1 Corintios 3
3
Qo'mi necochaxau'pi da' l'onataxanaxac ñi' Dios
1'Eesása, 'ami ỹaqáỹa', da' jaỹim sa 'te da' 'ami da' setaxaavlo ca'li da' sadénaxat ga' siỹaxaua 'me neta'nỹet so' lepaqal ñi'me Dios. Jaldáta da' séet'em qasen da' 'ami ga' siỹaxaua 'me maliaxa quétapegue' da' nisiỹaxauáỹaxac, qá'a 'ami sega'me da' maliaxa nootolec da' 'adip'iỹáxaquii so' Cristo. 2'Ami sanema da' napaxaguenataxanaxac 'me ỹisóteta, 'ami seet'ema ga' nootolec 'me maliaxa huanoquétac qoỹáat'am jan' nóchi', sa qoỹanem ga' nalic 'me d'añi. Qá'a 'ami maliaxa sa 'auaqanachichii da' 'aualíquii ga' nalic 'me d'añi. Qaláxasa ỹa quéta naỹi da' sa 'auaqanachichii da' 'aualíquii ga' nalic 'me d'añi, 3qá'a maliaxa 'oquíitapegue' da' mai'chi 'ansiỹaxauáỹaxaquii. Qá'a da' maliaxa 'andáqaitapega't, qataxa 'anágaqchiñiitapega't, qataxa 'ami colqátaỹilo, qana'chi ỹ'oqóta da' 'ami maliaxa 'oquíitapegue' da' 'adapáchiỹaxaquii, 'oñí'ỹam da' loic ỹima na' siỹaxadipi laỹi. 4Qá'a da' 'uo na' 'enaac: “Jaỹim lauégaqtac so' Pablo,” qataxa ga' laqáỹa 'enaac: “Jaỹim qamqaa'me lauégaqtac so' Apolos,” qana'chi di'ỹoxosa da' 'ami 'oñí'ỹam ga' siỹaxaua 'me quétapegue' da' 'chi nisiỹaxauáỹaxac.
5Qá'a ¿jái'chogamaxa ñisáaque jaỹim Pablo? ¿Jái'chogamaxa nesáaque ga' Apolos? 'Chi qo'mi lamaxa's ñi'me Dios, qo'mi 'auachiỹoxochiỹaỹilo da' 'uo da' 'ad'amaqténataxanaxaquii so' qadesaliaxanec Jesús. Ñi' 'oonolec da' senqáta ỹí'et ga' l'onataxanaxac 'me ỹanem ñi' qadesaliaxanec Dios. 6Jaỹim saañi ca'li jan' peta, qana'chi so' Apolos janac da' ỹipetelégue, qaláxasa ñi'me Dios 'me naséguem qa'en. 7Chan'eesa ga' janaxanaxaic qataxa ga' ỹipetetapeelégue qaỹa 'te ga' nesáaque. Na'chiñíta ñi'me Dios 'me 'uo da' nesáaque, qá'a naqaiñi 'me 'en naqaloxodíseguem jan' nañiise. 8Ga' janaxanaxaic qataxa ga' ỹipétapecot na'chi 'eet'a'salo, temaqaidi ñi' 'oonolec ỹaconeguet da' neseeténaguec da' l'onataxanaxac qomle ỹiseeten ñi'me Dios. 9Qá'a qo'mi necochaxa'u da' l'onataxanaxac ñi' Dios. Qana'chi 'ami 'oñí'ỹam ga' lanaxanqa' ñi' Dios.
