1 Corintios 4
4
Da' l'onataxanaxa'j saua' Jesús lamaxa's
1Chan'eesa 'ami, da' qo'mi 'autaqaiỹa'alo, qaláxasa 'chi qo'mi 'aumachiỹa'aque da' qo'mi lecochaxa'u so' Cristo, qataxa qo'mi qoỹipataxalóo'te da' sapaxaguenataxanaxac da' lasoxoc da' sa di'ỹoq 'me chiỹoqo'ot ñi' Dios. 2Chan'eesa jega'me 'uo ga' qoỹipataxalégue ỹiuen da' ỹátaqta nepé'et. 3Qaláxasa jaỹim sa ñiteela't da' 'uo ga' jaỹim 'auañíitapegooue, 'uootaxa da' jaỹim qoỹasoxonot ga' ỹ'oqóchiỹi net'a da' jaỹim nimit. Qana'chi 'ená'am jaỹim sa 'te da' mai'chi ñimitetapeela't. 4Qá'a temaqaidi da' sa 'alóxoỹi di' ỹiuel, qaláxasa sa se'uailégue da' senapeela't da' qaỹa 'te ga' ỹisamaxataxac. Qá'a so' qadesaliaxanec Jesús 'me na'chiso 'me jaỹim nimit qomle. 5Chan'eesa 'ami 'ená'te taa'le 'uo ga' 'au'aviilégue da' 'anmichii. 'Auachiiỹa'aguet so' qadesaliaxanec qomle n'iỹílaq da' di'ỹoq qa'en na' huétaaue na' n'álaxa. Jeso'me 'me ỹ'ouatelégue na' 'éetapeecpi jan' niquidiaqtepi. Ỹim, qaama'le ñi' Dios ỹaconeguet ñi' 'oonolec da' ỹanem ga' ỹátaqta 'eesa niỹamaxadénataguec.
6'Ami ỹaqáỹa', 'ami s'axatema dójo', jeda'me mai'chi 'adaỹamaqai. Saloqtenaxáatapiỹi so' Apolos qataxa jaỹim, da' qaidi qo'mi 'auachiỹoqoitelóo'te da' 'auaỹáchiñiita da' sa 'te 'anapaquiỹapeelóo'te naua' nidii's n'aqtaqa, qaidi qaỹa 'te ga' ni'ỹoxodéetapecot ga' siỹaxaua laqáỹa, qaláxasa ga' laqáỹa ỹ'otan. 7Qá'a ¿jái'chogamaxa 'am ỹanem da' 'anapacalégue na' 'adaỹi? ¿Qo'li sa 'te chiỹoqo'oto' ñi' Dios jen'me 'am huet'ot? Jiñi'me 'me 'am ỹanem jen'me 'am huet'ot, qana'chi ¿tóoqo'chi 'ani'ỹoxodéetapiỹi, 'ena'amo' da' ỹima na' 'am huet'ot mai'chi 'ad'añaxadet?
