1 Corintios 14
14
Da' 'éeta da' qodetaxaỹilo naua' ỹoda'alo n'aqtaqa
1'Aupaquiỹápegue' qomle da' 'uo da' 'adesóxodiquii qataxa da' 'ami ỹanema ñi'me Dios na' lesetaxanaxatpi, qaláxasa ỹágueegue 'aviñii qomle da' 'au'axáchii' naua' l'aqtaqa. 2Qá'a ga' siỹaxaua 'me detaxaỹilo naua' ỹoda'alo n'aqtaqa, jega'me 'me dosétapegue' ñi'me Dios, qana'chi sa 'te naqáina na' siỹaxadipi. Qá'a qaỹa 'te ga' demachiiỹet. Ga'me naa'me 'enapegalo qa'e'n so' lepaqal ñi'me Dios, qaláxasa ỹ'axat na' 'eesa nasoxocpi 'me sa di'ỹoq. 3Qaláxasa ga' ỹ'axa't naua' l'aqtaqa ñi'me Dios, jega'me d'aqtaxanem ga' laqáỹa da' nichíiseguem qa'en, qataxa da' ỹ'añaqtet, qataxa ỹa'uo lamaic. 4Ga'me ỹañoxot da' dosiilo naua' ỹoda'alo n'aqtaqa, jega'me mai'chi nichíctaseguem. Qaláxasa ga' ỹ'axa't naua' l'aqtaqa ñi' Dios, jega'me nichíctaseguem qa'en na' 'amaqténataxanaxaicpi.
5Jaỹim quiliisaxa da' ỹima da' 'oñíita 'auosiỹiilo naua' ỹoda'alo n'aqtaqa, qaláxasa ỹágueegue qasen da' quiliisaxa da' 'au'axáchii' naua' l'aqtaqa ñi'me Dios. Qá'a ỹágueegue ga' náaue da' qoỹ'axat da' n'aqtac, sa 'ená'am da' qodosiilo naua' ỹoda'alo n'aqtaqa. Lamá'asa da' sa qoỹ'axat ga' náaue jenaa'me n'aqtaqa, da' qaidi nichíiseguem na' 'amaqténataxanaxaicpi. 6Chan'eesa 'ami ỹaqáỹa', da' 'uootaxa 'ami sec'atalo da' 'ami s'axatema, qana'chi 'ami sedolóo'te jenaa'me n'aqtaqa 'me ỹoda'alo, qana'chi da' 'uootaxa sa 'te sichoxot ga' qo'mi ỹaỹátenaxanaxanque ñi'me Dios, 'uootaxa ga' naatetonaxanaxac, 'uootaxa ga' n'aqtaxanaxac 'me chiỹoqo'ot ñi'me Dios, 'uootaxa ga' napaxaguenataxanaxac, qana'chi ¿jái'chogamaxa 'auachiỹoxochiỹaỹi da'me ỹosáxac? ¡Qaỹa!
7Saloqtenaxanaxa jaga' naseede qataxa jaga' nivique 'me sa 'te da' dose: da' sa 'te di'ỹoxogue ga' laviliỹáxac da' qoỹiviquíitapiỹi, qana'chi sa 'te qoỹaỹáten ga' lalac. 8'Uootaxa da' qoỹic'áta ga' laataqa', qana'chi da' qoỹasiidíỹi jaga' naseede da' 'uootaxa sa 'te ỹataxalégue da' lesamaxa, qana'chi qaỹa 'te ga' niỹamaxataxac da' ỹic'áta ga' laataxac. 9Na'chi 'ená'am da' 'ami: da' naua' n'aqtaqa 'me 'anasaqáitrapegueegue, da' sa 'te qodemachiiỹeta, qana'chi ¿'éeta toqo' da' qoỹaỹáten ga'me 'oñíitapeec? Qana'chi ¡'ená'am 'chi 'au'axáchiitac díja'! 10Jalcote na' ỹodapecachi siỹaxadipi 'me huetalquéna, 'me ỹodapecachi naua' l'aqtaqa, qaláxasa ỹima jen'me mai'chi naỹáchiichiilo naua' l'aqtaqa. 11Chan'eesa jaỹim da' sa 'te semachiiỹeta naua' l'aqtaqa ga' jaỹim dosétapegue', qana'chi ga'me 'ená'am qa'en da' jaỹim ỹaqá'a lé'ec, qataxa ga'me 'ená'am qasen da' ỹaqá'a lé'ec. 12Chan'eesa 'ami 'me 'uo da' 'adidíaxasoxoquii da' 'auacoñiiỹet na' nesetaxanaxatpi 'me chiỹoqo'ot so' lepaqal ñi' Dios, ỹátaqta 'aupaquiỹápegue' qomle da' 'auacoñiiỹet ga'me 'en nichíiseguem na' 'amaqténataxanaxaicpi.
