1 Corintios 6
6
Qoỹin nimit ga' nesamaxataxac ga' net'a 'me sa d'amaqténataxan
1Da' 'uo ga' 'oonolec da' 'oñíita nesamaxatá'ai ga' laqáỹa l'amaqténataxanaxaua, qana'chi ¿tóoqo'chi da' ỹiỹaxanot ga' net'a 'me sa d'amaqténataxan da' ỹiláaque qa'en da' lasoxoc da' nesamaxataxac, qaama'te sa 'te ỹiỹáxanooue jen'me lalémaxasetpi ñi' Dios? 2¿Qo'li sa 'auaỹáchiñiiỹo' da' jen' lalémaxasetpi ñi' Dios da' naqáina 'me nimit qomle ỹima na' huetalquéna siỹaxadipi? Qana'chi qomle 'auañoxochii da' 'anmichii ỹima jen'me siỹaxadipi, qana'chi ¿sa 'te 'auaqanachichiiỹo' da' 'anmichii ga' 'ená'am dójo' qaỹa 'te ga' 'enec? 3¿Qo'li sa 'auaỹáchiñiiỹo' da' sivídaq'a da' ñimitaq qomle nataq'en na' piỹem lé'ecpi Dios lamaxa'spi? Qana'chi ¿'éeto'chi toqo' da' sa saqanateta' naua' huedalégue da' qad'óiỹaxac 'me qaỹa 'te nesédaaque? 4Qá'a da' 'uo ga' cotaxac 'ená'am dójo' 'me 'ami hualóo'te, qana'chi ¿tóoqo'chi 'aviỹáxañiỹa da' nimit da' nasoxoc ga' sa 'te dasoỹapégooue na' 'amaqténataxanaxaicpi? 5Senaac dójo', qaidi 'an'aláqaiñi. ¿Qo'li qaỹo' ga' 'chi 'oonolec da' 'oñíita da' ỹaỹáten da' nimit ga' lesamaxataxac ga' l'amaqténataxanaxaua? 6Da' 'uo ga' 'amaqténataxanaxaic nesamaxatá'ai ga' l'amaqténataxanaxaua, qana'chi ¿qo'li n'óota da' nimi't qoỹin ga' lasoxo'j ga' net'a 'me sa d'amaqténataxan?
7Ỹátaqta 'eesa da' huo'oi naua' cotaxaco 'me 'ami huetañiilo, qana'chi di'ỹoq qa'en da' 'uo da' 'adesamaxataxaquii. ¿Sa 'te ỹiỹamaxaño' da' 'an'añaxachiiỹet ga'me 'ami qoỹ'eteque sa ỹiỹamaxañi? ¿Sa 'te ỹiỹamaxaño' da' 'amachiit'a da' 'ami qodecachiỹoto? 8Qaláxasa 'ami jaldáta da' 'avídii'ỹa da' 'av'íchiic ga' sa ỹiỹamaxañi ga' mai'chi 'ad'amaqténataxanaxauai, qataxa 'aucachiitapecot.
9-10¿'Ami sa 'te 'auaỹáchiñiiỹo' da' ga' ỹ'étec ga' sa ỹiỹamaxañi ga' laqáỹa, qana'chi jega'me sa ỹaqanatet taa'le ỹinoxoneuó'o ga' maliaxa nátauo l'onataxanaxac ñi'me Dios? 'Ená'te 'ami noqovíñii's. Qá'a sa 'te ỹinoxoneuó'o qomle ga' l'onataxanaxac ñi'me Dios jen'me quétapegue' da' lequeséeguetaxa, qataxa jen'me netaméetapecot jen' 'chi nadénaqtac, qataxa na' 'uonáxaỹaic, qataxa ga' ỹacona jen' jaloic jan' ỹauo namaqátapii'ñi' ga' n'imiséua, qataxa na' cacháxaicpi, qataxa na' qopitaxanaqtáqaicpi, qataxa na' latáxa lai'tpi, qataxa na' n'aqtaqa ló'olpi, qataxa na' napogóxot ga' laqáỹa da' naueela't jaga' lemena. 11'Uo na' naq'áita joca'li da' 'oñíita 'ená'am jen'me. Qaláxasa ma'le 'ami qoỹiỹóte', qataxa sóxote da' 'anañiiỹot ñi' Dios, qataxa ñi'me sóxote 'ami ỹiỹamaxade'n. Da'me dójo' chiỹoqo'ot so' qadesaliaxanec Jesús qataxa so' lepaqal ñi' qadet'a Dios.
