataxan, da' sétaaque da' diimaxan, qana'chi diimaxan. Qana'chi da'me 'éeta dójo', qana'chi ga' 'amaqténataxanaxaic, 'uootaxa jaga' 'amaqténataxanaxai, qana'chi ỹitaxa huosóchiiñi. Qá'a ñi' Dios qo'mi ỹiỹaxanalo da' selagaqátapiiñi. 16Qá'a 'am ỹauo, ¿qo'li sa 'te 'amo' da' chiỹoqóchiỹi da' lec'alaxa jega'me 'adoua? 'Uootaxa 'am lé'em, ¿qo'li sa 'te 'amo' da' chiỹoqóchiỹi da' lec'alaxa jaga' 'adoua?
17Temaqaidi da' 'uo ga' lasoxoc ñi' 'oonolec, naqaiga sa 'te ỹaxanéegue. Jaldáta da' ỹilotelégue da' ladíquiaxac ga'me ỹanem so' qadesaliaxanec. Da' 'éeta da' lasoxoc joca'li Dios ỹiỹáxana, qana'chi na'chida qa'en. Qana'chi naqaida 'me ỹima saqátetelégue na' 'amaqténataxanaxaicpi. 18Da' 'uo ga' 'uo ga' n'anaxaset na' ló'oc ca'li ỹiỹáxana ñi' Dios, qana'chi jalda sa 'te ỹaxanéegue. Ga' qaỹa ga' n'anaxaset na' ló'oc ca'li qoỹiỹáxana, qana'chi n'óota da' 'eeta't da' sa 'te ỹa'uo ga' n'anaxaset. 19Temaqaidi da' 'uo ga' n'anaxaset na' ló'oc ga' siỹaxaua, 'uootaxa da' qaỹa, qaláxasa na'chi 'ená'am. Qá'a jalgáta ga' ỹ'e't naua' laqátaxaco ñi' Dios naqaiga 'me ỹiỹamaxaden. 20Ga' siỹaxaua n'óota da' sa 'te ỹaxanéegue ga' lasoxoc joca'li Dios ỹiỹáxana. 21Da' 'uootaxa 'am nelatac joca'li 'am qoỹiỹáxana, qana'chi n'óota da' sa 'te 'au'acalégue da'me. Temaqaidi da'me ga' nolo' da' 'uootaxa 'auaqanatet da' 'am huosóchiiñi, qana'chi lamá'asa 'anpogoxoin. 22Qá'a ga' siỹaxaua da' nelatac joca'li qoỹiỹáxana da' ỹ'amaqten so' qadesaliaxanec, jega'me ỹátaqta huosóta da' quétapegue' so'me. Qana'chi 'ená'am ga' siỹaxaua da' 'uootaxa sa 'te nelatac joca'li qoỹiỹáxana, jega'me naỹi lelatac so' Cristo. 23Qá'a ỹátaqta let'ádaic da' laso'víỹaxac joca'li 'ami neuodenalo ñi'me Dios, chan'eesa 'ená'te taa'le 'ami lelatáqa ga' 'chi siỹaxaua. 24Chan'eesa 'ami ỹaqáỹa', naỹi da' 'equegue ñi' Dios ñi' 'oonolec da' 'oñíita, qana'chi n'óota da' sa 'te ỹaxanáiỹi da' lasoxoc joca'li qoỹiỹáxana.
25Ga'me siỹaxaua 'me maliaxa samaxaic, jaỹim qaỹa 'te ga' ỹaqátaxac chiỹoqo'ot so' qadesaliaxanec da' sanem. Qaláxasa sanem da' ỹiinataxac, qá'a jaỹim ma'le sóvi' da' jaỹim nepé'et ỹasouaxat da' lichoxodénataxanaxac so' qadesaliaxanec. 26Jaỹim da' ỹiinataxac 'enaac: Ga' siỹaxaua n'óota da' na'chi 'ena't sa 'te ỹaxanéegue ga'me huét'a, qá'a naua' noloqo'te 'me qolqataavlo ỹátaqta 'uo da' laqalai'j. 27Da' 'uo jaga' 'adoua, qana'chi 'ená'te 'ocá'ai. Qaláxasa da' qaga 'te 'adoua, qana'chi n'óota da' 'ená'te 'aulótaaque. 28Qaláxasa da' 'uootaxa 'auó'on, qana'chi qaỹa 'te ga' 'adesamaxataxac. Qana'chi 'ená'am jaga' q'añole da' huó'on, qana'chi qaỹa 'te ga' lesamaxataxac. Qaláxasa ga' huó'on, ỹátaqta 'uo da' laqalaic da' nichaalataxac. Naqaida da' laqaláset 'me 'ami sevitaqtéetapeegueta.
