1 Corintios 2
2
N'aqtaguec so' Cristo ca'li qoỹip'enaséguem
1Chan'eesa 'ami ỹaqáỹa', ca'li 'ami sec'atalo da' 'ami s'axatema da' 'eesa lasoxoc 'me chiỹoqo'ot ñi'me Dios, qana'chi sa 'te taa'le saconalo naua' losáxaco na' ỹátenaxanaxaicpi, 'uootaxa naua' n'aqtaqa 'me lepoliodi. 2Qá'a jeso'me ca'li 'ami souetaavlo, qana'chi sacona da' qaỹa 'te ga' taỹapíỹi di' ỹiuel, jalsóta so' Jesucristo 'me qoỹip'enaséguem. 3Ca'li 'ami ñichaatoovlo, qana'chi qaỹa 'te ga' ỹ'añaxac qataxa tevíloxolaqtet da' ỹoqolánaxa. 4Chan'eesa ca'li sosétaac da' s'axátetac, qaa'le sa 'te saconalo naua' losáxaco ga' siỹaxaua ỹátenaxanaxaic, da' qaidi 'au'amaqténataxañii. Jalsóta so' lepaqal qataxa da' lañoqtaxanaxac ñi'me Dios jeda'me 'uo da' 'au'amaqténataxañii ca'li 'ami s'aqtaxáatapeema. 5Chan'eesa da' 'adip'iỹáxaquii sa 'te da' nesoctalégue da' laỹátenaxanaxac ga' 'chi siỹaxaua, jaldáta da' lañoqtaxanaxac ñi' Dios.
So' lepaqal ñi' Dios ỹaatetonaxanaxanec na' siỹaxadipi jiñi'me
6'Eesa da' qo'mi sosaxaỹilo naua' nosáxaco 'me naỹátenaxanaxaco, qaláxasa na'chínata jen'me sóxote ma'le d'añi da' lip'iỹáxac. Qaláxasa dójo' naỹátenaxanaxac sa 'te chiỹaqalquéna qataxa sa 'te chiỹoqo'ot jen' net'alpi 'me 'aléua lé'ecpi, 'me sa 'te loguéegue. 7Da'me naỹátenaxanaxac 'me sosáxanaxanaqtac, jeda'me sa di'ỹoq 'me chiỹoqo'ot ñi'me Dios. Naqaida da' mai'chi 'éetapeec jiñi'me joca'li maliaxa qaỹa jen' 'aléua da' sétaaque qaidi 'uo da' qadec'alaxa 'me qaỹa 'te loiquiaqa'. 8Jen' net'alpi 'me netalégue jen' 'aléua, qaỹa 'te ga' ỹaỹáten dójo' naỹátenaxanaxac. Qá'a taa'le ỹaỹáten dójo', qana'chi sa ỹip'enaséguem táxa so' qadesaliaxanec 'me ỹ'oxodaic. 9Qaláxasa táchiỹi da' 'enapega't naua' nidii's n'aqtaqa, 'eet'oi:
Ñi' Dios ỹaqátaxaatapiỹe't da' ỹanem jega'me ỹauotec jiñi'me
jen'me qaỹa 'te taa'le 'chi petelaxanapéga,
'uootaxa 'chi naquiáxanapeelégue, qataxa maqchaxa taa'le taỹapíỹi lauel.
10Naqáina jen' qo'mi ỹaatetonaxanaxanque ñi'me Dios, chiỹoqóchiỹi qa'en so' lepaqal, qá'a jeso'me ỹima nimitétac, qataxa ỹivíd'a da' ỹaỹáten na' sa di'ỹoq 'éetapeecpi ñi'me Dios.
11Jen' siỹaxadipi ¿jái'chogamaxa ỹaỹáten ga' leenataxac ga' siỹaxaua laqáỹa? Na'chisóta so' liquí'i 'me ỹiuoxonaac 'me ỹaỹáten. Qana'chi naq'áita nataq'en so' lepaqal ñi' Dios na'chisóta 'me ỹaỹáten ga' leenataxac ñi'me Dios. 12Qana'chi qo'mi sa 'te da' qo'mi taavlo so' nepaqal 'me chiỹaqalquéna, jalsóta so' lepaqal ñi' Dios, 'me qo'mi taavlo, qaidi saỹátenaq da' 'achíquiaxac 'me qo'mi ỹanema ñi'me. 13Qo'mi da' s'axátaq dójo', qana'chi sosaxaỹilo naua' n'aqtaqa 'me qo'mi ỹapaxaguenque so' lepaqal ñi' Dios, qana'chi sa 'te naqainaua naua' n'aqtaqa 'me sachiỹoxotaqáaue da' mai'chi qadaỹátenaxanaxac. Naq'áita da' s'axáta' naua' sa di'ỹaxalo lasoxoco da' s'aqtaxanaxam jega'me neta'nỹet so' lepaqal ñi' Dios.
14Ga' siỹaxaua 'me sa 'te neta'nỹet so' lepaqal ñi' Dios, qana'chi sa 'te ỹaconeeta naua' 'éetapeeque jeso'me. Qá'a jega'me da' naquiáxatapega, qaláxasa 'ená'am qa'en da' 'chi naỹáquiaxac. Sa 'te demachíỹa jeda'me, qá'a da' qonimit, qana'chi qoỹiuen da' lecochaxac so' lepaqal ñi' Dios. 15Qaláxasa ga' siỹaxaua 'me neta'nỹet so' lepaqal ñi' Dios, jega'me 'me nimit ỹima na' nasoxocpi. Jega'me qaỹa 'te ỹaqanatet taa'le nimit. 16Qá'a naua' nidii's n'aqtaqa 'enapega't: “¿Jái'chogamaxa ỹaỹáten ga' leenataxac ñi' qadesaliaxanec Dios? Qataxa ¿jái'chogamaxa ỹaqanatet taa'le ỹapaxaguen ñi'me?” Qaláxasa qo'mi sóxote qo'mi huet'oto da' leenataxac so' Cristo.
Currently Selected:
1 Corintios 2: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.