13Chan'eesa ga' siỹaxaua 'me huet'asop da' dosiilo naua' ỹoda'alo n'aqtaqa, n'óota da' nachoxodenot ñi'me Dios da' qaidi ỹanem da' ỹ'axat ga' náaue naa'me 'eedaac. 14Qá'a da' se'n naua' n'aqtaqa ỹoda'alo da' ñitamen, qana'chi nedóchiiñi ñi' jaỹim ỹiuoxonaac ỹiquí'i da' netamen, qana'chi qaỹa 'te ga' jaláỹaxac da' ỹaatetonaxanaxac. 15Qana'chi naqaida da' séeta naỹi. Da' ỹivíta da' ñitamen, qaláxasa na'chiñi ñi' jaỹim ỹiuoxonaac ỹiquí'i da' netamen, qataxa da' ỹaatetonaxanaxac. Da' ỹivíta da' s'ónaxan, qaláxasa na'chiñi ñi' jaỹim ỹiuoxonaac ỹiquí'i da' d'ónaxan, qataxa da' ỹaatetonaxanaxac. 16Qá'a 'am da' 'uootaxa 'avi'ỹoxodéetac ñi' Dios, qana'chi jalñíta ñi' 'am ỹiuoxonaac 'adiquí'i di'ỹoxodenataxáatac, qana'chi da' naquiáxatac ga'me siỹaxaua 'me qaỹa 'te ga' ỹaỹátenaac, qana'chi sa 'te naỹí'uo ga' 'antamnaxac da' 'auaatapecot da' 'antónaxac ñi'me Dios, qá'a ga'me sa 'te ỹaỹáte'n naua' 'adosáxaco. 17Da'me 'antamnaxac 'eesa da' ỹiỹamqáchiiñi, qaláxasa ga'me 'adaqáỹa 'me sa 'te nichíiseguem qoỹin. 18Sanot da' ñitónaxac ñi'me Dios, qá'a jaỹim sañoxo't da' sosiilo naua' n'aqtaqa 'me ỹoda'alo, 'ami ñapactelóo'te. 19Qaláxasa da' souétaaue ga' lemáxac na' 'amaqténataxanaxaicpi, qana'chi sepacapégue' da' sacone'ualo gaua' cincolqa n'aqtaqa 'me qodemachiiỹeta, da' sapaxaguenque ga' ỹaqáỹa, qana'chi sa 'te 'ená'am ga' diez mil n'aqtacpi 'me ỹoxosá'a.
20'Ami ỹaqáỹa', 'ená'te 'auadénaxachii da' leenataxac ga' nootolec. Qaláxasa ga' sa ỹiỹamaxañi, qana'chi 'auadénaxachii ga' nootolec. Qaláxasa da' 'adeenataxaquii ỹátaqta 'auadénaxachii ga' siỹaxaua ỹ'axaic. 21'Enapega't naua' nedétrañi laqátaxaco ñi'me Dios, 'eet'oi: “Sosiilo naua' ỹoda'alo n'aqtaqa da' senapéga jen'me siỹaxadipi da' ñamaxaquéna na' ỹaqá'a lé'ecpi siỹaxadipi. Qaláxasa taqadíta sa 'te jaỹim ỹoqo'cha jen'me, 'enaac joca'li ñi' qadesaliaxanec Dios.” 22Chan'eesa naỹi naa'me n'aqtaqa 'me ỹoda'alo, jenaa'me l'anaqa qoỹi'n na' maliaxa da' sa 'te d'amaqténataxan, qana'chi sa 'te naqáina na' sóxote da' d'amaqténataxan. Qaláxasa da' qoỹ'axat da' l'aqtac ñi'me Dios, jeda'me l'anec qoỹin na' sóxote d'amaqténataxan, qana'chi sa 'te naqáina na' maliaxa sa 'te da' d'amaqténataxan. 23Chan'eesa da' ỹima na' 'amaqténataxanaxaicpi da' ỹivíta da' ỹima'a't, qana'chi da' ỹima dosiilo naua' ỹoda'alo n'aqtaqa, qana'chi 'uootaxa nenoxonáuo ga' qaỹa 'te ỹaỹátenaac, 'uootaxa ga' sa 'te da' d'amaqténataxan, qana'chi ¿qo'li sa 'te 'ami 'enapegalo da' 'uo da' 'an'ónataguiquii? 24Qaláxasa da' ỹima da' 'au'axáchiitac da' l'aqtac ñi'me Dios, qana'chi da' nenoxonáuo ga' sa 'te d'amaqténataxan, 'uootaxa ga' qaỹa 'te ỹaỹátenaac, qana'chi jega'me mai'chi nelola't qataxa ỹilá'a ga' lesamaxataxac, qá'a demachítapega ỹima da' 'au'axáchiitac. 25Qana'chi ỹima na' sa di'ỹaxa leenataxacpi 'me huétaỹi jan' liquidiaqte ỹima di'ỹoq. Ỹim, qaama'le ỹisocoto naua' liliictel ñi'me Dios da' ỹi'ỹoxoden, qataxa ỹ'axátetac da' 'eesa da' ñi' Dios ỹátaqta 'ami huetaavlo.