8'Ami 'ená'am da' sóxote ma'le 'ami saliaxanqa, qataxa 'ami huet'oto ỹima na' 'adeuénquii. 'Ená'am taa'le 'ami net'al, qana'chi qo'mi sa 'te qo'mi 'aupaquiỹápee'to. ¡'Onaxaico' da' 'ami 'eesoda da' net'al, qaidi nataq'en da' ñiuanaqa'ualo 'ami da' qo'mi net'al! 9Qá'a séetapega da' ñi'me Dios qo'mi ỹip'áxatreegue 'me qo'mi Jesús lamaxa's da' qaỹa 'te ga' qadesáaque. Senqá'am ga' siỹaxaua 'me let'ádaic ga' lesamaxataxac, qana'chi qoỹalaat. Sevídaqat'aguet da' qo'mi qoni'vinỹiilo da' qo'mi ỹic'ate'n ỹima na' chiỹaqséguem Dios lamaxa'spi qataxa ỹima na' siỹaxadipi. 10Qo'mi qoỹanque da' qaỹa 'te saỹátenqaac, ỹasouaxat da' qolqátapegue' so' Cristo, 'ami qaa'le 'oñíỹapeela't da' 'auaỹáchiñiit'egue da' ladíquiaxac so' Cristo. Ñacagaqáñi qo'mi, qaamachaxa 'ami 'oñíỹapeela't da' 'ami 'uañaxaiqa. Na' siỹaxadipi qo'mi ni'vinỹiilo, qaláxasa ỹátaqta 'ami qoỹauo'oi. 11Cha ỹivíd'a naỹi da' qane'queténaxac da' qadoqouáxa, qataxa qadiliinquip, qataxa qaỹa 'te ga' qadoxot. Na' siỹaxadipi sa 'te qo'mi ỹodin'ape, qataxa qaỹa 'te ga' qad'acháqa'. 12Qadilíitañi ỹasouaxat da' qad'onataxanaxac. Na' siỹaxadipi qo'mi ỹisoueetalóo'te, qaláxasa qo'mi sasáasoqtalóo'te naua' qadosáxaco ỹiỹamadíchidiñi. Qo'mi qoỹicaat'ape, qaláxasa ñiuénaxaguet da' qancanáguec. 13Sa 'te qoỹodiáquena'salo da' qo'mi dosi'ỹalo, qaláxasa 'chi ñapogáxadenaxaguet da' saqátaqtapega. Naỹi maliaxa 'eeta't da' qo'mi qoỹiit'ema ga' lasoỹíñi, 'uootaxa na' liimec jen'me siỹaxadipi.
14Dójo' sidíñi, jeda'me sa 'te da' 'uootaxa 'ami s'aloqte't. Jaldáta da' sétaaque da' 'ami saqatalo, seet'ema 'ami da' ỹoqopi'chi ga' ỹalec. 15Qá'a temaqaidi da' ỹóvi' ga' diez mil na' 'ami ỹapaxaguenque so' Cristo, qaláxasa sa 'te jalcote na' 'adet'aipi. Qá'a jaỹim 'me jaỹim let'a da' 'adip'iỹáxaquii so' Cristo Jesús. Qá'a jaỹim 'me 'ami s'axatema ca'li da' 'ónaxaic qadipí'ic 'me nec'alaxaqui. 16Chan'eesa 'ami ñachoxodeetoovlo da' 'oquiitelégue da' ỹasoxoc.
17Chan'eesa sóxote 'ami samaxalo so' Timoteo 'me 'ená'am da' ỹaleesa, qá'a jaỹim ỹachiỹoxoto'ot da' 'equegue so' qadesaliaxanec. Jeso'me 'ami ỹiinataxanaxanque da' 'éeta da' ỹasoxoc da' sequétapegue' so' Cristo 'me sapaxaguéetapeec ỹima jen' qantamnaxaquipi 'me na'alo naua' 'ale'u laqáỹa'. 18'Uo jen' sa 'te nalo'oguet da' ni'ỹoxodénaxac da' 'ami 'me ỹipétetapega taa'le sa 'te 'ami sesapchiỹalo. 19Qaláxasa sa 'te ñiỹáloxoden qomle da' 'ami ñauaa'to, qomle jaỹim ỹanem ga' ỹiuoxoc so' qadesaliaxanec. Huá'a, qana'chi saỹáteeta jega'me 'éeta ga' l'añaxac ga' ỹ'oxodénaxaicpi, qaidi sa 'te 'chi l'aqtaqa naua' qoỹ'axátet'ape. 20Qá'a da' l'onataxanaxac ñi'me Dios da' ỹilo'ogue ỹimata'a'téna sa 'te nedóchidiñi naua' n'aqtaqa. Qá'a jeda'me ỹátaqta nañoqtaxanaxac. 21¿Jái'chogamaxa 'aupaquíitaaque da' 'ami sedolóo'te qomle 'ami sivitalo? ¿Qo'li 'aviỹamaxadíñi da' 'ami sedolóo'te ga' ỹalaqáinaxanaxat, 'uootaxa da' ỹisóxodic qataxa huosóta da' ỹasoxoc?
Currently Selected:
1 Corintios 4: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.