Da' qadapáchiỹaxac lalémaxaset ñi' Dios
12'Eesa naale da' 'enaac da' n'aqtac: “Sa 'te qoỹ'iláxatem ñi' 'oonolec siỹaxaua ga'me 'éeta ga' ỹí'et.” Qaláxasa sa 'te ỹima na' nasoxocpi da' ỹiỹamaxaỹi ga' siỹaxaua. Já'a, 'eesa da' sa 'te qoỹ'iláxatem ñi' 'oonolec siỹaxaua ga'me 'éeta ga' ỹí'et, qaláxasa ga' siỹaxaua 'ená'te taa'le 'en laqaláset ga' ỹí'et. 13'Eesa naale da' 'enaac da' n'aqtac: “Ga' nalic qoỹa'uo qaidi tánỹi jan' qadetá'am, qana'chi jan' qadetá'am qoỹa'uo da' qaidi huápiinỹi jen' nalic.” Qaláxasa ñi'me Dios 'en qaỹaua qomle naa'me. Chan'eesa sa qoỹa'uo da' qadapáchiỹaxac da' ló'o da' nequeséeguetaxa. Jaldáta da' qoỹa'uo da'me da' lalémaxaset so' qadesaliaxanec, qataxa so' qadesaliaxanec naga da' nec'alaxatéegue da' qadapáchiỹaxac. 14Ñi'me Dios 'me nec'alaxadiséguem so' qadesaliaxanec joca'li qoỹalaat, ñi'me nataq'en qo'mi nec'alaxachidíseguem da'me mai'chi lañoqtaxanaxac.
15¿Sa 'auaỹáchiñiiỹo' da' lapáchiỹaxac ñi' 'oonolec da' 'oñíita da' ỹoqotéta'uo da' lapáchiỹaxac so' Cristo? Qana'chi ¿qo'li n'óota da' ñaqatee'guesop ga' ỹoqotéta'uo 'me lapáchiỹaxac so' Cristo, ỹim, qana'chi ỹoqoteuo qasen da' lapáchiỹaxac jaga' queséeguetaxai? ¡'Axai', sa 'te 'éeta da'me dójo'! 16'Uootaxa ¿sa 'auaỹáchiñii jodamaxa da' 'uo ga' 'uoneguet jaga' queséeguetaxai, qana'chi gaa'me dos 'ena'ama da' 'oonolec da' napáchiỹaxac? Qá'a 'enapega't naua' nidii's l'aqtaqa ñi'me Dios, 'enapega't: “Gaa'me dos ỹivideguet da' sega'me 'oonolec.” 17Chan'eesa ga' 'oonolec siỹaxaua da' ỹoqotéta'uo so' qadesaliaxanec, qana'chi 'ena'ama da' 'oonolec, qá'a necoindétraỹi so' lepaqal ñi' Dios.
18Chan'eesa 'auasoỹíi'ỹem da' nequeséeguetaxa. Jen' laỹi sa ỹiỹamaxañi jen'me ỹí'et ga' siỹaxaua, jen'me sa 'te táaue da' lapáchiỹaxac. Qaláxasa ga' quétaaue da' lequeséeguetaxa, qana'chi jega'me mai'chi ỹasouaxat da' mai'chi lapáchiỹaxac. 19¿Sa 'auaỹáchiñiiỹo' da' 'adapáchiỹaxaquii da' 'ená'am da' l'emec so' Espíritu Santo 'me 'ami ỹanema ñi' Dios, qana'chi so'me 'ami netaavlo? Chan'eesa 'ami sa 'te 'adalémaxasichii da' 'adapáchiỹaxaquii, 20qá'a ñi'me Dios 'ami neuodénaqa'te joca'li, ỹátaqta sa lequeseuó'o da'me 'adasiichíỹaxaquii. Chan'eesa ỹátaqta 'amachiỹo'ot ñi'me Dios da' li'ỹoxodénataxanaxac da' 'adapáchiỹaxaquii qataxa ñi' 'ami ỹiuoxona'pe 'adiquí'ii, qá'a jenaa'me lalémaxase'te ñi'me Dios.
Currently Selected:
1 Corintios 6: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.