1 Corintios 15
15
So' Cristo sóxote da' qonec'alaxadiséguem
1Naỹi 'ami ỹaqáỹa', sétaaque da' 'ami seenataxanaxanque da'me n'aqtac 'me nec'alaxaqui, 'me maliaxa 'oquiitalégue, qataxa 'ami s'axatema ca'li, qana'chi sa 'te 'axanỹíỹi. 2Da'me ỹa'uo da' 'ami qonec'alaxatréegue, qomle 'oquiitelégue jeda'me 'ami s'axatema, qataxa qomle sa 'te 'chi naỹóxoic da' 'adip'iỹáxaquii.
3Da' se'uáuaxachiiñi 'ami sapaxaguenque da'me nataq'en jaỹim qoỹanem, jeda'me 'enaac: So' Cristo ỹileelóo'te naua' qadoico, ỹipaquichiilo jenaa'me 'enapega't naua' nidii's l'aqtaqa ñi'me Dios. 4Nataq'en 'ami sapaxaguenque da' so' Cristo qoỹisiiñi, qana'chi ca'li ỹivid'alo saua' tres noloqo'te, qana'chi ỹitaxa qonec'alaxadiséguem, ỹipaquichiilo naa'me 'enapega't naua' nidii's l'aqtaqa ñi'me Dios. 5Ỹim, qana'chi so'me naloxoneguet so' Pedro, ỹim, qataxa naloxoneeta saua' lamaxa's laqáỹa'. 6Ỹim, qataxa naloxoneguet so' jalcote qadaỹi napacalégue ga' quinientos. Jalcote na' maliaxa nec'alétaiỹi jen'me, qataxa 'uo na' sóxote ỹileu. 7Ỹim, qataxa naloxoneguet so' Jacobo, ỹim qataxa ỹima so'me namaxa'spi laỹi.
8Ỹim, qataxa jaỹim ỹip'áxateegue da' jaỹim naloxoneguet jeso'me, temaqaidi da' sená'am ga' nootolec da' nesóliaxat 'me sa nalóiñi. 9Qá'a qaỹa 'te ga' ñisáaque, sa 'te sóvi' na' lamaxa'spi laỹi so' Jesús, qataxa sa 'te sapoteuó'o da' jaỹim qoỹanaỹi da' jaỹim lamaxasec so'me, qá'a sequétapiinỹi na' ỹ'amaqtéetac ñi'me Dios josii'chi. 10Qaláxasa da' ñi' Dios jaỹim noq'oỹá'ac, qana'chi ma'le séeta ga'me séeta. Da'me ñoq'oỹáguec sa 'te qaỹa ga'me chiỹaqaỹi. Qá'a jaỹim ỹágueegue da' ỹ'onataxanaxac, napacalégue ỹima na' namaxa'spi laỹi. Temaqaidi da'me sa 'te mai'chaỹim, jaldáta da' ñi'me Dios 'me jaỹim noq'oỹá'ac. 11Qana'chi temaqaidi da' 'uootaxa jaỹim ỹágueegue da' ỹ'onataxanaxac, 'uootaxa jen'me, qaláxasa naqaida da' qad'aqtaxanaxac, qataxa naqaida 'me 'au'amaqchíñiitac.
Qomle qonec'alaxadiséguem jen' napa'lpi
12Qaláxasa da'me qo'mi s'axátaqtapegueegue so' Cristo da' ma'le sóxote da' Dios nec'alaxadiséguem, qana'chi ¿tá'nooqo'chi 'uo da' 'oñíita na' 'éetapega da' sa 'te qonec'alaxadiséguem na' napa'lpi? 13Qá'a da' 'eesa da' sa 'te da' qonec'alaxadiséguem na' napa'lpi, qana'chi so' Cristo sa 'te táxa da' qonec'alaxadiséguem. 14Qataxa taa'le sa qonec'alaxadiséguem so' Cristo, qana'chi da' qad'aqtaxanaxac qaỹa 'te ga' náaue, qataxa da' 'adip'iỹáxaquii nataq'en qaỹa 'te ga' laso'vi. 15Da'me 'éeta dójo', qana'chi qo'mi 'ená'am taa'le 'chi soqovínaxanaqtac, qá'a s'axátaqtac ñi'me Dios nec'alaxadiséguem so' Cristo. Qá'a da' sa 'te 'eesa da' qonec'alaxadiséguem na' napa'lpi, qana'chi ñi' Dios sa 'en 'te nec'aliséguem táxa so' Cristo. 16Qá'a da' sa 'te qonec'alaxadiséguem na' napa'lpi, qana'chi so' Cristo sa 'te táxa da' nec'aliséguem qoỹin. 17Qataxa da' so' Cristo sa 'te da' nec'aliséguem qoỹin, qana'chi da' 'adip'iỹáxaquii qaỹa 'te ga' náaue. Qataxa maliaxa 'oquiitalóo'te naua' 'adoicódii'. 18Qataxa na' sóxote ỹiléeta'ñi' da' ỹ'amaqten so' Cristo, qana'chi ỹátaqta ỹima daqat. 19Qana'chi jeda'me qanchaalataxac 'me maliaxa huót'ai naỹi, da' jaldáta da' huétaaue da' qadasoxonataxanaxac so' Cristo, qana'chi ỹátaqta ỹágueegue da' qadachoxodec, sa senqá'am ỹima na' qadaỹi.