Qataxa nataq'en 'oñí'ỹam ga' 'emec 'me n'oxótapiiseguem ñi' Dios. 10Qana'chi jaỹim sená'am ga' ỹilapeelégue na' 'emec ló'olpi, qá'a ñi'me Dios jaỹim ỹanem da' ỹapaxañi so' 'en d'anỹapeeguet so' 'emec. Qana'chi 'uo na' n'oxótapiiseguem so'me. Qaláxasa ñi' 'oonolec ỹiuen da' ỹilotelégue da' lasoxoc da' d'onataxan. 11Chan'eesa qaỹa 'te laqáỹa taa'le ỹitaxa lapaxañi ga' 'en d'anỹapeeguet ga' 'emec, qá'a sóxote 'uo so' qolapaqátañi, 'me na'chiso so' Jesucristo. 12Qaláxasa ga' 'oonolec ỹaqanatet taa'le ỹ'oxoolégue so'me d'anỹapeeguet qa'en ga' 'emec, ga' laicaua oro, qataxa plata, qataxa ga' qa' qasélgaxadaic qaỹá'uo jaga' laso'vi, 'uootaxa 'en ga' 'epaq, qataxa jen' 'auqapi, qataxa jan' coqta lat'e. 13Ga' l'onatac ñi' 'oonolec di'ỹoq qomle ỹivíta ga' nolo' p'áteegue. Qá'a ga'me nolo', qana'chi janac ga' dóle', qana'chi jega'me dóle' ỹavic qa'en na' ỹodapecachi n'onatacpi. Huá'a qomle, qana'chi di'ỹoq ga' lasoxoc ga' l'onatac ñi' 'oonolec. 14Qomle 'uo ga' 'oonolec n'oxooséguem ga' 'emec, da' nala'aguet ga' dóle', qana'chi jega'me ỹaconeguet qomle jaga' laso'vi. 15Qaláxasa ga' ỹavic ga' l'onatac, huá'a, qana'chi ỹima daqat da' l'onataxanaxac, temaqaidi jega'me qonec'alaxatéegue, qaláxasa 'ená'am ga' litec ga' dóle'.
16¿'Ami sa 'auaỹáchiñiiỹo' da' 'oñí'ỹam ga' l'emec ñi' Dios, qana'chi so' lepaqal jiñi'me 'ami netaavlo? 17Da' 'uo ga' noláxachiñi na' l'emec ñi' Dios, qana'chi jiñi'me noláxachiñi jega'me siỹaxaua. Qá'a jen'me l'emec ñi' Dios ỹátaqta lalémaxaset ñi'me, qataxa jen'me 'emec na'chada da' 'oñíita.
18Qaỹa 'te qomle ga' noqovíitapeela't. Qomle 'uo ga' nepétetapeela't da' ỹaỹáten da' ladíquiaxac jen' naỹátenaxanaxac 'me l'achaq'áina, ga'me n'óota da' ỹacona da' qaỹa 'te ỹaỹáten, qaidi ỹátaqta 'eesa da' ỹátenaxanaxaic. 19Qá'a da' naỹátenaxanaxac 'me l'achaq'áina, jeda'me 'ená'am da' 'chi naỹáquiaxac qa'en ñi' Dios. Qá'a naua' nidii's n'aqtaqa 'enapega't: “Ñi' Dios mai'chi líisec qa'en na' ỹátenaxanaxaicpi naua' mai'chi lapogoqtaxanaxaco.” 20Qataxa 'enaac: “Ñi' qadasoxola' Dios ỹaỹáten da' leenataxac na' ỹátenaxanaxaicpi da' qaỹa 'te ga' náaue.” 21Chan'eesa qaỹa 'te ga' napágaqtenaac da' ỹi'ỹoxodéetac ga' 'chi siỹaxaua, qá'a ỹima na' huetalquéna, jen'me 'adalémaxasichii: 22temaqaidi da' Pablo, 'uootaxa Apolos, 'uootaxa Pedro, 'uootaxa jen' 'aléua, 'uootaxa da' nec'alaxa, 'uootaxa da' neleuaxa, 'uootaxa naua' qanoloqo'te, 'uootaxa ga' maliaxa naỹáuo, ỹima jen'me mai'chi 'adalémaxasichii. 23Nataq'en 'ami lalémaxase'te so' Cristo, qataxa so' Cristo lalémaxaset ñi'me Dios.
Currently Selected:
1 Corintios 3: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.