1 Corintios 16
16
Qoỹa'uo jaga' netauánaqte na' 'amaqténataxanaxaicpi 'me l'acháqa' di' Jerusalén
1Qomle 'auauóỹaaque jaga' netauánaqte na' qadaỹi 'amaqténataxanaxaicpi Jerusalén lé'ecpi, qá'a jaỹim 'aunachíitapeec, qaláxasa 'av'íchii da'me sapaxaguenec na' 'amaqténataxanaxaicpi 'me néta'ña di' 'aléua, lenaxat Galacia. 2Da' ỹivíta di' nolo' 'me le'uáuaxanec naua' noloqo'te, qana'chi ñi' 'oonolec da' 'oñíita ỹa'uo jaga' laỹoñiise. Ỹátaqta jaga' 'uo, qana'chi ỹiỹamaxat, qaidi qomle 'ami sivitalo, qana'chi sa 'te ỹáloxosa da' 'auauóitaaque jaga' 'adetauánaxanaqchii. 3Qana'chi qomle 'ami sivitalo, qana'chi sedénaqteneelo jaga' ỹidíise gaa'me siỹaxa'u 'me 'auacoñii'ualo da' samaxasoxotegue di' Jerusalén, da' qaidi ỹidóta di' qadaỹi jaga' 'adetauánaxanaqchii. 4Qataxa da' jaỹim qoỹipacapégue' da' sec, qana'chi ñáicapee'to qomle gaa'me.
So' Pablo ỹaqátaxañi da' ladíquiaxac
5Da' ỹadíquiaxac sétaaque da' se'uáuaxañi saỹalégue di' 'aléua, lenaxat Macedonia. Qomle ỹim, qana'chi sec'áta di' Corinto. 6'Uootaxa cadá'ac da' 'ami sonaavlo, 'uootaxa da' ỹinoxóteegue na' naqaviaxa da' 'ami souetaavlo, qana'chi da' ỹim, qaama'le séetapega ma'le jaỹim 'alcochíiỹa da' ỹadíquiaxac ga'me saiỹi. 7Qá'a jaỹim sa siỹamaxaden da' 'chi 'ami ỹadicalóo'te. Na'chidáta da' sétaaque da' huo'oi gaua' noloqo'te da' 'ami souetaavlo, qomle qaỹa 'te 'uo qa'en da' ỹadíquiaxac so' qadesaliaxanec. 8Qaláxasa sétaaque da' soná'ña qomle di' Efeso, sivid'aguet ga' nolo' Pentecostés, 9qá'a di'me ỹátaqta jaỹim ỹ'ouateguet da' s'onataxan, da' qaidi jalcote na' ỹ'amaqten so' qadesaliaxanec. Temaqaidi da' jalcote na' nautéetac.
10Qomle 'ami nivitalo ga' Timoteo, ỹátaqta 'aupaquiỹápegue' da' 'auañiim da' lamaic, qaidi qaỹa 'te gamachaqaiga. Qá'a so'me ỹ'étetac da' l'onataxanaxac so' qadesaliaxanec, 'ená'am jaỹim. 11Chan'eesa qaỹo' ga' 'uootaxa 'oonolec da' 'oñíita da' ỹ'alóxon jeso'me. Jaldáta da' 'alcochíiỹa da' ladíquiaxac, qaidi qaỹa 'te 'uo. Qá'a seuatétaaque ga'me nataq'en gaua' liquiáxa'u laqáỹa', da' qaidi ñauaa'to.
12So' qadaqáỹa Apolos ỹátaqta jalcote da' ñachoxodéetapecot da' maliaxa coovlo saua' qadaqáỹa' da' 'ami nauaa'to, qaláxasa maliaxa sa jec naỹi. Qaláxasa mai'chi jec qomle 'uo ga' ledáqa'.
Da' p'áteegue lip'iỹénataxanaxac so' Pablo
13Ỹátaqta 'anlóitaiỹi, qataxa 'an'añaxachíỹic da' 'adip'iỹáxaquii. 'Auadénaxachii ga' ỹátaqta d'anỹi lauel siỹaxaua qataxa 'anp'adíquii. 14Ỹima na' 'auacoñiilégue da' 'av'íchii, qana'chi ỹátaqta 'ansóxodiñiichiỹi.
15Naỹi 'ami ỹaqáỹa' 'me 'ad'acháqadii na' 'aléua Acaya, sóxote da' 'auaỹáchiñiita na' lec'óqo'tepi na' Estéfanas naqáina 'me 'uaueguet da' 'ad'amaqténataxanaxaquii, qataxa jen'me ỹátaqta nañaneguet da' lecochiỹa na' qadaỹi 'amaqténataxanaxaicpi. 16Chan'eesa sétaaque da' 'ami nataq'en 'auqochíiỹa ga' siỹaxaua 'ená'am jen'me qataxa ỹima na' tauánaxanaxaic qataxa d'onataxáatac. 17Ỹátaqta 'uo da' ỹamaic da' nivíded'a na' sonéta'ña na' Estéfanas, qataxa na' Fortunato, qataxa na' Acaico, qá'a jenaa'me ỹañoxo't da' ỹ'e't da'me sa 'te 'auañoxochii, qá'a qo'mi sa qoỹoqo'tachi. 18Naa'me ỹátaqta ỹ'e't da' huosóchiỹi qa'e'n da' ỹ'óiỹaxac, qataxa nataq'en da' 'oñíita. Ỹátaqta 'adichilíiỹa qomle ga' siỹaxaua 'ena'ama naa'me.
19Na' 'amaqténataxanaxaicpi 'me néta'ña na' 'aléua Asia, 'ami ỹamaxalo da' lip'iỹénataxanaxac. Ñi' Aquila qataxa jañi' loua Priscila qataxa na' 'amaqténataxanaxaicpi 'me lemáqa' di' l'acháqa', jen'me ỹátaqta jalcote da' lip'iỹénataxanaxac 'ami ỹamaxalo, qá'a 'ami l'amaqténataxanaxa'u. 20'Ami ỹamaxalo da' lip'iỹénataxanaxac ỹima na' qadaỹi. Ỹátaqta nec'ouóxoi' qomle ñi' 'oonolec da' nip'iỹí'ne' ga' laqáỹa, ỹátaqta 'anchoxodiñiỹa't.
21Jaỹim Pablo 'ami samaxalo da' ỹip'iỹénataxanaxac, mai'chi ỹátaqta da' sidíñi.
22Da' 'uo ga' sa noqopita so' qadesaliaxanec Jesucristo, qana'chi jega'me huetalégue da' let'ádaic ne'uaxánaguec. ¡'Am qadesaliaxanec, sa 'aniỹáloxoden qomle da' 'an'iỹílaq!
23So' qadesaliaxanec 'ami ỹanema qomle ga' 'ónaxaic 'adadíquiaxaquii. 24Ỹima da' 'oñíita 'ami samaxalo da' ỹoqopi'chi 'me chiỹoqo'ot so' Cristo Jesús. Já'a, na'chi naq'áita dójo'.
Currently Selected:
1 Corintios 16: PLGNT93
Highlight
Copy
Compare
Share
Want to have your highlights saved across all your devices? Sign up or sign in
Nuevo Testamento Pilagá © Sociedades Bíblicas Unidas, 1993.