29'Ami ỹaqáỹa', da' senaac 'eet'oi: Sóxote da' ma'le sa qaỹádaiỹi naua' noloqo'te. Chan'eesa naỹi na' sóxote huó'on n'óota taa'le da' 'ená'am qa'en da' qaga jaga' loua, 30qataxa jen'me huasouaxaicpi n'óota da' 'ená'am da' sa 'te da' daquicotapiỹe't, qataxa na' netóotapiỹe't, qana'chi 'ená'am taa'le sa 'te netóotapiỹe't, qataxa ga' neuodéna na' leuoxoset qana'chi 'ená'am qa'en da' sa 'te da' lalémaxaset ga' neuodénaxat. 31Qataxa jen'me d'onataxáatapega jen' nep'aỹáñi 'ená'am qa'en da' sa 'te d'onataxana. Qá'a na' ỹ'oqóchiỹi 'me nep'aỹáñi sa 'te loguéegue.
32Sétaaque da' ỹátaqta 'ami huosóchidiñi, qaỹa ga' 'adaqalásichii. Ga' siỹaxaua da' maliaxa samaxaic, ỹátaqta nepogoxói'ne' da' quétapegue' so' qadesaliaxanec, qá'a sétaaque da' qoỹiỹamaxadéeta. 33Qaláxasa da' 'uootaxa ma'le huó'on, qana'chi na' n'onatacpi 'me huetalquéna, qá'a sétaaque da' mátac qa'en jaga' loua. 34Nataq'en jaga' ỹauo da' ma'le huó'on, qana'chi sa 'te 'ená'am jaga' samaxai. Qá'a jaga' samaxai ỹátaqta nepogoxói'ne' da' quétapegue' so' qadesaliaxanec, qá'a sétaaque da' ỹimato'ot da' ỹanot ñi' Dios da' l'óiỹaxac qataxa so' ỹiuoxonaac 'me liquí'i. Qaláxasa jaga' sóxote huó'on ỹátaqta ỹimelégue na' n'onatacpi 'me huetalquéna, qá'a sétaaque da' mátac qa'en ga' loua.
35Da'me ỹ'aqtac 'me 'ami sanema, da'me mai'chi 'adaỹamaxaquii, sa 'te taa'le sega'me ga' 'adiquíchii. Jaldáta da' sétaaque da' qaỹa 'te ga' 'an'aqtaguiquii ga' sa nó'in qataxa qaidi qaỹa 'te ga' 'ami 'adaqalásichii da' 'oquíitapegue' so' qadesaliaxanec.
36Qaláxasa da' 'uo ga' siỹaxaua sa 'te ỹiỹamaxaden da' huó'on jaga' lec'oqte, ỹasouaxat da' napacalégue di'me livídaqa' da' huó'on, jega'me qomle ỹiuen da' huó'on jaga'me, qana'chi n'óota da' ỹí'et ga' 'éetapeec. Qaỹa 'te ga' lesamaxataxac da' ỹ'onáxan jaga' lec'oqte. 37Qaláxasa da' 'uo ga' siỹaxaua laqáỹa qaỹa 'te ga' sega'me qoỹamaxalégue da' 'uo ga' ỹí'et, jaldáta da' huosóchiiñi, da' 'uootaxa sóxote nemá'te' da' leenataxac da' 'uootaxa da' sa ỹ'onáxan jaga' lec'oqte, qana'chi ỹiỹamqáchiiñi da' sa 'te ỹ'onáxan. 38Chan'eesa ga' ỹ'onáxan jaga' lec'oqte n'óota da' 'éet'ec. Qataxa ga' sa ỹ'onáxan jaga' lec'oqte, qana'chi ỹátaqta ỹágueegue da' ỹiỹamqáchiiñi.
39Jaga' ỹauo da' sóxote huó'on, jaga'me sa 'te taa'le qonsoỹíñi da' l'onáxac qomle maliaxa nec'alétaiỹi ga' loua. Qaláxasa ga' loua qomle da' 'uootaxa sóxote ỹileu, qana'chi jaga'me ỹátaqta huosóta da' 'uootaxa 'uoneguet ga' siỹaxaua laqáỹa, qaláxasa n'óota da' l'amaqténataxanaxaua. 40Qaláxasa jaga'me ỹátaqta ỹágueegue da' máchiiñi da' sa 'te ỹitaxa da' huó'on. Naqaida da' ỹiinataxac, qá'a nataq'en jaỹim s'amaqten da' jaỹim neta'nỹet so' lepaqal ñi'me Dios.
Currently Selected:
1 Corintios 7: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.