20Qaláxasa ỹátaqta 'eesa da' so' Cristo sóxote da' Dios nec'alaxadiséguem. Jeso'me 'me naqaiso so' le'uáuaxanec na' napa'lpi da' tát'a da' nataq'en qonec'alaxadiséguem. 21Qá'a dójo' neleuaxa chiỹoqóchiỹi josii'chi so' 'oonolec siỹaxaua, qataxa nataq'en chiỹoqóchiỹi so' siỹaxaua laqáỹa da' qonec'alaxadiséguem na' napa'lpi. 22Qá'a jeda'me 'éeta da' ỹima na' siỹaxadipi da' ỹileu, ỹasouaxat da' ỹoqotéta'uo so' Adán, qana'chi nataq'en táxa 'éeta da' ỹitaxa qonec'alaxadiséguem ỹima jen'me ỹasouaxat da' ỹoqotéta'uo so' Cristo. 23Qaláxasa ñi' 'oonolec ỹátaqta ga' mai'chi lalémaxaset ladíquiaxac. So' Cristo 'me 'uáiseguem da' qonec'alaxadiséguem. Ỹim, qana'chi jec na' lalémaxasetpi, qomle n'iỹílaq so'me. 24Qomle ỹivíta ga' loiquiaqa'éna, qana'chi so' Cristo noláxachiñi ỹima na' ỹodapecachi lañoqtaxanaxac na' 'oiquiaxaicpi net'alpi 'me sa 'te di'ỹaxa. Huá'a, qana'chi ỹanot da' l'onataxanaxac da' ỹilo'ogue ỹimata'a'téna jiñi'me 'me qantamnaxala' qataxa qadet'a. 25Qá'a so' Cristo qoỹin net'a, cha ỹivíd'a ga'me nolo' qomle ñi' Dios ỹapíaxanaxalégue ỹima na' lauteu'pi. 26Qana'chi ga'me p'áteegue nautéua 'me qonoláxachiñi, naqaiga ga' neleuaxa. 27Qá'a ñi' Dios ma'le ỹipataxalégue da' ỹima ỹilolquéna so' Cristo. Qaláxasa da'me 'enapega't naua' nidii's l'aqtaqa ñi'me Dios da' ỹimata'a'téna qoỹipataxalégue so'me, qana'chi ñi'me Dios sa 'te taa'le ỹalegóoue ỹimata'a'téna, qá'a jiñi'me naqaiñi ñi' chiỹoqóchiỹi da' ỹipataxalégue so'me ỹimata'a'téna. 28Qataxa qomle ỹivíta da' ma'le ỹim da' qoỹipataxalégue da' ỹimata'a'téna so' Cristo, qana'chi jeso'me 'me lec'óxot ñi' Dios nañanot ñi' let'a Dios, jiñi'me chiỹoqóchiỹi da' ỹipataxalégue so'me da' ỹilolquéna. Huá'a, qana'chi ñi' Dios ỹimata'a't da' ỹilolquéna.
29Da' lai laqáỹa ¿tá'nooqo'chi 'uo na' nañan da' nachilelégue ga' laqatac, da' qaỹa 'te ga' n'iỹílaxaseguem qa'en? ¿Tóoqo'chi ỹí'et dójo'? 'Chi jen' napa'lpi sa 'te da' ỹitaxa nec'aliséguem qoỹin, qana'chi ¿tóoqo'chi ñaatapeelégue jen'me da' qonachiláxan?
30Qataxa da' qo'mi ¿tá'nooqo'chi da' qo'mi huetalóo'te da' lichic ỹiméda naua' noloqo'te? 31Ỹátaqta 'eesa, 'ami ỹaqáỹa', da' ỹiméda naua' noloqo'te da' sasot'aguet da' neleuaxa, qana'chi ỹátaqta 'eesa dójo', 'ená'am da' ñitónaxac da' 'ami ñitóotapeeque, qá'a ma'le 'au'amaqchíñii so' qadesaliaxanec Jesucristo. 32Jaỹim 'ená'am da' ỹátaqta ñacó'ne' na' síiỹacpi ca'li souét'a na' Efeso, qaláxasa ¡qaỹa 'te ga' sachiỹoxotaỹi da'me! Da' 'uootaxa sa 'te da' 'eesa da' qonec'alaxadiséguem na' napa'lpi, qana'chi ỹátaqta 'eesasou da' n'aqtac 'me 'enaac: “Siqui'ỹaq qataxa ñiỹómaq, qá'a qomle ỹ'oxoñi, qana'chi qadeleu.”