'Aviỹamaxachíitac ỹima da' ladic da' 'ademáxaquii
26Chan'eesa 'ami ỹaqáỹa', da' ỹivíta da' 'adimii'ỹa't, qana'chi da' 'uo ga' 'oonolec da' 'oñíita 'uo ga' lalac, 'uootaxa ga' laqáỹa 'uo ga' lapaxaguenataxanaxac, 'uootaxa 'uo ga' 'uo ga' laỹátenaxanaxac chiỹoqo'ot ñi'me Dios, 'uootaxa ga' laqáỹa dosiilo naua' n'aqtaqa ỹoda'alo, 'uootaxa 'uo ga' laqáỹa nesodíñi jenaa'me n'aqtaqa, já'a, qana'chi ỹima jen'me n'óota da' nichíiseguem qa'en na' 'amaqténataxanaxaicpi. 27Qomle huo'oi gaua' dosiilo naua' ỹoda'alo n'aqtaqa, qana'chi n'óota da' doosolqa. 'Uootaxa huosái'isa ga' 'oonolec qana'chi tres, qaláxasa 'oonolqat'ape da' qonaquiáxana. Qaláxasa 'uo ga' netaxaỹáxanaxanec. 28Qaláxasa da' qaỹa 'te netaxaỹáxanaxanec da' ỹ'axa't naua' n'aqtaqa, qana'chi n'óota da' qaỹa 'te dose. Jaldáta da' ñi' 'oonolec mai'chi nedó'te' ñi'me Dios. 29Qana'chi 'ená'am da' huo'oi gaua' ỹ'axa't naua' l'aqtaqa ñi'me Dios, qana'chi n'óota da' dosi' gaua' doosolqa 'uootaxa treesolqa. Qana'chi na' laỹi' mai'chi naloqte'n da' l'aqtaxanaxa'j gaa'me. 30Qaláxasa da' ñi'me Dios 'uo ga' ỹanem ga' laỹátenaxanaxac na' ñíchiiñi, qana'chi ga' 'uáichiiñi dose, qana'chi n'óota da' n'emáxañi, 31qaidi ỹima na' ỹ'axátet'ape naua' l'aqtaqa ñi'me Dios da' 'oñíita ñi' 'oonolec dose, qaidi ỹima 'uo ga' 'adaỹátenaxanaxaquii, qataxa 'uo da' 'ad'añaxaquii. 32Jen'me ỹ'axátet'ape naua' l'aqtaqa ñi'me Dios, jen'me n'óota da' netela'alo naua' letaxaỹaxaco, 33qá'a ñi'me Dios sa 'te da' sa naỹáteela't qa'en na' siỹaxadipi. Jaldáta da' n'emáxac.
Qá'a da' lasoxoc ỹima jen' netamnaxaquipi na' qadaỹi 'amaqténataxanaxaicpi 'enaac: 34Jen' ỹauodipi ỹátaqta 'ená'te da' dose da' huétaaue ga' nemáxac, qá'a da'me ỹátaqta sa 'te qoỹisiquiaxaná'a. Qana'chi n'óota taa'le jaga' ỹauo ỹalaq. Qá'a naua' nidii's laqátaxaco ñi' Dios ỹátaqta damaxasoxolégue jeda'me. 35Da' 'uo ga' sétaaque da' ỹaỹáten, qana'chi ỹinat ga' loua da' huét'a ga' l'acháqa', qá'a qonpecoxolégue jaga' ỹauo taa'le dose da' huáaue ga' nemáxac.
36'Ami 'aueenachíit'a da' sa 'te 'ami chiỹoqotoovlo da' l'aqtac ñi'me Dios, qataxa sa 'te da' na'chi'amíte' da' 'auacoñiiỹet da'me. 37Qomle 'uo ga' 'enapeela't da' Dios letaxaỹáxanaxanec, 'uootaxa 'enapeela't da' neta'nỹet so' lepaqal ñi'me Dios, qana'chi n'óota da' ỹaỹáteet'eguet da'me sidíñi da' jeda'me laqátaxac so' qadesaliaxanec Jesús. 38Qaláxasa da' sa 'te ỹoqo'cha dójo', qana'chi jega'me nataq'en sa 'te qoỹoqo'cha.
39Chan'eesa 'ami ỹaqáỹa', 'aupaquiỹápegue' qomle da' 'au'axáchii' naua' l'aqtaqa ñi' Dios, qana'chi 'ená'te taa'le sa 'auasiñiim da' qodosiilo naua' ỹoda'alo n'aqtaqa. 40Qaláxasa 'aviỹamaxachíichiiñi da' ladíquiaxac ỹima jen'me, qaidi qaỹa 'te ga' 'an'uenáguiquii.
Currently Selected:
1 Corintios 14: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.