1 Corintios 5
5
Sa qoỹiỹamaxaden da' l'onáxac so' siỹaxaua
1Sóxote da' qoỹaỹáten'a't da' 'uo na' 'oonolec da' 'oñíita 'me 'ami netaavlo da' 'uoneguet jaga' lasoxoua. Dójo' n'onáxac, jeda'me ỹátaqta sa 'te qoỹisiquiaxaná'a. Jeda'me sa 'te ỹisiquiaxaná'a jen'me matemané'e sa ỹaateton ñi'me Dios. 2¡Qaa'le maliaxa 'ami ỹátaqteque da' 'ani'ỹoxodénaxaquii! ¡Taichaqai'me ỹátaqta da' 'auaquicoi! Jega'me siỹaxaua 'me ỹacoñíỹi dójo' let'ádaic sa 'te ỹiỹamaxañi, ỹátaqta 'au'odíỹaiỹi toqo', qana'chi sa 'te 'eeta't da' 'ami netaavlo. 3Qá'a temaqaidi da' sa 'te 'ami souetaavlo da' ỹó'oquiaxac, qaláxasa da' ỹiviliỹáxac 'me sóxote da' 'ami huetaavlo. Qana'chi sóxote ñimá'te' da' ỹiinataxac da' 'ená'am da' sóxote 'au'odíỹaiỹi ga'me siỹaxaua 'me ỹa'uo da'me let'ádaic sa ỹiỹamaxañi, 'ená'am da' 'ami souetaavlo. 4'Adimíitapega't qomle da' 'anasóiỹi da' lenaxat so' qadesaliaxanec Jesucristo. Qana'chi jaỹim jeda'me ỹiviliỹáxac 'ami souetaavlo, qataxa da' lañoqtaxanaxac so' qadesaliaxanec Jesús 'ami huetaavlo. 5Ỹim, qana'chi jega'me siỹaxaua qoỹanot so' paiỹac qadó'o Satanás, qaidi da' ló'oquiaxac qonoláxachiñi, qaláxasa qonec'alaxatéegue jeso'me ỹiuoxonaac liquí'i, qomle n'iỹílaq so' qadesaliaxanec Jesús.
6'Ami sa ỹiỹamaxañi da' 'ani'ỹoxodíñiitapiỹi da' 'av'íchiitac. ¿Sa 'auanómiỹo' jodamaxa n'aqtac 'me 'enaac: “Ga' cat'oñooc lale'gue jan' pan ỹátaqta quíchiỹi da' ỹasiidíỹi qa'en ỹima ga' nonáñiisec 'arína?” 7Chan'eesa 'ená'te 'aualícchiñiiỹet qomle jen' toisec lale'gue jan' pan 'me 'ami n'áxa't, qaidi 'oñí'ỹam ga' dálaxaic nonáñiisec 'me nedóchiiñi da' qoỹí'et jan' pan 'me qoỹiloxónaxa'ta da' qoỹalic da' ỹivíta ga' nolo' nemáxaqui 'me lenaxat pascua. Qá'a 'ami 'me 'oñí'ỹam ga' dálaxaic nonáñiisec. Qá'a so' Cristo 'me sóxote da' qoỹalaat da' qo'mi ỹileelóo'te, jeso'me naqaiso so' sega'me n'aanaxate lec'óxot 'me salíinaq da' ỹivíta ga' nolo' 'me pascua. 8Chan'eesa da' qolqátapegue' ñi' Dios, n'óota da' qolaxague da' huosóta nadíquiaxac qataxa 'eesa nasoxoc 'me 'ená'am da' salíinaq jan' pan 'me nedóchiiñi. Qana'chi sa 'te qolaxague da' sa ỹiỹamaxañi qataxa ga' sa nó'in 'me 'ená'am jan' pan 'me 'uo jen' toisec lale'gue.
9Jaso'me ỹidíise laqáỹa 'me sóxote 'ami sedénaqtenalo senaac ca'li da' sa 'te 'aualiquiỹiỹet jen' queséeguetaxaicpi. 10Sa 'te 'ami senapegalo da' ỹime'sa't da' sa 'aualiquiỹiỹet ỹima na' siỹaxadipi 'me queséeguetaxaicpi, 'uootaxa na' qopitaxanaqtáqaic, 'uootaxa ga' cacháxaic, 'uootaxa na' netaméetapecot na' 'chi nadénaqtacpi. Qá'a da' 'avichiỹa'aguet jen'me, qana'chi 'ená'am taa'le ỹátaqta 'oquí'ỹai jen' 'aléua. 11Jeda'me senaac seet'oi: 'Ená'te 'aualiquiỹiỹet da' 'uo ga' 'éetapega da' 'ad'amaqténataxanaxauai, qaláxasa da' quétaaue da' lequeséeguetaxa, 'uootaxa qopitaxanaqtáqaic, 'uootaxa netaméetapecot na' 'chi nadénaqtac, 'uootaxa n'aqtaqa ló'o, 'uootaxa taxaic, 'uootaxa cacháxaic. Cha ỹivíd'a da' 'ená'te da' 'chi 'adiqui'ỹáxauai ga' lasoxoc dójo'. 12-13Qá'a jaỹim sa 'te taa'le se'uailégue da' ñimit ga' sa 'te d'amaqténataxan. Ñi'me Dios 'me nimit qomle jen'me. Qaláxasa 'ami mai'chi 'anmichii na' sóxote da' d'amaqténataxan. Chan'eesa 'anaqchiỹíiỹi ñi'me loico ló'o 'me 'ami netañiilo.
Currently Selected:
1 Corintios 5: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.