33'Ená'te da' 'ami noqovíñii's qomle. 'Ená'am naale da' 'enaac di' n'aqtac: “Ga'me siỹaxaua qalhuaxaic n'áxat ga' 'ónaxaic jaloic ga' laqáỹa.” 34'Ami 'av'iỹílaqaiỹa qomle da' chaalataxac huosóta qataxa ỹataqtelégue, qataxa 'axañiidíñi naua' 'adoicódii', qá'a 'uo da' 'oñíita na' sona'li da' ỹaateton ñi'me Dios. Senaac da'me dójo', da' qaidi 'uo da' 'adepecóqoi.
Da' lasoxoc da' qomle nec'aliséguem na' napa'lpi
35Qaláxasa sa qoue na' denataxan da' 'enaac: “¿Jái'te 'éeta da' ỹitaxa qonec'alaxadiséguem na' napa'lpi? ¿Jái'te 'éeta jogamaxa ló'oquiaxac qomle?” 36Dójo' nenataxanaxac ỹátaqta nichiỹoxosóxoc. Qá'a da' 'uootaxa qoỹaañi jaga' peta, qana'chi jaso'me peta sa 'te da' nolel qomle maliaxa sa ỹileu. 37Jaga' qoỹaañi sa 'te naqaga jaga' lolelaxai. Jalsóta jaso' jala 'me qoỹaañi, da' trigo jala, 'uootaxa gamachaqaiga laqáỹa. 38Ỹim, qana'chi ñi'me Dios ỹanem da' lasoxoc jaso' lolelaxai, qataxa jan' 'oonole peta ỹipaquíchiỹi qa'en da' mai'chi lasoxoc. 39Sa 'te 'ena'a't ỹima da' nó'oquiaxac. Qá'a na' siỹaxaua 'uo da' mai'chi lalémaxaset ló'oquiaxac. Qana'chi 'ená'am na' ỹisidipi, 'uootaxa na' maỹo'pi, 'uootaxa na' noxop lé'ec. Jen'me ỹodapecachi na' ló'oquiaxac. 40Qana'chi 'éeta nataq'en 'uo da' mai'chi lasoxoc na' huet'ot na' piỹem, qataxa 'uo da' mai'chi lasoxoc na' huetalégue jen' 'aléua. Qaláxasa da' lodiac jen'me huet'ot di' piỹem sa 'te 'ená'am da' lodiac jen' 'aléua lé'ecpi. 41Da' l'edáxa jañi' c'atena sa 'ená'am da' l'edáxa so' 'auóxoic, qataxa nataq'en jan' huaqchiñipi. Qá'a jan' huaqchiñipi nataq'en sa 'te 'ena'a't da' l'edáxa. 42Qana'chi 'éeta nataq'en qomle qonec'alaxadiséguem na' napa'lpi. Ga'me qoỹisiiñi, qana'chi noláiñi, qaláxasa qomle qonec'alaxadiséguem, qana'chi sa 'te ỹileu. 43Ga'me qoỹisiiñi qaỹa 'te ga' lodiac, qaláxasa qomle qonec'alaxadiséguem, qana'chi ỹátaqta 'uo da' lodiac. Ga'me qoỹisiiñi qaỹa 'te ga' l'añaxac, qaláxasa qomle qonec'alaxadiséguem, qana'chi ỹátaqta 'uo da' lañoqtaxanaxac. 44Ga' qoỹisiiñi, di'ỹoqóta da' napat, qaláxasa qomle qonec'alaxadiséguem, qana'chi 'uo da' ló'oquiaxac sa di'ỹaxa. Qá'a da' 'uo ga' ỹ'oqóchiỹi nó'oquiaxac, qana'chi nataq'en 'uo ga' nó'oquiaxac 'me sa di'ỹoq.
45Chan'eesa 'enapega't naua' nidii's l'aqtaqa ñi' Dios: “So' 'uáichiiñi siỹaxaua, lenaxat Adán, joca'li qoỹí'et, qana'chi qoỹanem da' ỹátaqta nec'alétaiỹi qoỹin;” qaláxasa so' Cristo jeso'me p'áteegue Adán, naqaiso so'me sa di'ỹoq 'me dec'alaqtaxanaac. 46Qaláxasa da'me sa di'ỹoq sa naqaida 'me 'uáiñi. Na'chidáta da' ỹ'oqóchiỹi napáchiỹaxac. Qana'chi niỹaqa'aguet jeda'me sa di'ỹoq. 47So' 'uáichiiñi siỹaxaua chiỹaqaỹi qoỹin jen' 'aléua, qana'chi jeso'me 'aléua lé'ec. Qaláxasa so' niỹaqa'aguet siỹaxaua 'me qadesaliaxanec, jeso'me chiỹoxogue da' piỹem. 48Da' ló'oquiaxac na' siỹaxadipi, 'ená'am so' 'uáichiiñi siỹaxaua 'me 'aléua lé'ec. Qaláxasa da'me nó'oquiaxac 'me piỹem lé'ec, da'me 'ená'am so'me chiỹoxogue da' piỹem. 49Qana'chi naq'áita naỹi qo'mi sanaqátañi da' ló'oquiaxac so'me 'aléua lé'ec, qana'chi 'éeta nataq'en ga' nolo' qomle sanaxañi da' ló'oquiaxac jeso'me piỹem lé'ec.
50'Ami ỹaqáỹa', da' sétaaque 'ami s'axatema 'eet'oi: Da'me ỹ'oqóchiỹi qadapáchiỹaxac da'me sa ỹañoxot da' ỹinoxoneuó'o ga' maliaxa nátauo l'onataxanaxac ñi'me Dios. Qá'a jega'me 'uo ga' loiquiaqa', qana'chi sa nalo'oguet ga'me qaỹa 'te loiquiaqa'. 51Qaláxasa sétaaque da' 'auaỹáchiñii da'me sa di'ỹoq da' sa ỹima da' qadeleu, qaláxasa ỹima qomle da' qo'mi qoỹiléemaxa't. 52Qaláxasa ỹátaqta nepeláxateta qomle dójo', 'ená'am da' 'chi naqatégoxoñi ga' siỹaxaua, qomle qodemachíỹa jaga' p'áteegue naseedáxanaxac. Qomle qodaseedaxalquéna, qana'chi jen' napa'lpi qonec'alaxadiséguem. Huá'a, qana'chi sa ỹitaxa taa'le ỹileu. Qataxa qo'mi qoỹiléemaxa't qomle. 53Qá'a da'me qadó'oquiaxac 'me 'uo di' loiquiaqa', jeda'me ỹiuen da' qoỹin ỹaañi ga'me qaỹa 'te loiquiaqa'. Qana'chi jeda'me qadó'oquiaxac 'me sa qaloc, qana'chi ỹiuen qoỹin ỹaañi da' sa qaloquéta. 54Qana'chi qomle ỹaañi qoỹin da' qaỹa 'te loiquiaqa' na' qadó'oc 'me 'uo di' loiquiaqa', qataxa da'me qadó'oquiaxac 'me sa qaloc, qomle ma'le qoỹanaxanaxanỹi ga'me sa 'te loquéta, qana'chi ỹipaquichiilo naua' 'enapega't naua' nidii's l'aqtaqa ñi' Dios 'eet'oi: “Da' neleuaxa ma'le sóxote qonaqachiñi qoỹoláxachiỹi. 55'Am neleuaxa, ¿'te hua'ague ga'me 'adoiquiaxac da'me qo'mi 'au'quemaqtet'ape? 'Am neleuaxa, ¿'te hua'ague ga'me 'auenapéga 'adep'adégaxanaxac da' 'aumataxan?” 56Da'me ỹachiỹoxotapíỹi da' lañoqtaxanaxac da' neleuaxa da' qo'mi ỹi'quemaqte't, naqaida da' n'etaxalóxo. Qana'chi na' laqátaxacpi ñi'me Dios, naqaida 'me nichíỹaxateegue da' lañoqtaxanaxac da'me n'etaxalóxo. 57Qaláxasa ỹátaqta jalcote da' qantónaxac ñi'me Dios da' qo'mi ỹanema da' semataxanaq, chiỹoqóchiỹi qa'en so' qadesaliaxanec Jesucristo.
58Chan'eesa 'ami ñauotaxa'u ỹaqáỹa', qaỹo' qomle ga' 'aupaquiỹáaque, 'oquiit'ot da' 'av'íchiitac da' l'onataxanaxac so' qadesaliaxanec. Qá'a 'ami 'auaỹáchiñiita da'me 'ad'onataxanaxaquii da' 'au'onataxañiitapecot jeso'me, ỹátaqta sa ỹisamaxáỹi.
Currently Selected:
1 Corintios 15: PLGNT93
Highlight
Share
Compare
Copy
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.